Amǝ Ibǝru 11 - Maləmce Məfele mala Ɓakuli: Kurcau Məbəshe

Amǝ kanggǝrang paɓamuru aban Ɓakuli

¹ Adyan ngga, guli arǝ Ɓakuli ka, nda makɓalǝu ama kàngkàng sǝm nǝ̀ kum agir mǝnana sǝm tsǝkɓalǝ sǝm a rǝia ka; nda mǝsǝkang-kangŋa arǝ gir mǝnana sǝm nggǝ sǝni raka.

² Nda ace guliarǝu mala aɓwana mǝnana a pwaryan ngga, sǝ Ɓakuli ɓwangsǝia.

³ Nda acemǝnana sǝm earnǝ Ɓakuli ka sǝ kpaka sǝm ama nǝ́ cau male sǝ ɓanza andǝ kuli à yì puro, sǝ ɗǝm ngga ama agir mǝnana ado sǝm nggǝ sǝnia ka, Ɓakuli pusǝia arǝ agir mǝnana à kǝ sǝnia raka.

⁴ Habila pà ɓamuri aban Ɓakuli sǝ pè Ɓakuli gir'nkila mǝɓoarne mǝnana kuti mana Kayinu pà ka. Ace paɓamuru male sǝ Ɓakuli ɓwangsǝi ama yì ka, mǝ'cauɓoarna na, lang yi na mǝɓoarne amur aɓoro male ka. Ko kat andǝ amani ama Habila wuna ka, kǝ bangga sǝm cau piu nǝ paɓamuru male.

⁵ Nda ace paɓamuru mala Inok sǝ à twali à um nǝi a kuli, ace mǝnana ɓǝ̀ kǝa sǝn lú raka. Kǝ ɓwa kumi ɗang, acemǝnana Ɓakuli twali um nǝi ate. Sǝ kani ama ɓǝa twali ka, à surǝì nǝ pwasǝ bum Ɓakuli.

⁶ Ɓǝ̀ paɓamuru pà kàm raka, kǝɓwa pà nǝ̀ gandǝ pwasǝ bum Ɓakuli ɗang, acemǝnana ɓwa mana nǝ̀ yiu abani ka, she nǝ̀ ear ama yì ka, ndakam, sǝ nda mǝnana kǝ pa tangnakusǝ aɓwana mǝnana à kǝ alte ka.

⁷ Paɓamuru mala Nuhu aban Ɓakuli na ci sǝ kpata nunkiru mala Ɓakuli amur agir mǝnana à kǝ yiu a dǝmbǝa, gandǝ sǝnia raka. Lo nǝ ɓangciu mala pagulo aban Ɓakuli, gballì nggea waru ace amsǝ amǝ ɓala male. Nǝ mǝnia ka, yinǝ kasǝ-ɓashi amur ɓanza, pǝlǝa Ɓakuli é mǝ'cauɓoarna na, akban mǝnana à kǝ kumi nǝ paɓamuru ka.

⁸ Paɓamuru mala Ibǝrayim aban Ɓakuli na ci sǝ oki Ɓakuli, yì mǝnana Ɓakuli tunǝi ɓǝ̀ purî nzali male, ɓǝ̀ o a ɓe nzali mǝnana bangŋa ama nǝ̀ ngga pe wi ɓǝ̀ duk male ka. Sǝ nying nzali-lá male aban o, kat andǝ amani ama surǝ ban mǝno kákiyi kam ngga raka.

⁹ Nǝ́ paɓamuru sǝ wario kya do a nzali mǝnana Ɓakuli pe wi cau ace ka, kǝla bǝri a nzali-nza. Do aɓalǝ agumli, a tarǝia andǝ Ishaku, andǝ Yakupu, yia mǝnana à duk amǝ liɓala ate mala pàcau mǝ'mwashati ka.

¹⁰ Ibǝrayim pak mǝnia yì gir ka, acemǝnana nda ban kundǝ nggeala mǝnana ndanǝ kusǝɓa, sǝ ɓwa mǝnana nyoulǝ pa male sǝ ɓè ka, Ɓakuli na nǝ nggearǝì.

¹¹ Nǝ́ paɓamuru sǝ Saratu kum rǝcandǝa mala kum muna, kat andǝ amani ama yì ka, nkombi na sǝ ena kǝrkǝr à màlà ɓǝl muna ka. Ear nǝ Ɓakuli ama Ɓakuli nǝ̀ lumsǝ cau male mǝnana pà ka.

