Rm 14 - Ikan feg

Bəd ne ìwɔb ibḛfiŋ bɔri

¹ Mbə̀ niŋ bəd məjìm mbe ne ìwɔb ibḛfiŋ we bɔ̀rɔ, si ya gha, imbə̀ʼ mbə̰ si ya tàŋà awən inug tì inɔb imbə̀ʼ aghi ne mbɔb koʼi ni fàʼ kə̀ aghi ne chəyi mbɔb koʼi ni fàʼ.

² Bəd mɔ̀ʼɔ bèrì ibḛfiŋ ne nàʼà apan inɔb ni jəg tiku ighi ijìm, si ya gha, wə̀d we ne chəyi ibḛfiŋ məd taŋ kà we tì wì jəg məyi igyen icheg ton.

³ Bəd mbe ne jèghə tiku ighi ijìm, imbə̀ʼ mbi si sɔb awɔb isaʼi igun bəd mbe ne chəyi mbe jə̀ghə tiku ighi mɔ̀ʼɔ gha mbe gùg anug. Bəd mbe ne chəyi mbɔb mbe jə̀ghə tiku ighi mɔ̀ʼɔ, imbə̀ʼ mbɔb si bə sɔb awɔb isaʼi igun bəd mbe ne jə̀ghə tiku ighi ijìm gha mbe gug anug. Ze yaʼ ane imbə̀ʼ icheg ne Ŋwiye bḛ aku bəd ze ajìm.

⁴ Àghò kə we ne sàʼa wə̀d àfàʼì wə̀d ndəŋ? À ya məyi mbaʼ àfàʼì wə̀d beri ni kyeri gha àfàʼì məd kòʼ kə̀ chəyi. Àfàʼì məd biri kòʼ imbə̀ʼ icheg ne à ya Anɔŋisəg beri ika ni ghì gha àfàʼì məd koʼo.

⁵ Bəd mɔ̀ʼɔ ya nìŋə aneg mɔ̀ʼɔ gha ze taŋ bèrì aton chè mbin tì ineg. Bəd ndəŋ ya nìŋə ineg ijìm gha mbi ya andəŋ andəŋ. Wə̀d ijìm bḛ inga ìzi fìŋ gha anug ne zìye we kɔ̀ndɔ ze kòʼ.

⁶ Bəd mbe ne nìŋə aneg mɔ̀ʼɔ gha ze taŋ bèrì aton chè mbin tì ineg ya ghìyə̀ ane ni nàʼ ighumni abə Anɔŋisəg. Bəd mbe ne bə̀ jə̀ghə tiku ighi ijìm ya bə̀ ghìyə̀ ane ni nàʼ ighumni abə Anɔŋisəg imbə̀ʼ icheg ne mbi ya jə̀ghə̀ ane nàʼà məyakà abə Ŋwiye. Bəd mbe ne chəyi mbe jəghə tiku ighi ijìm ya bə̀ ghìyə̀ ane ni ghumni Anɔŋisəg bə̀ nàʼà məyakà abə Ŋwiye.

⁷ Wə̀d mɔ̀ʼɔ abɔ̀ʼ ina mə yaʼ izɔm, chəyi tengàŋ yaʼi izɔm ane ìwi ighəm. Kə̀ wə̀d mɔ̀ʼɔ abɔ̀ʼ ina mə ku, chəyi tengàŋ ku ane ìwi ighəm.

⁸ Kə̀, àmə yaʼ aghi ne tì yaʼi izɔm, tì yaʼ izɔm ni ya nàʼà ighumni abə Anɔŋisəg. Kə̀ tì mə ku, à ya ni nàʼ ighumni abə Anɔŋisəg. Ane, kə̀ tì yaʼ izɔm, kə̀ tì ku, mba ya bəd Anɔŋisəg.

⁹ Ane, Kristo ya ku, Ŋwiye zwèmni aməd ni gha wì yaʼ Anɔŋisəg abə bəd ne yaʼi izɔm fɔrɔ abə bəd ne fə ku.

¹⁰ Aton ne àghò we sɔ̀bɔ isaʼi igun ìwe ifi gha wè gùg anug àkə gha? Kə̀ aton ne àghò we kə̰̀ ìwe ifi àkə gha? Mbə̀ wendi gha, mba məjìm biri ghum təm imbìghè abə Ŋwiye ane aneg ze ne wì biri sɔb isaʼi igun ina.

