Amǝ Ibǝru 13 - Maləmce Məfele mala Ɓakuli: Kurcau Məbəshe

Masǝlǝata kwarkiru

¹ Wu lidǝmbǝa nǝ lǝmndǝia rǝ wun earcearǝu kǝla amǝ'eamrǝarǝu.

² Wu kǝa aulǝ nǝ ak abǝri ɗang. Acemǝnana anggo sǝ aɓea aɓwana mǝnana à kǝ ak abǝri ka, à kumo à ak amǝturonjar a ɓala malea, sǝ à sǝlǝ ɗang.

³ Wu ɗenyi nǝ aɓwana mǝnana à nda a ndàkurban ngga, kǝla wu ndakam atea, sǝ aɓwana mǝnana à ɓinǝ mǝsǝia, à kǝ pakkia wia mǝɓane ka, wu ɗenyi nǝia kǝla gir nî ka nda rǝ wun.

⁴ Ɓǝa aɓwana kat gusǝlǝ doɓala, sǝ wu dum nǝ mǝsǝcau a rǝarǝ wun aɓa doɓala, acemǝnana Ɓakuli nǝ pakki amǝ'nshawari ɓashi andǝ amǝ'nonggi nǝ aɓwana mana à pa doɓala andǝia raka.

⁵ Wu kǝa dum nǝ ɓealǝu mala rufi ata boalo ɗang. Agir mǝnana wu ndanǝia ka, ɓǝa ɗǝmsǝ wun. Acemǝnana Ɓakuli bangŋǝna ama, “Pà mǝ nǝ ɗekio ɗang; pà mǝ nǝ nying buam a rǝo ɗang.”

⁶ Anggo ka, sǝ sǝm nǝ̀ na nǝ mǝsǝkang-kangŋa ama, “Mǝtalabangŋo nda gbasha mem; ɓangciu pà nǝ̀ pakkam ɗang. Mana gir nì na ɓwa nǝ̀ gandǝ pakkam?”

⁷ Wu ɗenyi nǝ aɓwana-mǝgule ma'wun mǝnana à kania wun cau mala Ɓakuli ka. Wu ɗenyi nǝ agir mǝɓoarne mǝnana à pur aɓa do malea ka, sǝ wu twal kusǝ kǝ paɓamuru malea.

⁸ Yesu Kǝrǝsti kǝ nggaɗi ɗang; kǝ mǝ'mwashati na yilung, andǝ yalung, sǝ málá male pà kàm ɗang.

⁹ Ɓǝa kǝa ɓosǝki wun nǝ ambalang abǝri kanigir ɗang. Ndanǝ ɓoaro ɓǝ̀ rǝcandǝa mala ɓabum wun yiu nǝ ban ɓwamuru mala Ɓakuli, ɓǝ̀ kǝa yiu nǝ ban kpata anzongcau mala liki agirlina ɗang; aɓwana mǝnana à kǝ kpata amǝnia yì anzongcau ka, à kǝ kum kǝgir aɓalǝi ɗang.

¹⁰ Sǝm ndanǝ gir'nkila amur gyangŋan, mǝnana apǝris mana à pakkiyi turo aɓa Taragula kani a ɓanza ka, à earia wia ɓǝa li kam raka.

¹¹ Aɓa pakkiagir aɓata kurcau mǝ'e ka, Pǝris Mǝgule nǝ̀ yinǝ nkila mala agirkusǝu aɓa Ban Nggea Mǝfele, mǝnana à nǝ̀ pànà ɓoro nǝi kǝla gir'nkila ace twalban cauɓikea ka, sǝ nyamia ka à nǝ̀ ngga pisǝì anzǝm agumli.

¹² Kǝla mǝno gbal ka Yesu tanni anzǝm nggeala, ace mǝnana ɓǝ̀ tàr aɓwana male ace Ɓakuli nǝ nkile.

¹³ Ace mani ka, ɓǝ̀ sǝm puro abani anzǝm agumli, ace mǝnana ɓǝ̀ sǝm kya twal mǝno yì gir kǝsǝkya mǝnana yiu amuri ka.

¹⁴ Aɓa mǝnia yì ɓanza ka, sǝm pànǝ nggeala mǝnana pà nǝ̀ mal raka ɗang, sǝm nda ban kundǝ nggeala mǝnana kǝ yiu ka.

¹⁵ Ɓǝ̀ sǝm lidǝmbǝa nǝ pê Ɓakuli ɓoro mala ɓwangsǝkiban nǝban Yesu, nǝ acau mǝnana à nǝ̀ lǝmndǝ bwāng ama sǝm ndaka amale ka.

¹⁶ Ɓǝ̀ ɓalǝ wun ɓǝ̀ kǝa lorǝ ce pak mǝɓoarne, andǝ gau gir mǝnana wu ndanǝi ka wunǝ aɓwana ɗang, acemǝnana nǝ ulang amǝno yì aɓoro ka sǝ bum Ɓakuli kǝ pwasǝo.

¹⁷ Wu oki aɓwana mǝnana a múr wun ngga, wu pà ɓamur rǝ wun a ɓatea. Acemǝnana à ndaka amǝyal wun, sǝ à ndaka aɓwana mǝnana Ɓakuli nǝ̀ ngga ɗia amur mǝnia yì turo pea wia ka. Ace mani ka, wu cia ɓǝa pak ture nǝ bumpwasǝa, pà aɓa bumkiɗikea ɗang. Ɓǝ̀ ana raka, pà nǝ̀ ɓoara wun ɗang.

¹⁸ Wu pak hiwi ace sǝm. A ɓabum sǝm ngga sǝm sǝlǝ ama gir mǝnana sǝm pakki ka, nda pepe, sǝ sǝm nggǝ earce dukdo pak mǝɓoarne a koya pwari.

¹⁹ Ən nggǝ pà zǝmbǝa mem aban wun nǝ ɓuakiarǝu mǝcande ama wu pak hiwi ɓǝ̀ Ɓakuli tsǝa mǝ nyar ɗǝm tu aban wun.

^20-21 Ɓǝ̀ Ɓakuli mala dorǝpwala, mǝnana loasǝ Mǝtala sǝm Yesu, a ɓembe ka, pà wun koya gir mǝɓoarne mǝnana ɓoaro ɓǝ̀ wu pang nǝi ace pak kani male ka. Ɓǝ̀ pakturo male aɓalǝ wun, nǝ rǝcandǝa mala Yesu Kǝrǝsti, ace pwasǝ bumi. Yesu ka nda nggea yalgir mǝgule mala anzur, mǝnana nǝ nkile sǝ Ɓakuli tita kurcau male mǝnana pè nǝ aɓwana male ka, yì kurcau mana pà nǝ̀ mal raka. Gulo kat ka male na mǝnana málá male pà kàm raka. Amin.

²² Ən nggǝ zǝmbǝa wun, wun amǝ'eamrǝarǝu, wu tsǝk ɓalǝ wun arǝ mǝnia yì gbǝlǝm cau ɓakɓabum ǝn gilǝa wun ngga.

²³ Ən nggǝ earce wu sǝlǝ ama à pusǝna mǝ'eam sǝm Timoti a ndàkurban. Ɓǝ̀ yina tu ka, sǝm nǝ̀ ká sǝnǝi aban wun.

²⁴ Wu makki aɓwana-mǝgule ma'wun kun, andǝ acili aɓwana mala Ɓakuli kat. Amǝkwaɗi mǝnana amǝ Italiya na ka à kǝ makka wun kun.

²⁵ Ɓwamuru mala Ɓakuli ɓǝ̀ do ata wun kat.