¹² Yì burri Ibǝrayim ngga, kat andǝ amani ama è kǝrkǝr, mǝnana à nǝ̀ twali ama yì ka, lú na ka, nǝ́ ban mǝnia yì ɓwa mwashat ka sǝ amǝkau puro. Amǝke yi lakki kǝla lakki mala anlero a kuli andǝ mǝsǝsala a kun nggeamur, mana à pà nǝ̀ gandǝ ɓalli raka.

¹³ Amǝnia yì aɓwana kat ka, à wu aɓa paɓamuru malea, yale à kum agir mǝnana Ɓakuli na ama nǝ̀ pea wia ka ɗang. À sǝnia nǝ sǝna kuko, sǝ à gingsǝ yiu malea. À bangŋi bwāng ama à nda ka abǝri andǝ amǝgya-kutio aɓa ɓanza.

¹⁴ Lǝmndǝa a banfana ama aɓwana mǝnana à kǝ na ulang amǝnia yì acau ka, à nda ban alta nzali mǝnana à nǝ̀ tunǝi ama malea na ka.

¹⁵ Ɓǝà bangŋa ama ɓabumia na piu arǝ nzali mǝnana à puri wi ka, ɓǝ́ à kumǝna njar mala nyare kam.

¹⁶ Sǝ yia ka, à nda ban alta nzali mǝɓoarne mǝnana kuti mǝno ka, nzali mǝnana a kuli ka. Nda gir mǝnana tsǝa sǝ Ɓakuli ka, kǝsǝkya pakki wi, yi mana ɓǝa tunǝi ama nda Ɓakuli malea ka ɗang, acemǝnana gilǝkina nggeala acea.

¹⁷ Nǝ́ paɓamuru sǝ Ibǝrayim pà ɓoro nǝ muni Ishaku kǝla gir'nkila, a pwari mǝno Ɓakuli karǝki ka. Yì Ibǝrayim ngga Ɓakuli angŋa dǝmbǝa nani wi ama nǝ̀ pe wi muna, sǝ kat andǝ amani ka eare pà ɓoro nǝ kǝ muni mǝno mwashat ɓǝrɓǝr ka.

¹⁸ Ɓakuli angŋa dǝmbǝa nani wi ama, “Nǝ́ ban munio Ishaku, sǝ a wu nǝ kum amǝkau mo mǝnana ǝn po cau ace ka.”

¹⁹ Ibǝrayim sǝnggi ce a ɓabumi ama, ɓǝ̀ Ishaku wu ka, Ɓakuli na nǝ rǝcandǝa mǝnana nǝ̀ pe wi yilǝmu ɗǝm ngga. Sǝ mǝnia ka à nǝ̀ twali kǝla Ibǝrayim yi ak muni Ishaku a ɓembe.

²⁰ Nǝ́ paɓamuru sǝ Ishaku tsǝkbu amur Yakupu andǝ Isǝwa ace dǝmbǝa malea.

²¹ Nǝ́ paɓamuru sǝ Yakupu, lang málá nǝ̀ wu ka, tsǝki ko yana ata amuna mala Yisǝfu ka bu, sǝ kūndǝo arǝ gara male peri aban Ɓakuli.

²² Nǝ́ paɓamuru sǝ Yisǝfu, lang málá nǝ̀ wu ka, bang cau mala puro mala amǝ Isǝrayila mǝnana à nǝ̀ puri ɓa nzali Masar ka, pǝlǝa nea wia ama ɓǝà pwan amuí a buia, ɓǝ̀ à nǝ̀ u ka.

²³ Nǝ́ paɓamuru sǝ lang à ɓǝlna Musa ka, a tarrí andǝ ngge sǝmbǝrǝi arǝ azongŋo tārú. Acemǝnana à sǝn muna ka ndanǝ ɓoarɓwa ka, nda gir nî sǝ ɓangciu pakkia wia arǝ nzongcau mala murǝm raka.

²⁴ Nǝ́ paɓamuru sǝ lang Musa gulna ka, gine ɓǝa kǝa tunǝi ama yì ka, nda muna mala muna-ɓwama mala Firona ɗang.

²⁵ Nǝ́ eare male sǝ kutio a tanni ata aɓwana mala Ɓakuli, amur mǝnana nǝ̀ kum banɓoarnado aɓa pǝlpǝl mala cauɓikea, mǝnana banì pà nǝ̀ sau raka.

²⁶ Abani ka, ɓangginǝban ace Kǝrǝsti ka, kuti kume mǝnana a Masar ka, acemǝnana tsǝk mǝsǝì arǝ tangnakusǝi mǝnana kǝ yiu ka.

