Amǝ Ibǝru 7 - Maləmce Məfele mala Ɓakuli: Kurcau Məbəshe

Melkizedek ka Pǝris na

¹ Ɓwa mǝnia yì Melkizedek ka, murǝm mala nggeala Salem na, sǝ ɗǝm ngga, yì nda Pǝris mala Ɓakuli mana karban kat ka. Anzǝm mǝnana Ibǝrayim linamurǝm a lwa amur amurǝma, sǝ nda aban nyare ka, à yì je andǝi, pǝlǝa tsǝki Ibǝrayim bu.

² Ibǝrayim twal mwashat-aɓa-lum mala koya gir mǝnana kumo aban lwa ka, sǝ pe Melkizedek. Lullǝu mǝnia ama Melkizedek ka, ɓālǝi nda “murǝm ɓealɓoarna”; sǝ ɗǝm ngga, yì nda “murǝm mala Salem”, sǝ murǝm Salem ngga ɓālǝi nda “murǝm dorǝpwala.”

³ Yì Melkizedek ka, Malǝmce lǝmndǝa ko yan nda tarrí ko ngge, ko a ya tau sǝ pùr ɗang. Sǝ à gilǝ kǝ gìr amur ɓǝlban andǝ masǝlǝata do yilǝmu male ɗang. Yì ka, nda kǝla Muna mala Ɓakuli, mǝnana do-pǝris male ka masǝlǝate pà kàm raka.

⁴ Wu sǝn ulang gulo mala mǝnia yì ɓwa mǝnana kà-sǝm Ibǝrayim pe wi mwashat-aɓa-lum mala agir mǝnana pwan a kun munǝo ka.

⁵ Nggurcau mala Musa ka, bangŋa ama, amǝ kau mala Lawi mǝnana à ak turo pǝris ka, ɓǝa ak mwashat-aɓa-lum, a bu acilia amǝ Isǝrayila, yia amǝ'eambǝia. Yia apǝris ka, à nǝ̀ ak mǝno ka, kat andǝ amani ama yia andǝ acilia amǝ Isǝrayila gbal ka, amǝ kau mala Ibǝrayim na ka.

⁶ Sǝ Melkizedek, mǝnana pà a tau mala Lawi raka, ak mwashat-aɓa-lum a bu Ibǝrayim. Sǝ pǝlǝa tsǝki Ibǝrayim bu, yì ɓwa mǝnana Ɓakuli ak dǝmbǝa pà acau male abani ka.

⁷ Makgir pà kàm a rǝì ɗang ama ɓwa mǝnana nǝ gulo ka, nda nǝ̀ tsǝki ɓwa mǝkyauwe bu ka.

⁸ Apǝris mǝnana a tau mala Lawi, mǝnana à akiyi mwashat-aɓa-lum ngga, aɓwapǝndǝa na mǝnana à kǝ wu ka; sǝ mala Melkizedek mǝnana ak mwashat-aɓa-lum a bu Ibǝrayim ngga, à bangŋǝna ama yì ka, ndakam nǝ yilǝmu.

⁹ Sǝm nǝ̀ gandǝ bangŋa ama Lawi mǝnana akiyi mwashat-aɓa-lum a bu aɓwana ka, pà mwashat-aɓa-lum aban Melkizedek nǝ bu Ibǝrayim.

¹⁰ Ko kat andǝ amani ama, anggo ka, a malaká ɓǝlì yì Lawi raka, nggearǝ tau mǝnana Lawi yi pur kam ngga, nda aɓa nkila mala Ibǝrayim, a baki mǝno Melkizedek akiyi kǝ mwashat-aɓa-lum a bu Ibǝrayim ngga.

Yesu ka, nda kǝla Melkizedek

¹¹ Ɓakuli ka pani amǝ Isǝrayila Nggurcau ama dobuno-pǝris ka nǝ̀ pur a tau mala Lawi. Sǝ aturo-pǝris mala mǝno yì tau mala Lawi ka, yinǝ aɓwana, à kum lumsǝo kǝla mǝnana Ɓakuli earkiyi ce ka ɗang. Nda gir mǝnana tsǝa sǝ Ɓakuli loasǝ ɓe pǝris, a njari mala Melkizedek, sǝ pà a njari mala Lawi andǝ Haruna raka.

¹² Sǝ ɓǝà nggaɗi dobuno-pǝris ka, dumǝna pup gbal ama à nǝ̀ nggaɗi nggurcau nì.

¹³ Yì pǝris mǝnana à nakiyi mǝnia yì acau amuri ka, pur a ɓe tau ɗàng, mǝnana kǝɓwa pà kàm a mǝno yì tau male mana kutio aban pak turo mala pǝris amur gyangŋan àkǝ̀ pwari ka ɗang.

