Mk 6 - Ikan feg

Bəd mbe a Nazarèd ya to̰ awɔb Yeso

¹ Yeso ya nɔ̀ʼ ane asiŋi ze, bə̀ndì ghò ibo inga aben. Mə̀mə̀nənùg məd ya bə̀ ghò tì məd.

² Igun aneg àzwètì mə̀Ju, wì ya ko ni chwiti inug inga ichamì Ŋwiye. Bəd nɔʼ nɔʼ mbe ne ya yaʼi angu ya zug inug mbe yeti, ane bìri gha, “Wə̀d gho̰ kə̀ nìŋi inug mbo̰ ijìm aya? Wì kə̀ nìŋi iku iwe gho̰ aya? Mbə̀ nḛ inug yeti yeti ne we ghìyə̀!

³ Imbə̀ʼ wə̀d gho̰ ya ŋwan Kəpindà, ŋwan Mèri? Imbə̀ʼ məfi məd ya Jem tì Jòseb tì Judàs fɔrɔ Sayimùn? Imbə̀ʼ njàbi məd te aŋa tì ina?” Mbi ya biri ane, to̰ awɔb ni bḛ inug məd.

⁴ Yeso ya ghà inɔb gha, “Bəd mbe ghùmnə wə̀dkə̀n Ŋwiye isiŋi ijìm. Si ya gha, chəyi bəd mbe ghùmnə aməd inga aben məd, kə̀ abɔ̀ʼ inəbi məd, kə̀ bèyi fɔrɔ inga nəb məd.”

⁵ Chəyi wì ya ghi anug yeti yeti mɔ̀ʼɔ angu, chèyi ane icheg ne wì ya nɔŋi ìmbi ibo igun bəd mɔ̀ʼɔ kwa kwa ne ghɔ̰̀, ghù awɔb.

⁶ Anug ya chè aməd icheg ne chəyi mbi ya beri ibḛfiŋ. Yeso yaya yḛ̀ nè chwìte inug inga isiŋi mbe ne ya yaʼi iban iban.

Yeso ya tɔm ìmbi mə̀mə̀nənùg mbe ìghum chɔ̀b ibe

⁷ Icheg ne wì yaya ghìyə̀ ane, wì ya kàrì ìmbi mə̀mə̀nənùg mbe ìghum chɔ̀b ibe, mbi ghò abɔ̀ʼ məd. Wì ya tɔm awɔb məbe məbe gha mbe gho ghàm Ìngam Ŋwiye. Wì ya tɔm awɔb ane, nàʼ ika inɔb ni kamni izwighi tibɔ̀ŋ chì inga bəd.

⁸ Wì ya si ghà inɔb gha, “Mbə̀ niŋ məyi fìmbàŋì ane igha̰ gho̰. Imbə̀ʼ mbə̰ niŋə awən tijəg, kə̀ àbàn, kə̀ ikab.

⁹ Mbə̀ zi itami. Imbə̀ʼ mbə̰ niŋə awən ndwi ndəŋ.

¹⁰ Achan ne mbə̀ nyi inga, mbə̀ chughi inga anene mbə nɔ̀ʼ inga asiŋi ze.

¹¹ Asiŋi ne mbə̀ nyi chəyi mbi niŋə awən, kə̀ zug anug ne mbə̰ mbe ghà, mbə̀ kutə agwi ane asiŋi ze chì ane ìmbən ighog, dù awən angu. Àze biri yaʼ aneni inɔb ni chwi gha mbɔb to̰ awɔb Ìngam Ŋwiye.”

¹² Mbi ya dù ghò ghàm Ìngam Ŋwiye gha bəd bəŋə ìtɔb fìŋ waʼ inug tibɔ̀ŋ.

¹³ Mbi ya kamni izwighi tibɔ̀ŋ nɔʼ nɔʼ chì inga bəd. Mbi ya zɔʼ bəd nɔʼ nɔʼ ne yaya ghɔ̰̀ ane məwud bə̀ ghù awɔb.

