Rm 15 - Ikan feg

Anug ni ya ghìyə̀ yaʼ inug ne bɔŋi abə mə̀mbin

¹ Mba mbe ne ìwa ibḛfiŋ ka tè kòʼ ni ya nyìmbe fìŋ tì bəd mbe ne ìwɔb ibḛfiŋ bɔri. Imbə̀ʼ tì ya ghìyə̀ awa məyi inug ne bɔŋi ina.

² Wə̀d imɔʼ imɔʼ abɔ̀ʼ ina kirə ika ni ya ghìyə̀ yaʼ inug ne bɔŋi abə mə̀mbin. Àze biri ghì gha ibḛfiŋ taŋ kà abə mə̀mbin.

³ Chəyi Kristo yaya ghìyə̀ məyi inug ne biri bɔ̀ŋ ibo. A ze inga Àŋwàʼrì Ŋwiye gha: “Àzɔ̀mbì ze ne bəd ya zɔ̀mbi awe ze yèʼe igun inum.”

⁴ Inug mbo̰ ijìm ne mbi ya ghum ŋwàʼrì inga Àŋwàʼrì Ŋwiye ya ne kə awa. Inug mbo̰ ya nə̀rə awa ghìyə̀ tì bere inyimbifiŋ bə̀ nɔ̀ŋɔ̀ ikɔndi ni ghɔ̀m inug mbe ne Ŋwiye ya kàʼi ina.

⁵ Ŋwiye we ne nə̀rə ìta fìŋ bə̀ ghìyə̀ gha tì beri inyimbifiŋ, wì bə ghì mbə̀ chughi ane ichug imɔʼ tì ìmbən məfi fɔrɔ ìtən njàbi icheg bəd ne bène abɔ̀ʼ Yeso Kristo.

⁶ Àze biri ghì mbə fɔti ichug ghùmnə Ŋwiye ne yaʼi Mbaʼ abə ìwa Anɔŋisəg Yeso Kristo.

⁷ Ane, mbə̀ niŋ wə̀d imɔʼ imɔʼ icheg chɔm kwàʼ icheg ne Kristo fə niŋi awən. Mbə̀ ghiyə ane ni nàʼ ighumni abə Ŋwiye.

⁸ Mə ya anìŋ ghà inən gha, Kristo ya bə̀ŋə ane wə̀d àfàʼì abə mə̀Ju ni chwiti gha Ŋwiye we ghìyə̀ inug mbe wì ya kàʼi abə ìmbɔb mə̀mbaʼ te aneg.

⁹ Wì ya ghì ane ni gha bəd mbe ne kayi mə̀Ju mbe tì mbi ghumni Ŋwiye imbə̀ʼ icheg ne wì ya beri àsɔ̀mnəfiŋ igun inɔb. A ze inga Àŋwàʼrì Ŋwiye gha; “Mə biri ghumni awe inga bəd ne kayi mə̀Ju, bə̀ zə̀ʼ tikyeg ne ghùmnə awe.”

¹⁰ A ze bə̀ ywìrì inga Àŋwàʼrì Ŋwiye gha; “Mbə̰ mbe ne kayi mə̀Ju mbə̀ gyendi abɔ̀ʼ bəd Ŋwiye.”

¹¹ Mbe bə̀ ywìrì ŋwàʼrì inga Àŋwàʼrì Ŋwiye gha; “Mbə̀ məjìm mbe ne kayi mə̀Ju mbə̀ ghumni Anɔŋisəg, bəd məjìm bə ghumni aməd.”

¹² Wə̀dkə̀n Ŋwiye Àzayà ya bə̀ ywìrì gha, “Ŋwan biri dù ane aghaŋ inəbi Jesè ne biri tùmbì bəd ne kayi mə̀Ju. Mbɔb biri nɔ̀ŋì ìtɔb tikɔndi igun məd.”

