1 Amǝ Tasalonika 5 - Maləmce Məfele mala Ɓakuli: Kurcau Məbəshe

Wu dumnǝ gilǝkirǝu ace nyare yiu mala Mǝtalabangŋo Yesu

¹ Ado ka, wun amǝ'eamrǝarǝu, amur cau mala apwari andǝ akúnnì mǝnana amǝno yì agir nǝ̀ yia lumsǝ nǝi ka, ɓoaro mǝ gilǝa wun kǝgir ɗang.

² Acemǝnana wun nǝ ɓamur rǝ wun ngga, wu sǝlǝna ama pwari mǝnana Mǝtalabangŋo ci nǝ̀ yiu nǝi ka, nǝ̀ yiu kǝla yiu mala mǝn'i nǝ du.

³ Lang ɓǝ̀ ɓwapǝndǝa na aban na ama, “Ban pwalǝna ɗǝong, kǝgir samban pà kàm raka,” anggo sǝ kara tanni mǝkiɗikibanì nǝ̀ yia sulǝo amuria kat! Nǝ̀ yipia wia nǝ yasǝlǝban, kǝla mǝnana kwanban mala gbashi kǝ yipi mɓwama mǝnana nǝ muna-bum ngga, sǝ à pà nǝ̀ au ɗang ko bǝti.

⁴ Sǝ wun amǝ'eambǝam ngga, wu pa ɗǝm aɓa pǝndǝa ɗang, mǝnana mǝno yì pwari ka nǝ̀ yia yasǝlǝ wun kǝla yiu mala mǝn'i ka ɗang.

⁵ Acemǝnana wun kat, wun amǝ'eamrǝarǝu, wu nda ka aɓwana mala tǎlaban, andǝa mala pwari. Sǝm ngga, sǝm nda ka mala du ko mala pǝndǝa ɗang.

⁶ Ace mani ka, wu tsǝkir wun, wu kǝa nong'ntulo kǝla acili aɓwana ɗang. Ɓǝ̀ sǝm dum nǝ mǝsǝ sǝm andǝ do aɓa kwaro mala dǝmbǝu.

⁷ Nǝ́ du sǝ ɓwapǝndǝa kǝ nong'ntulo, sǝ nǝ du sǝ ɓwapǝndǝa kǝ wal-walo-agir.

⁸ Sǝ sǝm mǝnana sǝm nda ka aɓwana mala pwari ka, ɓǝ̀ sǝm do aɓa kwaro mala dǝmbǝu. Ɓǝ̀ sǝm oasǝ paɓamuru andǝ earcearǝu kǝla oasǝ daura bolo, sǝ tsǝkɓalǝu arǝ kum amsǝban ngga, kǝla sukuru bolo.

⁹ Ɓakuli ka tunǝ sǝm ace mǝnana ɓǝ̀ so bumlulla male amur sǝm ngga ɗang, yì ka, tunǝ sǝm, ace mǝnana ɓǝ̀ sǝm kum amsǝban nǝ bu Mǝtala sǝm Yesu Kǝrǝsti ka.

¹⁰ Kǝrǝsti wú ace sǝm ace mǝnana ko ɓǝ̀ sǝm nda andǝ mǝsǝ sǝm, ko aɓa lú ka, sǝm nǝ̀ yiu aɓa yilǝmu, sǝm nǝ̀ do a tarǝ sǝm sǝnǝi.

¹¹ Ace mani ka, wu kǝ pea rǝ wun rǝcandǝa, wu kǝ ɓak rǝarǝ wun, kǝla mǝnana ado wu kǝ pak ka.

Masǝlǝata kwarkiru mala Bulǝs

¹² Wun amǝ'eamrǝarǝu, sǝm nggǝ zǝmbǝa wun, wu kǝ pea aɓwana mǝnana à kǝ pak turo aɓalǝ wun ngga gulo, yia mǝnana à ndaka aɓwana-mǝgule amur wun andǝ amǝ'kwarkir wun aɓa dotarǝu ma'wun wunǝa Mǝtalabangŋo ka.

¹³ Wu dǝmbǝri cea kǝrkǝr aɓa earcearǝu ace turo mǝnana à pakkiyi ka. Wu dumnǝ rǝpwala a rǝarǝ wun.

¹⁴ Wun amǝ'eambǝam, sǝm nggǝ kwarkir wun, wu nun kir aɓwana mǝnana à ndanǝ nkundǝr ka. Wu ɓak ɓabum amǝ'ɓangciu, wu bwalia aɓwana mǝnana à pànǝ rǝcandǝa raka. Wu dum nǝ munyi arǝ aɓwana kat.

¹⁵ Wu kǝa eari kǝɓwa aɓalǝ wun ɓǝ̀ mbwe kǝɓwa nǝ pe mǝɓike a kun mǝɓike ɗang. Ɓǝ̀ do ama a koya pwari ka, wu kǝ ɓariki wu kǝ pakki arǝ wun pe mǝɓoarne andǝ aɓwana kat.

¹⁶ Wu dumnǝ banɓoarnado a koya pwari,

¹⁷ wu came arǝ hiwi,

¹⁸ wu dumnǝ ɓabum yàwá aɓa ko man ngga; mǝnia ka nda kani mala Ɓakuli aban wun mǝnana wu ndaka mala Kǝrǝsti Yesu ka.

¹⁹ Wu kǝa eare wu par Bangŋo Mǝfele ɗang.

²⁰ Wu kǝa nyesǝ ce bang gi Ɓakuli nǝ kun aɓwana male ɓà ɗang.

²¹ Wu karǝki agir kat, wu pelǝkia pepe; wu bwal mǝnana mǝɓoarne na ka.

²² Wu kǝa sungŋo aban gir mǝnana kat pur mǝɓike ka ɗang.

²³ Adyan ngga, Ɓakuli mana pākiyi dorǝpwala ka, nǝ ɓamuri ɓǝ̀ tàr wun, ɓǝ̀ wu duk amale arǝ anjari pupup. Ɓǝ̀ yál bangŋo ma'wun, andǝ yilǝmi wun, andǝ nggūrǝ wun kat ɓǝa do aɓa ɗwanyi cau a rǝǔ a pwari mǝnana Mǝtala sǝm Yesu Kǝrǝsti nǝ̀ nyar nǝi ka.

²⁴ Yì Ɓakuli mǝnana tunǝ wun ngga, mǝ pě nǝ́ mǝsǝcau na; nǝ̀ pakka wuni.

²⁵ Wun amǝ'eamrǝarǝu, wu pakka sǝm hiwi gbal.

²⁶ Wu makkia amǝ'eamrǝarǝu kun kat, nǝ makkun earcearǝu ulang mala amǝkpata Ɓakuli.

²⁷ Ən nggǝ tsǝka wuni, aɓa lullǝ Mǝtalabangŋo, wu ɓal mǝnia yì cautera ka aban amǝ'eamrǝarǝu kat.

²⁸ Ɓwamuru mala Mǝtala sǝm Yesu Kǝrǝsti, ɓǝ̀ do ata wun.