Amǝ Galati 6 - Maləmce Məfele mala Ɓakuli: Kurcau Məbəshe

Wu bwalia rǝ wun twalo

¹ Wun amǝ'eamrǝarǝu, ɓǝ̀ mǝ'eamrǝarǝu na sǝ à kumi aɓa ɓe kǝgir mǝɓane ka, wun mǝnana wu came aɓa Bangŋo ka, wu nyesǝi amur njargula, nǝ ɓealǝu mǝɓukɓuki. Sǝ we ɓwa mǝnana a nǝ pak turo nyesǝban ngga, parkiro ace mǝnana wu kǝa kpa aɓa mǝno yì karǝkiban ɗang.

² Wu bwalia rǝ wun aɓa tanni; anggo ka, sǝ wu nǝ̀ lumsǝ nggurcau mala Kǝrǝsti.

³ Ɓǝ̀ kǝ ɓwa twalî ɓamuri ama ndanǝ gulo, sǝ pà nǝ̀ nyesǝ ɓamuri nǝ̀ bwali kǝ ɓwa kàm raka, ɓwe kǝ swarki ɓamuri nǝ swarkio. Yì ka, pà a kun ɓe kǝgir ɗang.

⁴ Kárǝ́kí turo mo nǝ nggearǝo wu sǝni, anggo sǝ a nǝ sǝlǝa ko turo mǝɓoarne na a pak ka, sǝ anggo ka a pà nǝ kani rǝo arǝ kǝɓwa ɗang.

⁵ Ɗenyi ama koyan ngga nǝ̀ ɓua nǝ́ ɓamuri nǝ ulang ɓealǝu male.

⁶ Aɓwana mǝnana à kǝ kania wia cau mala Ɓakuli ka, ɓoaro ɓǝa kǝ pakkì amǝ kania wia gir mana nda pepe ka; ɓǝa kǝ gau agir mǝɓoarne malea andǝia ace mǝnana ɓǝa kumo atea.

⁷ Ɓǝa kǝa ɓosǝki wun ɗang, kǝɓwa pà nǝ̀ ɓangginǝ Ɓakuli ɗang. Ko ɓǝ̀ mana sǝ ɓwa ɓeal ka, kǝ gir nî na nǝ̀ càn ngga.

⁸ Aɓwana mǝnana do malea ka, kǝ nda ace lumsǝ sune mala nggūrǝia mǝ'cauɓike ka, kǝ kìɗìkì nda mǝnana à nǝ̀ càn ngga. Sǝ aɓwana mǝnana do malea ka, kǝ nda ace pwasǝbum Bangŋo mala Ɓakuli ka, à nǝ̀ kum yilǝmu mǝnana málá male pà kàm raka, nǝban Bangŋo.

⁹ Ace mani ka, ɓǝ̀ sǝm ngga aulǝ nǝ pak gir mǝnana mǝɓoarne na ka ɗang. Ɓǝ̀ pwari yi karǝna ka, sǝm nǝ̀ ngga kum tangnakusǝu mǝɓafoe, yì mǝnana ɓǝ̀ aulǝa pa ka sǝm, sǝm bwaki bu sǝm raka.

¹⁰ Ace mani ka, ɓǝ̀ sǝm kum dǝmbǝu ka, ɓǝ̀ sǝm pakkî koyana le ka mǝɓoarne, nggeamurǝmi ka, amǝ'eamrǝarǝu mǝnana sǝm nda aɓa paɓamuru mǝ'mwashati sǝnǝia aban Kǝrǝsti ka.

Masǝlǝata kwarkiru mala Bulǝs

¹¹ WU SƏN ATƏRGILE MƏGULKE MƏNANA ƏN NGGƏ GILƏA WUN MASƏLƏATA ACAU MEM NƏIA, NƏ NGGEARƏ BUAM NGGA.

¹² Aɓwana mǝnana à kǝ ɓariki ama à nǝ̀ tsǝk wun púp wu kasǝ-ɓatau ka, à nda aban earce ama ɓǝ̀ aɓwana sǝn sǝlǝpe malea. À eare ama à nǝ̀ kum tanni ace nggun-gangndi mala Kǝrǝsti ɗang. Nda gir mǝnana tsǝa sǝ à kǝ ɓinǝ kanigir mana ama nǝ́ guli arǝ turo mǝnana Kǝrǝsti malǝna pe amur nggun-gangndi nǝmurǝì ka, sǝ aɓwana nǝ̀ kum amsǝban ngga.

¹³ Ko nggearǝ aɓwana mǝnana à camnggiyi kingging arǝ cau mala kasǝ-ɓatau ka, yia nǝ nggearǝia ka, à kǝ kpata nggurcau kat ɗang. Eare malea ka, ɓǝa kasǝa wun ɓatau sǝ à nǝ̀ nggǝ nggori nǝ wun ama à nda à yinǝ wun aɓa kwaɗi mala amǝ Yahudi ka.

¹⁴ Ma-mem ngga, pa mǝ nǝ nggori nǝ kǝgir ɗang, she kǝ nggun-gangndi mala Mǝtala sǝm Yesu Kǝrǝsti. Ace mǝno yì nggun-gangndi ka, kpata ɓanza man, mǝnana a ɓalǝam ngga, à gballìni wuna, sǝ nggearǝ mim gbal aban ɓanza ka à gballìnam ǝn wuna.

¹⁵ Ko à kasǝa sǝm ɓata sǝm, ko à kasǝa sǝm raka, kǝgir pa a ɓalǝi ɗang. Gir mǝnana kutibanì kat ka nda nggaɗiban mǝnana ama à nda bǝsa ɓwa ka.

¹⁶ Ɓǝ̀ dorǝpwala andǝ ɓwamuru mala Ɓakuli do ata aɓwana mǝnana à kǝ kpata mǝnia yì nzongcau ka. Yia ka, à nda ka amǝ Isǝrayila mǝbǝshe mala Ɓakuli.

¹⁷ Adyan ngga, kǝɓwa ɓǝ̀ kǝa na ama nǝ̀ soaki ɓabumam nǝ amǝnia yì agir ka ɗang. Acemǝnana mǝ ndanǝ ayalenpenye a nggūrǝam mǝnana à lǝmndǝ ama mǝ nda mala Yesu ka.

¹⁸ Wun amǝ'eamrǝarǝu, ɓwamuru mala Mǝtala sǝm Yesu Kǝrǝsti ɓǝ̀ do ata wun. Amin.