Mk 15 - Ikan feg

Mbi ya niŋ Yeso ghò imbìghè Abə Payilèd

¹ Kwàʼ isusu izimi izimi, itog bəd mbàn Ŋwiye tì bəd kyen mbe inga aben tì mə̀chwitì mə̀nɔ̀ʼɔ̀ bə̀ fɔrɔ itog bəd ne sàʼa aben məjìm ya nyimi ifeti ni chuʼri anug ne mbi biri ghì tì Yeso. Mbi ya chuʼri ane, kɔd aməd, niŋ ghò nàʼ abə Payilèd.

² Payilèd ya biri ibo gha, “Àghò kə ifɔn mə̀Ju?” Wì ya ywìtì ibo gha, “À ya icheg ne àghò gha.”

³ Itog bəd mbàn Ŋwiye ya zì inug nɔʼ nɔʼ ibo igun atog.

⁴ Ane, Payilèd ya bə̀ ywìrì bìri ibo gha, “Chəyi àghò beri iywiti ane inug mbo̰? Nḛ icheg ne mbi fə zi inug nɔʼ nɔʼ ine igun atog.”

⁵ Chəyi Yeso ya ywìrì ywìtì anug mɔ̀ʼɔ. Anug ze ya chè Payilèd.

Payilèd ya sɔb isaʼi gha mbe zwete Yeso

⁶ Igun ineg Iteri Chègun ijìm, Payilèd yaya chìyè wə̀d ndəŋ ifibì sàŋà. Wì yaya sàŋà wə̀d ne mə̀Ju ghà ibo gha wì chiye sàŋì.

⁷ Mbaŋà mɔ̀ʼɔ ne ikum məd ya Bàrabas ya yaʼ inga nəb ndəŋ tì bəd mbe ne məd tì inɔb ya bùg ndum ghì mbi zweti wə̀d.

⁸ Inɔ̰ bəd ya ghò ghà abə Payilèd gha wì ghi icheg ne wì yaya kà ghìyə̀.

⁹ Payilèd ya biri inɔb gha, “Mbə wa kə̀b gha mə saŋa ifɔn mə̀Ju?”

¹⁰ Wì ya taŋ kyèri gha à ya imbə̀ʼ àdeg ne itog bəd mbàn Ŋwiye ya gwi aməd yèʼe nàʼ ibo.

¹¹ Si ya gha, itog bəd mbàn Ŋwiye ya to inɔ̰ bəd we gha mbe gha ibo gha wì chiye yaʼ Bàrabas sàŋì.

¹² Payilèd ya ywìrì bìri abə inɔ̰ bəd we gha, “Mə si ghə̀nə tì mbaŋà ìzo̰ ne mbə kàrà ane ifɔn mə̀Ju?”

¹³ Mbi ya ywìrì kyen ane gì ka ka gha, “kɔ̀mbɔ aməd igun azed abaʼri!”

¹⁴ Payilèd ya biri inɔb gha, “Aton kə gha? Anug ne wì gùghi àkə aghə?” Anyumə̀ ne wì ya biri ane, mbi ya ywìrì taŋ kyen gha, “Kɔ̀mbɔ aməd igun azed abaʼri!”

¹⁵ Payilèd ya kə̀b ni ghì gha inɔ̰ bəd we gyendi. Ane, wì ya chìye Bàrabas sàŋì. Anyumə̀ ne wì ya fə ghi gha mbe te Yeso ane ngwàn, wì ya nàʼ aməd gha mbe ghò kɔ̀mbì azed abaʼri.

Mə̀sogyì ya chàpì Yeso

¹⁶ Mə̀sogyì ya niŋ Yeso nyi ghò inga ìtɔʼ gɔbnà. Mbi ya pè kàrì mbin tì mə̀sogyì məjìm, mbi fete.

¹⁷ Mbi ya chì ndwi məd, si zì ndwi ifɔn ibo ibə̀m. Mbi ya bə̀ niŋ agyen njəŋ njəŋ kad icheg aghi atog zì ibo.

¹⁸ Mbi ya si ko se nèn aməd gha, “Mbèè! Ngə̀ə̀! Tì we chàʼrà awe, ifɔn mə̀Ju!”

