Mk 12 - Ikan feg

Ngam məgri imbə̀ʼ bəd ne ya nyimi mben vayìn

¹ Yeso ya si nɔ̀ʼ ko ghà tìngam məgri abə bəd mbe ne ya tangi inug inga aben mə̀Ju gha, “Mbaŋà mɔ̀ʼɔ ya kon mben vayìn, kɔd ikam chè kad, tɔŋ ibighi bɔm asiŋi ne mbi biri se mḭ̀yḛ̀ mənoʼ inga. Wì ya bə̀ bɔm nəb ikaŋ ne wə̀d biri chùghi inga se kyèʼrè mben ze. Wì ya ghì ane nàʼ mben ze abə bəd mɔ̀ʼɔ gha mbe nyimi ghi fàʼ inga. Wì ya nàʼ ane, nɔ̀ʼ ghò inga aben ndəŋ.

² Ane nyùmə̀ ya kòʼi ne mbi biri kab titam vayìn te, wì ya chà ìwi wə̀d àfàʼì abə bəd mbe ne ya nyimi mben ze gha wì gho niŋ ìwi tì vayìn.

³ Bəd mbe ya gwi wə̀d àfàʼì we, sɔm, chà aməd ibo zɔbi.

⁴ Mbaʼ mben we ya ywìrì chà wə̀d àfàʼì ndəŋ inɔb. Mbi ya sɔm we tòʼ atog, bə̀ ghì tì məd ane icheg ne chəyi wi koʼi.

⁵ Mbaʼ mben we ya ywìrì chà wə̀d àfàʼì ndəŋ. Mbi ya zweti we. Wì ya bə̀ chà bəd àfàʼì nɔʼ nɔʼ ndəŋ. Mbi ya sɔm mbi mɔ̀ʼɔ bə̀ zweti mbin.

⁶ Mbaʼ mben we ya kiri bèrì wə̀d ndəŋ imɔʼ, ne ya ŋwan məd ne wì taŋ kɔ̀ŋ. Wì ya si nwḭ̀yḛ̀ chà ŋwan we inɔb, gha, ‹Mbi biri ghùmnə ìmə ŋwan.›

⁷ Si ya gha, bəd mbe ne ya gwi ŋwan we si chùm mbɔb mbɔb gha, ‹À ya àjəgnəb məd gho̰. Mbə̀ yèʼe tì zweti aməd, imbə̀ʼ ighi mbo̰ si yaʼ ìmba.›

⁸ Mbi ya ghà ane, gwi ŋwan we zweti, màʼ aməd anjìm ikam ane mben vayìn ze.

⁹ Mbaʼ mben vayìn ze kə ghə̀nə? Wì biri ghò zweti bəd mbe ne ya nyìmi mben ze, si nàʼ mben ze abə bəd ndəŋ.

¹⁰ Chəyi mbə̀ kiri fɔŋi anug azo̰ inga Àŋwàʼrì Ŋwiye gha, ‹Iteg we ne bəd ne kɔ̀rɔ nəb ya to̰ awɔb, wì fə bə̀ŋə̀ ane iteg ibog nəb.

¹¹ Anug azo̰ ya Anɔŋisəg ghi. À ya ayeti anug ina ni bàd!›”

¹² Itog bəd inga aben mə̀Ju ya zug ane, se kə̀bə̀ ni gwì aməd imbə̀ʼ icheg ne mbi ya kyeri gha wì ya ghàmà ìngam məgri we imbə̀ʼ awɔb. Si ya gha, mbi yaya bɔ inɔ̰ bəd we. Ane, mbi ya sàŋì aməd nɔ̀ʼ ghò awɔb.

Ibiri imbə̀ʼ anug ne nàʼ mə̀tag

¹³ Bəd mbe ne yaya tangi inug inga aben mə̀Ju ya tɔm mə̀Farìsi mɔ̀ʼɔ fɔrɔ bəd mɔ̀ʼɔ abɔ̀ʼ mə̀sə̀ʼ ìmbi Erɔ̀d gha mbe gho abə Yeso. Mbi ya ghò ni zweri ìngam məd ni gha wì mə̀ ghà anug mɔ̀ʼɔ mbi si chè igun zì isaʼi igun məd.

¹⁴ Mbi ya ghò pè ghà abə Yeso gha, “Àchwitìnùg, tè kyèri gha àghò we ghàmà tesiʼ. Tè bə̀ kyèri gha chəyi àghò we bɔ bəd imbə̀ʼ icheg ne chəyi àghò we ghìyə̀ ighə. Àghò ya chwìte yaʼ tesiʼ imbə̀ʼ icheg ne Ŋwiye kə̀bi gha bəd chughi. Mə̀nɔ̀ʼɔ̀ wa chwi gha tì nàʼ mə̀tag abə Kayisà kə̀ chəyi?

¹⁵ Tì naʼa kə̀ chəyi?” Yeso ya kyeri gha mbɔb ya bəd ne bèmnè inug. Ane, wì ya ghà inɔb gha, “Aton ne mbə̰ mbe kə̀bə̀ ni kwàʼrì mə àkə gha? Mbə̀ yeʼe tì ikab atə̰ mɔ̀ʼɔ, nàʼ mə̀ nḛ.”

