Rm 16 - Ikan feg

Pɔl chàʼrì bəd mɔ̀ʼɔ a Rom

¹ Mə kə̀b gha mbə̀ kyeri ìza njàbi, Febè. Məd we wètè ni fàʼ inga ifeti bəd Kristo we a Sènkreyà.

² Mbə̀ niŋ aməd ane ikum Anɔŋisəg icheg ne ze koʼi gha mbə̀ niŋ bəd Ŋwiye. Mbə̀ wete aməd ni nàʼ ighi ne wì bìri inən imbə̀ʼ icheg ne məd ini fə wètì bəd nɔʼ nɔʼ bə̀ wètì amə.

³ Mbə̀ chàʼri Priskà tì Àkwilà. Mbɔb ya fɔrɔ fàʼà tì inum abə Yeso Kristo.

⁴ Mbɔb ya sɔ̀ŋì ìmbɔb itog imbə̀ʼ amə. Kayi məyi mo ne nàʼà məyakà inɔb. Bəd məjìm inga tifeti bəd Kristo te ne kayi mə̀Ju mbe bə̀ nàʼà məyakà inɔb.

⁵ Mbə̀ chaʼra bəd inga ifeti bəd Kristo we ne nyìye inɔb inga nəb. Mbə̀ chaʼra Èpenetùs. Məd ya àmə ìsə̀ʼ ne mə̀ taŋ kɔ̀ŋ. Məd ya wə̀d mbègtog ne ya bḛ Kristo inga aba isəg ze a Esìyà.

⁶ Mbə̀ chaʼra Mèri. Məd ya taŋ zì atog ni fàʼ inən ane fìŋ ijìm.

⁷ Mbə̀ chaʼra Àndrònikùs tì Junìyàs. Mbɔb ya mə̀Ju ne tì ya yaʼi inɔn tì inɔb inga nəb ndəŋ . Bədtɔm Kristo ya niŋ awɔb ane ijiʼi bəd. Mbɔb ya bḛ Kristo bɔŋ mo se bḛ.

⁸ Mbə̀ chaʼra Àmplìyatùs. Məd ya ìmə ìsə̀ʼ ne mə̀ taŋ kɔ̀ŋ icheg ne tì yaʼi ane ifɔti tì Anɔŋisəg.

⁹ Mbə̀ chaʼra Òbanùs. Məd ya wə̀d àfàʼì Kristo abɔ̀ʼ ina. Mbə̀ chaʼra Stakìs. Məd ya ìmə ìsə̀ʼ ne mə̀ taŋ kɔ̀ŋ.

¹⁰ Mbə̀ chaʼra Apelès. Məd fə chwi gha zìye ya kwàʼ wə̀d Kristo. Mbə̀ chaʼra bəd mbe ne yaʼi inga nəb Àristobulùs.

¹¹ Mbə̀ chaʼra Hèrodìyòn. Məd ya bə̀ Ju icheg inum. Mbə̀ bə chàʼrì bəd Kristo mbe ne yaʼi inga nəb Nàsisùs.

¹² Mbə̀ chaʼra Trifenà tì Trìfosà. Mbɔb ya mə̀yi ne taŋ fàʼà abə Anɔŋisəg. Mbə̀ chaʼra Pesì ni yaʼi ìmə ìsə̀ʼ ne mə̀ taŋ kɔ̀ŋ. Məd ya bə̀ àyi ne ya taŋ zìye atog ni fàʼ abə Anɔŋisəg.

¹³ Mbə̀ chaʼra Rufùs. Àfàʼì məd abə Anɔŋisəg fə dù zen icha. Mbə̀ bə chàʼrì ngɔb məd we ne ya niŋi amə kwàʼ icheg ìwi ŋwan.

¹⁴ Mbə̀ chaʼra Àsinkritùs tì Flegòn tì Hemès tì Pàtrobàs tì Hemàs, bə̀ chàʼrì fɔrɔ bəd Kristo mbe ne yaʼi abɔ̀ʼ inɔb.

¹⁵ Mbə̀ chaʼra Fìlologùs tì Julìyà tì Nereyùs bə̀ chàʼrì njàbi məd. Mbə̀ bə chàʼrì Òlimpàs tì bəd Ŋwiye məjìm mbe ne yaʼi abɔ̀ʼ inɔb.