¹³ Mə we chàʼrà Ŋwiye gha, Ŋwiye we ne ghìyə̀ mbə nɔ̀ŋɔ̀ ikɔndi ni ghɔ̀m inug mbe ne wì ya kàʼi, wì ghiyə mbə̀ chughi ane igyendi bə̀ chùghi ane àbɔrɔ̀bɔd icheg ne mbə̀ nɔŋi ibḛfiŋ igun məd. Wì ghiyə gha Azwighi Ŋwiye naʼa ika inən mbə chè imbìghè ni nɔ̀ŋì ikɔndi ghɔ̀m inug mbe ne Ŋwiye ya kàʼi.

Aton ne Pɔl ŋwàʼri àŋwàʼrì azo̰

¹⁴ Ìmbum məfi fɔrɔ ìtum njàbi, mə we tə̀rə̀ mə imbə̀ʼ awən imbə̀ʼ fìŋ chɔm ze ne mbə̀ beri fɔrɔ imbə̀ʼ icheg ne mbə̀ fə kyeri inug nɔʼ nɔʼ. Mbə̰ inən mbe tì mbə̀ se chwìte inug abə mə̀mbin.

¹⁵ Mə ŋwàʼrì àŋwàʼrì azo̰ inən ne chəyi mə̀ bɔ, ni ywìri nɔ̀ri ìmbən itog imbə̀ʼ itog inug mɔ̀ʼɔ ne mə̀ ya wendi inən. À ya anjìm ìchɔ̀mì we ne Ŋwiye beri igun inum, ne wì chɔʼi amə ane wə̀d àfàʼì Yeso Kristo.

¹⁶ Ane ya ni ghì gha, mə̀ yaʼ wə̀d àfàʼì chɔ̀m abə Yeso Kristo, ne məd tɔmi amə abə bəd mbe ne kayi mə̀Ju. Mə ya chètè ikən chɔm gho̰ icheg wə̀d mbàn Ŋwiye ni ghì gha bəd mbe ne kayi mə̀Ju si yaʼ kwàʼ aghi àfàtì chɔm abə Ŋwiye, bə̀ yaʼ bəd ne Azwighi Ŋwiye ghi awɔb mbi təm zen imbìghè abə Ŋwiye.

¹⁷ Icheg ne mə̀ yaʼi mə ane anug amɔʼ tì Yeso Kristo, mə we tì mə kɔ̀m ìmə igo icheg ne mə̀ fàʼà abə Ŋwiye.

¹⁸ Chəyi mə̀ beri ni kɔ̀m igo imbə̀ʼ anug mɔ̀ʼɔ ndəŋ, chèyi ane anug ne Kristo che inga inum ghàm abə bəd bə̀ fàʼ bəd bàd ni ghì gha bəd mbe ne kayi mə̀Ju mbe bə̀ŋi fìŋ si yaʼ bəd Ŋwiye.

¹⁹ Aghi ne ghi bəd mbe ne kayi mə̀Ju bə̀ŋì ìtɔb fìŋ bḛ Ŋwiye ya inug yeti yeti mbe ne mbɔb bari fɔrɔ icheg ne Azwighi Ŋwiye ghi gha mbɔb bḛ Ŋwiye. Àze ghì mə bèrì ika ni chètì ikən chɔm gho̰ imbə̀ʼ Kristo; ni ko a Jèrusalèm, ghò anene ghò pè aba aben ze a Ìlirikùm.

²⁰ Mə ya kà kɔ̀ŋɔ̀ ni niŋ ikən chɔm gho̰ imbə̀ʼ Kristo ghò chètì inga isiŋi mbe ne chəyi bəd kə kweʼì zug. Chəyi mə̀ kə̀bi ni yḛ̀ inga isiŋi mbe ne bəd ndəŋ fə bi kweʼì chè angu tì ikən chɔm gho̰ imbə̀ʼ Yeso Kristo.