²⁷ Nǝ́ paɓamuru sǝ Musa nying nzali Masar, ɓangciu pakki wi arǝ bumlulla mala murǝm ɗang. Lidǝmbǝa aban o, ɓinǝ pǝlǝ mǝsǝì a nzǝmi, kǝla ɓwa mǝnana tsǝngŋǝna mǝsǝì jik arǝ Ɓakuli, yi mana à sǝnggiyi raka.

²⁸ Nǝ́ paɓamuru sǝ Musa tita Lamsan Yalimuru. Pà nzongcau ama ɓǝa watsǝki nkila arǝ akunakurǝm, ace mǝnana mǝturonjar mala lú ɓǝ̀ kǝa je amuna dǝmbǝa mala amǝ Isǝrayila raka.

²⁹ Nǝ́ paɓamuru sǝ amǝ Isǝrayila kuti nǝ ɓa Nggeamur Nzuno aban ká nkaring nǝ gya a nzǝm nzali kǝla à nda kwar-nza. Sǝ lang amǝ Masar ɓariki, à pa kǝla malea ka, kara mùr ali amuria a wú mbǝtǝp.

³⁰ Nǝ́ paɓamuru sǝ sheran mala nggeala mala amǝ Jeriko kanggia a nzali, lang amǝ Isǝrayila camarǝ gya aban kàrǝkì aɓa nongŋo tongno-nong-ɓari ka.

³¹ Nda ace paɓamuru mala man-gung man yì Rahap ka, sǝ à amsǝi à wali wú ata amǝla malea, mǝnana à mgbiki Ɓakuli kiru ka raka. Kum auwa acemǝnana ak amǝ shenzǝ-nzali mala amǝ Isǝrayila nǝ akban dotarǝu.

³² Sǝ mana ɗǝm mǝ nǝ bangŋa? Pwari pà nǝ̀ kārǝam ɗang yi mǝnana mǝ nǝ na wun cau amur paɓamuru mala aɓwana kǝla Gidiyon, andǝ Barak, andǝ Samsǝn, andǝ Jefta, andǝ Dauda, andǝ Samuyila, sǝ amǝ'ɓangna mala Ɓakuli ka.

³³ Nǝ́ paɓamuru sǝ amǝnia yì aɓwana ka à li ka anzali-murǝm a lwa, à yal aɓwana aɓa mǝsǝcau, sǝ à kum agir mǝnana Ɓakuli pàcau acea abania ka. À girki kun a-im,

³⁴ à linggi rǝcandǝa mala bǝsa, sǝ à api lú mala nggeabyau. Rǝwukya malea ka pǝlǝ rǝcandǝa. À duk aburana a kun-munǝo sǝ à pǝr amǝ lwa mala aɓea nzali ɗàngɗáng.

³⁵ Nǝ́ paɓamuru sǝ amamǝna ak alú malea à long nǝ yilǝmu. Aɓea ɓwana ka, à pakkia wia gir murmwana acemǝnana à ginǝ eare à nǝ̀ makgir paɓamuru malea ace ak ɓamuria ka. À tsǝk ɓabumia arǝ kum yilǝmu mǝnana ɓoaribanì anzǝm loapi ɓembe.

³⁶ Aɓea ɓwana atea ka, à oalia oalban zalǝban sǝ à kwea. Aɓea ka, à oasǝia a nsolo sǝ à ramtea a ndàkurban.

³⁷ À ɓukki aɓea à wú. À zanzǝki aɓea a ɓalǝu nǝ byau zanzǝki nggun. À wal-lú aɓea nǝ nggeabyau. Anggu-nzur andǝ anggu-mbulpǝndǝa à nda ka agir-nggurǝu malea aban gya arǝ aban. À duk amǝtǝr, à paria aɓata tanni, à pakkia wia mǝɓane.

³⁸ Ɓanza kārǝa ɓǝa aɓwana man do aɓalǝi ɗang. À camarǝ gali a njarnza andǝ mur ankono, andǝ do aɓalǝ agumi-ɓa-tali, andǝ atuli a tǝta nzali.

³⁹ Aɓwana mǝnia kat ka, à kum lullǝu mǝɓoarne ace paɓamuru malea, kat andǝ amani ka, kǝɓwa kam atea kum gir mǝnana Ɓakuli pàcau ama nǝ̀ pea wia ka ɗang,

⁴⁰ acemǝnana Ɓakuli ka, ndanǝ gir mǝnana ɓoaribanì ka aɓa kane mala ace sǝm. Kane mala Ɓakuli ka nda mǝnana ama, yia ka à pà nǝ̀ kum lumsǝo kǝla mǝnana earkiyice ɓǝa pak ka ɗang she ɓǝ̀ sǝm ngga sǝm nda atea ka.