Rm 5 - Ikan feg

Anug ni təm kòʼ imbìghè abə Ŋwiye

¹ Icheg ne Ŋwiye fə ghi tì təm kòʼ anjìm ibḛfiŋ, tì fə se ane àbɔrɔ̀bɔd tì Ŋwiye anjìm ìwa Anɔŋisəg Yeso Kristo.

² À ya anjìm Yeso Kristo ne tì nyi inga ìchɔ̀mì gho̰ ne tì yaʼi inga tèchɔ̀ŋ. Ane, tì we kɔ̀mɔ̀ igo nɔ̀ŋɔ̀ ikɔndi ghɔ̀mɔ̀ ni chughi tì Ŋwiye inga kə̀tə̀d məd.

³ Kayi məyi ane. Tì ya bə̀ ywìrè kɔ̀mɔ̀ igo imbə̀ʼ icheg ne te zə̰ ngəʼ. Tì ya kɔ̀mɔ̀ igo imbə̀ʼ icheg ne tè kyèri gha ngəʼ ya ghìyə̀ tì kyère icheg ni nyimi fìŋ.

⁴ Inyimbifiŋ ya ghìyə̀ gha tì bere ikuchèg chɔm. Ikuchèg chɔm ya ghìyə̀ gha bəd bere ikɔndi chɔm ni ghɔ̀m anug ne Ŋwiye kàʼi.

⁵ Ikɔndi chɔm we ne tì nɔŋi ni ghɔ̀m, chəyi wi biri ghì gha tì bere tìnìrètog imbə̀ʼ icheg ne Ŋwiye fə zì àzi àkɔ̀ŋì inga ìta fìŋ anjìm Azwighi məd ze ne wì nàʼi ina.

⁶ Anyumə̀ ne nyùmə̀ Ŋwiye ya kòʼi, Yeso Kristo ya ku atog abə bəd mbe ne chəyi mbe ghùmnə Ŋwiye. Anyumə̀ we chəyi tì ya kiri beri ika.

⁷ Tesiʼ ya gha, ze ya kà yi abə wə̀d ni ku atog abə wə̀d ne təmi kòʼ. A ze jiʼè yi gha, wə̀d mɔ̀ʼɔ we tì wì nyìmi fìŋ ni ku atog abə wə̀d chɔ̀m.

⁸ Àsi Ŋwiye, wì chwi gha zìye kɔ̀ŋ awa icheg ne Yeso Kristo ya ku ina atog ne tì yaya kiri ghiyə inug tibɔ̀ŋ.

⁹ Icheg ne anəm Yeso fə ghi tì təm kòʼ imbìghè abə Ŋwiye, à ya kwàʼ ane ne Ŋwiye biri chì àzi agaŋ igun ina anjìm Kristo.

¹⁰ Anyumə̀ ne tì ya kiri yaʼi bəd ìpàb Ŋwiye, wì ya ghì tì si yaʼ mə̀sə̀ʼ məd anjìm Ŋwan məd we ne ya ku imbə̀ʼ awa. Amad anìŋ ne tì si yaʼ mə̀sə̀ʼ Ŋwiye, tì fə pum anjìm ìtḛ̀ Ŋwan məd.

¹¹ Anug kyen ndəŋ ya gha, tì we gyènde abə Ŋwiye anjìm Anɔŋisəg Yeso Kristo ne ghi tì si yaʼ mə̀sə̀ʼ Ŋwiye.

Iwu ya nyi igun bəd anjìm Adàm, ìtḛ̀ si yèʼe anjìm Kristo

¹² Icheg ne inug tibɔ̀ŋ ya nyi inga isəg anjìm wə̀d imɔʼ, iwu ya bə̀ nyi anjìm inug tibɔ̀ŋ. Ane, iwu ya nyi igun wə̀d ijìm imbə̀ʼ icheg ne anjìm wə̀d imɔʼ, wə̀d ijìm ya gùg anug.

¹³ Inug tibɔ̀ŋ ya fə se yi inga isəg bɔŋ Ŋwiye ya se nàʼà mə̀nɔ̀ʼɔ̀ abə Muse. Si ya gha, chəyi mbe nyìme wə̀d gha wè gùg anug asiŋi ne chəyi mə̀nɔ̀ʼɔ̀ angu.

¹⁴ Tesiʼ ya gha, iwu ya bèrì ika igun wə̀d ijìm ni ko ane nyùmə̀ Adàm ghò pè ane nyùmə̀ Muse. Iwu bèrì ika fɔrɔ igun bəd ne chəyi mbi ya gùghi anug kwàʼ icheg Adàm. Adàm ya iku wə̀d ne yaʼi icheg wə̀d we ne ya beri ni ghum yeʼe.

¹⁵ Si ya gha, chəyi bəd mbo̰ məbe yaʼi andəŋ andəŋ imbə̀ʼ icheg ne chəyi ineʼi Ŋwiye yaʼi icheg inug tibɔ̀ŋ ìmbi Adàm. À ya tesiʼ gha bəd nɔʼ nɔʼ ya ku anjìm anug tibɔ̀ŋ wə̀d we imɔʼ. Si ya gha, ìchɔ̀mì Ŋwiye faŋ. Ineʼi məd we ne wì nàʼi abə wə̀d ijìm anjìm ìchɔ̀mì wə̀d imɔʼ ne ya Yeso Kristo, we faŋ chè àfàʼì inug tibɔ̀ŋ.

¹⁶ Chəyi ineʼi Ŋwiye yaʼi icheg iwu ne ya beri ika igun bəd anjìm anug tibɔ̀ŋ wə̀d imɔʼ. Ŋwiye zì ngəʼ igun bəd məjìm anjìm anug tibɔ̀ŋ wə̀d imɔʼ. Si ya gha, ineʼi Ŋwiye we ne ya yeʼe anjìm inug tibɔ̀ŋ nɔʼ nɔʼ ya ghì bəd təm kòʼ imbìghè abə Ŋwiye.

¹⁷ À ya tesiʼ gha anjìm anug tibɔ̀ŋ Adàm, iwu ya bèrì ika igun wə̀d ijìm. Si ya gha, àfàʼì ne wə̀d imɔʼ ne ya Yeso Kristo fàʼi, ze faŋ chè. Ane, bəd mbe ne niŋi ìchɔ̀mì nɔʼ nɔʼ we ne Ŋwiye nàʼi ne Ŋwiye fə bə ghì fìŋ chɔ̀m niŋ awɔb ane bəd ne ghìyə̀ inug ne təmi kòʼ, mbi biri chughi se fɔrɔ tùmbə̀ isəg tì Kristo.

¹⁸ Ane, icheg ne anug tibɔ̀ŋ wə̀d imɔʼ fə ghì wə̀d ijìm gug isaʼi imbìghè abə Ŋwiye, à ya bə̀ ane ne anug chɔm wə̀d imɔʼ fə bə ghì wə̀d ijìm təm zen imbìghè abə Ŋwiye bə̀ jəg ìtḛ̀.

¹⁹ Icheg ne wə̀d imɔʼ ya ghi tìzughə̀ ghì bəd nɔʼ nɔʼ se ghìyə̀ inug tibɔ̀ŋ, à ya bə̀ ane ne wə̀d imɔʼ zùgrə Ŋwiye, bəd nɔʼ nɔʼ si təm kòʼ imbìghè abə Ŋwiye.

²⁰ Mə̀nɔ̀ʼɔ̀ Muse ya ghì inug tibɔ̀ŋ nɔʼ. Si ya gha, asiŋi ze ne inug tibɔ̀ŋ nɔʼi ìchɔ̀mì Ŋwiye ya nɔ̀ʼɔ chè.

²¹ Icheg ne inug tibɔ̀ŋ ya beri ika igun isəg anjìm iwu, à ya bə̀ ane ne ìchɔ̀mì Ŋwiye biri bèrì ika igun isəg anjìm icheg ne bəd mbe ghìyə̀ inug ne təmi kòʼ, ane, se nàʼà ìtḛ̀ ighə̀m imɔʼ anjìm ìwa Anɔŋisəg Yeso Kristo.