1 Amǝ Korinti 2 - Maləmce Məfele mala Ɓakuli: Kurcau Məbəshe

Cau amur Kǝrǝsti andǝ nggun gangndi

¹ A pwari mǝno ǝn yiu nǝi aban wun, wun amǝ'eambǝam, ace hamnǝ mǝsǝcau ɓa sǝmbǝrǝa mala Ɓakuli mana lǝmndǝa mi ka, ǝn pak turo nǝ sǝlǝne andǝ surǝgir mǝgule ɗang.

² Acemǝnana ǝn twal a bumam nǝma ǝn earce surǝ ɓe kǝgir aɓalǝ wun ɗang, she kǝ Yesu Kǝrǝsti, kǝ yì mǝnana à gballì amur nggun-gangndi ka.

³ Sǝ yiu mem aban wun ngga, nda aɓa ɗwanyi rǝcandǝa andǝ do nǝ ɓangciu, andǝ rǝɓǝla mǝkǝrkǝr nì.

⁴ Sǝ kanigir mem andǝ nacau mala Ɓakuli mem ngga, pà aɓa kunɓoarna andǝ nacau sǝlǝe mala ɓwapǝndǝa ɗang. Nda aɓa lǝmndǝ rǝcandǝa andǝ Bangŋo mala Ɓakuli,

⁵ ace mǝnana paɓamuru ma'wun ngga, ɓǝ̀ kǝa do amur sǝlǝe mala ɓwapǝndǝa ɗang, ɓǝ̀ do amur rǝcandǝa mala Ɓakuli.

Sǝlǝe mala Ɓakuli

⁶ Sǝm ngga, sǝm nggǝ hamnǝ cau mala sǝlǝe aban aɓwana mǝnana à karǝna ɓwa aɓa Bangŋo ka. Sǝ mǝnia ka sǝlǝe mala ɓanza man na ɗang, ko sǝlǝe mala aɓwana mǝnana amurǝma na a ɓanza man, amǝnana rǝcandǝa malea na ban mal ka ɗang.

⁷ Sǝlǝe mǝnana sǝm nggǝ hamnǝi ka, sǝlǝe mala Ɓakuli na, mǝnana sǝmbǝrǝi ɗiɗyal ka. Sǝ mǝnia yì sǝlǝe ka, Ɓakuli pe ace ɓoaro ma'sǝm, twal a share ta ɓanza.

⁸ Kǝɓwa pà kàm aɓalǝ amurǝma mala nza man mǝnana surǝ mǝnia yì sǝlǝe ka ɗang. Ɓǝa pǝlǝa ama à surǝni ka, ɓǝ́ à gballì ma Mǝtalabangŋo mǝnana nǝ gulo kat ka ɗang.

⁹ Kǝla mǝnana Malǝmce bang ngga, “Kǝ mǝsǝu malaká sǝn ɗang, kiru malaká ok ɗang, yale malaká kutio aɓa ɗenyicau mala kǝɓwa ɗang, gir mǝnana Ɓakuli gilǝkini ace aɓwana mǝnana à kǝ earce ka.”

¹⁰ Sǝ Ɓakuli ka, lǝmndǝna sǝm mǝnia nǝ Bangŋo male. Sǝ Bangŋo mala Ɓakuli ka, nda sǝnggiyi ɓalǝ agir kat ka, ko nggearǝ acau mǝlime mala Ɓakuli.

¹¹ Yana surǝ gir mǝnana nda a ɓabum ɓwa ka? Kǝ bangŋo mala ɓwa mǝnana nda a ɓalǝi ka, nda surǝ agir male ka re? Anggo gbal, kǝ Bangŋo mala Ɓakuli na surǝ agir male kat ka.

¹² Sǝm ngga, sǝm ak bangŋo mala ɓanza ɗang, kǝ Bangŋo mala Ɓakuli mǝnana turabani ka nda sǝm ak ka, ace mǝnana ɓǝ̀ sǝm surǝ agir mǝnana kat Ɓakuli pa sǝm mia ɓà ka.

¹³ Ace mani ka, aɓa nacau ma'sǝm ngga, sǝm nggǝ pakturo nǝ gir mǝnana à kania sǝm nǝ sǝlǝe mala ɓwapǝndǝa ka ɗang. Cau ma'sǝm nda kǝ mǝnana Bangŋo mala Ɓakuli kania sǝm ngga. Kǝ nda sǝm nggǝ mǝnggi ɓa mǝnia yì mǝsǝcau mala Bangŋo ka, aban aɓwana mǝnana gbal à ndanǝ Bangŋo mala Ɓakuli ka.

¹⁴ Sǝ ɓwa mǝnana pànǝ Bangŋo mala Ɓakuli raka, pà nǝ̀ gandǝ ak aɓoro mǝnana à pur aban Bangŋo mala Ɓakuli ka ɗang. Mǝno yì ɓwa ka pà nǝ̀ gandǝ surǝ amǝnia yì agir ka ɗang, acemǝnana agir mǝɓane na abani, sǝ pà nǝ̀ surǝia ɗang, acemǝnana agir ka nǝ bu Bangŋo mala Ɓakuli sǝ à nǝ̀ surǝia.

¹⁵ Sǝ ɓwa mǝnana kat ndanǝ Bangŋo mala Ɓakuli ka, dumǝna ama nǝ̀ gandǝ gakita mǝɓoarne andǝ mǝɓane mala koya gir, sǝ kǝɓwa pà kàm nǝ̀ ɓashi wi ɗang.

¹⁶ Kǝla mǝnana Malǝmce bang ngga, “Yana ɗe surǝ ɗenyicau mala Mǝtalabangŋo? Yana ɗe nǝ̀ gandǝ pe wi cau nǝ̀ kwarkiri?” Sǝ sǝm ngga, sǝm ndanǝ ulang ɓabum mala Kǝrǝsti.