Mk 7 - Ikan feg

Icheg aben mə̀mbaʼ mbe te aneg

¹ Mə̀Farìsi tì mə̀chwitì mə̀nɔ̀ʼɔ̀ mɔ̀ʼɔ ne ya nɔ̀ʼi a Jèrusalèm ya ghò fète chè kad Yeso.

² Mbi ya bàd gha mə̀mə̀nənùg məd mɔ̀ʼɔ yaya jə̀ghə witì mbi sò ibo icheg ne ze yaʼi inga mə̀nɔ̀ʼɔ̀ mə̀Ju.

³ (Chəyi mə̀Farìsi tì mə̀Ju məjìm yaya jə̀ghə ne chəyi mbi sò ìmbɔb ibo icheg ne ìmbɔb mə̀mbaʼ mbe te aneg ya nɔŋi.

⁴ Anyumə̀ ne mbi bə̀ndi iywin, chəyi mbe jə̀ghə witì mbi sòrì nyɔd icheg ne ze yaʼi inga mə̀nɔ̀ʼɔ̀ ìmbɔb mə̀mbaʼ. Məcheg aben nɔʼ nɔʼ ya yaʼ angu ne mbɔb yaya bène abɔ̀ʼ, icheg anug ni sò toʼ tì ikon tì mbe akwighe fɔrɔ anug ni sò ighi mbe ne mbe zìyè ighi inga ne mbi tangi ane brons.)

⁵ Mə̀Farìsi mbe tì mə̀chwitì mə̀nɔ̀ʼɔ̀ mbe ya biri ibo gha, “Aton ne chəyi ìmbe mə̀mə̀nənùg mbe nɔ̀ŋɔ̀ inug aben mbe ne ìmba mə̀mbaʼ mbe te aneg ya nɔŋi àkə imbə̀ʼ aghə? Aton ne mbɔb mbe jə̀ghə ane ibo ne chəyi mbi zḛ icheg ne ze yaʼi inga mə̀nɔ̀ʼɔ̀ àkə imbə̀ʼ aghə?”

⁶ Wì ya ywìtì inɔb gha, “Wə̀dkə̀n Ŋwiye Àzayà ya ghà anug ne koʼi imbə̀ʼ awən, mbə̰ bəd ne bèmnè inug. Wì ya ŋwàʼrì gha, ‹Bəd mbo̰ mbe ghùmnə amə ane ìmbɔb mə̀chùg, si ya gha, ìtɔb fìŋ te agha se.

⁷ Mbɔb mbe ghùmnə amə atog ako. Mbɔb mbe chwìte mə̀nɔ̀ʼɔ̀ bəd icheg ni gha à ya mə̀nɔ̀ʼɔ̀ Ŋwiye.›

⁸ Mbə̰ fə sàŋì mə̀nɔ̀ʼɔ̀ Ŋwiye, si taŋ nyìmi yaʼ məcheg bəd.”

⁹ Wì ya ywìrì ghà inɔb gha, “Mbə̰ bèrì ikuchèg chɔm ni nɔŋi mə̀nɔ̀ʼɔ̀ Ŋwiye aseg imbə̀ʼ nyimi yaʼ ìwən ikuchèg aben!

¹⁰ Muse ya gha, ‹Ghumni ìwe mbaʼ tì ìwe ngɔb.› Wì ya bə̀ gha, ‹Wə̀d ne zɔ̀mbi ìwi mbaʼ kə̀ ìwi ngɔb, mbe zweti aməd.›

¹¹ Si ya gha, mbə̰ mbe gha, Wə̀d mə ghà abə ìwi mbaʼ kə̀ abə ìwi ngɔb gha, ‹Aghi ze ne mə beri ni wètì awe angu ya Kobàn› Ane ya gha, ‹mə fə nàʼ abə Ŋwiye.›

¹² Ane, chəyi mbə̰ mbe ywìrè bḛ gha wə̀d wete ìwi mbaʼ kə̀ ìwi ngɔb.

¹³ Ane ikuchèg gho̰, mbə̰ mbe nìmne Ìngam Ŋwiye anjìm ìwən ikuchèg aben we ne mbə̰ mbe chwìte abə bəd. Mbə̰ mbe bə̀ ghìyə̀ inug nɔʼ nɔʼ ndəŋ icheg mbo̰.”

Ighi mbe ne ghìyə̀ gha imbə̀ʼ wə̀d zḛ yi

¹⁴ Yeso ya ywìrì kàrì inɔ̰ bəd we abɔ̀ʼ məd, ghà inɔb gha, “Mbə̰ məjìm zug anug azo̰ ne mə ghà, ìmbən itog zen.

¹⁵ Chəyi aghi mɔ̀ʼɔ asaŋ ne wə̀d mə jəg kə̀ ne wì mə no, ze ghì gha imbə̀ʼ wì zḛ yi. À ya anug ze ne dùwə̀ inga wə̀d ze ghìyə̀ gha imbə̀ʼ wì zḛ yi.” [

¹⁶ “Wə̀d ne tì wì zug anug, wì zug.”]

¹⁷ Anyumə̀ ne wì ya sàŋì bəd mbe ghò nyi inga nəb, mə̀mə̀nənùg məd ya biri aton ane ìngam məgri we.

¹⁸ Wì ya ghà inɔb gha, “Chəyi mbə̀ bə kyèri? Chəyi mbə̀ bari gha, chəyi aghi ze ne wə̀d we jə̀ghə kə̀ ne we no ze ghìyə̀ gha imbə̀ʼ wì zḛ yi?

