1 Yohana 3 - Maləmce Məfele mala Ɓakuli: Kurcau MəbəsheAmǝkwaɗi ka amuna mala Ɓakuli na 1 Wu sǝn ulang earcearǝu mǝnana Tár sǝm nani arǝ sǝm, mǝnana à nǝ̀ tunǝ sǝm ama, amuna mala Ɓakuli ka! Sǝ anggo sǝ sǝm pa! Sǝ aɓwana mǝnana amǝ ɓanza na ka, à pànǝ sǝlǝ ama sǝm ndaka muna mala Ɓakuli ɗang, acemǝnana à surǝì ɗang. 2 Wun agyajam, sǝm ado ka, sǝm ndaka amuna mala Ɓakuli, sǝ à malaká lǝmndǝa sǝm ulang pa mǝnana sǝm ngga pak ka ɗang. Sǝa ma sǝm sǝlǝna ama ɓǝ̀ Yesu yi pusǝna rǝì ka, sǝm nǝ̀ pa kǝla yi, acemǝnana sǝm nǝ̀ yia sǝni kǝla mǝnana ndakam ngga. 3 Sǝ ɓwa mǝnana kat ndanǝ mǝnia yì tsǝkɓalǝu ka, kǝ dukdo ɓoarnsari, kǝla mǝnana Yesu ka mǝɓoarnsari na ka. 4 Ɓwa mǝnana kǝ pak cauɓikea ka, ndarǝ yàl nggurcau, acemǝnana cauɓikea ka, nda yàl nggurcau. 5 Sǝ wu sǝlǝna ama, Yesu ka yiu ace twal acauɓikea ma'sǝm, sǝ yì ka, cauɓikea pa a ɓalǝi ɗang. 6 Ace mani ka, ɓwa mǝnana nda aɓa dotarǝu andǝ Kǝrǝsti ka, pà nǝ̀ lidǝmbǝa nǝ pak cauɓikea ɗang. Sǝ ɓwa mǝnana kat kǝ pak cauɓikea ka, ɓwe malaká sǝni, ko surǝì ɗang. 7 Wun amunem, wu kǝa eare ɓǝ̀ kǝɓwa ɓǝ̀ ɓosǝki wun ɗang: Ɓwa mǝnana kat kǝ pak mǝɓoarne ka, mǝ'cauɓoarna na, kǝla mǝnana Kǝrǝsti ka mǝ'cauɓoarna na ka. 8 Ɓwa mǝnana lidǝmbǝa aɓa cauɓikea ka, ɓwa mala Shetan na, acemǝnana twal a tite ka, Shetan ngga mǝ'cauɓikea na. Tǝr yiu mala Muna mala Ɓakuli ka, nda ace kiɗiki aturo mala Shetan. 9 Ɓwa mǝnana kat ɓǝlban mala Ɓakuli na ka, kǝ lidǝmbǝa aɓa cauɓikea ɗang, acemǝnana mǝsǝɓeale mala Ɓakuli na a ɓabumi; pà nǝ̀ lidǝmbǝa nǝ pak cauɓikea ɗang, acemǝnana yì ka, ɓǝlban mala Ɓakuli na. 10 Mǝnia ka, nda gir mǝnana gakita amuna mala Ɓakuli andǝ amuna mala Shetan ngga: Ɓwa mǝnana kat kǝ pak cauɓoarna raka, muna mala Ɓakuli na ɗang, anggo sǝ ɓwa mǝnana kǝ earce mǝ'eambǝi raka, yì gbal ka muna mala Ɓakuli na ɗang. Wu earce arǝ wun 11 Mǝnia ka, nda cau mǝnana wu oe a tite ka: Ɓǝ̀ sǝm earce arǝ sǝm. 12 Ɓǝ̀ sǝm ngga pa kǝla Kayinu mǝnana ɓwa mala mǝɓealɓikea na, sǝ wal-lú mǝ'eambǝi Habila ka ɗang. Ace mana ɗe sǝ wal-lui? Nda acemǝnana aturo male ka amǝ ɓike na, sǝ a mala mǝ'eambǝi ka amǝɓoarne na ka. 13 Ɓǝ̀ kǝa dupa wun gir'ndǝlǝki ɗang, wun amǝ'eamrǝarǝu, yi mǝnana ɓǝ̀ amǝ ɓanza ɓinǝ mǝsǝ wun ngga. 14 Sǝm sǝlǝna ama sǝm auwuni lú, sǝm kutina aɓa yilǝmu, acemǝnana sǝm nggǝ lǝmndǝì amǝ'eamrǝarǝu earcearǝu. Sǝ ɓwa mǝnana pànǝ earceban raka, ɓwe ka, lú-ɓwa na. 15 Ɓwa mǝnana kat kǝ ginǝ mǝsǝ mǝ'eambǝi ka, mǝ'walki-alú na. Sǝ wu sǝlǝna ama kǝ mǝ'walki-alú pà kàm nǝ yilǝmu mǝnana málá male pà kàm raka ɗang. 16 Ani sǝ sǝm nǝ̀ surǝ mana nda earcearǝu, yi mǝnana Kǝrǝsti pa yilǝmi ace sǝm ngga. Sǝm gbal ka, ɓoaro ɓǝ̀ sǝm pa yilǝmi sǝm ace amǝ'eam sǝm. 17 Ɓǝ̀ kǝɓwa nanǝ agirkuma mala ɓanza man, sǝ sǝn mǝ'eambǝi aɓa tǝle, sǝ ɓinǝ sǝn mǝsǝswatǝr male ka, lang sǝ earcearǝu mala Ɓakuli nǝ̀ pa a ɓabum mǝnia yì ɓwa ka? 18 Wun amunem, earcearǝu ma'sǝm ngga, ɓǝ̀ kǝa ueo a mburkun ɗang, ɓǝ̀ duk mǝ'mǝsǝcau nì, mǝnana kǝ lǝmndǝ rǝì aɓa pě ka. 19 Anggo ka sǝ sǝm nǝ̀ sǝlǝ ama sǝm ndaka a mala mǝsǝcau, sǝ sǝm nǝ̀ kum rǝcandǝa mala ɓabum a ɓadǝm Ɓakuli. 20 Sǝ ko ɓǝ̀ ɓabum sǝm mak sǝm ngga, Ɓakuli gulo kuti oě mala ɓabum sǝm, sǝ yì ka, surǝna rǝ agir kat. 21 Ace mani ka, wun agyajam, ɓǝ̀ ɓabum sǝm mak sǝm raka, sǝm ndanǝ mǝsǝkang-kangŋa a ɓadǝm Ɓakuli. 22 Sǝ gir mǝnana kat sǝm zǝm abani ka nǝ̀ pa sǝmi, acemǝnana sǝm nggǝ kpata anzongcau male, sǝ sǝm nggǝ pak gir mǝnana pwasǝ bumi ka. 23 Mǝnia ka nda nzongcau male: Ɓǝ̀ sǝm pa ɓamur sǝm aban Muni Yesu Kǝrǝsti, sǝ ɓǝ̀ sǝm earce rǝarǝ sǝm kǝla mǝnana bangga sǝm ngga. 24 Aɓwana mǝnana à kǝ kpata anzongcau mala Ɓakuli ka, à nda aɓa dotarǝu andǝa Ɓakuli, sǝ Yì Ɓakuli ka nda aɓa dotarǝu andǝia. Ani sǝ sǝm sǝlǝ ama Ɓakuli ka nda aɓa dotarǝu nǝ sǝm: Sǝm sǝlǝa nǝ Bangŋo male mǝnana pa sǝm ngga. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust