Matìyò 9 - Ikan feg

Yeso waʼ inug tibɔ̀ŋ abə wə̀d ne buʼrə bə̀ ghù aməd

¹ Yeso ya nyi inga abaŋ igyi, bàni atəŋ bə̀ndì ghò ibo aben.

² Bəd mɔ̀ʼɔ ya bèʼì wə̀d ne buʼrə inga tìsa yèʼe ibo. Anyumə̀ ne Yeso ya bàri gha mbɔb bèrì ibḛfiŋ igun məd, wì ya ghà abə abuʼrə wə̀d ze gha, “Àmə ŋwan, àghò nyimbi fìŋ. Mə fə waʼ ìmbe inug tibɔ̀ŋ.”

³ Icheg ne wì ya ghàmi ane, mə̀chwitì mə̀nɔ̀ʼɔ̀ mɔ̀ʼɔ ya ko se ghàmà mbɔb mbɔb gha, “Wə̀d gho̰ ya anìŋ zɔ̀mbɔ Ŋwiye.”

⁴ Yeso ya kyeri anug ne mbɔb yaya kɔ̀ndɔ, si ghà inɔb gha, “Aton ne mbə̀ kɔ̀ndɔ inug tibɔ̀ŋ inən inga fìŋ àkə gha?

⁵ Anug ne zami àkə aza? Àkə ni gha, ‹Mə waʼ ìmbe inug tibɔ̀ŋ› kə̀ àkə ni gha, ‹Nɔ̀ʼɔ yḛ̀›?

⁶ Mə ghàm anìŋ ni gha mbə̀ kyeri gha Ŋwan Wə̀d bèrì ika ni waʼ inug tibɔ̀ŋ abə bəd igun isəg.” Wì ya si ghàbri ghà abə abuʼrə wə̀d ze gha, “Àghò nɔ̀ʼɔ təm, kad àze abaʼ ghò ine achan.”

⁷ Wə̀d we ya bə̀ nɔ̀ʼ təm kwàʼ ati, se yḛ̀ ghò yi ibo achan.

⁸ Anyumə̀ ne inɔ̰ bəd we ya bàri anug ne du, mbi ya bɔ, se ghùmnə Ŋwiye we ne nàʼi iku ika gho̰ abə bəd.

Yeso kàrì Matìyò

⁹ Icheg ne Yeso ya nɔ̀ʼi asiŋi ze, wì yaya ghò nyì bàd wə̀d mɔ̀ʼɔ ne ikum məd ya Matìyò. Wì ya yaʼ ichughi asiŋi àfàʼì məd ne we nìŋə tag. Yeso ya ghà ibo gha, “Àghò beni abɔ̀ʼ inum.” Matìyò ya bə̀ nɔ̀ʼ bèni ibo anjìm.

¹⁰ Icheg ne Yeso tì mə̀mə̀nənùg məd yaya jə̀ghə inga nəb abə Matìyò, bədtag nɔʼ nɔʼ tì bəd ne ghìyə̀ inug tibɔ̀ŋ ya fete ni jəg abɔ̀ʼ inɔb.

¹¹ Anyumə̀ ne mə̀Farìsi ya bàri, mbi ya biri abə mə̀mə̀nənùg ìmbi Yeso gha, “Aton ne ìwən Àchwitìnùg we jə̀ghə tì bədtag fɔrɔ bəd ne ghìyə̀ inug tibɔ̀ŋ àkə gha?”

¹² Yeso ya zug anug ne mbɔb biri si ywìtì gha, “Bəd ne kə̀bə̀ wə̀d ifuʼ kayi bəd ne yaʼi icheg chɔm. À ya bəd ne ghɔ̰̀.

¹³ Mbə̀ gho nàni aton ane Ìngam Ŋwiye we ne gha, ‹Mə kɔ̀ŋ gha bəd ya bèrè àsɔ̀mnəfiŋ. Chəyi mə̀ kɔŋi anug ne bəd mbe nàʼà ighi àfàtì inum.› À ya ane imbə̀ʼ icheg ne chəyi mə̀ yeʼe ni kàrì bəd ne təmi kòʼ. Mə yeʼe ni kàrì bəd ne ghìyə̀ inug tibɔ̀ŋ.”

