Rm 6 - Ikan feg

Tè dù aton ika inug tibɔ̀ŋ nyi inga Kristo

¹ Amad anìŋ, ze kə chwìye gha? Tì wa che imbìghè ni ghì inug tibɔ̀ŋ imbə̀ʼ Ŋwiye che imbìghè ni ghì ìchɔ̀mì ina?

² Chəyi ze koʼi ane ka. Anug mə̀ yaʼ inug tibɔ̀ŋ, mba ya icheg iwu bəd. Ane, chəyi tì beri ni chè imbìghè ni ya ghìyə̀ inug tibɔ̀ŋ.

³ Chəyi mbə̀ kyeri gha icheg ne tì ya niŋi mənib ni yaʼ ane ifɔti tì Yeso Kristo, mba ya icheg bəd ne bə ku tì Yeso.

⁴ Mənib mbe ne tì ya niŋi ya aneni ni chwi gha mba ya ku, mbi bə̀ twə̀ŋi awa tì Yeso. Ane, icheg ne ika Ŋwiye ya zwemne Yeso Kristo, à ya icheg ne tì koʼi ni se chùghə inga ikuchèg feg.

⁵ Icheg ne tì ya fɔti tì Yeso ane iwu məd, tesiʼ ya gha, tì biri ghum zweme icheg məd.

⁶ Tè kyèri gha Yeso ya fə bèʼì ìwa ikuchèg anun ne ya ikuchèg tibɔ̀ŋ ku igun azed abaʼri tì ìwiwən ni chìkì ika inug tibɔ̀ŋ igun ina. Wì ya ghì ane ni gha imbə̀ʼ tì ywiri yaʼ awa məfeg abə inug tibɔ̀ŋ.

⁷ À ya ane imbə̀ʼ icheg ne chəyi tì inug tibɔ̀ŋ ywìrì bèrì ika igun wə̀d ne fə ku.

⁸ Àmə yaʼ aghi ne tì ya ku tì Kristo, nji tì kyeri gha tì biri ghum bèrì ìtḛ̀ feg tì məd.

⁹ Icheg ne tì kyeri gha, Ŋwiye ya ghì Kristo zwème, chəyi wì biri ywiri ku ighəm ndəŋ. Chəyi iwu bə ywìrì bèrì ika igun məd.

¹⁰ Yeso ya ku ni chìkì ika inug tibɔ̀ŋ ane ighə̀m imɔʼ. Amad anìŋ ne wì yaʼi izɔm, wì ya se ni ghumni Ŋwiye

¹¹ À ya bə̀ ane ne mbə̀ beri ni kyeri gha, anug mə zì inug tibɔ̀ŋ, tì mənyìʼ niŋ ìwa nyɔd icheg iwu bəd imbə̀ʼ chè anjìm Yeso Kristo si bèrì ìtḛ̀ inga Ŋwiye.

¹² Ane, icheg bəd-aku, imbə̀ʼ mbə̰ saŋa awən gha inug tibɔ̀ŋ bere ika igun inən se ghìyə̀ gha mbə̀ ya kɔ̀ŋɔ̀ inug tibɔ̀ŋ.

¹³ Imbə̀ʼ mbə̰ naʼa awən apan ni gha inug tibɔ̀ŋ niŋ àzən asiŋi nyɔd mɔ̀ʼɔ ka. Ze bɔ̀ŋ yaʼ gha mbə̀ naʼa ìtən nyàmnyɔd tijìm abə Ŋwiye ni ya fàʼà inug chɔm icheg bəd mbe ne Ŋwiye fə zwemni awɔb iwu. Mbə̀ naʼa ìtən nyàmnyɔd abə Ŋwiye icheg ighi àfàʼì mbe ne fàʼà yaʼ inug ne təmi kòʼ.

