1 Amǝ Tasalonika 3 - Maləmce Məfele mala Ɓakuli: Kurcau Məbəshe

¹ Nda, lang sǝm yì sǝni pà sǝm nǝ̀ gandǝ twal gandǝrǝu ɗǝm raka, sǝm yì ɗenyi ama nǝ̀ ɓoaro ɓǝa nying sǝm nǝmurǝ sǝm ɓǝ̀ sǝm do aɓa Atina,

² sǝ sǝm tasǝ Timoti ɓǝ̀ kyane ɓǝ̀ kya sǝn wun. Yì ka, mǝ'eam sǝm na andǝ ɓi'sǝm mǝturo mala Ɓakuli aɓa hamnǝ Cau Amsǝban mala Kǝrǝsti. Sǝm turi aban wun ace mǝnana ɓǝ̀ yi ɓakɓabum wun, ɓǝ̀ dupa wun gbasha aɓa paɓamuru ma'wun aban Kǝrǝsti.

³ Sǝm pa anggo, ace mǝnana ɓǝ̀ ɓeɓwa aɓalǝ wun, ɓǝ̀ kǝa dǝurǝo ata cau mala amǝnia yì atanni ka ɗang. Sǝ wu sǝlǝna ama mǝno ka kàni mala Ɓakuli na ace sǝm.

⁴ Nda gir mǝnana tsǝa, mana sǝm nda aban wun ngga, sǝm akdǝmbǝa sǝm camarǝ bangga wun ama sǝm nǝ̀ ngga kum pàtanni a bu aɓwana. Sǝ ndo gbal, wu sǝnǝni, kǝla mǝnana wu sǝlǝ ka.

⁵ Ace mani ka, lang ǝn sǝni, pa mǝ nǝ gandǝ twal gandǝa ɗǝm raka, nda sǝ ǝn tasǝ Timoti, ɓǝ̀ yiu ɓǝ̀ yi sǝn tà wun aɓa do paɓamuru ma'wun aban Yesu. Ɓangciu pakkam ama, ce wu earǝ́nì mǝkarǝkiban, yì Shetan swarkina wun, wu ɗekina kpata Yesu, sǝ turo mala Ɓakuli mǝnana sǝm pe aɓalǝ wun ngga, uena ɓà!

Timoti yinǝ cau mala do lidǝmbǝa mala amǝkpata Yesu a Tasalonika

⁶ Sǝ a dyan ngga, Timoti nyarǝna yina aban sǝm. Yi bangŋǝna sǝm cau mǝɓoarne mala paɓamuru ma'wun aban Ɓakuli andǝ earcearǝu ma'wun. Ɗǝm ngga, bangga sǝm ama wu kǝ ɗenyi nǝ do mǝɓoarne ma'sǝm sǝnǝa wun, wu kǝ pak nzal sǝn sǝm, kǝla mǝnana ado, sǝm nggǝ pak nzal sǝn wun ngga.

⁷ Ace mani ka, wun amǝ'eamrǝarǝu, kat andǝ do mǝkwane andǝ pàtanni mǝnana sǝm nda a ɓalǝi ka, sǝm kum ɓakɓabum nǝ cau mǝnana sǝm ok amur paɓamuru ma'wun aban Kǝrǝsti ka.

⁸ Adyan ngga mǝnia yì gir ka, loasǝna sǝm ɗǝm, acemǝnana sǝm sǝlǝna ama wun ngga, wu nda aban came kàngkàng aɓa dotarǝu ma'wun wunǝa Mǝtalabangŋo Yesu.

⁹ Ya ulang yàwá na sǝm nǝ̀ pakki Ɓakuli ace wun! Ata cau ma'wun ngga, sǝm ndanǝ banɓoarnado kǝrkǝr a ɓadǝm Ɓakuli ma'sǝm!

¹⁰ Du andǝ pwari, sǝm nggǝ pak hiwi nǝ ɓabum sǝm kat kǝrkǝr aban zǝmbǝi Ɓakuli, ɓǝ̀ pa sǝm dǝmbǝu ɗǝm, ɓǝ̀ sǝm sǝn wun, ace mǝnana ɓǝ̀ sǝm kania wun aɓea agir mǝnana ɓoaro ɓǝ̀ wu surǝia aɓa paɓamuru ma'wun aban Ɓakuli ka.

¹¹ Ado ka sǝm nggǝ zǝmbǝa ama ɓǝ̀ Ɓakuli ma'sǝm, yì Tar sǝm nǝ nggearǝì, andǝ Mǝtala sǝm Yesu, mǝnba sǝm njar ace yiu aban wun!

¹² Sǝm nggǝ pak hiwi ama ɓǝ̀ Mǝtalabangŋo tsǝk earcearǝu ma'wun arǝarǝ wun andǝ aɓwana kat, ɓǝ̀ lidǝmbǝa nǝ gulo sǝ ɓǝ̀ kǝ aliki, kǝla mǝnana earcearǝu ma'sǝm aban wun kǝ pak ka.

¹³ Anggo ka nǝ̀ pa wun rǝcandǝa mala ɓabum ace do tár ɓamuru ace Ɓakuli, andǝ ɗwanyi cau a rǝǔ a ɓadǝm Ɓakuli ma'sǝm mǝnana nda Tarrû ka, a pwari mǝnana yì Mǝtala sǝm Yesu nǝ̀ yiu nǝi, andǝ amǝturonjar male kat ka. Amin.