Erɔ̀d ya ghì mbi sɔb atog abə Jɔn

¹⁴ Erɔ̀d ya zug inug mbo̰ ijìm imbə̀ʼ Yeso imbə̀ʼ icheg ne bəd yaya ghà inug ne Yeso yaya ghìyə̀ isiŋi ijìm. Mbi mɔ̀ʼɔ yaya gha, “À ya Jɔn we ne yaya nàʼà mənib fə zweme ane iwu. À ya aton ne wì beri ika ni ghì iyeti inug.”

¹⁵ Mbi mɔ̀ʼɔ ya gha məd ya Èlayijà. Mbi ndəŋ bə̀ gha, à ya wə̀dkə̀n Ŋwiye icheg mbe te aneg.

¹⁶ Ane, anyumə̀ ne Erɔ̀d ya zughi inug mbo̰, wì ya gha, “Jɔn we ne mə̀ ya sɔbi atog məd we zwemni iwu!”

¹⁷ Erɔ̀d ya ghàm anìŋ imbə̀ʼ icheg ne à ya məd ya ghi mbi gwìye Jɔn, kɔd, ghò zì a nəb ndəŋ. Wì ya ghì anìŋ imbə̀ʼ icheg ne wì ya nami Èrodìyàs ne ya iweg ifi məd. Ikum ifi məd we ya Filib.

¹⁸ Aton ya gha, Jɔn yaya ghà abə Erɔ̀d gha, “Chəyi ze koʼi ine ni niŋ iweg ìwe ifi.”

¹⁹ Ane, Èrodìyàs ya gaŋ tì Jɔn si nyimi aməd inga fìŋ. Wì ya se kə̀bə̀ inɔnjì ni zweti Jɔn. Si ya gha, chəyi wì ya beri apan ni zweti.

²⁰ Erɔ̀d ya ghùmnə Jɔn imbə̀ʼ icheg ne wì ya kyeri gha Jɔn ya wə̀d ne təmi kòʼ bə̀ yaʼ wə̀d ne təmi zen. Ane, wì yaya tàŋà məd. Wì yaya kɔ̀ŋɔ̀ ni zug inug ne Jɔn we ghà. Si ya gha, mà nyumə̀ ijìm ne wì zùghi inug mbe, mbi ya nàʼà ngəʼ ibo.

²¹ Inug mbo̰ ya yaʼ anìŋ anene Èrodìyàs bèrì apan. Erɔ̀d ya ghì iteri ni gyendi àze aneg gwi, kàʼ bəd kyen ne sàʼa aben tì itog mə̀sogyì fɔrɔ itog bəd inga Galìli.

²² Anyumə̀ ne ŋwan àyi we Èrodìyàs ya pe bin, ze ya bɔŋ abə Erɔ̀d fɔrɔ bəd mbe ne məd ya kàʼi ane iteri we.

²³ Wì ya ghà abə ŋwan àyi we gha, “Àghò bìri aghi ne àghò kə̀bi, mə biri nàʼ ine.” Wì ya kàʼ aməd ane, zɔ̀m gha, “Aghi ne àghò biri mə biri nàʼ ine, ka bèyi aba afibì ane àmə aben.”

²⁴ Ŋwan we ya dù iseg ghò bìri abə ngɔb məd gha, “Mə̀ biri aghə?” Wì ya ywìtì ibo gha, “Àghò biri atog ze Jɔn we ne nàʼà mənib.”

²⁵ Kwàʼ ati ati, ŋwan àyi we ya zàmbì nyi ghò ghà abə ifɔn Erɔ̀d gha, “Mə kə̀b gha àghò naʼa atog ze Jɔn we ne nàʼà mənib inum inga akaŋ amad anìŋ.”

²⁶ Anug azo̰ ya nàʼ ngəʼ abə ifɔn Erɔ̀d, wì sɔmnɔ̀ kwàʼ ako. Si ya gha, anjìm icheg ne məd ya fə kàʼi zɔ̀m, bə̀ fɔrɔ icheg ne bəd kyen kyen ya yaʼi ane iteri we, chəyi ya inɔnjì ni ywiri ton ni nàʼ aghi ze ne ŋwan àyi we ya biri.

²⁷ Wì ya cha sogyì bə̀ kwàʼ ati ati gha wì sɔb atog abə Jɔn yèʼe tì àzewən. Sogyì we ya ghò inga nəb ndəŋ pè sɔb atog abə Jɔn.

