Amǝ Afisu 1 - Maləmce Məfele mala Ɓakuli: Kurcau Məbəshe

Makkun mala Bulǝs

¹ Mǝnia yì cautera ka pur nǝ bu Bulǝs, mǝnana à tàrì, à twali nǝ eare mala Ɓakuli ɓǝ̀ duk mǝ'mishan mala Kǝrǝsti Yesu ka. Gilǝ mǝnia yì cau ka aban ká aban aɓwana mala Ɓakuli, yì amǝkwaɗi mǝnana à pa ɓamuria aban Kǝrǝsti Yesu nǝ mǝsǝcau, a nggeala Afisu ka.

² Ɓǝ̀ Ɓakuli Tàr sǝm andǝ Mǝtalabangŋo Yesu Kǝrǝsti lǝmndǝa wun ɓwamuru sǝ ɓǝ̀ pa wun dorǝpwala.

Ɓakuli tsǝngŋǝna sǝm bu kǝrkǝr aɓa Kǝrǝsti

³ Ɓǝ̀ sǝm ɓwangsǝ Ɓakuli, Tár Mǝtala sǝm Yesu Kǝrǝsti, mǝnana tsǝngŋǝna sǝm bu nǝ́ ko ya tsǝkbu mala Bangŋo, mana kǝ yiu nǝ́ kuli ka, aɓa kpapi ma'sǝm sǝnǝa Kǝrǝsti.

⁴ Kaniama nǝ̀ pak ɓanza ka, Ɓakuli ak tadǝmbǝa tàr sǝm, ɓǝ̀ sǝm duk amale, aɓa kpapi ma'sǝm sǝnǝa Kǝrǝsti, ace mǝnana ɓǝ̀ sǝm tar ɓamur sǝm aceì, ɓe sǝm duk aɓwana amǝ ɗwanyi cau a rǝǔ abani, sǝ ɓǝ̀ sǝm dukdo earcearǝu.

⁵ Ɓakuli ak dǝmbǝa ɗiɗyal kànì a bumi ama, nǝ̀ pa sǝm bancame mala duk amuni nǝ bu Yesu Kǝrǝsti. Mǝnia ka nda earkiyi ce, sǝ ban kǝ ɓoari wi a rǝì ka.

⁶ Ace mani ka, sǝm nggǝ ɓwangsǝ Ɓakuli ace ɓwamuru male mǝgule mǝnana soapa sǝm mi amur sǝm, sǝm aɓwana mǝnana sǝm nda ka mala Muni mǝnana earkiyi ace raka.

⁷ Yì ka, mǝsǝswatǝr andǝ ɓwamuru male ka à gul kǝrkǝr, nda sǝ yi kúr panzǝban ma'sǝm nǝ nkila mala Muni, pǝlǝa twala sǝm ban acauɓikea ma'sǝm ngga.

⁸ Yi soapa sǝm pe mǝɓoarne male nyangsang amur sǝm, andǝ sǝlǝe andǝ surǝe kat.

⁹ Adyan ngga, Ɓakuli lǝmndǝna sǝm kane male mǝnana lǝmndǝi aban kǝɓwa ɗiɗyal raka, mǝnana kani ace lumsǝ banɓoarnado male nǝ bu Kǝrǝsti ka.

¹⁰ Sǝ mǝnia ka nda kànì male: Ɓǝ̀ pwarì yi karǝna ka, Ɓakuli nǝ̀ dapi koya gir mǝnana a kuli andǝa mǝnana a nzali kat ka aɓata rǝcandǝa mala Kǝrǝsti.

¹¹ Sǝ acemǝnana à dapina sǝm sǝnǝa Kǝrǝsti ka, sǝm angŋǝna liɓala a bu Ɓakuli, acemǝnana ak dǝmbǝa tàr sǝm ɓǝ̀ sǝm duk amale aɓa kpata kane male, sǝ yì nǝ nggearǝì ka kǝ tsǝk koya gir ka ɓǝ̀ pa kǝla mǝnana ɓabumi earkiyice ka.

¹² Kànì mala Ɓakuli ka nda mǝnana ama, sǝm amǝ Yahudi mana sǝm nda ka amǝdǝmbǝa paɓamuru aban Kǝrǝsti ka, ɓǝ̀ sǝm yinǝ ɓwangsǝban andǝ pagulo aban Ɓakuli.

