2 Amǝ Korinti 4 - Maləmce Məfele mala Ɓakuli: Kurcau Məbəshe

Agir-ɓoarna mala Ɓakuli aɓalǝ ankwaring dǝɓang

¹ Sǝ acemǝnana Ɓakuli, aɓa sǝn mǝsǝswatǝr male sǝ pà sǝm mǝnia yì turo mishan ngga, ɓabum sǝm pà nǝ̀ ɓunggi ɗang.

² Sǝm nyingŋǝna bu sǝm arǝ agir kǝsǝkya mǝnana à kǝ pea aɓa sǝmbǝrǝa ka, sǝ sǝm ginǝce ɓealǝu mala swarkiban. Pà sǝm nǝ̀ na cau mala Ɓakuli nǝ nyir ɗang. Sǝm nǝ̀ dukdo mǝsǝcau aɓa tǎlaban a ɓadǝm Ɓakuli, sǝ sǝm nǝ̀ ɓariki aban lǝmndǝ ɓamur rǝ sǝm a njar mǝɓoarne aban aɓwana kat mǝnana à kǝ gandǝ gakita mǝɓoarne andǝ mǝɓane aɓa ɗenyicau malea ka.

³ Sǝ ɓǝ̀ Cau Amsǝban mǝnana sǝm nggǝ hamnǝi ka, sǝmbǝrǝa anzǝm lagir ka, sǝmbǝrǝi aɓwana mǝnana à kǝ ká kiɗiki ka.

⁴ Shetan, mǝnana ginggiyi nǝ nza man ngga songŋǝna pǝndǝa aɓa ɗenyicau mala amǝ ɗwanyi earnǝ Cau Amsǝban, ace mǝnana ɓǝa kǝa kum sǝn tǎlaban mala Cau Amsǝban amur ɓoarɓwa mala Kǝrǝsti, mana ndà purban mala Ɓakuli ka, ɗang.

⁵ Yì Yesu Kǝrǝsti Mǝtalabangŋo ka, nda mana sǝm nggǝ hamnǝi ka, ɓamur rǝ sǝm na sǝm nggǝ hamnǝi ka ɗang. Sǝm ngga, sǝm nda ka amǝturo ma'wun à kǝ ce Yesu.

⁶ Ɓakuli mǝnana na ama, “Ɓǝ̀ tǎlaban ta aɓa pǝndǝa” ka, tana a ɓabum sǝm ace pà sǝm tǎlaban mala surǝ ɓoarɓwa mala Ɓakuli mǝnana à nǝ̀ sǝni a ɓamǝsǝ Yesu Kǝrǝsti ka.

⁷ Mǝnia yì turo mishan Ɓakuli pa sǝm ngga nda kǝla gǝna mǝɓoarne mana à nǝ̀ tsǝkce pépè ka. Sǝ nggearǝ sǝm mǝnana à pa sǝm mǝnia yì gǝna ka, sǝm nda kǝla ankwaring dǝɓang, ace lǝmndǝa sǝm ama rǝcandǝa mǝgule mana karmur ban kat ka, pur nǝban sǝm ɗang, pur nǝban Ɓakuli.

⁸ À tsǝk sǝm aɓa do mǝkwane a koya bui ka, sǝ mǝno ka ɓunggi sǝm ɗang. À zurǝì ɓabum sǝm, sǝ sǝm pǝlǝki nǝ ɓalǝ sǝm ɗang.

⁹ À pà sǝm tanni, sǝ Ɓakuli ka nying sǝm ɗang; à ram sǝm a nzali, sǝ sǝm par bu sǝm, sǝm lo.

¹⁰ Sǝm dukdo mala aɓwana mǝnana à wuna aɓa nggūrǝu sǝm sǝnǝa Yesu ko aya pwari ka, ace mǝnana do male nǝ yilǝmu gbal ka à nǝ̀ sǝni aɓa nggurǝ sǝm.

¹¹ Aɓa do ma'sǝm kat ka, sǝm do aɓa ká-mǝɓane mala lú ko aya pwari ata cau mala Yesu, ace mǝnana do male ɓǝ̀ lǝmndǝa aɓa nggurǝ sǝm mǝnana dupi lu ka.

¹² Mǝnia ka lǝmndǝ ama sǝm amǝ'mishan ngga, sǝm nda aɓa wara sǝnǝa lú, sǝa ma mǝno ka ndarǝ yinǝ wun aɓa kum yilǝmu.

¹³ Malǝmce bang ama, “Ən earǝna nǝi, ace mani ka ǝn na cau.” Nǝ mǝno yì bangŋo mala paɓamuru ka, sǝm gbal ka sǝm earnǝi, nda sǝm na cau ka.

¹⁴ Sǝm pa anggo acemǝnana sǝm sǝlǝna ama Ɓakuli, mǝnana loasǝ Mǝtalabangŋo Yesu ka, nǝ̀ loasǝ sǝm gbal sǝnǝa Yesu, sǝ nǝ̀ ká nǝ sǝm, sǝnǝa wun a ɓadǝmbǝi.

¹⁵ Mǝno kat ka, nda à kǝ ce ɓoaro ma'wun, ace mǝnana ɓwamuru mala Ɓakuli mǝnana nda aban lidǝmbǝa aban ká aban aɓwana pas ka, nǝ̀ yinǝ pak yàwá mǝgule, sǝ nǝ̀ lidǝmbǝa nǝ̀ yinǝ gulo aban Ɓakuli.

¹⁶ Ace mani ka, ɓabum sǝm ɓunggi ɗang. Ko ɓǝ̀ do ama nggurǝ sǝm mǝnana à kǝ sǝni nǝ mǝsǝu, nda ban ká kìɗìkì ka, bangŋo ma'sǝm ngga kǝ duk bǝshe a koya pwari.

¹⁷ Amǝnia yì atanni ma'sǝm mǝkeke mana bania pà nǝ̀ sau raka, à nda ban gilǝki sǝm ace kum ɓoarɓwa mǝnana málá male pà kàm ɗang, sǝ gulo male ka kǝ ɓe pà kàm à nǝ̀ kani a rǝi ɗang.

¹⁸ Agir mǝnana à kǝ sǝnia nǝ mǝsǝu ka, à kǝ sau ɗang, sǝ agir mǝnana à kǝ sǝnia nǝ mǝsǝu raka, málá malea pà kàm ɗang. Nda gir mǝnana tsǝa sǝ sǝm nggǝ soa mǝsǝ sǝm arǝ agir mǝnana à kǝ gandǝ sǝnia raka.