²⁸ Wì ya niŋ atog àze Jɔn inga akaŋ, yèʼe pè nàʼ abə ŋwan àyi we, wì si niŋ nàʼ abə ìwi ngɔb.

²⁹ Mə̀mə̀nənùg ìmbi Jɔn we ne yaya nàʼà mənib ya zug anug ze, si ghò niŋ tìkwḭ̀ məd, ghò twə̀ŋi.

Yeso ya jə mbaŋà chuʼ ità̰

³⁰ Bədtɔm Kristo ya bə̀ndì ane isiŋi mbe ne mbi ya gho ni ghàm Ìngam Ŋwiye, ghò fète iban məd, mə̀tì ighi ijìm mbe ne mbɔb fàʼi bə chwìti ibo.

³¹ Chəyi bədtɔm Kristo ya beri apan ni jəg imbə̀ʼ icheg ne bəd yaya nɔ̀ʼɔ. Bəd yaya yèʼe, chè bə̀ndə̀, yèʼe chè bə̀ndə̀. Ane, Yeso ya ghà inɔb gha, “Mbə̀ yeʼe abɔ̀ʼ inum tì gho asiŋi ne chəyi wə̀d mɔ̀ʼɔ angu, ghò zwètì iki piʼì.”

³² Ane, mbi ya nyi inga abaŋ igyi məyi mbɔb mbɔb ghò ane asiŋi ne chəyi wə̀d mɔ̀ʼɔ angu.

³³ Si ya gha, icheg ne mbi yaya ghò ane, bəd ndan ndàn ni ya bàri icheg ne mbe ghò, ya neni awɔb. Ane, bəd mbe ya nɔ̀ʼ inga isiŋi ijìm nòrò ane ighog ghò pè angu bɔŋ Yeso tì ìmbi mə̀mə̀nənùg məd ya se pè.

³⁴ Anyumə̀ ne mbi ya pe dù inga abaŋ igyi ze, Yeso ya bàd inɔ̰ bəd ne ya fə se angu kwàʼ ìwi kyen. Wì ya bèrì àsɔ̀mnəfiŋ igun inɔb imbə̀ʼ icheg ne, mbɔb ya yaʼ icheg njə̀g ne chəyi ti bere àjənjə̀g. Ane, wì ya ko ni chwiti inug nɔʼ nɔʼ inɔb.

³⁵ Anyumə̀ we, nyùmə̀ ya fə fen. Mə̀mə̀nənùg məd ya ghò ghà ibo gha, “Aŋa ya asiŋi zɔbi. Nyùmə̀ fə bə̀ chè.

³⁶ Cha bəd mbo̰ mbe gho inga mben te ne yaʼi iban iban fɔrɔ inga iben mbe ne yaʼi iban iban ghò kə̀b aghi mɔ̀ʼɔ jəg.”

³⁷ Yeso ya ywìtì yaʼ gha, “Mbə̀ naʼa aghi mɔ̀ʼɔ inɔb mbe jəg.” Mbi ya ywìtì ibo gha, “Tijəg biri niŋ ikab ne che ikab àfàʼì wə̀d ane aməg ìfàmi! Àghò kə gha tè chì inun ikab we məyi ni zon tijəg nàʼ inɔb, mbe jəg?”

³⁸ Yeso ya biri inɔb gha, “Mbə̀ bèrì chiŋ ngə̀ŋ mə̀kara tisə̀ʼə? Mbə gho nèn.” Anyumə̀ ne mbi ya gho nèn, mbi ya si ywìtì ibo gha, “Tè bàd chiŋ ngə̀ŋ mə̀kara tita̰ tì su tibe.”

³⁹ Asiŋi ze ya yaʼ tì agyen zu. Yeso ya si ghà inɔb gha, “Mbə̀ ghiyə bəd chughi aseg igun agyen akoʼi akoʼi.”

⁴⁰ Ane, bəd ya chughi aseg. Tikoʼi mɔ̀ʼɔ ya yaʼ bəd iki ifibì ifibì. Ìtin tì tikoʼi ya yaʼ bəd ìghum ita̰ ita̰.

