Rm 2 - Ikan feg

Ŋwiye we sɔ̀bɔ isaʼi ane icheg ne koʼi

¹ Icheg ne ze yaʼi ane, àghò ne sɔ̀bɔ isaʼi igun bəd ndəŋ, chəyi tì àghò gha, “Chəyi mə̀ kə kyeri.” À ya ane imbə̀ʼ icheg ne anyumə̀ ne àghò we sɔ̀bɔ isaʼi igun wə̀d, à ya bə̀ isaʼi ne àghò we zìyè igun ìwe nyɔd. À ya ane imbə̀ʼ icheg ne, àghò we ne sɔ̀bɔ isaʼi igun bəd, àghò we bə̀ ghìyə̀ inug mbe ne mbɔb mbe ghìyə̀.

² Tè kyèri gha Ŋwiye we sɔ̀bɔ isaʼi igun bəd mbe ne ghìyə̀ tiku inug ìto̰ kwàʼ ane icheg ne koʼi.

³ Ane, wə̀d-aku icheg ine, àghò wa kɔ̀ndi gha, icheg ne àghò we sɔ̀bɔ isaʼi igun bəd mbe ne ghìyə̀ tiku inug ìto̰, bə̀ ywìrè ghìyə̀ inug angu, chəyi Ŋwiye biri ghum sɔb isaʼi igun ine?

⁴ Àghò we wa wèghè inug chɔm nɔʼ nɔʼ mbe ne Ŋwiye we ghìyə̀ ine anjìm fìŋ chɔm məd bə̀ fɔrɔ icheg ne Ŋwiye we nyìmbe fìŋ tì ine, icheg ne wì sàŋi gha àghò be ghìyə̀ inug mbe ne chəyi mbi koʼi? Kə̀ chəyi àghò kyèri gha Ŋwiye ya ghìyə̀ fìŋ chɔm ine, nàʼà apan ine gha àghò bəŋi fìŋ sìkì inug tibɔ̀ŋ?

⁵ Icheg ne àghò beri fìŋ ne ka ne chəyi àghò kə̀bi ni bə̀ŋì, àghò ya anìŋ chè imbìghè ghìyə̀ Ŋwiye gàŋa tì ine. Ane, igun aneg ze ne Ŋwiye biri sɔb isaʼi igun bəd ane icheg ne koʼi, wì biri taŋ gaŋ tì ine, sɔb ìwe isaʼi zì ngəʼ ne ka igun ine.

⁶ Ŋwiye biri nàʼ chùd wə̀d imɔʼ imɔʼ icheg ne àfàʼì wə̀d chwi.

⁷ Wì biri nàʼ ìtḛ̀ ighə̀m imɔʼ abə bəd mbe ne che imbìghè ni nyìʼ fìŋ fàʼ inug chɔm, bə̀ kə̀bə̀ gha Ŋwiye ghiyə mbe beri ighumni, bə̀ kə̀bə̀ gha Ŋwiye gha gha mbɔb fàʼ icheg chɔm bə̀ ghì mbɔb yaʼ izɔm ane ighə̀m imɔʼ.

⁸ Àsi bəd mbe ne to̰ awɔb tesiʼ, si nɔ̀ŋì fìŋ se ghìyə̀ yaʼ inug tibɔ̀ŋ fɔrɔ inug mbe ne bɔŋi inɔb, Ŋwiye biri gaŋ tì inɔb, chə awɔb.

⁹ Ŋwiye biri zì ngəʼ kyen igun wə̀d ijìm ne ghìyə̀ inug tibɔ̀ŋ. Wì biri ko ni zì ngəʼ ze igun mə̀Ju, nɔ̀ʼ ghò igun bəd ne kayi mə̀Ju. Mbi biri zə̰ ngəʼ. Ìtɔb nyàmnyɔd biri bə tɔ.

¹⁰ Si ya gha, bəd mbe ne ghìyə̀ inug chɔm, Ŋwiye biri ghì mbɔb bèrì ighumni bə̀ ghà gha mbɔb fàʼ icheg chɔm bə̀ ghì mbi chughi ane àbɔrɔ̀bɔd igun isəg. Wì biri ghì ane ni ko igun mə̀Ju si ghò abə bəd mbe ne kayi mə̀Ju.

¹¹ À ya ane imbə̀ʼ icheg ne chəyi Ŋwiye we ghìyə̀ ighə.

¹² Bəd məjìm mbe ne chəyi mbi beri mə̀nɔ̀ʼɔ̀ Muse, ne kayi mə̀Ju, ne ghìyə̀ inug tibɔ̀ŋ, mbɔb biri ku nim ne kayi mə̀nɔ̀ʼɔ̀ Muse ghi. Mə̀Ju ne beri mə̀nɔ̀ʼɔ̀ Muse, ne ghìyə̀ inug tibɔ̀ŋ, Ŋwiye biri bə saʼ awɔb ane mə̀nɔ̀ʼɔ̀ Muse.

¹³ Chəyi wə̀d we tə̀mə kòʼò imbìghè abə Ŋwiye məyi imbə̀ʼ icheg ne we zùghə mə̀nɔ̀ʼɔ̀ Muse. Wə̀d ya tə̀mə kòʼò məyi ane we fàʼà inug mbe ne mə̀nɔ̀ʼɔ̀ mbe ghà.

¹⁴ Bəd ne kayi mə̀Ju, chəyi mbi kyeri mə̀nɔ̀ʼɔ̀ Muse. Si ya gha, mbi ya fàʼà yaʼ anug ne ìtɔb fìŋ te ghà, ne à ya bə̀ anug ne mə̀nɔ̀ʼɔ̀ Muse mbe ghà. Ane, ze chwi gha mbɔb kyèri inug chɔm bə̀ kyèri mbi tibɔ̀ŋ, ka chəyi mbɔb kyeri mə̀nɔ̀ʼɔ̀ Muse.

