Tayitùs 1 - Ikan feg

¹ À ya mo Pɔl, wə̀d àfàʼì Ŋwiye ne bə̀ yaʼ wə̀dtɔm Kristo ŋwàʼri àŋwàʼrì azo̰. Ŋwiye ya chɔʼ amə gha mə̀ ghiyə ibḛfiŋ abə bəd mbe ne wì chɔ̀ʼi we təm kà. Wì ya bə̀ chɔʼ amə gha mə̀ ghiyə mbe kyeri tesiʼ we ne biri ghì mbɔb chughi ane ikuchèg ne Ŋwiye kə̀bi.

² Tesiʼ gho̰ biri ghì tì nɔ̀ŋì ìta tikɔndi se ghɔ̀mɔ̀ ìtḛ̀ ighə̀m imɔʼ we ne Ŋwiye kaʼi. Chəyi Ŋwiye we kàʼà anug ze chè ako. Wì ya fə kàʼ anug azo̰ bɔŋ se tànga isəg.

³ Ane nyùmə̀ ya kòʼi, Ŋwiye ya ghì ìngam məd dù zen. Wì ya zì ìngam gho̰ inum ikye abo gha mə chete kwàʼ icheg ne Ŋwiye we ne pùmnə awa wì kə̀bi.

⁴ Mə ŋwàʼrì anìŋ ine àghò Tayitùs. Àghò ya ìmə ŋwan tesiʼ ane ibḛfiŋ we ne tì beri inga Kristo. Ŋwiye ne yaʼi Mbaʼ tì Yeso Kristo ne ya chi awa inga ngəʼ, wì ghiyə ìchɔ̀mì ine bə̀ ghì àghò chughi ane àbɔrɔ̀bɔd.

Àfàʼì ne Tayitùs kòʼi ni fàʼ a Kred

⁵ Aton ne mə̀ ya sàŋi awe a Kred ya gha àghò mana sèmbì inug mɔ̀ʼɔ mbe ne chəyi tì ya kiri sembi, bə̀ chɔʼ itog bəd inga tifeti bəd Kristo inga isiŋi ijìm a Kred icheg ne mə̀ ya gha ine.

⁶ Wə̀d ne yaʼi atog wə̀d inga ifeti bəd Kristo mənyìʼ yaʼ wə̀d ne chəyi bəd beri anug tibɔ̀ŋ mɔ̀ʼɔ ni ghà imbə̀ʼ aməd. Wì beri ni nam àyi məyi imɔʼ bə̀ chùghi məyi tì àyi we imɔʼ. Bɔn məd beri ni yaʼ bɔn ne bḛ Kristo bə̀ yaʼ bɔn ne chəyi mbe bùrə̀ isiŋi kə̀ ghìyə̀ tìzughə̀.

⁷ Icheg ne atog wə̀d igun bəd Kristo ya wə̀d ne nḛ̀ àfàʼì Ŋwiye, wì bèrì ni yaʼ wə̀d ne chəyi bəd mbe ghàmà anug tibɔ̀ŋ imbə̀ʼ aməd. Imbə̀ʼ wì yaʼi wə̀d ne nɔ̀ nyɔd kə̀ wə̀d ne zàmbà gàŋa kə̀ wə̀d ne no be, kə̀ wə̀d ne kɔ̀ŋɔ̀ àzɔ̀ŋì, kə̀ wə̀d ne ghə̀ʼrə̀ ikab.

⁸ Wì yaʼ wə̀d ne nìŋə bəd ibo inga nəb icheg chɔm bə̀ kɔ̀ŋɔ̀ ni ghì inug chɔm. Wì yaʼ wə̀d ne kyeri icheg ni nyimbi nyɔd bə̀ təm kòʼ imbìghè abə Ŋwiye. Wì yaʼ wə̀d ne ghìyə̀ inug ne chwìye ìzḛzḛ bə̀ ya nɔ̀ŋɔ̀ mə̀nɔ̀ʼɔ̀ Kristo.

⁹ Wì yaʼ wə̀d ne nyìme inug mbe ne mbi ya chwiti ibo imbə̀ʼ Kristo kwàʼ icheg chɔm. À ya inug ne tì wə̀d nɔŋi fìŋ igun. Wì beri ni nyimi inug kwàʼ icheg chɔm imbə̀ʼ kyeri icheg ni ya nə̀rə mə̀mbin ane inug chɔm ne wì biri ya chwìte inɔb bə̀ ya chwìte abə bəd mbe ne tàŋà inug imbə̀ʼ Kristo imbə̀ʼ icheg ne à ya inug tesiʼ.

¹⁰ Mə ya ghàmà anìŋ imbə̀ʼ icheg ne bəd nɔʼ nɔʼ mbe angu ne chəyi mbe kə̀bə̀ ni zugri inug ne itog bəd Kristo mbe ghà. Mbɔb mbe ghàmà inug zɔbi nɔʼ nɔʼ ne zìyè àbùrì inga bəd bə̀ tàmba bəd. Bəd mbo̰ ne ghìyə̀ inug mbo̰ ya bəd mbe ne ghà gha mbi mənyìʼ ŋwed wə̀d. Mbɔb ya ghà ane imbə̀ʼ icheg ne mbɔb ya bì bḛ yaʼ iku we ne mə̀Ju yaya ghìyə̀ anug Ŋwiye.

¹¹ Àghò kirə ika ni ghì gha mbe chim tizi imbə̀ʼ icheg ne mbɔb mbe bùrə̀ tinəbi tijìm ane inug mbe ne mbɔb mbe chwìte ne chəyi mbi koʼi ni chwiti. Mbɔb ya chwìte inug mbe məyi ni bèrì ìwɔb ikab.

¹² Ìwɔb wə̀dkə̀n mɔ̀ʼɔ ya gha, “MəKred ya bəd inug ako. Mbɔb ya ghìyə̀ inug bə bə kwàʼ icheg nyam tɔ tɔ. Mbɔb ya məgwed ne jə̀ghə chè ati.”

¹³ Anug azo̰ ne wə̀dkə̀n we ya gha ya anug tesiʼ. Ane, àghò bèrì ni ghàm gaŋ abə tiku bəd mbo̰ kwàʼ ane gì ka ka ni ghì gha ìwɔb ibḛfiŋ igun Kristo təm kà.

¹⁴ Ane, chəyi mbɔb biri ywìri nɔ̀ŋì atog igun tìmùghì ako te abə mə̀Ju kə̀ nɔ̀ŋì atog igun tikə te ne bəd mbe ne to̰ awɔb inug tesiʼ mbe ghà.

¹⁵ Inug ijìm ya zḛ abə bəd mbe ne ìtɔb fìŋ zḛ. Àsi bəd mbe ne chəyi ìtɔb fìŋ zḛ, chəyi inug mbe zḛ inɔb. Chəyi fìŋ ze zḛ abə wə̀d ne chəyi wì nɔŋi ibḛfiŋ igun Kristo. Tesiʼ ya gha, ìtɔb tikɔndi fɔrɔ ìtɔb fìŋ fə bə mànì.

¹⁶ Mbɔb mbe gha mbɔb kyèri Ŋwiye, si ya gha, ìtɔb tighi inug ya chwìye gha mbɔb fə ton awɔb Ŋwiye. Ŋwiye ya bà̰ awɔb imbə̀ʼ icheg ne mbɔb ya ghìyə̀ tìzughə̀ abə Ŋwiye. Chəyi tì mbi fàʼ àfàʼì chɔm mɔ̀ʼɔ ka.