¹⁹ Aton ya gha, chəyi ze nyḭ̀yḛ inga fìŋ. Ze ya nyḭ̀yḛ yaʼ inga fibum, si chè dù asaŋ.” (Icheg ne wì ya gha anug azo̰, ane ya gha, wì fə sɔb gha ighijəg ijìm kòʼ gha bəd jəg.)

²⁰ Wì ya bə̀ ywìrì gha, “Anug ze ne dùwə̀ inga wə̀d, ya aghi ne ghìyə̀ gha imbə̀ʼ wə̀d zḛ yi.

²¹ Aton ya gha, tikɔndi tibɔ̀ŋ ya dùwə̀ inga fìŋ wə̀d. Tikɔndi te ne ghìyə̀ gha wə̀d ghi inug tibɔ̀ŋ icheg: ni nɔ̀kì mə̀yi kə̀ nɔ̀kì mbaŋà abu abu, ni ji, ni zweti wə̀d,

²² ni nɔ̀kì iweg wə̀d kə̀ inɔm wə̀d, ni ghə̀ʼrì ighi bəd, ni ghì ìpàb, ni ghì inug izəg, ni tambi bəd, ni ghì àdeg, ni chìkì tikum bəd, ni nɔ̀ nyɔd fɔrɔ ni ghì inug anen.

²³ Inug tibɔ̀ŋ mbo̰ ijìm ya dùwə̀ inga fìŋ wə̀d, se ghìyə̀ gha imbə̀ʼ wə̀d zḛ yi.”

Ibḛfiŋ ne àyi ne ya nɔ̀ʼi a Sàyìròfònisìyà ya bèri

²⁴ Yeso ya nɔ̀ʼ a Gènesarèd ghò aba aben ze a Tayì fɔrɔ Sidòn. Wì ya pè nyi inga nəb mɔ̀ʼɔ. Chəyi wì ya kə̀bi gha wə̀d mɔ̀ʼɔ kyeri gha zìye we inga nəb ze. Si ya gha, chəyi icheg ne tì wì ya nə̀mbə̀.

²⁵ Kwàʼ məyi ati ati, àyi mɔ̀ʼɔ ya zug inug imbə̀ʼ Yeso. Azwighi tibɔ̀ŋ ya yaʼ inga ŋwan àyi ìwi àyi we. Ane, àyi we ya ghò gɔ̀m itog inwḭ imbìghè abə Yeso.

²⁶ Àyi we ya wə̀d a Gris, si ya gha, mbi ya gwi aməd inga Sàyìròfònisìyà. Wì ya ghò gɔ̀m itog inwḭ mbe ane, boʼ ibo abə Yeso gha wì kamni azwighi tibɔ̀ŋ ze chì inga ŋwan məd.

²⁷ Yeso ya ghà ibo gha, “Àghò bi sàŋì gha mbe jə bɔn imbə̀ʼ icheg ne chəyi ze bɔŋi gha mbe niŋ ighijəg bɔn nàʼ abə bog.”

²⁸ Àyi we ya ywìtì gha, “À ya ane, Masà. Si ya gha, ka bèyi bog te ne aton fiŋaŋi, ti ya jə̀ghə ibəʼri ighi mbe ne fènde anyumə̀ ne bɔn mbe jə̀ghə.”

²⁹ Yeso ya ghà ibo gha, “Icheg ne àghò gha ane, nɔ̀ʼɔ ghò awe. Azwighi tibɔ̀ŋ ze fə dù inga ìwe ŋwan.”

³⁰ Àyi we ya nɔ̀ʼ ghò ibo achan. Wì ya pè bàd ŋwan we inɔ̀ki igun abaʼ. Azwighi tibɔ̀ŋ ze ya fə dù inga ŋwan we.

Yeso ya ghù wə̀d mɔ̀ʼɔ ne ya koro ne chəyi we bə̀ ghàmà

³¹ Anyumə̀ ne Yeso ya bə̀ndì aba aben ze a Tayì. Wì ya chè inga Sidòn bə̀ chè inga aba aben ze a Dèkapolìs ne ya se ghò ane atəŋ ze a Galìli.

³² Anyumə̀ ne wì ya che inga Dèkapolìs, bəd mɔ̀ʼɔ ya niŋ wə̀d ne koro, ne yaya bə̀ kə̀bə̀ icheg ni ghàm ghò ibo. Mbi ya ghò ane, boʼ ibo gha wì nɔŋɔ ìmbi ibo igun wə̀d we.

³³ Yeso ya niŋ mbaŋà ze chì inga inɔ̰ bəd we, mbi ghò a asiŋi ndəŋ. Wì ya pè angu, zì ìti tweg-abo inga ìtɔ̀ŋi wə̀d we, bə̀ ched timad bètì inemi wə̀d we inga.

³⁴ Wì ya nèn ikaŋ, sɔ ichug, ghà ibo gha, “Efatà!” Ane ya gha, “Fìʼe!”

³⁵ Kwàʼ ati ati, ìtɔ̀ŋi wə̀d we ya tòʼò, inemi məd zà, wì ko se ghàmà icheg chɔm.

³⁶ Yeso ya ghì ane, pàti bəd mbe gha, “Imbə̀ʼ mbə̰ nɔ̀ʼ ghà anug azo̰ abə wə̀d mɔ̀ʼɔ.” Si ya gha, icheg ne wì ya pati awɔb gha imbə̀ʼ mbi gha awɔb, à ya bə̀ icheg ne mbi yaya yḛ̀ nè sàʼa anug ze kwàʼ ane ika.

³⁷ Anug ya chè bəd mbe, mbi se ghà gha, “Wì fə ghì inug ijìm icheg chɔm. Wì fə ghì gha bəd ne koro se zùghə inug bə̀ ghì gha bəd ne chəyi mbe ghàmà mbi se ghàmà.”