Rm 11 - Ikan feg

Ŋwiye chwi àsɔ̀mnəfiŋ abə mə̀Izre

¹ Mə ya bìre gha Ŋwiye wa fə to̰ yi ìmbi bəd? Indèʼ ka! Chəyi wì to̰ imbə̀ʼ icheg ne mo inum ya bə wə̀d Izre, kwàʼ ane aghaŋ inəbi Abràham. Mo ya wə̀d inga inəbi Benjàmen.

² Chəyi Ŋwiye ya to̰ bəd məd mbe ne wì ya fə chɔʼi bɔŋ se tànga isəg. Àkə chəyi mbə̀ kyeri anug ne Àŋwàʼrì Ŋwiye gha imbə̀ʼ Èlayijà, ane icheg ne wì ya boʼi ibo abə Ŋwiye imbə̀ʼ mə̀Izre?

³ Èlayijà ya gha, “Anɔŋisəg, mbe fə zweti ìmbe bədkə̀n məjìm bə̀ chìkì tikwijə̀ŋ Ŋwiye tijìm. À ya mo tèzìʼì si tèn. Mbɔb mbe bə̀ kə̀bə̀ ni zweti amə.”

⁴ Ŋwiye ya ywìtì abə Èlayijà gha? Wì ya ghà ibo gha, “Mə fə nɔ̀ŋì ìmbum bəd chuʼ ìsàmbe ne chəyi mbi kiri ghumni ŋwiye we ne mbe kàrà ane Bal.”

⁵ À ya bə̀ ane inga nyùmə̀ gho̰ gha àbùʼì bəd mɔ̀ʼɔ ze kiri angu ne Ŋwiye chɔʼ anjìm ìchɔ̀mì məd.

⁶ Ŋwiye ya chɔʼ bəd anjìm ìchɔ̀mì məd, kayi imbə̀ʼ àfàʼì ne bəd ya fàʼi. Àkə wì ya chɔʼi bəd anjìm ìmbɔb ìfàʼì, nji chəyi ìchɔ̀mì məd biri yaʼ kwàʼ ìchɔ̀mì tesiʼ.

⁷ Tì kə ywìrè gha? Chəyi mə̀Izre ya beri aghi ne mbi yaya kə̀bə̀. À ya məyi bəd mbe ne Ŋwiye ya chɔʼi ya bàri ighi mbe ne mbi yaya kə̀bə̀. Si ya gha, chəyi àzin tì àbùʼì bəd yaya ywìrè zùgrə anug ne Ŋwiye yaya ghà inɔb.

⁸ Àŋwàʼrì Ŋwiye gha, “Ŋwiye ya ghì ìtɔb tikɔndi fɔrɔ ìtɔb fìŋ ti tu, pè techɔŋ gho̰ chəyi tì mbɔb zug anug kə̀ bàd isiŋi.”

⁹ Ifɔn Dèvid ya gha; “Ìwɔb Iteri bəŋə ane itam mbe ne biri gwì awɔb. Wì bə ghi gha mbe gùg anug. À ya angu ne mbi biri chə awɔb.

¹⁰ Àzɔb aghə ze fin imbə̀ʼ mbi nɔ̀ʼ bàd isiŋi. Ìtɔb njìm te gumnə ane ighə̀m imɔʼ.”

Ŋwiye biri pumni bəd ne kayi mə̀Ju

¹¹ Mə we ywìrè bìre gha, mə̀Ju wa tə̀ngə̀ gùg ane icheg ne chəyi tì mbi ywìrì nɔ̀ʼ? Indèʼ ka! Kayi ane imbə̀ʼ icheg ne mbi ya ghì inug tibɔ̀ŋ, Ŋwiye si ghì bəd ne kayi mə̀Ju mbi pum ni ghì gha mə̀Ju se ghìyə̀ àdeg.

¹² Àmə yaʼ ne inug tibɔ̀ŋ mə̀Ju fɔrɔ icheg ne mbɔb ya to̰ awɔb Ŋwiye ya ghi bəd ne kayi mə̀Ju jəg ìchɔ̀mì, àze chwi gha, Ŋwiye biri ghì mə̀Ju taŋ jəg ìchɔ̀mì anyumə̀ ne mbɔb məjìm fɔti abɔ̀ʼ bəd ne kayi mə̀Ju ni bḛ Ŋwiye.