Tibiri imbə̀ʼ anug ni chughi njèg

¹⁴ Mə̀mə̀nənùg ìmbi Jɔn we ne yaya nàʼà mənib ya yeʼe abə Yeso pè bìri ibo gha, “Aton ne mba tì mə̀Farìsi te nḛ anug ni chughi njèg, àsi ìmbe mə̀mə̀nənùg, chəyi mbɔb mbe chùghə njèg àkə gha?”

¹⁵ Yeso ya ywìtì inɔb gha, “Chəyi mə̀sə̀ʼ ìmbi mbaʼ igən mbe chùghə njèg bə̀ sɔ̀mnɔ̀ anyumə̀ ne mbaʼ igən kiri biri tì inɔb ane inami. Nyùmə̀ we yèʼe ne mbi biri niŋ mbaʼ igən chì abɔ̀ʼ inɔb. À ya anyumə̀ we ne mbɔb biri se chùghə njèg bə̀ sɔ̀mnɔ̀.

¹⁶ Chəyi wə̀d mɔ̀ʼɔ ne kweʼè nìŋə aba ane ndwi feg bànda igun ndwi anun. Mbi mə̀ ghì ane, nji ze biri ghì ndwi ze taŋ sètè.

¹⁷ Chəyi bəd mbe bə̀ zìyè mənoʼ zù inga aghi mənoʼ ne fə beghi. Mbi mə̀ zì ane, aghi mənoʼ ze biri sa̰, mənoʼ tuyə, aghi mənoʼ bə̀ bə. Tesiʼ ya gha, mbi ya zìyè mənoʼ zù inga aghi mənoʼ feg ni gha aghi mənoʼ fɔrɔ mənoʼ yaʼ icheg chɔm.”

Yeso zwèmni ŋwan àyi mɔ̀ʼɔ bə̀ ghù àyi mɔ̀ʼɔ ne yaya ghɔ̰̀ ìseg

¹⁸ Anyumə̀ ne Yeso yaya kiri ghàmà inug mbo̰, wə̀d mɔ̀ʼɔ ne yaʼi atog wə̀d inga ichamì Ŋwiye ya yeʼe pè gɔ̀m itog inwḭ aseg ibo imbìghè, ghà ibo gha, “Àmə ŋwan àyi cherè kùyə məyi amad anìŋ. Àghò yeʼe nɔ̀ŋì ìmbe ibo igun məd wì zweme.”

¹⁹ Yeso ya nɔ̀ʼ ko ni ghò abɔ̀ʼ məd. Mə̀mə̀nənùg məd ya bə̀ bèni ibo anjìm.

²⁰ Icheg ne mbɔb yaya ghò, àyi mɔ̀ʼɔ ne ya fə zə̰ ngəʼ tì ìseg ane tituʼ ìghum chɔ̀b ibe ya yeʼe anjìm abə Yeso, pè sèmì abo bètì ibug ndwi məd.

²¹ Bɔŋ wì ya se bètè ndwi ze, wì ya ghà ibo inga fìŋ gha, “Mə mə̀ bètì ka à ya məyi ibug ndwi məd, aghɔn azo̰ biri mèg.”

²² Yeso ya ghabri bàd aməd, si ghà ibo gha, “Abo, àghò nyimbi fìŋ. Ìwe ibḛfiŋ fə ghì aghɔn mèg igun ine.” Aghɔn ze ya bə̀ mèg kwàʼ ati.

²³ Anyumə̀ ne Yeso ya gho pè nyi inga achan abə atog wə̀d ze inga ichamì Ŋwiye, wì ya bàd inɔ̰ bəd ne dèghè to ìsaʼ fɔrɔ bəd ne se fə ikəʼ zə̀ʼə̀ tikyeg iwu.

²⁴ Wì ya ghà inɔb gha, “Mbə̀ saka mbə̰ məjìm! Chəyi ŋwan we kiri ku. Wì ya gwḛ yi gwḛ.” Inɔ̰ bəd we ya chəʼ aməd.

²⁵ Anyumə̀ ne mbi ya fə ghi inɔ̰ bəd we dù isəg, Yeso ya nyi inga nəb, nyìmi ŋwan àyi we ane abo, wì gad nɔ̀ʼ chùghi ichughi.

²⁶ Bəd ya chètì anug azo̰ inga isiŋi ijìm inga aba aben ze.

Yeso ghù məfəg məbe

²⁷ Anyumə̀ ne Yeso ya nɔ̀ʼi ane asiŋi ze ko ni ghò yi, mbaŋà mɔ̀ʼɔ tibe ne yaʼi məfəg ya beni ibo anjìm, se nè kyḛ kàrà aməd gha, “Ŋwan ifɔn Dèvid! Àghò bere àsɔ̀mnəfiŋ igun ina.”

²⁸ Anyumə̀ ne Yeso ya gho pè nyi inga nəb, məfəg mbe ya yeʼe ibo. Wì ya biri inɔb gha, “Mbə bḛ gha mə we tì mə ghù awən?” Mbɔb ya ywìtì gha, “E, Masà! Tè bḛ”

²⁹ Icheg ne mbi ya gha ane, wì ya sèmì abo bètì àzɔb aghə, si ghà inɔb gha, “Icheg ne ìwən ibḛfiŋ chwi, mbə̀ se bàrà isiŋi.”

³⁰ Mbi ya ko se bàrà isiŋi. Yeso ya si pàti awɔb kɔ̀mbì kɔ̀mbì gha, “Imbə̀ʼ mbə̰ gha awən anug ne du abə wə̀d.”

³¹ Yeso ya jiʼì ghà ane, si ya gha, mbɔb ya dù isəg, saʼ anug ne Yeso ya ghi inɔb inga aba aben ze ajìm.

Yeso ghù wə̀d ne chəyi wì yaya ghàmà

³² Icheg ne mbaŋà te tibe ne Yeso ya ghi mbi se bàrà isiŋi yaya ghò, bəd mɔ̀ʼɔ ya niŋ wə̀d mɔ̀ʼɔ ne azwighi tibɔ̀ŋ ya nyi inga məd, yèʼe abə Yeso. Azwighi tibɔ̀ŋ ze ya ghì chəyi wì yaya ghàmà.

³³ Kwàʼ anyumə̀ ne Yeso ya kamni azwighi tibɔ̀ŋ ze chì inga wə̀d we, wì ya si ko se ghàmà. Anug ya chè inɔ̰ bəd we, mbi si gha, “Chəyi tì kə kweʼì bàd anug icheg azo̰ inga aben Izre”

³⁴ Si ya gha, mə̀Farìsi ya ton awɔb, si ghà àzɔb gha, “À ya ifɔn abə izwighi tibɔ̀ŋ nàʼi ika ibo gha wì se chìyè izwighi tibɔ̀ŋ inga bəd.”

Yeso bèrì àsɔ̀mnəfiŋ igun bəd

³⁵ Yeso yaya ghò inga iben ijìm, mbi kwa kwa tì mbi kyen kyen. Wì yaya yḛ̀ nè chwìte inug inga məchamì Ŋwiye bə̀ nè chètè ikən chɔm imbə̀ʼ anug ìfɔ̀n ikaŋ. Wì yaya bə̀ yḛ̀ nè ghùyə̀ aku aghɔn ajìm ne bəd yaya ghɔ̰̀.

³⁶ Anyumə̀ ne wì ya bàri inɔ̰ bəd, wì ya bèrì àsɔ̀mnəfiŋ imbə̀ʼ icheg ne bəd yaya zə̰ ngəʼ ne chəyi wə̀d ni wètì awɔb. Bəd ya yaʼ icheg njə̀g ne chəyi wə̀d ni kyèʼrì awɔb.

³⁷ Wì ya si ghà abə mə̀mə̀nənùg məd gha, “Ighi fə tə̀n a mben nɔʼ, si ya gha, bəd àfàʼì kə.

³⁸ Mbə̀ chaʼra Ŋwiye gha Wə̀d ne beri mben wè cha bəd àfàʼì inga ìzi mben, mbe niŋ ighi məd.”