Amǝ Galati 1 - Maləmce Məfele mala Ɓakuli: Kurcau Məbəshe

¹ Mǝnia yì cautera ka, pur a banam, mim Bulǝs mǝ'mishan. Twalban mem a turo mishan ngga pur nǝban ɓwapǝndǝa ɗang, pur nǝ bu Yesu Kǝrǝsti andǝ Ɓakuli Tarrû, mana loasǝi yì Kǝrǝsti a ɓembe ka.

² Amǝ'eamrǝarǝu mǝnana sǝm nda kani sǝnǝia ka, sǝm nggǝ dapi bu aban tasǝ mǝnia yì cautera ka, aban ká aban a'ikǝlisiya mǝnana a bu-nzali Galati ka.

³ Ɓǝ̀ Ɓakuli Tar sǝm andǝ Mǝtalabangŋo Yesu Kǝrǝsti, lǝmndǝa wun ɓwamuru andǝ dorǝpwala.

⁴ Yesu pa yilǝmi ace acauɓikea ma'sǝm, kǝla mǝnana Ɓakuli Tar sǝm kani ka, ace mǝnana ɓǝ̀ amsǝ sǝm, a bu mǝnia yì nza mǝɓealɓike sǝm nda a ɓalǝi ka.

⁵ Ɓwangsǝban kat ka, mala Ɓakuli na, mǝnana málá male pà kàm raka! Amin.

Cau Amsǝban mǝ'mǝsǝcau nì ka nda mwashat ɓǝrɓǝr

⁶ Ən nggǝ ndali nǝ kaurǝ ndǝli ma'wun arǝ Ɓakuli, mǝnana tunǝ wun nǝ ɓwamuru mala Kǝrǝsti, sǝ wu pǝlǝa wu kǝ kpata ɓe kǝ cau ɗàng ngga.

⁷ Wu nda ban kpata ɓe “cau amsǝban” mǝnana a mǝsǝ sǝm ngga, kǝ cau amsǝban na raka. Aɓea aɓwana na, à kǝ earce zurǝì mur wun, à nǝ̀ ɓosǝki ta Cau Amsǝban mala Kǝrǝsti ka.

⁸ Ɓǝ̀ suban mala Ɓakuli sulǝo amur ko ɓǝ̀ ya ɓwa nani, ko ɓǝ̀ sǝm nda, ko ɓǝ̀ mǝturonjar mǝnana a kuli na ka, yi mǝnana ɓǝ̀ hamnǝ ɓe cau amsǝban ɗàng andǝ mǝnana sǝm hamǝna wunì ɗiɗyal ka.

⁹ Kǝla mǝnana sǝm na wun a dǝmbe ka, ǝn nggǝ ɓǝsǝlǝi ɗǝm ama: Ɓǝ̀ ɓwa hamba wun nǝ ɓe kǝ cau ama “cau amsǝban” na, sǝ nda ɗàng andǝ Cau Amsǝban mǝnana wu angŋǝni ka, ɓǝ̀ suban mala Ɓakuli sulǝo amur ɓwe.

¹⁰ Ado ka, ɓwangsǝban mala ɓwapǝndǝa na ǝn alkiyite ka le, ko mala Ɓakuli? Ɓǝ̀ mǝ nda ban ɓariki mǝ nǝ pwasǝbum ɓwapǝndǝa ka, ɓǝ́ pa mǝ nǝ duk guro mala Kǝrǝsti ɗang.

Ɓakuli na tunǝ Bulǝs ɓǝ̀ duk mǝturo mishan ngga

¹¹ Wun amǝ'eamrǝarǝu, ǝn nggǝ earce nǝma ɓǝ̀ wu sǝlǝ ama, Cau Amsǝban mǝnia ǝn nggǝ hamnǝi ka, ɗenyicau mala ɓwapǝndǝa na ɗang.

¹² Ən ak cau mem a bu ɓwapǝndǝa ɗang, sǝ kǝɓwa nǝ̀ kaniam gbal ɗang. Mǝnia yì cau ka, Yesu Kǝrǝsti nǝ̀ mǝnmbam ɓālǝi nǝ ɓamuri.

¹³ Wu surǝna rǝ pa mem ɗiɗyal, mǝnana mǝ nda ban peri, peri mala amǝ Yahudi ka, yi mǝnana ǝn pe ikǝlisiya mala Ɓakuli tanni kǝrkǝr, yale eare mem ngga nǝma ɓǝa mesǝkea ɓǝa ueɓà.

¹⁴ Ən kutì aɓeam amǝlo kat aɓa peri mala amǝ Yahudi, sǝ mǝ ndanǝ ɓabumpina kǝrkǝr arǝ kuncau mala aká sǝm.

¹⁵ Sǝ kani ama à nǝ̀ ɓǝlam ngga, Ɓakuli taram, sǝ tunǝam aɓata ɓwamuru male. Banɓoari wi

¹⁶ ɓǝ̀ lǝmndǝam Muni ace mǝnana ɓǝ̀ ǝn hamnǝ Cau Amsǝban male aban aɓwana arǝ aɓea nzali. Sǝ mim ngga ǝn alta kwarkiru mala kǝɓwa ɗang

¹⁷ Yale ǝn wari ma a Urǝshalima nǝma mǝ nǝ ngga ok ɓe kǝcau a kun aɓwana mǝnana à akàm dǝmbǝa aɓa turo mishan ngga ɗang. A kun mani ka, ǝn o kporong aɓa nzali Arabiya, sǝ nǝ nzǝmo ka, ǝn nyare a nggeala Damaska.

¹⁸ Anzǝm apǝlǝa tārú ka, ǝn wario a Urǝshalima, nǝma mǝ nǝ ngga sǝn Bitǝrus. Ən nggea pakki anonggeo lum-bwamdǝ-tongno abanì.

¹⁹ Kǝ ɓe mǝ'mishan mǝnana ǝn sǝn ɗǝm amǝno yì apwari ka, nda Jemis mǝ'eam Mǝtalabangŋo.

²⁰ Mǝnia ka, mǝsǝcau na ǝn nakiya wun a ɓadǝm Ɓakuli ka, nyir pa a ɓalǝi ɗang.

²¹ Anzǝm mǝno ka ǝn wario arǝ aɓea ban aɓalǝ abu-nzali Suriya andǝ Sǝlisiya.

²² Kat andǝ amani ka, a'ikǝlisiya mǝnana à nda aɓa Kǝrǝsti a bu-nzali Yahudi ka, à surǝam a ɓamǝsǝam ɗang.

²³ Kǝgir mǝnana à surǝì ka nda kǝ cau mǝnana aɓwana kǝ na ama: “Ɓwa mǝnana ɗiɗyal kǝ pa sǝm tanni ka, adyan ngga nda kǝ hamnǝ ce paɓamuru mǝnana ɓariki nǝ̀ kiɗiki ka.”

²⁴ Pǝlǝa à ɓwangsǝ Ɓakuli ata cau mem.