¹³ Sǝ wun aɓwana mǝnana amǝ Yahudi na raka, wun gbal ka à yì nyesǝ wun wu pǝlǝna aɓwana mala Ɓakuli, lang wu yi ok cau mǝ'mǝsǝcau nì, yì Cau Amsǝban, sǝ wu paɓamur wun aban Kǝrǝsti ka. Ɓakuli canba wun nyoulǝa male arǝ wun, mǝnana lǝmndǝ ama angŋǝna wun kǝla amale ka. Sǝ mǝno yì nyoulǝa ka nda Bangŋo Mǝfele a ɓabum wun, mǝnana bangce a pwaryan ama nǝ̀ pà ka.

¹⁴ Sǝ yì Bangŋo Mǝfele ka nda lǝmndǝa sǝm aɓa mǝsǝcau ama, agir kat mǝnana Ɓakuli pàcau acea, ama tsǝngŋǝnia nǝ̀ pà sǝmia ka, nda anggo à dumǝna ma'sǝm, ba pwari akmúr aɓwana kat mana à ndaka mala Ɓakuli ka. Pak mǝnia ka ace mǝnana ɓǝ̀ sǝm ɓwangsǝi, sǝ ɓǝ̀ sǝm nggǝ pe wi gulo.

Bulǝs pak hiwi ace aɓwana mala Ɓakuli ɓǝa kum sǝlǝe

¹⁵ Ace mǝnia ka, lang ǝn ongŋǝna ce paɓamuru ma'wun aban Mǝtalabangŋo Yesu andǝ earcearǝu mana wu ndanǝi aban aɓwana mala Ɓakuli a koya ban ngga,

¹⁶ ko ǝn usǝlǝki pakki Ɓakuli yàwá ace wun ɗang. Ən nggǝ pak hiwi ace wun pwari-pwari.

¹⁷ Ən nggǝ zǝmbǝi Ɓakuli mǝgulo, yì Tár Mǝtala sǝm Yesu Kǝrǝsti, ɓǝ̀ pa wun sǝlǝe mala Bangŋo mala Ɓakuli andǝ sǝngir, ace mǝnana ɓǝ̀ wu surǝ Ɓakuli kam kpǝm.

¹⁸ Ən nggǝ pak hiwi gbal ama, ɓabum wun ɓǝ̀ lumsǝ nǝ tǎlaban, ace mǝnana ɓǝ̀ wu surǝ tsǝkɓalǝu mana Ɓakuli tunǝ wun aɓalǝi ka. Sǝ mǝnia yì tsǝkɓalǝu mǝnana nda ace aɓwana male mǝfele ka, nda mǝnana ama, ɓǝa kum agir mǝɓoarne kǝkǝr aɓa liɓala mǝgule, mǝnana Ɓakuli bangŋa ama nǝ̀ pea wia ka.

¹⁹ Ɗǝm ngga, ǝn nggǝ pak hiwi ama ɓǝ̀ wu bwalta gulo mala rǝcandǝa mala Ɓakuli mana à pà nǝ̀ gandǝ kane arǝ kǝ ɓe raka, mǝnana ndanǝi ace sǝm, sǝm mǝnana sǝm pa ɓamur sǝm abani ka. Mǝnia yì rǝcandǝa mana Ɓakuli kǝ pangŋǝna turo nǝi aɓalǝ sǝm ngga, nda kǝ rǝcandǝa

²⁰ mǝnana loasǝna Kǝrǝsti nǝi a ɓembe nǝ yilǝmu, sǝ dumsǝi a buno-gulo, a bu-mǝli mala Ɓakuli a kano a kuli ka.

²¹ Aban mǝno ka, ndanǝ rǝcandǝa kǝrkǝr amur ko ya murǝma, andǝ amǝ'pagara, andǝ amǝ'rǝcandǝa, andǝ amǝ'yalmuru, andǝ koya buno gulo nani ka; yale pa amǝnia yì ɓanza nǝmurǝì ɗang, nda kat andǝ ɓanza mǝno gbal kǝ yiu ka.

²² Ɓakuli nyesǝ koya gir ka aɓata rǝcandǝa mala Kǝrǝsti, sǝ tsǝk Kǝrǝsti amur girbunda kat, ace ɓoaro mala ikǝlisiya, yia amǝkpate.

²³ Kǝrǝsti ka nda Múr ikǝlisiya, sǝ ikǝlisiya, yia amǝkpata Kǝrǝsti ka, à ndaka nggūrǝì mǝnana à lumsǝ nǝ Kǝrǝsti ka, sǝ yì nǝ nggearǝì ka akiban lumsǝ ko man kat ka, a ko ya njari.