¹³ Mə ya bə̀ ghàmà inən mbə̰ mbe ne kayi mə̀Ju. Icheg ne mo ya wə̀dtɔm Kristo abə bəd ne kayi mə̀Ju, mə ya kə̀bə̀ ni zì atog ane àfàʼì ze ne Ŋwiye chɔ̀ʼi amə gha mə faʼa.

¹⁴ Mə ya kə̀bə̀ inɔnjì ni ghì gha mə̀Ju beri ìdɔ̀b ane aghi ne Ŋwiye we fàʼà abə bəd ne kayi mə̀Ju ni ghì gha mə̀Ju mɔ̀ʼɔ pum.

¹⁵ Anyumə̀ ne Ŋwiye ya to̰ awɔb, bəd igun isəg ne ya yaʼi bəd ìpàb Ŋwiye ya kɔpɔ si mə̀sə̀ʼ məd. Ŋwiye kə mə̀ ywìrì bḛ awɔb, inug biri si yaʼ iye? Ze biri yaʼ icheg wə̀d ne zweme ane iwu.

¹⁶ Àmə yaʼ aghi ne mbe nàʼà tijəg mbègtog abə Ŋwiye ane ituti Ŋwiye, nji tijəg tijìm ya bə̀ ìti məd. Àmə yaʼ aghi ne mbe nàʼà ighaŋ ized abə Ŋwiye ane ituti Ŋwiye, nji tìtab azed ya bə̀ ìti məd.

¹⁷ Àmə yaʼ aghi ne mbi ya sɔbi fìtab mɔ̀ʼɔ ane azed olìf tibɔ̀ŋ ghò nàndì ane ibəm azed olìf chɔm, nji mbə̰ mbe ne kayi mə̀Ju ya icheg azed olìf tibɔ̀ŋ ze ne mbi ya nàndì ane àze chɔm. Mbə̰ mbe se bə̀ bèrè àbɔrɔ̀bɔd ze ne mə̀Ju mbe bèrè amad anìŋ.

¹⁸ Imbə̀ʼ mbə̰ nyete awən bəd mbe ne mbi ya sɔbi awɔb chì icheg fìtab. Aton ne mbə̰ nɔ̀rɔ̀ nyɔd àkə gha? Mbə̀ kyeri gha mbə̰ ya icheg tìtab. Kayi mbə̰ mbe nyìme ighaŋ azed. À ya ighaŋ azed mbe nyìme awən.

¹⁹ Ka wə̀d mɔ̀ʼɔ abɔ̀ʼ inən jiʼì gha, “Mbi ya sɔb tìtab te chì ni nàʼ apan inum.”

²⁰ À ya kwàʼ tesiʼ, si ya gha, aton ne mbi ya sɔbi awɔb icheg tìtab chì ya imbə̀ʼ icheg ne chəyi mbɔb ya nɔŋi ibḛfiŋ igun Kristo. Àsi awən, mbə̀ nyimi ìwən ibḛfiŋ icheg chɔm. Imbə̀ʼ mbə̰ nɔrɔ awən nyɔd. Mbə̰ ya se bèrè yaʼ ibɔ ane anug ne tì ze dù.

²¹ Àmə chəyi Ŋwiye ya sàŋi tìtab mbègtog te gha te chughi, nji chəyi wì biri bə̀ sàŋì awən.

²² Mbə bàd icheg ne Ŋwiye we ghìyə̀ inug chɔm bə̀ bàd icheg ne wì ya tɔ. Ŋwiye ya tɔ abə bəd mbe ne ghìyə̀ tìzughə̀, bə̀ chè imbìghè ni ghì inug chɔm abə bəd mbe ne bḛ anug chɔm ze ne Ŋwiye ghi. Ane, mbə̀ chughi məyi inga ìchɔ̀mì məd, nji wì biri bə̀ sɔb awən waʼ.

²³ Àmə yaʼ aghi ne mə̀Ju kɔpɔ si nɔ̀ŋì ibḛfiŋ igun Kristo, nji Ŋwiye biri ywiri nàndì awɔb ane azed ze ne wì ya sɔbi awɔb chì angu imbə̀ʼ icheg ne wì bèrì ika ni ghì ane.

²⁴ Mbə̰ mbe ne kayi mə̀Ju, mbə̰ ya icheg titab azed olìf tibɔ̀ŋ te ne wì ya sɔbi ghò nàndì ane azed olìf chɔm. Chəyi ze ya kòʼi ni yaʼ ane. Mə̀Ju ya icheg azed olìf chɔm. Ane, ze biri zàm abə Ŋwiye ni ywiri nàndì awɔb ane azed chɔm ze ne mbi ya sɔb awɔb chì angu.