¹⁹ Mbi ya kwèn atog məd ane fìmbàŋì, ched timad igun məd bə̀ gɔ̀m itog inwḭ aseg ibo imbìghè, ghùmnə aməd.

²⁰ Anyumə̀ ne mbi ya fə chàpì aməd, mbi ya chì ndwi ifɔn ze ywìrì zì ìzi məd tì ndwi ibo ibə̀m. Mbi ya ghì ane, si niŋ aməd ghò kɔ̀mbì azed abaʼri.

Mə̀sogyì ya kɔ̀mbì Yeso igun azed abaʼri

²¹ Mə̀sogyì mbe ya pè inɔnjì bàd mbaŋà mɔ̀ʼɔ ne nɔ̀ʼi a Sayirèn ne ikum məd ya Sayimùn. Wì yaya chè yi che. Wì ya nɔ̀ʼ a mben se ghò a Jèrusalèm. Ane, mbi ya nyə̀ŋ aməd gha wì niŋ azed abaʼri ze abə Yeso bèʼì. Sayimùn we ya yaʼ mbaʼ ìwi Àlèzandà tì Rufùs.

²² Mə̀sogyì mbe ya niŋ Yeso ghò a asiŋi ze ne mbe kàrà ane Golgotà, (ane ya gha asiŋi Tìngəʼ atog).

²³ Mbi ya nàʼ mənoʼ ibo ne mbi ya nyàmbi tì ifuʼ mɔ̀ʼɔ ne mbe kàrà ane mər, si ya gha, chəyi wì ya no.

²⁴ Mbi ya kɔ̀mbì aməd igun azed abaʼri, si bùʼri tikaʼì ni kyeri ndwi ne wə̀d imɔʼ imɔʼ abɔ̀ʼ inɔb biri niŋ. Mbi ya ghì ane ghàpì ndwi məd, wə̀d ijìm abɔ̀ʼ inɔb niŋ àze aba.

²⁵ Mbi ya kɔ̀mbì aməd ane mə̀nyùmə̀ àbɔg isusu.

²⁶ Anug ne mbi ya ŋwàʼrì kɔ̀mbì ane atog azed abaʼri ze ni chwi anug ze ne Yeso ya gùghi ya gha, “Aŋa ya ifɔn mə̀Ju.”

²⁷ Mbi ya bə̀ kɔ̀mbì məji məbe iban məd. Mbi ya kɔ̀mbì ìwi ifibì aba abo jəghi, bə̀ kɔ̀mbì ìywin aba abo təŋ.

²⁸ [Anug azo̰ ya dù si kòʼ koʼi tì Ìngam Ŋwiye we ne gha, “Mbi ya fɔti məd abɔ̀ʼ bəd ne ghì inug tibɔ̀ŋ.”]

²⁹ Bəd mbe ne yaya chè iban asiŋi ze ya chàpì aməd, bə̀ mə̀ʼ ìmbɔb itog gha, “Zweʼi! Àghò we ne biri sàʼ Mbàn Ŋwiye ywìrì niŋ ineg itad kɔd.

³⁰ Àghò pum ìwe nyɔd, swiʼi ikaŋ azed abaʼri aghɔ!”

³¹ À ya bə̀ ane ne itog bəd mbàn Ŋwiye tì mə̀chwitì mə̀nɔ̀ʼɔ̀ ya bə̀ chàpì aməd se ghàmà mbɔb mbɔb gha, “Wì yaya chìyè bəd ndəŋ inga ngəʼ, si ya gha, chəyi tì wì pum ìwi nyɔd!

³² Wə̀d we ne Ŋwiye zɔ̀ʼi, ne yaʼi ifɔn mə̀Izre, swiʼi ikaŋ azed abaʼri aghɔ amad anìŋ, tì bara bḛ!” Mbaŋà te ne mbi ya kɔ̀mbi iban məd ya bə̀ zɔ̀mbɔ məd.

Icheg ne Yeso ya ku

³³ Anyumə̀ ne àngɔŋ tisi ya fə ka, isiŋi ijìm inga aben ya fin. Isiŋi ya fin anene ghò pè ane mə̀nyùmə̀ mə̀tad tisi.

