1 Bitǝrus 3 - Maləmce Məfele mala Ɓakuli: Kurcau Məbəshe

Amanɓala andǝ aburria

¹ Anggo gbal, wun amanɓala ka, wu pà ɓamur rǝ wun aɓata abura wun, ace mǝnana ɓǝ̀ aɓea ɓwana nakam atea mǝnana à earnǝ Cau Amsǝban raka, ɓeal wun nǝ nunia à nǝ̀ pà ɓamuria. Pà nǝ̀ do ama she ɓǝ̀ wu naná kǝ cau ka ɗang,

² acemǝnana à nǝ̀ sǝn pagulo, andǝ ɓealǝu mǝɓoarne ma'wun.

³ Ɓǝ̀ gilǝki rǝǔ ma'wun, ɓǝ̀ kǝa duk mala pakki agir arǝ nggurǝ wun, kǝla aɓolǝkia-nyaun, andǝ oasǝki anlang, andǝ agirgarabu, ko mala agir-nggurǝu mǝnana wu kǝ oasǝ ka ɗang.

⁴ Gilǝki rǝǔ ma'wun ngga, ɓǝ̀ duk mala ɓabum wun, yì ɓoarnsari mǝnana pà nǝ̀ mal raka, yì ɓoarnsari mala ɓealǝu ɓukɓuka, andǝ do bwalrǝu arǝ aloasǝkiaban. Ulang mǝnia yì ɓealǝu ka, nggea gir mǝgule na aban Ɓakuli.

⁵ Amamǝna mǝnana a pwaryan à dukdo yal ɓamuria ace Ɓakuli sǝ à guli a rǝì ka, anggo sǝ à gilǝki ɓoarnsari malea. À nongsǝ muria aɓata aburria,

⁶ kǝla mǝnana Saratu oki burri Ibǝrayim, sǝ tunǝi ama mǝtale ka. Wu nda ka amuni, ɓǝ̀ wu kǝ pak gir mǝnana nda pepe sǝ ɓangciu kǝ pakka wun arǝ kǝgir raka.

⁷ Anggo gbal, sǝ wun aburala ka, wu lǝmndǝ sǝlǝe aɓa doɓala ma'wun. Amālá wun ngga wu kǝ ɗenyi nǝia kǝla aɓwana mana rǝcandǝa malea bwalta ma'wun raka, sǝ wu bwalia nǝ pagulo acemǝnana yia ka, aɓiwun na aɓa ɓwamuru mala bǝsa do mana Ɓakuli pà ka. Wu bwalia pepe, ace mǝnana kǝgir ɓǝ̀ kǝa tamsǝ ahiwi ma'wun raka.

Tanni ace pak mǝɓoarne

⁸ A masǝlǝate ka, wun kat ka, ɗenyicau ma'wun ɓǝ̀ duk mwashat. Wu kǝ sǝn mǝsǝswatǝr mala rǝarǝ wun. Wu earce rǝarǝ wun kǝla amǝ'eamrǝarǝu. Wu dum nǝ ɓabum ɓukɓuka andǝ nyesǝmuru.

⁹ Wu kǝa wu mbweban nǝ ɓealɓikea a kun ɓealɓikea ɗang. Ɓǝ̀ aɓwana sanggi wun ngga, ce wu nyesǝia wia nǝ sanggiban ɗang; a kun mani ka wu tsǝkia wia bu, acemǝnana nda àkǝ̀ ce mani sǝ Ɓakuli tunǝ wun, ama ɓǝ̀ wu kum tsǝkbu.

¹⁰ Malǝmce ka, bangŋa ama: “Ɓwa mǝnana kat kǝ earce kum banɓoarnado mala yilǝmu, sǝ nǝ̀ sǝn anonggeo mala bumpwasǝa ka, dumǝna púp nǝ̀ bwal lasǝi arǝ na mǝɓike, sǝ mburkuni ka, nǝ̀ bwali arǝ na nyir.

¹¹ Dumǝna púp, nǝ̀ pǝlǝ nzǝmi arǝ ɓealɓikea sǝ nǝ̀ pak mǝɓoarne; dumǝna púp, nǝ̀ alta dorǝpwala, sǝ nǝ̀ ɓangŋa ate.