Àsɔ̀mnəfiŋ Ŋwiye ze igun bəd məjìm

²⁵ Ìmbum məfi fɔrɔ ìtum njàbi, tesiʼ mɔ̀ʼɔ we angu ne yaʼi inə̀mbi ne mə̀ kəbi gha nji mbə kyèri. Tesiʼ we biri ghì gha mbə̀ saŋa icheg ne mbə̀ kɔ̀ndɔ gha mbə bèrì iwe. Tesiʼ we ya gha: chəyi ìkɔ̀b ze ne mə̀Izre beri biri tèn igun inɔb ane ighə̀m imɔʼ. Ìkɔ̀b ze ya ghɔ̀mɔ̀ gha àbùʼì bəd ze ne kayi mə̀Ju ze mana yèʼe abə Ŋwiye.

²⁶ Aŋa ya inɔnjì ne mə̀Izre məjìm biri ghum chè angu pum. Àŋwàʼrì Ŋwiye gha, “Wə̀d we ne biri pumni bəd biri ghum dù inga aben Zayɔ̀n. Wì biri chì tiku inug tibɔ̀ŋ tijìm igun aghaŋ inəbi Jàkɔb.

²⁷ Mə biri ghum wàd ikan gho̰ tì inɔb anyumə̀ ne mə̀ waʼi ìmbɔb inug tibɔ̀ŋ.”

²⁸ Icheg ne mə̀Ju to̰ awɔb ikən chɔm gho̰, mbɔb ya si bəd ìpàb Ŋwiye imbə̀ʼ awən, mbə̰ mbe ne kayi mə̀Ju. Si ya gha, icheg ne mbɔb yaʼi inəbi ne Ŋwiye ya fə chɔʼi, mbɔb ya si mə̀sə̀ʼ məd anjìm ìmbɔb mə̀mbaʼ kyen mbe te aneg.

²⁹ À ya ane imbə̀ʼ icheg ne Ŋwiye fə mə̀ chɔʼ wə̀d mɔ̀ʼɔ ane ìwi, fə bə̀ ghì ìchɔ̀mì abə tengàŋ, chəyi məd Ŋwiye we ywìrè kɔ̀pɔ ìzi fìŋ ka.

³⁰ Àsi awən, mbə̰ mbe ne kayi mə̀Ju, mbə̀ kyeri gha mbə yaya ghùmə̀ ghìyə̀ tìzughə̀ abə Ŋwiye. Àsi amad anìŋ, Ŋwiye fə chwi àsɔ̀mnəfiŋ inən imbə̀ʼ icheg ne mə̀Ju ghi tìzughə̀.

³¹ Icheg ne Ŋwiye beri àsɔ̀mnəfiŋ igun inən, à ya bə̀ ane ne, mə̀Ju mbe ghìyə̀ tìzughə̀ abə Ŋwiye ni ghì gha Ŋwiye bə bèrì àsɔ̀mnəfiŋ igun inɔb amad anìŋ.

³² Ane, Ŋwiye zì bəd məjìm a ndəŋ imbə̀ʼ ìwɔb tìzughə̀. Məd ghì ane ni chwi icheg ne wì beri àsɔ̀mnəfiŋ igun bəd məjìm.

Pɔl ghùmnə Ŋwiye

³³ Weye! mbə̀ nḛ icheg ne Ŋwiye we ghìyə̀ ìchɔ̀mì abə bəd məjìm. Mbə̀ nḛ icheg ne wì beri iwe bə̀ kyèri inug ijìm! Chəyi tì wə̀d kyèri tikɔndi məd. Chəyi tì wə̀d bə kyèri tikuchèg məd.

³⁴ A ze inga Àŋwàʼrì Ŋwiye gha, “Wə̀d ne kyeri ikɔndi ìwi Anɔŋisəg àkə we? Kə̀, wə̀d ne tì wì nàʼ ikə ibo àkə we?

³⁵ Wə̀d ne kweʼì nàʼ aghi mɔ̀ʼɔ abə Ŋwiye, ni gha wì ywite ibo àkə we?”

³⁶ À ya ane imbə̀ʼ icheg ne, à ya Ŋwiye tangi ighi ijìm. À ya anjìm məd ne ighi ijìm yaʼi. Ighi ijìm ya ìmbi məd. Tì ghumni aməd ane ighə̀m imɔʼ. À ya ane.