Rm 12 - Ikan feg

Bəd mbe ne bḛ Kristo biri jəg ìtḛ̀ feg

¹ Ìmbum məfi fɔrɔ ìtum njàbi, mə̀ ya anìŋ nə̀rə awən gha, icheg ne Ŋwiye chwi àsɔ̀mnəfiŋ igun ina, mbə̀ naʼa ìtən nyàmnyɔd abə Ŋwiye icheg aghi àfàtì ìzḛzḛ ne kiri biri izɔm ne Ŋwiye biri kɔ̀ŋ. À ya ikuchèg ne bɔŋi ni ghumni Ŋwiye ya iwe.

² Imbə̀ʼ mbə̰ ghiyə awən inug icheg we ne bəd inga isəg mbe ghìyə̀. Ane, mbə̀ saŋa Ŋwiye kɔpi ìwən ikuchèg icheg ne məd we nàʼà tikɔndi feg inən. Àze biri ghì gha mbə̀ kyeri inug mbe ne məd kə̀bi. Inug mbe ne məd kəbi ya inug chɔm tì inug ne wì kɔ̀ŋi fɔrɔ inug ne koʼi ibo.

³ Ane, icheg ne Ŋwiye fə ghi ìchɔ̀mì inum gha mə yaʼ wə̀dtɔm Kristo, mə̀ ya anìŋ ghà abə wə̀d ijìm ne abɔ̀ʼ inən gha, imbə̀ʼ wə̀d nìŋə yi ìwi nyɔd ane wə̀d kyen chè icheg ne wì yaʼi. Wə̀d ijìm nɔŋɔ ikɔndi yaʼ ni swi ìwi nyɔd aseg. Wə̀d imɔʼ imɔʼ məgri ìwi nyɔd ane ibḛfiŋ we ne Ŋwiye nàʼi ibo.

⁴ Mbə kyèri gha nyàmnyɔd bèrì isiŋi nyɔd nɔʼ nɔʼ, si ya gha, chəyi asiŋi nyɔd mɔ̀ʼɔ ne fàʼà icheg àzin.

⁵ Icheg ne tì yaʼi ane ifɔti tì Kristo, ka tì jiʼi nɔʼ, mba məjìm ya isiŋi nyɔd ane nyàmnyɔd imɔʼ. Wə̀d imɔʼ imɔʼ fɔ̀tɔ tì mə̀mbin kwàʼ icheg ne isiŋi nyɔd bə fɔ̀tɔ.

⁶ Ìta tineʼi ya icha icha icheg ne Ŋwiye ghi ìchɔ̀mì ina. Ineʼi wə̀d mə̀ yaʼ ni ghà ikən Ŋwiye, tengàŋ ya fàʼà icheg ne ibḛfiŋ məd chwi.

⁷ Ineʼi wə̀d mə̀ yaʼ ni fàʼ abə bəd, wì taŋ zì atog ni fàʼ. Ineʼi wə̀d mə̀ yaʼ ni chwiti inug, wì bə zì atog ni chwiti.

⁸ Ineʼi wə̀d mə̀ yaʼ ni nəri bəd, wì taŋ zì atog fàʼ kwàʼ icheg chɔm. Ineʼi wə̀d mə̀ yaʼ ni wètì bəd, wì ya bə̀ nàʼà ighi abə bəd ane ìzi fìŋ ijìm. Wə̀d ne ineʼi məd ya ni saʼ bəd, wì ya sàʼa bəd kwàʼ icheg chɔm. Wə̀d ne ineʼi məd ya ni ghì ìchɔ̀mì abə bəd, wì ya bə̀ fàʼà ane ìzi fìŋ ijìm.

Ineni ane àkɔ̀ŋì tesiʼ

⁹ Wə̀d ya kɔ̀ŋɔ̀ bəd ane ìzi fìŋ ijìm. Wə̀d ijìm ba̰ inug tibɔ̀ŋ. Wə̀d ijìm taŋ nyìmi inug ne yaʼi inug chɔm.