¹¹ A ze inga Àŋwàʼrì Ŋwiye gha, “Anɔŋisəg gha, Mo ya Ŋwiye ne yaʼi izɔm, ane, wə̀d ijìm biri gɔ̀m itog inwḭ aseg ghùmni amə, wə̀d ijìm biri bə bḛ gha mo ya Ŋwiye.”

¹² Wə̀d imɔʼ imɔʼ biri ghum təm imbìghè abə Ŋwiye mə̀tì ìfàʼì mbe ne wì yaya fàʼà igun isəg fɔrɔ aton ne wì ya fàʼi inug mbe.

¹³ Ane, imbə̀ʼ tì ywiri sɔ̀bɔ awa isaʼi igun wə̀d gha wè gùg anug. Mbə̀ nɔŋɔ inga ìtən fìŋ gha chəyi mbə̀ biri ghì wə̀d mɔ̀ʼɔ abɔ̀ʼ inən gùg anug, kə̀ ghì ìwən ifi kùn feg.

¹⁴ Icheg ne mə̀ yaʼi ane ifɔti tì Anɔŋisəg Yeso fə ghì mə kyeri gha chəyi iku tijəg mɔ̀ʼɔ angu ne chəyi ti zḛ imbìghè abə Ŋwiye. Si ya gha, wə̀d mɔ̀ʼɔ mə̀ kɔ̀ndi gha iku tijəg mɔ̀ʼɔ te angu ne chəyi ti zḛ imbìghè abə Ŋwiye imbə̀ʼ wì jə̀ghə yi ìtiwən.

¹⁵ Àghò mə̀ ya jə̀ghə aghi mɔ̀ʼɔ ne àghò kyèri gha ze biri ghì ìwe ifi gùg anug, àze chwi gha chəyi àghò kɔ̀ŋi aməd. Imbə̀ʼ àghò saŋa awe gha aghi ne àghò we jə̀ghə ze ghiyə wə̀d ne Yeso ya ku imbə̀ʼ aməd wì nim ìwi ìtḛ̀.

¹⁶ Aghi ne àghò kyèri gha à ya àze chɔm imbə̀ʼ àghò saŋa awe gha mbe ghamba gha à ya aghi tibɔ̀ŋ.

¹⁷ Anug ìfɔ̀n Ŋwiye kayi imbə̀ʼ anug ni ya jə̀ghə no. À ya anug ni ghì inug ne təmi kòʼ imbìghè abə Ŋwiye tì ni chughi ane àbɔrɔ̀bɔd tì mə̀mbin fɔrɔ ni bèrì igyendi icheg ne Azwighi Ŋwiye ze nàʼà ika ina.

¹⁸ Bəd mə̀ ya fàʼà abə Kristo ane ikuchèg gho̰, nji Ŋwiye biri ya gyènde tì inɔb, bəd bə̀ bḛ gha mbe fàʼ icheg chɔm.

¹⁹ Tì ghi ìwa ika ijìm ni fàʼ inug ne ghìyə̀ tì chùghə ane àbɔrɔ̀bɔd fɔrɔ inug ne ghìyə̀ gha ibḛfiŋ təm kà abə wə̀d imɔʼ imɔʼ abɔ̀ʼ ina.

²⁰ Imbə̀ʼ mbə̰ chìkì awən àfàʼì Ŋwiye anjìm tijəg. Tijəg ijìm bɔ̀ŋ, si ya gha, chəyi ze bɔŋi ni jəg aghi ne biri ghì wə̀d ndəŋ gùg anug.

²¹ Ze bɔ̀ŋ ni chughi witì kud nyam, kə̀ chùghi witì no mənoʼ, kə̀ chùghi witì ghì aghi ndəŋ ne biri ghì ìwe ifi gùg anug.

²² Ikɔndi we ne àghò beri imbə̀ʼ ighi mbo̰ ijìm, we buʼə ine tì Ŋwiye. Ŋwiye ziye àbɔrɔ̀bɔd igun wə̀d ne fàʼà inug ne fìŋ məd bḛ gha mbe kòʼ.

²³ Àsi wə̀d we ne jə̀mə̀, bə̀ ywìrè jə̀ghə, tengàŋ gùg anug imbə̀ʼ icheg ne chəyi we jə̀ghə tì ibḛfiŋ. Inug ijìm mbe ne chəyi wə̀d we ghìyə̀ tì ibḛfiŋ ya inug tibɔ̀ŋ.