1 Amǝ Tasalonika 1 - Maləmce Məfele mala Ɓakuli: Kurcau Məbəshe

Makkun mala Bulǝs

¹ Mǝnia yì cautera ka pur nǝban Bulǝs, andǝ Silas, andǝ Timoti. Aban ká aban ikǝlisiya mala amǝ Tasalonika, aɓwana mala Ɓakuli Tarrû, andǝa mala Mǝtalabangŋo Yesu Kǝrǝsti. Ɓǝ̀ ɓwamuru andǝ dorǝpwala mala Ɓakuli do ata wun.

Paɓamuru mala amǝkpata Yesu a Tasalonika ka

² A koya pwari ka, sǝm nggǝ pakki Ɓakuli yàwá ace wun, sǝ sǝm nggǝ pak hiwi tutu ace wun kat.

³ Aɓa hiwi ma'sǝm amur wun aban Ɓakuli ma'sǝm yì Tarrú ka, sǝm nggǝ ɗenyi nǝ pé ma'wun aɓa paɓamuru, andǝ earcearǝu ma'wun mǝnana tsǝa wu pakturo kǝrkǝr, andǝ came mala tsǝkɓalǝu ma'wun arǝ Mǝtala sǝm Yesu Kǝrǝsti.

⁴ Wun amǝ'eam sǝm, sǝm sǝlǝna ama Ɓakuli earǝna ce wun, nda sǝ tàr wun ace mǝnana ɓǝ̀ wu duk aɓwana male ka.

⁵ Cau Amsǝban mǝnana sǝm yiu nǝi aban wun ngga, pà aɓa ne anggo nǝmurǝì ɗang, nda gbal aɓa rǝcandǝa mala Bangŋo Mǝfele, andǝ pa'eare mǝkǝrkǝr nì mǝnana lǝmndǝ ama cau mana sǝm na ka mǝsǝcau na ka. Wu sǝlǝna rǝ ulang do mǝnana sǝm do aɓalǝ wun àkǝ̀ ce ɓoaro ma'wun ngga.

⁶ Wu yi duk amǝ twalkusǝ sǝm andǝ mala Mǝtalabangŋo; kat andǝ tanni ma'wun kǝrkǝr ka, wu ak cau mala Ɓakuli nǝ banɓoarnado mala Bangŋo Mǝfele.

⁷ Ace mǝno ka, wu dumǝna amǝkpata Yesu mǝnana amǝkwaɗi aɓa nzali Masǝdoniya andǝ Akaya kat, à nǝ̀ sǝna arǝ wun sǝ à nǝ̀ twal kusǝ wun ngga.

⁸ Sǝ ado, cau mala Mǝtalabangŋo ka, nda rǝ puro nǝ ban wun aban ká aban aɓwana aɓa nzali Masǝdoniya andǝ Akaya kat. Sǝa ma mǝno na nǝmurǝì ɗang, cau mala paɓamuru ma'wun gbal aban Ɓakuli ka, mesǝna aban aɓwana a koya ban. Yale sǝm pànǝ cau mǝnana ɗǝm sǝm nǝ̀ nea wia amur paɓamuru ma'wun ngga ɗang.

⁹ Aɓwana nǝ ɓamuria na à cama rǝ na cau mala agir mǝɓoarne mana wu pak kat ace ak sǝm, mana sǝm waria sǝn wun ngga. À bang ce vwakibu ma'wun arǝ ankúl ace kpata Ɓakuli mǝ'mǝsǝcau nì andǝ mǝyilǝmuì.

¹⁰ Ɗǝm ngga à bang cau mala do kundǝmuru ma'wun arǝ yiu mala Muna mala Ɓakuli nǝ kuli, yì muna male mana loasǝi a ɓembe ka. Nda Yesu mana nda mǝ'amsǝ sǝm a bu tanni mala bumlulla mǝɓike mala Ɓakuli mǝnana kǝ yiu ka.