¹⁴ Puro mala Mǝtala sǝm a tau mala Yahuda ka, gbara arǝ kǝgir ɗang. Sǝ Musa ka, kǝ cau pur a kuni ama tau mala Yahuda ka, apǝris nǝ̀ pur kam ɗang.

¹⁵ Gir mǝnana yi pusǝ ceì kam bwāng ngga nda yiu mala ɓe bǝsa pǝris, mǝnana nda kǝla Melkizedek ka.

¹⁶ Yesu ka duk pǝris, sǝ pà acemǝnana yì ka, lumsǝ kun gir mǝnana nggurcau mala Ɓakuli earkiyi ce amur ɓǝlban a tau mala Lawi ka ɗang. Yi duk pǝris nǝ rǝcandǝa mala yilǝmu mǝnana à pà nǝ̀ gandǝ kiɗiki raka.

¹⁷ Malǝmce bangŋa amuri ama: “We ka, a nda pǝris masǝlǝate pà kàm ɗang, aɓa njar mǝ'mwashati kǝla mǝnana Melkizedek ka pǝris na ka.”

¹⁸ Nzongcau mala dobuno-pǝris mǝ'e ka, à nyesǝni a giriban, acemǝnana pà nǝ́ rǝcandǝa ɗang, sǝ gandǝ pak gir mǝnana ɓoaro ɓǝ̀ pak ka ɗang.

¹⁹ Nggurcau mǝnana Ɓakuli pa nǝ bu Musa ka, gandǝ tsǝk kǝgir ɓǝ̀ lumsǝo kǝla mǝnana Ɓakuli earkiyice ka ɗang. Sǝ adyan ngga, à yina nǝ́ bǝsa tsǝkɓalǝu mǝnana ɓoaribanì, nǝ̀ nun sǝm aban Ɓakuli tù ka.

²⁰ Dobuno-pǝris mala Kǝrǝsti ka, Ɓakuli kwaki te nǝ kángir! Sǝ dobuno-pǝris mala acili aɓwana a tau mala Haruna ka, kana pa a rǝì ɗang.

²¹ Sǝ mala Yesu ka, duk pǝris nǝ kángir mǝnana Ɓakuli kánna aɓa cau male mǝnana ne wi ama: “Mǝtalabangŋo kánnǝna, sǝ pà nǝ̀ nyar nǝ te ɗǝm ɗang ama, ‘A nda pǝris mana do mo kǝla pǝris pà nǝ̀ mal raka.’ ”

²² Ace mǝnia yì kánna ka, Yesu dumǝna ɓwa mǝnana nǝ̀ cam a kusǝ mǝnia yì bǝsa kurcau, mǝnana ɓoari mǝ'e ka, ace mana ɓǝ̀ yi lumsǝo.

²³ Apǝris mǝnana aɓata mǝno yì dobuno-pǝris mǝ'e ka, à yì duk pas, acemǝnana ko yan atea ka, lú tamsǝì arǝ lidǝmbǝa nǝ turo mala pǝris.

²⁴ Sǝ acemǝnana Yesu ka, lú gandǝ tamsǝe raka, dobuno-pǝris male ka, masǝlǝate pà kàm ɗang.

²⁵ Ace mani ka, nǝ̀ gandǝ amsǝ aɓwana mǝnana à yiu aban Ɓakuli nǝ bani ka, a koya njari, acemǝnana ko aya pwari ka ndakam nǝ yilǝmu ace zǝmbǝa acea.

²⁶ Ulang mǝnia yì Pǝris Mǝgule, yì Yesu ka, nda sǝm earkiyice ka. Acemǝnana yì ka, ɓwa mǝfele na, panǝ cau a rǝì ɗang, kǝ pak cauɓikea ɗang, sǝ yì ka, Ɓakuli tarrì ci ɗàng nǝ amǝ'cauɓikea. Adyan ngga, Ɓakuli pani wi gulo amur agir kat a kuli.

²⁷ Yì ka, pà kǝla acili apǝris mǝgule mǝnana à camarǝ paki agir-nkila pwari-pwari ace acauɓikea malea ata dǝmbǝa, sǝ mala acili aɓwana ka ɗang. Yì ka, pà gir'nkila kusǝ mwashat ɓǝrɓǝr ace acauɓikea malea, yì mǝnana yi pa ɓamuri ka.

²⁸ Nggurcau mala Musa kǝ twal aɓwapǝndǝa aɓa gatti malea, ɓǝa duk apǝris mǝgule. Sǝa ma anzǝm mǝnana à pana Nggurcau mala Musa ka, Ɓakuli yi twal Muni nǝ́ kánna ɓǝ̀ yì duk Pǝris Mǝgule, mǝnana lumsǝna aɓalǝ agir kat mana Ɓakuli earkiyi ce ɓǝ̀ duk ka, málá male pà kàm ɗang.