1 Amǝ Korinti 3 - Maləmce Məfele mala Ɓakuli: Kurcau Məbəshe

Amǝturo mala Ɓakuli

¹ Wun amǝ'eambǝam, aɓa mǝsǝcau ka, ǝn gandǝ na wun cau kǝla mǝnana mǝ nǝ nea aɓwana mana ǝn sǝlǝna nǝma à ndanǝ Bangŋo mala Ɓakuli ka ɗang. Ən na wun cau kǝla mǝnana mǝ nǝ ne amǝɓanza ka, acemǝnana wun ngga, wu kǝ pak gir kǝla abangna-muna aɓa kpata Kǝrǝsti.

² Nda gir mǝnana tsǝa, kǝ kiura mala abangna-muna, nda mǝnana ǝn pa wun ngga. Ən gandǝ pa wun girlina mala aɓwana mǝnana à karǝna ɓwa ka ɗang, acemǝnana wu lǝmndǝ ama wu karǝna ɓwa ɗang. Sǝ ko ado ka, wu malaká karǝ ɗang,

³ acemǝnana gir mana nggūrǝu earkiyice ka nda wu ginggi ate ka piu. Yi mǝnana mɓali na kam arǝarǝ wun andǝ ɓikido ka, mǝno ka lǝmndǝ ama wu ndaka mala ɓanza re? Wu pa aɓa do ulang do mala amǝɓanza re?

⁴ Ɓǝ̀ ɓeɓwa aɓalǝ wun kǝ na ama, “Mim ngga Bulǝs na ǝn nggǝ kpate ka,” sǝ ɓeɓwa ka ama, “Mim ngga Apolo na ǝn nggǝ kpate ka,” mǝno ka lǝmndǝ ado ama wu pa kǝla amǝɓanza re?

⁵ Sǝ nggearǝì ka, yana nda Bulǝs? Sǝ yana nda Apolo? Yia ka, kǝ amǝturo mala Ɓakuli mǝnana à hamnǝ cau male sǝ wu yi é, kǝla mǝnana Ɓakuli pe koyan ngga turo male mǝnana nǝ̀ pak ka re?

⁶ Mim ngga ǝn ɓeal mǝsǝɓeale, sǝ Apolo ka mur na pà ka, sǝ Ɓakuli na tsǝk agir sǝ à gul ka.

⁷ Lǝmndǝ ama mǝɓeale andǝ mǝpà mur ka à nda à sǝnggiyi ka ɗang, kǝ Ɓakuli mǝnana tsǝa sǝ agir gul ka, nda à nǝ̀ sǝn ngga.

⁸ Sǝ mǝɓeale andǝ mǝpà mur ka à nda mwashat, sǝ koyan aɓalǝia ka, Ɓakuli na nǝ̀ pe wi tangnakusǝi amur gir mǝnana ɓwe pak ka.

⁹ Sǝm ngga sǝm ndaka amǝturo sǝnǝa Ɓakuli. Sǝ wun ngga, wu nda ka ɓaban mala Ɓakuli mǝnana rikiyi ka. Ɗǝm ngga, wu nda ka ɓah mala Ɓakuli mǝnana ɓakkiyi ka.

¹⁰ Nǝ ɓwamuru mala Ɓakuli mǝnana lǝmndǝam ngga, ǝn pak turo a pe mala mǝsǝlǝɓa, ǝn tsǝk kusǝɓǎ, sǝ ɓeɓwa yiu kǝ ɓak ɓa amuri. Sǝ koyan aɓalǝ sǝm ngga ɓǝ̀ tsǝk kiri, ɓǝ̀ ɗenyi nǝ ulang ɓa mǝnana kǝ ɓak ka.

¹¹ Sǝ kǝ ɓe kusǝɓa pà kàm ɓe kǝ ɓwa nǝ̀ kwakite mǝnana nda ɗàng andǝ mana à angŋa dǝmbǝa à kwakinate ka ɗang, mǝnana nda Yesu Kǝrǝsti ka.

¹² Koya ɓwa nani sǝ ɓak ɓa amur mǝnia yì tita kusǝɓǎ ka, ko nǝ zǝnariya, ko azǝrfa, ko nǝ atali gǝna, ko nggun mǝ ime, ko oazo, ko kùrí ka,

¹³ turo mala ko ya ɓwa ka nǝ̀ pusǝrǝi, acemǝnana a Pwari mala Kǝrǝsti ka, tea nǝ̀ puro. Bǝsa na nǝ̀ pusǝ tea ka. Sǝ bǝsa na nǝ̀ karǝki koya turo nani ɓwa pè ka.

¹⁴ Sǝ ɓǝ̀ turo mala ɓwa, mǝnana ɓak amur yi kusǝɓa camǝna ka, ɓwe nǝ̀ kum tangnakusǝi.

¹⁵ Sǝ ɓǝ̀ turo mala kǝɓwa pi ka, ɓwe nǝ̀ ɗwanyi tangnakusǝi, kat andǝ amani ka, nǝ̀ kum auwa, kǝla ɓwa mǝnana pur aɓa bǝsa api pibǝsa ka.

¹⁶ Wun ngga wu sǝlǝ mbak ama wu ndaka Ndàmǝgule mala Ɓakuli, sǝ Bangŋo mala Ɓakuli ka ndanǝ do aɓalǝ wun?

¹⁷ Ɓǝ̀ kǝɓwa kiɗiki Ndàmǝgule mala Ɓakuli ka, Ɓakuli nǝ̀ kiɗikì. Acemǝnana Ndàmǝgule mala Ɓakuli ka nda àkǝ̀ ce yì, sǝ wu nda ka Ndàmǝgule mala Ɓakuli.

¹⁸ Ɓǝ̀ kǝɓwa ɓǝ̀ kǝa swarki ɓamuri ɗang. Sǝ ɓǝ̀ ɓe kǝɓwa aɓalǝ wun kǝ sǝni kǝla ndanǝ sǝlǝe mala ɓanza man ngga, yì ka, ɓǝ̀ kpata njar mǝnana amǝɓanza twali ɓanggea na ka, sǝ yì ka, nǝ̀ duk mǝsǝle aɓa mǝsǝcau.

¹⁹ Acemǝnana gir mana ɓanza man kǝ sǝni kǝla nda sǝlǝe ka, nda ɗwanyi sǝlǝe aban Ɓakuli. Kǝla mǝnana Malǝmce bang ngga, “Ɓakuli kǝ bwal amǝ sǝlǝe aɓa kutan malea.”

²⁰ Sǝ ɓe banì cau mala Ɓakuli bangŋa ama, “Yì Mǝtalabangŋo ka, sǝlǝna ama aɗenyicau mala amǝ'sǝle mala ɓanza man ngga, amǝɓane na.”

²¹ Kǝɓwa pà kàm ado mǝnana nǝ̀ na cau nǝ̀ nggori amur gir mǝnana ɓwapǝndǝa nǝ̀ gandǝ pe ka ɗang. Aɓa mǝsǝcau ka, agir kat à dumǝna a ma'wun.

²² Bulǝs, andǝ Apolo, andǝ Bitǝrus ka, a ma'wun na. Ɓanza mǝnia ka, ko aɓa do nǝ yilǝmu, ko lú, andǝ agir mǝnana adyan andǝ amǝnana à nǝ̀ yiu a dǝmbǝa ka, yia kat ka a ma'wun na.

²³ Sǝ wun ngga, wu ndaka mala Kǝrǝsti, sǝ Kǝrǝsti ka, mala Ɓakuli na.