¹⁶ Mbi ya ghò nàʼ ikab atə̰ mɔ̀ʼɔ ibo. Ane, wì ya biri inɔb gha, “Ìfe gho̰ tì ikum gho̰ àkə ìwi we?” Mbi ya ywìtì ibo gha, “À ya ìwi Kayisà.”

¹⁷ Yeso ya ghà inɔb gha, “Mbə̀ naʼa ighi Kayisà abə Kayisà bə̀ nàʼ ighi Ŋwiye abə Ŋwiye.” Mbi ya taŋ yeti icheg ne wì ya ywìti ìngam we angu.

Ibiri imbə̀ʼ anug ne zweme ane iwu

¹⁸ Mə̀sadùsi yaya gha chəyi bəd biri zweme ane iwu. Ane, mbi mɔ̀ʼɔ abɔ̀ʼ inɔb ya ghò abə Yeso pè biri ibo gha,

¹⁹ “Àchwitìnùg, Muse ya ŋwàʼrì ina gha ifi wə̀d mə ku nɔ̀ŋì ìwi iweg ne chəyi ŋwan, tengàŋ bèrì ni niŋ iku-àyi we gwi bɔn tì məd ne biri yaʼ bɔn ìmbi ifi məd we ne ku.

²⁰ Məfi mɔ̀ʼɔ ìsàmbe ya yaʼ angu. Wə̀d mbègtog ya nam ìwi iweg, ku ne chəyi wì beri ŋwan.

²¹ We ne beni abɔ̀ʼ ya niŋ iku-àyi we, bə̀ ku ne chəyi wì beri ŋwan. Ze ya yaʼ ane tì ifi we ne ya pè ane itad.

²² Ze ya chè gha məfi mbe ìsàmbe ya ku ne chəyi mbi beri ŋwan tì àyi we. Àyi we ya bə̀ si nwḭ̀yḛ̀ ku yi.

²³ Anyumə̀ ne bəd biri zweme ane iwu, iku-àyi we kə si yaʼ iweg iwe, icheg ne məfi mbe ìsàmbe ya nam məd?”

²⁴ Yeso ya ywìtì inɔb gha, “Aton ne mbə fèbè ya gha chəyi mbə̀ kyèri anug ne yaʼi inga Àŋwàʼrì Ŋwiye. Chəyi mbə̀ bə kyèri ika Ŋwiye.

²⁵ Anyumə̀ ne bəd biri zweme ane iwu, chəyi mbi biri ya ywìrè nàma. Chəyi mbi biri ya bə̀ ywìrè nàmna bɔn. Bəd biri si yaʼ icheg mbè angirə̀ mbe ne ikaŋ àbɔ̀ŋɔ.

²⁶ Àsi imbə̀ʼ anug ne iwu bəd biri zweme: Àkə chəyi mbə̀ kiri fɔŋi inga àŋwàʼrì ze ne Muse ya ŋwàʼri? Wì ya ghà inga asiŋi ze ne ghàmi imbə̀ʼ agyen ne yaya bère, mə̀tì icheg ne Ŋwiye ya ghà ibo gha, ‹Mo ya Ŋwiye ìwi Abràham tì Azìg fɔrɔ Jàkɔb.›

²⁷ Məd kayi Ŋwiye iwu bəd. Məd ya Ŋwiye bəd mbe ne yaʼi izɔm. Mbə fə taŋ fèbè!”

Nɔ̀ʼɔ̀ we ne che mə̀nɔ̀ʼɔ̀ məjìm

²⁸ Àchwitì mə̀nɔ̀ʼɔ̀ mɔ̀ʼɔ ya zug icheg ne Yeso tì mə̀Sadùsi mbe yaya ghàmà, bə̀ bàd icheg ne Yeso yaya ywìtì ìngam inɔb icheg chɔm. Ane, wì ya biri ibo gha, “Nɔ̀ʼɔ̀ we ne che mə̀nɔ̀ʼɔ̀ məjìm àkə iweg?”

²⁹ Yeso ya ywìtì ibo gha, “Nɔ̀ʼɔ̀ ne che mə̀nɔ̀ʼɔ̀ məjìm ya gha, ‹O Mbə̰ mə̀Izre! Mbə̀ zug, Anɔŋisəg ìwa Ŋwiye, Anɔŋisəg ya məyi iwe imɔʼ.

³⁰ Àghò bèrì ni kɔ̀ŋ Anɔŋisəg ìwe Ŋwiye ane ìze fìŋ ijìm, tì ìwe ìtḛ̀ ijìm tì ìwe ikɔndi tijìm fɔrɔ ane ìwe ika ijìm.›

³¹ Nɔ̀ʼɔ̀ ne beni abɔ̀ʼ ya gha, ‹Àghò kɔŋɔ wə̀d ne yaʼi iban ine icheg ne àghò kɔ̀ŋi ìwe nyɔd.› Chəyi nɔ̀ʼɔ ndəŋ ne chè mbo̰ məbe.”