²¹ À ya ane imbə̀ʼ icheg ne mbe ŋwàʼrì inga Àŋwàʼrì Ŋwiye gha: “Bəd mbe ne chəyi mbi kweʼì ghàm inɔb imbə̀ʼ aməd, mbɔb biri bàd aməd. Bəd mbe ne chəyi mbɔb kweʼì zug inug imbə̀ʼ aməd, mbɔb biri zug ìmbɔb itog bə̀ zen.”

²² Mə̀ ya kə̀bi aghəm nɔʼ nɔʼ ni yeʼe bàd awən, si ya gha, inug mɔ̀ʼɔ ya nyime mə.

Pɔl chùʼri nyɔd ni ghò a Rom

²³ Àsi amad anìŋ ne mə̀ fə mànì àmə àfàʼì inga iba iben mbo̰, mə biri yeʼe bàd awən icheg ne mə̀ yaya kə̀bə̀ ni yeʼe nɔ̀ʼ inga tituʼ tin.

²⁴ Mə we chùʼrə gha anyumə̀ ne mə̀ ghò a Spen, mə biri chè aghɔ bàd awən. Ikɔndi ne mə beri ya gha, anyumə̀ ne tì mughi ane iki nyumə̀ mɔ̀ʼɔ, mbə̰ biri nàʼ àwètì inum mə si ghò a Spen.

²⁵ Anug ne angu ya gha, mə̀ ya anìŋ inɔnjì ghò a Jèrusalèm ni nàʼ ighi abə bəd Ŋwiye mbe ne angu.

²⁶ Aton ya gha, bəd inga tifeti bəd Kristo te inga aba aben ze a Màsèdonìyà fɔrɔ Akìyà ya gyen ni chɔ̀pì ighi nàʼ abə bəd ne chəyi àzɔb inga ifeti bəd Ŋwiye we a Jèrusalèm.

²⁷ Mbɔb ya kɔ̀ŋ ni chɔ̀pì ighi mbe. Tesiʼ ya gha, mbi ya bèrì ni ghì ane imbə̀ʼ icheg ne bəd ne kayi mə̀Ju fə fɔti tì mə̀Ju ni bèrì àbɔrɔ̀bɔd ze ne Azwighi Ŋwiye ze nàʼà. Ane, mbɔb bèrì ni nàʼ ighi mbe ne mbɔb bə bèrì abə mə̀Ju mbe ne bḛ Kristo.

²⁸ Ane, anyumə̀ ne mə̀ mani àfàʼì azo̰ bə̀ nàʼ ighi mbe ne mbi chɔpi inɔb, mə biri chè mùg tì inən anyumə̀ ne me ghò a Spen.

²⁹ Mə kyèri gha anyumə̀ ne mə̀ yèʼe, mə biri ghì mbə̰ bèrì àbɔrɔ̀bɔd ajìm ze ne Kristo ya nàʼà.

³⁰ Ìmbum məfi fɔrɔ ìtum njàbi, mə̀ ya bòʼo ibo inən ane ikum ìwa Anɔŋisəg Yeso Kristo fɔrɔ anjìm àkɔ̀ŋì ze ne Azwighi Ŋwiye ghi tì beri gha mbə̀ fɔti ichug abɔ̀ʼ inum taŋ chàʼra Ŋwiye inum.

³¹ Mbə̀ chaʼra Ŋwiye gha wì pumnə mə chì abə bəd mbe ne yaʼi a Jùdeyà ne chəyi mbi bḛ Kristo. Mbə̀ bə chàʼra Ŋwiye gha bəd Ŋwiye mbe ne yaʼi a Jèrusalèm mbe niŋ ighi mbe ne mə̀ biri nàʼ inɔb.

³² Mbə̀ ghiyə ane ni gha Ŋwiye mə bḛ, mə biri yeʼe ni bàd awən nè gyènde. Ane, mba məjìm biri bèrì àzùtì.

³³ Ŋwiye we ne nàʼà àbɔrɔ̀bɔd yaʼ tì inən mbə̰ məjìm. À ya ane.