¹⁰ Wə̀d ijìm ya kɔ̀ŋɔ̀ ìmbi məfi fɔrɔ ìti njàbi kwàʼ icheg ne wì kɔ̀ŋi ìzi nyàmnyɔd. Wə̀d ijìm ya ghùmnə ìmbi məfi fɔrɔ ìti njàbi chè icheg ne we ghùmnə ìwi nyɔd.

¹¹ Wə̀d ijìm taŋ zì atog ni fàʼ. Imbə̀ʼ wə̀d mɔ̀ʼɔ si ghìyə̀ yi igwed. Wə̀d ya fàʼà abə Anɔŋisəg ane ìzi fìŋ ifibì.

¹² Mbə̀ ya gyènde imbə̀ʼ inug mbe ne Anɔŋisəg kàʼi nɔ̀ŋì inən. Anyumə̀ ne mbə̰ mbe chè inga ngəʼ, mbə̀ ya nyìmbe fìŋ. Mbə̀ ya chàʼrà Ŋwiye mà nyumə̀ ijìm.

¹³ Mbə̀ ya wètè bəd Ŋwiye ni nàʼ ighi mbe ne chəyi mbɔb beri inɔb. Mbə̀ ya nìŋə bəd tìsɔ̀ʼ mbe ne yaʼi abɔ̀ʼ inən.

¹⁴ Mbə chaʼra Ŋwiye gha wì ziye àbɔrɔ̀bɔd igun bəd mbe ne chɔ̀ʼrɔ ìmbən ibɔʼì ighog. Mbə gha Ŋwiye ziye yaʼ àbɔrɔ̀bɔd igun inɔb, kayi ndɔ̀n.

¹⁵ Mbə̀ ya gyènde tì bəd ne gyènde bə̀ sɔ̀mnɔ̀ tì bəd ne sɔ̀mnɔ̀.

¹⁶ Mbə̀ chughi ane àbɔrɔ̀bɔd tì mə̀mbin. Imbə̀ʼ mbə̰ ya nɔ̀rɔ̀ awən nyɔd. Mbə̀ ya jə̀grə tì bəd ne chəyi mbi beri aghi. Imbə̀ʼ mbə̰ ya kɔ̀ndɔ awən gha mbə bèrì iwe chè icheg ne mbə̀ beri.

¹⁷ Imbə̀ʼ mbə̰ ywiti awən anug tibɔ̀ŋ igun anug tibɔ̀ŋ. Mbə̀ ghì ika ni ya ghìyə̀ yaʼ inug ne bəd məjìm biri bàd gha à ya inug ìchɔ̀mì.

¹⁸ Mbə ghì ika ijìm ne tì mbə̰ ghì ni chughi ane àbɔrɔ̀bɔd tì wə̀d ijìm.

¹⁹ Ìmbum mə̀sə̀ʼ, imbə̀ʼ mbə̰ ywite awən anug tibɔ̀ŋ. Mbə saŋa, à ya Ŋwiye biri ywìtì ane àzi agaŋ. Anɔŋisəg ghà inga Àŋwàʼrì Ŋwiye gha, “Mə biri ywìtì inug tibɔ̀ŋ mbe ne bəd ghìyə̀. Bəd mbe ne ghìyə̀ mə̀mbin zə̰ ngəʼ, mə biri ywìtì inɔb bə”.

²⁰ Ane, Àŋwàʼrì Ŋwiye ghà yaʼ gha: “Njèg mə̀ ya zàŋa ìmbən bəd ìpàb, mbə̀ naʼa tijəg inɔb. Adɔʼ mənib mə̀ ya ko awɔb, mbə̀ naʼa mənib inɔb. Mbə̰ mə̀ ghì ane, mbə biri ya zìyè yaʼ tìnìrètog igun inɔb.”

²¹ Imbə̀ʼ mbə̰ saŋa awən gha inug tibɔ̀ŋ nyəmə awən aseg. Mbə̀ ya ghìyə̀ inug chɔm ni nyə̀m inug tibɔ̀ŋ aseg.