1 Timoti 2 - Maləmce Məfele mala Ɓakuli: Kurcau Məbəshe

Kwarkiru amur peri aban Ɓakuli

¹ A dǝmbǝa nǝ agir kat ka, ǝn nggǝ pa kwarkiru ama, wu kǝ pak hiwi ace aɓwana kat. Wu kyan nǝ ɓua ma'wun aban Ɓakuli amuria, wu zǝmbǝi wi ɓǝ̀ bwalia wia kam kat nǝ ɓwamuru male, sǝ wu kǝ pakki wi yàwá acea.

² Wu kǝ pak hiwi anggo, ace amurǝma andǝ aɓwana mǝnana à ndanǝ gulo a banturo nggwamnati ka, ace mǝnana ɓǝ̀ sǝm dukdo rǝpwala, andǝ ɓanggi Ɓakuli andǝ bwalrǝu.

³ Mǝnia ka ndanǝ ɓoaro, sǝ kǝ pwasǝbum Ɓakuli Mǝ'amsǝ sǝm,

⁴ mǝnana eare male na koyan ngga, ɓǝ̀ kum auwa sǝ ɓǝ̀ surǝ mǝsǝcau ka.

⁵ Ɓakuli ka, nda mwashat ɓǝrɓǝr, sǝ Ɓwa mǝnana a nre ɓwapǝndǝa andǝ Ɓakuli ka, nda mwashat, yì Ɓwa kǝla Kǝrǝsti Yesu,

⁶ mǝnana pa yilǝmi, ace akmúr ɓwapǝndǝa kat ka. Mǝnia yì cau ka à yì pe ɓanza a kārǝa mala pwari ama Ɓakuli ka earǝna ce ama aɓwana kat ɓǝa kum amsǝban.

⁷ Àkǝ̀ ce mani sǝ à taram kǝla mǝhama andǝ mǝ'mishan, mǝ kani aɓwana mala acili anzali gir, amur paɓamuru andǝ mǝsǝcau. Mǝnia ka nyir na ǝn nakiyi ka ɗang, nggearǝ mǝsǝcau na ǝn nggǝ na ka.

⁸ A koya ban peri ka, ǝn nggǝ earce aburana mǝnana à pana ɓamuria aban Ɓakuli ka, ɓǝa pak hiwi nǝ loasǝ abuia mǝfele a kuli nǝ ɓabum mǝɓoarnsari, bumlulla andǝ makgir pà kàm ɗang.

⁹ Anggo gbal sǝ amamǝna ka ɓǝa gilǝki rǝia nǝ agir-nggurǝu ulang amǝnana à nǝ̀ yinǝ pagulo ka. Gilǝkirǝu malea ɓǝ̀ kǝa yàl nzong ɗang sǝ ɓǝa bwal ɓamuria. Pà nǝ ɓolǝkia anyang, ko nǝ zǝnariya ko nǝ agir twal mǝsǝu andǝ agir boalo ɗang.

¹⁰ Gilǝkirǝu malea ɓǝ̀ duk pakki agir-ɓoarna mǝnana dupi amamǝna mana à bang ama à kǝ ɓanggi Ɓakuli ka.

¹¹ Amamǝna ka, ɓǝa kǝ kwaki kiria arǝ kanigir nǝ do ɗǝong andǝ nongsǝmuru.

¹² Ən eare nǝma ɓǝa amamǝna duk amǝkanigir amur aburana ko ɓǝa dum nǝ rǝcandǝa amuria ɗang. Yia ka, ɓǝa kǝ kwaki kiria nǝ do ɗǝong.

¹³ Acemǝnana Adamu na Ɓakuli tita pusǝe sǝ nǝ nzǝmo ka, yi pusǝ Hawawu.

¹⁴ Sǝ Adamu na Shetan swarki ka ɗang, mɓwama na Shetan swarki, sǝ gir nî yi duk cauɓikea.

¹⁵ Kat andǝ amani ka mɓwana ka, ɓǝ̀ lidǝmbǝa aɓa paɓamuru, andǝ earcearǝu, andǝ domǝfele, nǝ bwalrǝu ka, à nǝ̀ yallí nǝ̀ pur jam aɓa gbashi.