¹² Amǝ́sǝ́ Mǝtalabangŋo ka, à nda arǝ aɓwana mana à kǝ pak mǝɓoarne ka, sǝ akiri gbal ka, à ndarǝ ok hiwi malea. Sǝ ɓamǝsǝ Mǝtalabangŋo ka, kǝ ɓinǝ mǝsǝ amǝpak ɓealɓikea.”

¹³ Yana ɓwe na nǝ̀ pakka wun kǝgir, yi mǝnana rǝ wun nǝ̀ nggǝ ɓǝla arǝ pak gir mǝɓoarne ka?

¹⁴ Sǝ ko ɓǝ̀ wu kum tanni ace pak gir mǝnana nda a njari ka, wu ndanǝ tsǝkbu mala Ɓakuli. Ace mani ka, “bum wun ɓǝ̀ kǝa zurǝki ɗang, sǝ ɓangciu ɓǝ̀ kǝa pakka wun ɗang.”

¹⁵ Wun ngga, wu kǝ pe Kǝrǝsti gulo a ɓabum wun, ɓǝ̀ duk Mǝtala wun. Wu do aɓa gilǝrǝu ko aya pwari ka, ace bǝli ko ya ɓwa na ɗi wun ce tǝ́r tsǝkɓalǝu mǝnana wu ndanǝi aɓa kwaɗi ma'wun ngga.

¹⁶ Sǝa ma wu pe nǝ ɓukɓuka, andǝ pagulo a ɓalǝi. Ɓǝ̀ ɗenyicau ɓabum wun do nǝ ɓoarnsari, ace mǝnana ko ɓǝa ɓwana kiɗiki wun nǝ kunia ka, kǝsǝkya nǝ̀ pakkia wia, yi mǝnana ɓǝa sǝn do ma'wun mǝɓoarnsari, acemǝnana wu nda ka mala Kǝrǝsti ka.

¹⁷ Nǝ̀ ɓoaribanì ɓǝ̀ ɓwa tanni ace pak gir mǝɓoarne, ɓǝ̀ mǝno nda eare mala Ɓakuli ka, amur mǝnana ɓwa ɓǝ̀ tanni ace ɓealɓikea ka!

¹⁸ Kǝrǝsti ka, wú ace acauɓikea ma'sǝm kusǝ mwashat ɓǝrɓǝr, mǝ'cauɓoarna ace amǝ'cauɓikea, ace mǝnana ɓǝ̀ yinǝ wun a ɓala aban Ɓakuli ka. Yì ka, wú aɓa nggūrǝu, sǝa ma dum nǝ yilǝmu aɓa bangŋo.

¹⁹ Sǝ aɓa pa male anggo aɓa bangŋo ka wario kya hama aban abangŋo mǝnana à nda kùrban ngga.

²⁰ Amǝnia ka, à ndaka abangŋo mǝnana à mgbiki Ɓakuli kiru a pwaryan a nza mala Nuhu, a baku mǝnana Nuhu na aban shar nggea waru male, sǝ Ɓakuli na arǝ kundǝo nǝ́ munyi ka. Kǝ aɓwana tongno-nong-tārú na à amsǝia amǝno yì nggea-murgula ka.

²¹ Sǝ mǝno yì mùrgula, mǝnana aɓwana tongno-nong-tārú api wi ka, nda kǝla batisǝma mǝnana kǝ amsǝ wun ado ka. Pà ace lak pǝndǝkea mala nggūrǝu wun ɗang, nda ace lǝmndǝ eare ma'wun aban Ɓakuli nǝ ɓabum mǝɓoarnsari. Kǝ amsǝ wun acemǝnana Yesu Kǝrǝsti lo a ɓembe nǝ yilǝmu ka.

²² Ado ka, Kǝrǝsti umǝna a kuli, nda a bu-mǝli mala Ɓakuli, sǝ amǝturonjar, andǝ ayalban, andǝ arǝcandǝa kat ka, à nda a ɓate.