¹⁵ Ze chwi gha, Ŋwiye ya fə ŋwàʼrì mə̀nɔ̀ʼɔ̀ Muse inga ìtɔb fìŋ. Ìtɔb fìŋ fɔrɔ ìtɔb tikɔndi te se sàʼa awɔb, zìyè isaʼi igun inɔb kə̀ bə̀ tàŋà awɔb.

¹⁶ Aŋa ya icheg ne ze biri yaʼ igun aneg ze ne Ŋwiye biri chè anjìm Yeso Kristo ni saʼ bəd ane inug ijìm fɔrɔ inug mbe ne mbi ya ghi inə̀mbi icheg ne mə̀ ya gha inən inga ikən chɔm.

Mə̀Ju tì Mə̀nɔ̀ʼɔ̀

¹⁷ Àsi awe, àghò gha àghò ya Ju. Àghò gha àghò we nɔ̀ŋɔ̀ mə̀nɔ̀ʼɔ̀ Muse. Àghò we bə̀ kɔ̀mɔ̀ igo gha àghò kyère Ŋwiye.

¹⁸ Àghò gha àghò fə kyeri aghi ze ne Ŋwiye kə̀bi gha àghò faʼa. Àghò gha àghò kyèri inug chɔm fɔrɔ inug tibɔ̀ŋ icheg ne mə̀nɔ̀ʼɔ̀ chwi.

¹⁹ Àghò gha àghò kyèri kwàʼ tesiʼ gha àghò ya aghə abə ifəg, bə̀ yaʼ ikaʼì abə bəd mbe ne chəyi mbi kyeri Ŋwiye.

²⁰ Àghò gha àghò we fìʼè itog abə inen bə̀ chwìte inug abə bəd ne chəyi mbi kyeri inug. Mbə̀ Kyeri kwàʼ icheg chɔm gha inga mə̀nɔ̀ʼɔ̀ Muse, àghò we nàna inug ijìm fɔrɔ tesiʼ.

²¹ Àghò kə chwìte inug abə bəd ndəŋ anìŋ, àghò ine fə bì nàni inug? Àghò we ghà abə bəd ndəŋ gha, “Imbə̀ʼ àghò jìye we.” Àghò ine we wa jìye?

²² Àghò we ghà abə bəd ndəŋ gha, “Imbə̀ʼ mbə̰ fana awən.” Àghò ine we wa bə̀ fànà? Àghò we bà̰ anug ni ghumni mə̀ŋwiye to. Àghò we wa jìye ighi mbe ne yaʼi inga ìtɔb ìjə?

²³ Àghò we kɔ̀mɔ̀ igo gha àghò kyèri mə̀nɔ̀ʼɔ̀ Ŋwiye. Àghò we wa chìkì ikum Ŋwiye ane icheg ne àghò we gùghə mə̀nɔ̀ʼɔ̀ məd?

²⁴ A ze inga Àŋwàʼrì Ŋwiye gha, “Bəd mbe ne kayi mə̀Ju mbe zɔ̀mbɔ̀ ikum Ŋwiye ne à ya mbə̰ mə̀Ju ghi.”

²⁵ Ze chwi gha, anug ne ŋwed wə̀d bèrì ighumni anyumə̀ ne mbə̰ mbe nɔ̀ŋɔ̀ mə̀nɔ̀ʼɔ̀ Muse. Àmə yaʼ ne mbə̰ mbe gùghə̀ mə̀nɔ̀ʼɔ̀ Muse, ane ya gha, anug ne ŋwed wə̀d ya ati ako.

²⁶ Àmə yaʼ ni gha, bəd ne chəyi mbi ya ŋweri awɔb icheg ne mə̀nɔ̀ʼɔ̀ Muse chwi, mbɔb mbe nɔ̀ŋɔ̀ inug mbe ne mə̀nɔ̀ʼɔ̀ chwi, Ŋwiye biri niŋ awɔb icheg bəd ne mbi fə ŋweri.

²⁷ Tesiʼ ya gha, bəd mbe ne kayi mə̀Ju ne nɔ̀ŋɔ̀ mə̀nɔ̀ʼɔ̀ Ŋwiye icheg ne ìtɔb fìŋ te ghà, ka chəyi mbi ya ŋweri awɔb, mbɔb bɔ̀ŋ chè awən mbə̰ mə̀Ju ne taŋ kyèri mə̀nɔ̀ʼɔ̀ Ŋwiye, ne chəyi mbə̰ mbe nɔ̀ŋɔ̀ mə̀nɔ̀ʼɔ̀ mbe.

²⁸ Mbə̀ kyeri gha, kayi anug ni ŋwed wə̀d kə̀ ne mbi ghi igun nyàmnyɔd wə̀d ze ghìyə̀ gha wì yaʼ Ju tesiʼ.

²⁹ Ju tesiʼ ya wə̀d we ne bḛ Ŋwiye kwàʼ ibo inga fìŋ. Anug ni ŋwed wə̀d tesiʼ ya ikɔpi we ne yaʼi inga fìŋ wə̀d ne à ya Azwighi Ŋwiye ghi, kayi mə̀nɔ̀ʼɔ̀ Muse. Wə̀d ne beri iku ikɔpi gho̰ inga fìŋ məd ya bèrè ighumni ne nɔʼi imbìghè abə Ŋwiye kayi abə bəd igun isəg.