³² Àchwitì mə̀nɔ̀ʼɔ̀ we ya ghà ibo gha, “Àchwitìnùg, àghò fə ghà anug ne koʼi. Àghò fə ghà tesiʼ gha Ŋwiye ya məyi we imɔʼ, ne chəyi ìwi ndəŋ.

³³ Anug ni kɔ̀ŋɔ məd ane fìŋ ijìm, bə̀ kɔ̀ŋ ane ikɔndi ijìm, bə̀ kɔ̀ŋ ane ika ijìm bə̀ fɔrɔ anug ni kɔ̀ŋ wə̀d ne yaʼi iban ine icheg ne àghò kɔ̀ŋi ìwe nyɔd. Mə̀nɔ̀ʼɔ̀ mbe chè nyam tijìm te ne mbe tɔ̰̀ abə Ŋwiye bə̀ chè ighi àfàtì ijìm.”

³⁴ Anyumə̀ ne Yeso ya bàd gha wì fə ywìtì ane iwe, wì ya ghà ibo gha, “Àghò fə tinde iban anug ìfɔ̀n Ŋwiye.” Ni ko ane nyùmə̀ we, chəyi wə̀d mɔ̀ʼɔ ya ywirì nyìmi fìŋ ni biri anug mɔ̀ʼɔ abə Yeso.

Ibiri imbə̀ʼ Wə̀d we ne Ŋwiye zɔ̀ʼi

³⁵ Anyumə̀ ne Yeso yaya chwìte inug inga mbàn Ŋwiye, wì ya biri gha, “Mə̀chwitì mə̀nɔ̀ʼɔ̀ kə gha Wə̀d we ne Ŋwiye zɔ̀ʼi ya ŋwan ane aghaŋ Dèvid iye?

³⁶ Azwighi Ŋwiye ya ghì Dèvid ghà zìye gha, Anɔŋisəg ya ghà abə ìmə Anɔŋisəg gha, Chughi inum aba abo jəghi, pè ane nyùmə̀ ne mə̀ biri nɔ̀ŋì ìmbe bəd ìpàb ine aton ighog.”

³⁷ Dèvid ziye ya kàrì Yeso ane Anɔŋisəg. Ze si ywìrì chè iye gha Anɔŋisəg ya ŋwan ane aghaŋ məd? Inɔ̰ bəd we ya kɔ̀ŋ ni zug inug mbe ne wì yaya ghà.

Yeso ya pati bəd imbə̀ʼ mə̀chwitì mə̀nɔ̀ʼɔ̀

³⁸ Anyumə̀ ne Yeso yaya chwìte inug, wì ya ghà gha, “Mbə̀ we awən imbə̀ʼ mə̀chwitì mə̀nɔ̀ʼɔ̀. Mbi ya kɔ̀ŋɔ̀ ni zì ndwi se se se ŋa yḛ̀ tì tiwən. Mbi ya bə̀ kɔ̀ŋɔ̀ gha bəd ya chàʼrà awɔb tì ighumni a sàmi tiywin.

³⁹ Mbi ya kɔ̀ŋɔ̀ ni chughi igun itən mbe ne yaʼi imbìghè inga məchamì Ŋwiye. Mbi ya bə̀ kɔ̀ŋɔ̀ ni chughi igun isiŋi ighumni ane isiŋi inug jəghi.

⁴⁰ Mbi ya tàmba məku àyi nìŋə ìmbɔb ighi. Mbi ya ghìyə̀ ane, se fùbrə̀ chàʼrà Ŋwiye tà̰. Ŋwiye biri zì isaʼi ka ka igun inɔb.”

Aghi ne iku-àyi ya tùti Ŋwiye angu

⁴¹ Yeso ya chughi iban aghi ze ne mbi yaya zì ituti Ŋwiye inga. Wì yaya nḛ̀ icheg ne bəd yaya zìyè ikab inga aghi ze. Bəd ikab nɔʼ nɔʼ ya zì ikab ne nɔ̀ʼi.

⁴² Iku-àyi mɔ̀ʼɔ ne chəyi àze məd ya pè zì ikab atə̰ mə̀kopà məbe ne inun məd ya icheg mə̀fraŋ ìghum.

⁴³ Yeso ya bàd ane, kàrì ìmbi mə̀mə̀nənùg abɔ̀ʼ məd ghà inɔb gha, “Mə gha tesiʼ inən gha, iku-àyi gho̰ ne chəyi àze məd fə zì ikab ne nɔ̀ʼi chè ìwi bəd məjìm mbe ne zì ikab inga aghi ze.

⁴⁴ Wè zì chè bəd məjìm imbə̀ʼ icheg ne mbɔb məjìm ya nàʼà ìwɔb ikab inga ikab nɔʼ nɔʼ ne mbi beri. Àsi məd ne yaʼi iku-àyi ne chəyi àze məd, wì fə kùtì àbàn zì ikab ijìm ne wì bèri.”