2 Amǝ Korinti 2 - Maləmce Məfele mala Ɓakuli: Kurcau Məbəshe

¹ Ace mǝno ka, ǝn twali a ɓabumam nǝma pà mǝ nǝ kiɗiki ɓabum wun ɗǝm nǝ kà mem aban wun ɗang.

² Ɓǝ̀ ǝn kiɗiki ɓabum wun ngga, sǝ à yana ɗe à nǝ̀ pwasǝ bumam? Kǝ wun mǝnana ǝn kiɗiki ɓabum wun ngga, kǝ wu nda re?

³ Ən gilǝa wun mǝno yì cautera ka ace mǝnana, mǝ ngga yiu mǝ pak bumkiɗikea nǝ aɓwana mǝnana à nda à nǝ̀ pam bumpwasǝa ka ɗang. Mǝ ndanǝ mǝsǝkang-kangŋa arǝ wun kat ama ɓǝ̀ ɓabumam pwasǝ ka, wun kat ka ɓabum wun nǝ̀ pwasǝ gbal.

⁴ Ən gilǝa wun mǝno yì cautera ka aɓa bumkiɗikea mǝgule andǝ bumpina nǝ mǝrǝm a mǝsǝam; sǝ mǝno ka pà ace kiɗiki ɓabum wun ɗang, nda ace lǝmndǝa wun earcearǝu mǝlime mǝnana mǝ ndanǝi ace wun ngga.

Twalbani ace ɓwa mǝnana pak cauɓikea

⁵ Ɓǝ̀ kǝɓwa yinǝ bumkiɗikea ka, mǝ nda nǝ́muràm kiɗiki ɓabumam ngga ɗang, wu nda mǝnana kat kiɗiki ɓabum wun ngga. (Mǝno ka dumsǝkicau na ɗang).

⁶ Tanni mǝnana bangula wun pe wi ka, karǝna.

⁷ Sǝ adyan ngga, ɓoaro wu twali wi banì, sǝ wu giriki, ace mǝnana bumkiɗikea ɓǝ̀ kǝa kuti rǝcandǝa male gandǝa ɓǝ̀ ɓunggi ɓabumi ka ɗang.

⁸ Ən nggǝ zǝmbǝa wun, wu lǝmndǝì wi ɗǝm ama wu ndanǝ earcearǝu a rǝì.

⁹ Ən gilǝa wun ace karǝki wun, sǝ mǝ sǝlǝa ko wu ndanǝ okiru arǝ acau mem aɓa ko ya gir kat.

¹⁰ Ɓwa mǝnana wu twalǝni wi banì ka, mim gbal ka, ǝn twalǝni wi banì. Sǝ gir mǝnana kat ǝn twalǝna banì (ɓǝ̀ ɓe kǝgir nakam mǝnana ɓoaro ɓǝa twalbani ka) ǝn twalǝna banì nǝ rǝcandǝa mala Kǝrǝsti ace wun.

¹¹ Ən pak mǝnia yì gir ka ace mǝnana Shetan ɓǝ̀ kǝa kum njar arǝ sǝm ɗang. Acemǝnana sǝm ngga, sǝm surǝna rǝ akutan male.

Bumpina mala Bulǝs a Tǝros

¹² Lang ǝn bingŋǝna Tǝros, ace kǝ hamnǝ Cau Amsǝban mala Kǝrǝsti ka, ǝn yi sǝni ka Mǝtalabangŋo angŋa dǝmbǝa mǝnǝna njar mala turo akano.

¹³ Sǝ ko bumam nong ɗang, acemǝnana ǝn kum mǝ'eam sǝm Titus akano ɗang, nda sǝ ǝn tsǝk aɓwana mǝno ka a ndà sǝ ǝn kuti aban ká a Masǝdoniya.

¹⁴ Sǝa ma ɓǝa pakki Ɓakuli yàwá! Acemǝnana ko aya pwari, aɓa dotarǝu ma'sǝm sǝnǝa Kǝrǝsti ka, kǝ ging nǝ sǝm aɓa limurǝm. Kǝ pakturo nǝ sǝm ace mesǝ mǝsǝcau mǝnana nǝ̀ tsǝk aɓwana ɓǝa surǝ Kǝrǝsti a koya ban, kǝla rǝm muru-mǝrǝmɓoarne.

¹⁵ Sǝm ngga sǝm nda kǝla muru-mǝrǝmɓoarne mǝnana Kǝrǝsti kǝ pana ɓoro nǝi aban Ɓakuli, sǝ rǝmbi kǝ mǝsǝe aɓalǝ aɓwana mǝnana à kǝ kum auwa, sǝ aɓalǝ aɓwana mǝnana à nda aɓa ká kiɗikea ka.

¹⁶ Aban aɓwana mǝnana à nda aɓa ká kiɗikea ka, rǝm muru mǝnia ka mǝɓike na, mǝnana nǝ̀ ká nǝia a lú murmwana ka; sǝ aban aɓwana mǝnana à kǝ kum auwa ka, rǝm muru mǝnia ka mala pa yilǝmu na. Sǝ yana ɓwe kārǝa nǝ̀ pak mǝnia yì turo ka?

¹⁷ Sǝm pa kǝla acilia aɓwana, mǝnana à twal cau mala Ɓakuli gir nggaliki na ka ɗang. Sǝm, aɓa tárǝu ma'sǝm sǝnǝa Kǝrǝsti ka, sǝm nggǝ hamnǝ cau nǝ ɓabum sǝm mwashat a ɓadǝm Ɓakuli, kǝla aɓwana mǝnana Ɓakuli nǝ̀ turia ka.