1 Timoti 4 - Maləmce Məfele mala Ɓakuli: Kurcau MəbəsheÀ kwarkir Timoti 1 Adyan ngga, Bangŋo Mǝfele kǝ na sǝm bwāng ama a masǝlǝata apwari ka, aɓea aɓwana nǝ̀ pǝlǝì paɓamuru mǝ'mǝsǝcau nì nzǝmia. À nǝ̀ kpata abangŋo mǝ'nyirì andǝ akanigir mǝnana à pur nǝ ban akukwar ka. 2 Amǝnia yì amǝkanigir ka, amǝ'kunɓarina na sǝ amǝnyir na. Ɓabum ɗenyicau mǝɓoarne malea wuna. 3 À ndaka aɓwana mana à kǝ pǝrban arǝ doɓala andǝ lika aɓea agirlina, agirlina mǝnana Ɓakuli pusǝia ace aɓwana mana à surǝna rǝ mǝsǝcau, à pana ɓamuria abani ka, ɓǝa kǝ lia nǝ pak yàwá ka. 4 Sǝ acemǝnana koya gir Ɓakuli pusǝì ka mǝɓoarne na ka, ɓǝ̀ sǝm ngga na ama sǝm nǝ̀ ɓinǝ kǝ ɓe ɗang. Ɓǝ̀ sǝm e nǝ ɓabum yàwá, 5 acemǝnana Ɓakuli tsǝngŋǝni dumǝna mǝfele nǝ hiwi andǝ cau male. 6 We ka, ɓǝ̀ a kǝ lidǝmbǝa nǝ bǝli amǝkpata Ɓakuli ɓalǝ amǝnia yì agir ka, a nǝ duk mǝturo mǝɓoarne mala Kǝrǝsti Yesu, a nǝ lǝmndǝ ama a gulna aɓalǝ acau mala do kwaɗi andǝ kanigir mǝ'mǝsǝcau nì mǝnana a kpana te ka. 7 Tārǝto arǝ naki acauɓana andǝ anjarnzǝne mala aɓwagula. We ka, pa rǝcandǝa mo arǝ pe ɓamuro kanigir mala do pepe aɓa Bangŋo. 8 Songnǝ nggūrǝu ka ndanǝ ɓoaro, sǝa ma ɓak ɓamuru aɓa do kpata Ɓakuli ka ndanǝ gir mǝɓoarne ate a koya njari ka, acemǝnana nda bwal kum do yilǝmu mǝɓoarne mana adyan andǝ mǝno kǝ yiu ka. 9 Mǝnia ka, nda mǝsǝcau mǝnana ndanǝ ɓoaro ɓǝ̀ koyan ngga ɓǝ̀ é ka. 10 Nda gir mǝnana tsǝa sǝ sǝm nggǝ pak turo kǝrkǝr, sǝm nggǝ lidǝmbǝa nǝ ɓariki, acemǝnana tsǝkɓalǝu ma'sǝm ngga, nda amur Ɓakuli mǝyilǝmuì, yì Mǝ'amsǝban mala aɓwana kat, nggeamurǝmi ka aɓwana mǝnana à paɓamuria abani ka. 11 Kani aɓwana amǝnia yì agir ka, sǝ wu tsǝa koyana ka ɓǝ̀ bwaltea. 12 Kǝa eare ɓǝ̀ kǝ ɓwa nyesǝo ɓà, acemǝnana a nda lo-ɓwa ka ɗang. Duk girkani aban amǝkwaɗi aɓa nacau, andǝ domǝɓoarne, andǝ earcearǝu, andǝ paɓamuru, andǝ domǝɓoarnsari mo. 13 Sǝ kaniama mǝ yiu ka, pa ɓamuro arǝ ɓallia aɓwana Malǝmce mala Ɓakuli andǝ kania wia gir, ɓǝa kum ɓakban. 14 Ce a burice ɓoro mala Bangŋo mǝnana a ndanǝi, mana à po nǝ na gi Ɓakuli, a pwari mǝnana amǝkurcau aɓwana-mǝgule amur ikǝlisiya tsǝko buia a muro ka. 15 Tsǝk amǝnia yì agir ka aɓa turo, pa ɓamuro kat a rǝia, anggo sǝ aɓwana kat nǝ̀ sǝn lidǝmbǝa mo. 16 Tsǝk kiro arǝ do andǝ kanigir mo. Lidǝmbǝa aɓa mǝnia ka, acemǝnana ɓǝ̀ a pa anggo ka, a wu nǝ amsǝ ɓamuro andǝ aɓwana mǝnana à kǝ oeo ka. |
© Wycliffe Bible Translators, Inc. and © The Nigeria Bible Translation Trust 2016
Nigeria Bible Translation Trust