¹⁴ Chəyi inug tibɔ̀ŋ beri ika igun inən imbə̀ʼ icheg ne chəyi mbə̰ mbe ywìrè ghìyə̀ inug icheg ne mə̀nɔ̀ʼɔ̀ kəbi. Mbə̰ ya ghìyə̀ inug yaʼ icheg bəd ne Ŋwiye fə ghi ìchɔ̀mì inən.

Ìbòʼì ane inug ne təmi kòʼ imbìghè abə Ŋwiye

¹⁵ Amad anìŋ, ze kə chwìye gha? Tì wa che imbìghè ni ghì inug tibɔ̀ŋ imbə̀ʼ icheg ne chəyi mə̀nɔ̀ʼɔ̀ ywirì bèrì ika igun ina fɔrɔ imbə̀ʼ icheg ne tì si yaʼ inga ìchɔ̀mì we ne Ŋwiye fə ghi ina? Indèʼ ka!

¹⁶ Chəyi àghò kyèri gha wə̀d ne àghò də̀bi ni yaʼ ifeg ibo bə̀ zùgri aməd, àghò ya kwàʼ ifeg abə ìwe Mbaʼ we ne àghò we zùgrə aməd? À ya ane, kə̀ àkə ni yaʼ ifeg abə inug tibɔ̀ŋ, ghì inug tibɔ̀ŋ ne zwète wə̀d, kə̀ àkə ni yaʼ ifeg abə Ŋwiye, zùgrə aməd, ghì inug ne təmi kòʼ ibo imbìghè.

¹⁷ Tè nàʼ məyakà abə Ŋwiye gha, à ya yaʼ mbègtog, mbə̰ ya yaʼ ìbòʼì abə inug tibɔ̀ŋ. Àsi amad anìŋ, mbə̰ mbe se nɔ̀ŋɔ̀ inug feg mbe ne tì fə chwiti inən ane ìzən fìŋ ijìm.

¹⁸ Amad anìŋ, mbə̰ fə pum abə inug tibɔ̀ŋ ne ya beri ika igun inən. Mbə̰ ya icheg məfeg abə inug mbe ne təmi kòʼ imbìghè abə Ŋwiye.

¹⁹ Mə ya nìŋə inug ne mbə̀ kyeri icheg bəd-aku ni ghàm inən anìŋ, ni ghì gha ìmbən itog zen. Mbə̰ ya kweʼì niŋ ìmbən isiŋi nyɔd icheg məfeg ni ghì izṵ inug nɔʼ nɔʼ fɔrɔ ni ghì inug izəg nɔʼ nɔʼ. Amad anìŋ, mbə̀ si niŋ ìtən nyàmnyɔd ni ghì yaʼ inug ne təmi kòʼ fɔrɔ ni ghì gha Ŋwiye so awən mbə̀ zen mànì.

²⁰ Anyumə̀ we ne mbə̀ ya yaʼi icheg məfeg abə inug tibɔ̀ŋ, chəyi mbə̀ ya mənyìʼ ghì inug ne koʼi imbìghè abə Ŋwiye.

²¹ Ane, chùd ne mbə̀ ya beri àkə iza? Mbə̰ ya anìŋ se bèrè tìnìrètog imbə̀ʼ inug ne mbə̀ yaya fàʼà. Chùd ane inug mbe ya iwu.

²² Si ya gha, amad anìŋ ne Ŋwiye fə pumni awən chì abə ika inug tibɔ̀ŋ, mbə̰ ya si icheg məfeg abə Ŋwiye. Chùd ya gha Ŋwiye fə sò awən mbə zen se fàʼà məyi ibo, wì bə̀ nàʼ ìtḛ̀ ighə̀m imɔʼ inən.

²³ Tesiʼ ya gha, chùd inug tibɔ̀ŋ ya iwu. Àsi ineʼi we ne Ŋwiye nàʼi ya ìtḛ̀ ighə̀m imɔʼ anjìm Yeso Kristo, ìwa Anɔŋisəg.