⁴¹ Yeso ya niŋ chiŋ ngə̀ŋ mə̀kara te tita̰ tì su te tibe, nèn ikaŋ, nàʼ məyakà abə Ŋwiye, bə̀ʼri nàʼ abə mə̀mə̀nənùg məd gha mbe ghapa abə bəd. Wì ya bə̀ ghàpì su te tibe abə mə̀mə̀nənùg məd gha mbe ghapa abə bəd məjìm.

⁴² Wə̀d ijìm ya jəg kɔd.

⁴³ Mə̀mə̀nənùg məd ya si fèti ibəʼri ngə̀ŋ tì ibəʼri su, mbi sweg inga tiko ìghum chɔ̀b ibe.

⁴⁴ Mbaŋà ne ya jəghi ya yaʼ mbaŋà chuʼ ità̰.

Yeso ya yèn igun atəŋ

⁴⁵ Anyumə̀ ne mbi ya jəghi mànì, Yeso ya ghì mə̀mə̀nənùg məd nyi inga abaŋ igyi ko ghò ibo imbìghè ijin ìywin a Bèsayidà. Wì ya bùʼ anjìm ghì inɔ̰ bəd we kùrə ghò inga ìmbɔb achan.

⁴⁶ Anyumə̀ ne wì ya nàʼrì tì inɔb, wì ya ghò ikaŋ iwum ni chàʼra Ŋwiye

⁴⁷ Anyumə̀ ne ituʼ ya se fḭ̀yḛ, abaŋ igyi yaya kiri inga fìghàra atəŋ kyen ze. Yeso ya yaʼ yi tèzìʼì asaŋ.

⁴⁸ Wì ya bàd icheg ne mə̀mə̀nənùg məd yaya zə̰ ngəʼ imbə̀ʼ icheg ne afim ti àwàwà yaya nàʼà ngəʼ inɔb. Ane mə̀nyùmə̀ mətad izimi, wì ya yèn igun igyi ghò kɔ̀ti awɔb. Wì yaya se chè yi iban inɔb.

⁴⁹ Si ya gha, anyumə̀ ne mbi ya bàri aməd ne we yḛ̀ igun igyi inga atəŋ kyen ze, mbi ya kɔndi gha à ya àziŋ wə̀d. Ane, mbi ya kyen dèg

⁵⁰ imbə̀ʼ icheg ne mbɔb məjìm ya bàd aməd se bɔ. Kwàʼ anyumə̀ we, wì ya ghàm inɔb gha, “Mbə̀ nyimbi fìŋ! Imbə̀ʼ mbə̰ bɔ awən. À ya mo.”

⁵¹ Anyumə̀ ne wì ya gha ane, wì ya nyi inga abaŋ igyi abɔ̀ʼ inɔb. Afim ze ya sɔbɔ. Anug ya chè awɔb

⁵² imbə̀ʼ icheg ne chəyi mbɔb ya jiʼì kyèri icheg ne Yeso ya chè angu jə inɔ̰ bəd ane chiŋ ngə̀ŋ mə̀kara te tita̰.

Yeso ya ghù bəd a Gènesarèd

⁵³ Anyumə̀ ne Yeso tì mə̀mə̀nənùg məd ya bani ghò injḭ igyi ìywin, mbi ya pè təm a Gènesarèd, tìŋì abaŋ igyi ze angu.

⁵⁴ Kwàʼ icheg ne mbi ya du inga abaŋ igyi, bəd ya bàra Yeso nèni məd.

⁵⁵ Bəd mbe ne ya bàri aməd nèni ya ghò inga aba aben ze ajìm chètì abə bəd. Bəd yaya bèʼè bəd ne ghɔ̰̀ igun tìsa ghò a asiŋi ne mbi zughi gha Yeso we angu.

⁵⁶ Isiŋi ijìm ne wì ya gho angu inga iben kə̀ inga isiŋi mben, mbi ya feti bəd ne ghɔ̰̀ a sàmi iywin. Mbi ya se bòʼo ibo gha wì sàŋa bəd aghɔn mbe bete aməd ka à ya məyi ndwi məd. Ane bəd məjìm ne ya bèti aməd, àzɔb aghɔn ya mèg.