Amǝ Ibǝru 12 - Maləmce Məfele mala Ɓakuli: Kurcau Məbəshe

Ɓakuli kǝ kwarkir amuna male

¹ Ado ka sǝm ndya nǝ ɓwabunda mǝ lakke kǝrkǝr mǝnana à lǝmndǝ ama à guli arǝ Ɓakuli, à gumbǝli sǝm aɓalǝu, à kǝ sǝn sǝm ngga! Ace mani ka, ɓǝ̀ sǝm sukki agir kat mǝnana à kǝ eara sǝm raka, andǝ acauɓikea mǝnana à kwan a taɓǝlǝki sǝm na raka. Ɓǝ̀ sǝm ɓangmire nǝ gandǝrǝu, yì mire mǝnana Ɓakuli tsǝka sǝmi a dǝm sǝm ngga.

² Ɓǝ̀ sǝm soa mǝsǝ sǝm arǝ Yesu, yì ɓwa mǝnana kwakita paɓamuru ma'sǝm, sǝ nda mǝnana nǝ̀ yinǝ lumsǝo male ka. Ace bumpwasǝa mǝnana à tsǝki wi a dǝmbǝi ka, shakminǝi aɓa tanni mala gbaliban amur nggun-gangndi, burice kǝsǝkya mǝnana nǝ̀ kum ate ka, sǝ adyan ngga nda aban do a buno, aban gulo a bu-mǝli mala bunomurǝm mala Ɓakuli.

³ Wu ɗenyi nǝ mǝno yì nggea tanni mǝnana yi kumi a bu amǝ'cauɓikea ka, ace mǝnana rǝ wun ɓǝ̀ kǝa wuki arǝ wun, gandǝa wu nǝ̀ bwaki bu wun ngga ɗang.

⁴ Nggearǝ wara ma'wun arǝ cauɓikea ka, malaká ká nǝ wun aban sukki nkila wun ɗang.

⁵ Ɗǝm ngga, ɓalǝ wun lorǝna cau ɓakɓabum mala Ɓakuli aban wun mǝnana kǝ tunǝ wun ama amuni ka le? Yi mǝnana ama: “Munem, kǝa burice kwarkiru mala Mǝtalabangŋo ɗang, sǝ rǝo ɓǝ̀ kǝa wuki ɗang, mǝnana ɓǝ̀ cio a njar ka.

⁶ Acemǝnana Mǝtalabangŋo kǝ kwarkir aɓwana mǝnana kǝ earcea ka, sǝ kǝ nunkir koya ɓwa mana kǝ e ama muni na ka.”

⁷ Wu dum nǝ gandǝrǝu ɓǝ̀ wu kutia aɓa kwarkiru mala Ɓakuli ka, sǝ wu sǝlǝ ama Ɓakuli na aban na ama wu nda ka amuni. Ya muna na ɗe ado tarrí kǝ kwarkiri ɗang?

⁸ Ɓǝ̀ Ɓakuli kǝ kwarkir wun, kǝla mǝnana kǝ pang nǝ amuna male kat ka, raka, lǝmndǝ ama wu nda ka amuna-twala, wu nda ka amuni ɗang.

⁹ Ɓǝ̀ sǝm sǝni, atár sǝm mǝnana a nggūrǝu ka, à kǝ kwarkir sǝm, sǝ sǝm nggǝ pea wia gulo ace. Palang ado sǝ pa sǝm nǝ̀ ɓun aɓata Tar sǝm mǝnana pusǝ abangŋo ma'sǝm, ace mǝnana ɓǝ̀ sǝm dumnǝ yilǝmu ka ɗang?

¹⁰ Atár sǝm a ɓanza kǝ kwarkir sǝm aɓalǝ apwari bǝti arǝ njar mǝnana à sǝni nda ɓoaria wia ka; sǝ Ɓakuli ka kǝ kwarkir sǝm ace mǝnana ɓǝ̀ ɓoara sǝm ngga. Kǝ pe ace mǝnana ɓǝ̀ sǝm duk amǝfele kǝla yì.

¹¹ Koya nunkiru ado ka pà pǝlpǝl ɗang, kǝ kwanrǝu. Sǝ nǝ nzǝmo ka, kǝ pusǝ ɓǝle mala dorǝpwala andǝ ɓealɓoarna aban aɓwana mǝnana à kum kanigir aɓa kwarkiruî ka.

¹² Ace mani ka, wu sarǝ abu wun mǝnana à kǝ aulǝ ka, sǝ wu candǝki ankunǝ wun mǝnana à kǝ ɓunggi ka.

¹³ “Wu tsǝk njar ma'wun ɓǝ̀ sarǝ pǝrapǝra,” ace mǝnana agbakǝre ɓǝa kǝa kpa ɗang, ɓǝa kum sonzǝban.

Nunkiru arǝ ɓinǝki Ɓakuli

¹⁴ Wu ɓariki wu dukdo rǝpwala wunǝ aɓwana andǝ do mǝfele; aɓwana mǝnana à kǝ dukdo mǝfele raka, à pà nǝ̀ sǝn Mǝtalabangŋo ɗang.

