Amǝ Ibǝru 2 - Maləmce Məfele mala Ɓakuli: Kurcau Məbəshe

Nunkiru ace tsǝkiru arǝ amsǝban mǝnana Ɓakuli yina sǝm ngga

¹ Ace mani ka, sǝm nǝ̀ tsǝk kir sǝm pépè arǝ cau mǝnana sǝm ok ka, ace mǝnana ɓǝ̀ sǝm ngga kyanggi wi ɗàng.

² Ɓǝ̀ cau mǝnana amǝturonjar ne ka, kum came kàngkàng, sǝ koya yàl nzongcau andǝ mgbicau ka, à kum tangnakusǝu mǝnana karǝ a rǝia ka,

³ lang sǝ sǝm nǝ̀ auwa, yi mǝnana ɓǝ̀ sǝm burice mǝnia yì amsǝban mǝgule ka? Mǝtalabangŋo bang ce a nggea dǝmbe, sǝ aɓwana mǝnana a oe nǝ kiria ka, à na sǝm ama, kǝ nda anggo.

⁴ Ɓakuli gbal ka, pu nzǝm cau malea nǝ agir-lǝmndǝa, andǝ agir-gyambǝliban, andǝ agir-ndǝlǝki ɗàngɗáng, andǝ aɓoro mala Bangŋo Mǝfele mǝnana gakia kǝla mana bumi kani wi ka.

Yesu nda tǝr amsǝban

⁵ Ɓanza mǝno kǝ yiu sǝm nakiyi ce ka, Ɓakuli nyi a ɓabu amǝturonjar ɗang.

⁶ Malǝmce bangŋa a ɓe ban ama: “Yana nda ɓwamǝpǝnde mǝnana, We Ɓakuli, a kǝ ɗenyi nǝi ka, ko muna ɓwapǝndǝa mǝnana a kǝ tsǝkiri ka?

⁷ A cî gatti amǝturonjar bǝti; a pǝti muri nǝ ɓoarɓwa andǝ gulo,

⁸ a cî do amur koya gir a pê ka.” Aɓa tsǝa mǝnana Ɓakuli tsǝk ɓwapǝndǝa ɓǝ̀ do amur agir kat ka, lǝmndǝ ama kǝgir pà kàm mǝnana pà a ɓate raka ɗang. Sǝ ado mǝno ka, sǝm malaká sǝn ko man kat aɓata rǝcandǝa mala ɓwapǝndǝa ɗang.

⁹ Gir mǝnana sǝm sǝni ka nda Yesu mǝnana à cì gatti amǝturonjar bǝti, ace mǝnana nǝ ɓwamuru mala Ɓakuli ka, ɓǝ̀ wú ace ko yan ngga. Sǝ adyan ngga, sǝm sǝni ka à pǝtina muri nǝ ɓoarɓwa andǝ gulo, acemǝnana nu tanni wu ace aɓwana ka.

¹⁰ Ɓakuli ka nda mǝnana pusǝ agir kat ka. Sǝ agir kat ka àkǝ̀ ce ɓoarɓwa male sǝ à pa. Yi sǝni ka nda a njari ɓǝ̀ yinǝ amuna male mǝnana à nda pas ka, ɓǝa kum kāmbe aɓa ɓoarɓwa male. Pǝlǝa tsǝk Yesu, yì ɓwamǝgule malea, ɓǝ̀ kum lumsǝo aɓalǝ agir kat kǝla mǝnana Ɓakuli earkiyice ka nǝ njar mala nu tanni, ace mǝnana ɓǝ̀ duk ɓwa mǝnana karǝna nǝ̀ yinǝia aɓa amsǝban malea ka.

¹¹ Sǝ ado ka, Yesu andǝ aɓwana mǝnana kǝ táría ɓǝa duk mala Ɓakuli ka, Tárria mwashat. Nda gir mǝnana tsǝa sǝ kǝsǝkya pakki Yesu arǝ tunǝia ama, amǝ'eambǝi raka.

¹² Yì ka, ne Ɓakuli ama, “Mǝ nǝ hamnǝ lullǝo aban amǝ'eambǝam; mǝ nǝ ɓwangsǝo aɓalǝ aɓwana mo mǝnana à ram ngga.”

¹³ Na ɗǝm ama, “Mǝ nǝ guli a rǝì.” Sǝ nyare na ɗǝm ama, “Mǝ ndya sǝnǝ amuna mǝnana Ɓakuli pam ngga.”

¹⁴ Sǝ acemǝnana amuna mala Ɓakuli ka, à pea nǝ nkila andǝ nyama ka, Yesu gbal ka duk nkila andǝ nyama, do kǝla yia aɓwapǝndǝa. Nǝ́ lú male sǝ gandǝ kiɗiki rǝcandǝa mala mǝɓealɓikea mǝnana bwal rǝcandǝa mala lú ka.

¹⁵ Anggo sǝ panzǝ aɓwana mǝnana à do malea kat ka, à nda ka aguro aɓata ɓangciu mala lú ka.

¹⁶ Aɓa mǝsǝcau ka, amǝturonjar na Yesu falǝnia nǝ̀ bwalia wia kam ngga ɗang. Yiu male ka, nda ace bwalia amǝkau mala Ibǝrayim.

¹⁷ Ace mani ka, dumǝni wi ama she nǝ̀ nyesǝ ɓamuri kǝla amǝ'eambǝi a koya njargula, ace mǝnana ɓǝ̀ duk Pǝris Mǝgule mǝnana ndanǝ mǝsǝswatǝr aban aɓwana, à nǝ̀ earnǝi aɓa turo male aban Ɓakuli ka. Anggo ka sǝ́ nǝ̀ pa gir'nkila ace twalban cauɓikea mala aɓwana mala Ɓakuli.

¹⁸ Sǝ acemǝnana yì nǝ nggearǝì ka, kutina aɓa tanni andǝ karǝkiban ngga, nǝ̀ gandǝ bwali aɓwana mǝnana à kutio aɓa karǝkiban ngga.