¹⁶ Mbə̀ chaʼra wə̀d imɔʼ imɔʼ kwàʼ icheg chɔm. Mbə̀ chaʼra ane chwi àkɔ̀ŋì ze ne yaʼi inga bəd Kristo. Bəd inga tifeti bəd Kristo məjìm bə̀ chàʼrì awən.

Tikə ne Pɔl si nwḭ̀yḛ̀ ni nàʼ

¹⁷ Ìmbum məfi tì tum njàbi, mə we nə̀ri awən gha, mbə̀ we awən tì bəd mbe ne ghìyə̀ gha bəd Kristo ghapa bə̀ ghìyə̀ gha mbe febe inɔnjì. Mbi ya ghìyə̀ ane icheg ne mbi to̰ awɔb inug mbe ne mbə̀ ya fə nani. Imbə̀ʼ mbə̰ si jəgri awən tì inɔb

¹⁸ imbə̀ʼ icheg ne chəyi tiku bəd ìto̰ te fàʼà abə ìwa Anɔŋisəg Yeso Kristo. Mbi ya fàʼà məyi aghi ni jəg awɔb. Mbi ya tàmba bəd mbe ne chəyi mbi kyeri anug ane ìngam nəmi nəmi fɔrɔ ìngam bɔti bɔti.

¹⁹ Wə̀d ijìm kyèri gha mbə̰ mbe zùgrə Anɔŋisəg. À ya aton ne mo ya taŋ gyènde imbə̀ʼ awən. Mə kə̀b gha mbə̀ beri iwe imbə̀ʼ ya ghìyə̀ məyi inug mbe ne yaʼi inug chɔm. Si ya gha, mbə̀ chìye ìmbən ibo inga anug ne zìyè inug tibɔ̀ŋ.

²⁰ Chəyi agha biri sà, Ŋwiye we ne ghìyə̀ tì chùghə ane àbɔrɔ̀bɔd biri baŋi Sàtàn si ghì mbə bèrì ika igun məd. Anɔŋisəg Yeso Kristo ghiyə ìchɔ̀mì inən.

²¹ Timotì ne fàʼà tì inum we bə̀ chàʼrà awən. Lucìyùs tì Jasòn fɔrɔ Sòsipatà ne yaʼi mə̀Ju icheg inum mbe bə̀ chàʼrà awən.

²² Mo Tetìyùs ne ŋwàʼri àŋwàʼrì azo̰, mə we bə̀ chàʼrà awən ane ikum Anɔŋisəg.

²³ Gayòs ne mə chùghə ibo inga achan tì bəd Kristo mbe ne nyìme ifeti ibo inga nəb mbe bə̀ chàʼrà awən. Èrastùs ne nɔ̀ŋɔ̀ ikab aben inga asiŋi azo̰ tì Kwatùs ne yaʼi ìwa ifi we bə̀ chàʼrì awən.

²⁴ [Anɔŋisəg Yeso Kristo ghiyə ìchɔ̀mì inən mbə̰ məjìm. À ya ane]

Ichaʼri Ŋwiye ne si nwḭ̀yḛ̀

²⁵ Tè ghumni Ŋwiye! Məd we tì wì ghi mbə bèrì ibḛfiŋ ni təmi kà anjìm ikən chɔm we ne mə chètè imbə̀ʼ Yeso Kristo. Məd we tì wì ghì ane anjìm inug tesiʼ mbe ne ya yaʼi inə̀mbi nɔ̀ʼ a jeje ne fə du asaŋ.

²⁶ Amad anìŋ, mbi fə tòʼ inug mbe asaŋ inga ìŋwàʼrì mbe ne bədkə̀n Ŋwiye ya ŋwàʼri ghì gha iben ijìm kyeri. Ŋwiye we ne yaʼi ane ighə̀m imɔʼ ya fə ghì ane ni gha iben ijìm bḛ aməd bə̀ zùgri aməd.

²⁷ Mbə̀ naʼa ighumni ane ighəm imɔʼ anjìm Yeso Kristo, abə Ŋwiye we imɔʼ ne beri iwe ijìm. À ya ane.