¹⁵ Wu parkir wun, kǝɓwa ɓǝ̀ kǝa gatti kum ɓwamuru mala Ɓakuli ɗang. Ce wu eare nlerǝ bumkpǝmna to aɓalǝ wun, mana nǝ̀ yinǝ tanni, sǝ nǝ̀ tsǝk aɓwana pas ɓǝa pǝndǝki ka ɗang.

¹⁶ Wu tsǝkir wun, ce à kum kǝɓwa ata wun nǝ ɓealǝu kiɗìkì mala nonggi nǝ rǝarǝu, ko mǝnana kǝ ɓanggi Ɓakuli raka kǝla Isǝwa, mǝnana mak gulo ɓǝlban male ace kwar girlina ka.

¹⁷ Wu sǝlǝna ama nǝ nzǝmo ka, yi earce ama ɓǝa pe wi tsǝkbu mala tarrí; sǝa ma à ginǝi wi, acemǝnana kum njar mala nggaɗi gir mǝnana ak dǝmbǝa pè ka ɗang, kat andǝ amani ama alta mǝnia yì tsǝkbu nǝ mǝrǝm a mǝsǝì ka.

¹⁸ Yiu ma'wun aban Ɓakuli ka, pà kǝla yiu mala amǝ Isǝrayila a Nkono Saina ɗang. Yì Nkono Saina mǝnana à nǝ̀ gandǝ je nǝ bu sǝ kǝ earki nǝ bǝsa ka. Sǝ yiu ma'wun pa gbal aban pǝndǝa, andǝ banzuppi, andǝ gung-mbulo ɗang.

¹⁹ Sǝ pa gbal aban mǝnana à ok ɓua mala njawe, andǝ gi Ɓakuli aban nacau, mǝnana tsǝa amǝ'oe zǝmbǝa ama ɓǝ̀ tamsǝ nacau ka ɗang.

²⁰ Acemǝnana à gandǝ twal gandǝa nǝ nzongcau mǝnana ama, “Ko ɓǝ̀ girkusǝu na sǝ je mǝno yì nkono ka, ɓǝa ɓukki ɓǝ̀ wú” ka ɗang.

²¹ Mǝno yì gir à sǝn ngga, kàrmuria kǝ̀rkǝ́r, gandǝa Musa na ama, “Ɓangciu ciem rǝam kǝ ɓǝla.”

²² Sǝa ma yiu ma'wun ngga, wu yina aban Nkono Siyona, a nggeala mala Ɓakuli mǝyilǝmuì, a Urǝshalima mǝnana a kuli, aban mǝnana á-pas amur á-pas mala amǝturonjar nakam aban rambǝa aɓa banɓoarnado ka.

²³ Wu yina aban rambǝa mala amuna-dǝmba mala Ɓakuli, mǝnana à gilǝna alullǝia a kuli ka. Wu yina aban Ɓakuli, mǝɓashi ɓwapǝndǝa kat. Wu yina aban abangŋo mala aɓwana mǝnana à dukdo ɓealɓoarna sǝ adyan ngga Ɓakuli ea à kumǝna lumsǝo ka.

²⁴ Wu yina aban Yesu, yì ɓwa mǝnana nda mǝkutio a nre-rǝarǝu mala bǝsa kurcau a nre Ɓakuli andǝ aɓwana male ka. Wu yina aban yì nkila à watsǝki, mǝnana kǝ bangcau mǝɓoarne kuti mala nkila mala Habila ka.

²⁵ Wu tsǝkir wun, cala wu ginǝ oki Ɓakuli mǝnana kǝ na wun cau ka ɗang. Ɓǝ̀ amǝ Isǝrayila mǝnana à ginǝ oki Musa, lang nunkiria akani a ɓanza ka, à au raka, lang sǝ sǝm nǝ̀ auwa, ɓǝ̀ sǝm pǝlǝì Ɓakuli nzǝm sǝm, mǝno ado kǝ nunkir sǝm nǝ kuli ka?

²⁶ Amǝno yì pwari mana Ɓakuli nacau male ka, gì dǝkǝri ɓanza, sǝ adyan ngga pana cau male ama, “Ado ɗǝm ngga, ɓanza na nǝmurǝì mǝ nǝ dǝkǝri ka ɗang, mǝ nǝ dǝkǝri kuli gbal.”

²⁷ Mǝnia yì cau ama “Ado ɗǝm ngga” lǝmndǝ ama gir mǝnana kat Ɓakuli nǝ pusǝì ka, à nǝ̀ dǝurǝki, sǝ à nǝ̀ gǝshi, ace mǝnana agir mana à pà nǝ̀ dǝurǝ raka, à nda à nǝ̀ ueo ka.

²⁸ Sǝ acemǝnana à pana sǝm domurǝm mǝnana pà nǝ̀ dǝurǝ raka, ɓǝ̀ sǝm pak yàwá, sǝ ɓǝ̀ sǝm peri aban Ɓakuli nǝ ulang peri mǝnana gir-á na abani ka, nǝ pagulo andǝ ɓangciu;

²⁹ acemǝnana “Ɓakuli ma'sǝm ngga bǝsa mǝtwalta gir na.”