³⁴ Ane mə̀nyùmə̀ mətad ya kòʼi, Yeso ya kyen ane gì ka ka gha, “Èloyì, Èloyì, lama sàbatàni?” Ane ya gha, “Ìmə Ŋwiye, ìmə Ŋwiye, aton ne àghò wàʼi amə àkə gha?”

³⁵ Bəd mɔ̀ʼɔ abɔ̀ʼ mbe ne ya təmbi iban angu ya zug, si gha, “Mbə̀ zweri, wì ya kàrà Èlayijà gha wì yeʼe wètì aməd.”

³⁶ Wə̀d mɔ̀ʼɔ abɔ̀ʼ inɔb ya nòtò ghò niŋ juʼ, chùb inga àtwaŋi mənoʼ, fàmì atog fized, nɔ̀ ikaŋ zì ibo ichug gha wì sɔri. Anyumə̀ ne wì yaya ghìyə̀ ane, wì yaya ghà abə mə̀mbin gha, “Mbə̀ chim tizi tì nḛ gha Èlayijà wa biri yeʼe swi aməd aseg?”

³⁷ Yeso ya kyen ane gì ka ka si ku yi.

³⁸ Ndwi ze ne mbi ya tìŋə inga mbàn Ŋwiye ya sa̰ iba ibe, ko ikaŋ ghò pè aseg.

³⁹ Anyumə̀ ne atog wə̀d igun mə̀sogyì mbe ne ya təmi angu se nḛ̀ Yeso, ya zughi icheg ne wì ya kyḛ bə̀ bàd gha wì fə ku yi, wì ya gha, “À ya kwàʼ tesiʼ gha, wə̀d gho̰ ya kə Ŋwan Ŋwiye!”

⁴⁰ Mə̀yi mɔ̀ʼɔ yaya bə̀ angu ne ya təmi ane agha se ghi nḛ̀. Mə̀yi mɔ̀ʼɔ abɔ̀ʼ inɔb yaya: Mèri Màdàlen, Mèri ngɔb Jem kwa tì Jòseb fɔrɔ Sàlomè.

⁴¹ Mə̀yi mbo̰ ya beni abɔ̀ʼ Yeso. Mbi yaya yḛ̀ nè wètè aməd nɔ̀ʼ ane Yeso yaya kiri a Galìli. Mə̀yi nɔʼ nɔʼ ndəŋ yaya bə̀ angu ne ya kɔ̀ʼɔ ghò a Jèrusalèm tì məd.

Icheg ne mbi ya twəŋi Yeso

⁴² À yaya si ikwikwiri aneg ze ne nàʼà abə aneg àzwètì mə̀Ju, icheg ne à ya aneg ne mbe chùʼrə nyɔd,

⁴³ Jòseb a Àrimàtiyà ya nyimi fìŋ ghò abə Payilèd, pè ghà ibo gha wì naʼa awu àze Yeso mbe ghò twə̀ŋi. Məd ya wə̀d ne mbi yaya ghùmnə abɔ̀ʼ bəd ne sàʼa aben. Wì yaya bə̀ ghɔ̀mɔ̀ anug ìfɔ̀n Ŋwiye.

⁴⁴ Anug ya chè Payilèd ni zug gha Yeso fə ku. Ane, wì ya kàrì atog wə̀d igun mə̀sogyì iki biri ibo gha, “Yeso wa fə ku?”

⁴⁵ Anyumə̀ ne atog wə̀d igun mə̀sogyì ya ghà ibo gha wì fə ku, wì ya bḛ gha Jòseb ghò swi awu ze niŋ ghò twə̀ŋi.

⁴⁶ Jòseb ya ghò zon ndwi linèn, ghò swi awu ze Yeso, nib inga ndwi linèn ze, ghò nɔ̀ŋì inga iseg ne mbi ya to inga igho. Wì ya si bìŋi iteg kyen kùbri ichug iseg we angu.

⁴⁷ Mèri Màdàlen tì Mèri ngɔb Jòseb ya bàd asiŋi ne mbi ya nɔ̀ŋì awu Yeso angu.