Matìyò 3 - Ikan feg

Inug imbə̀ʼ Jɔn we ne nàʼà mənib

¹ Nyùmə̀ mɔ̀ʼɔ ya pè, Jɔn we ne nàʼà mənib gho inga ibad zɔbi we inga Jùdeyà. Wì ya pè ko se ghàmà Ìngam Ŋwiye.

² Wì yaya ghàmà gha, “Mbə̀ bəŋə ìtən fìŋ sìkì inug tibɔ̀ŋ imbə̀ʼ icheg ne anug ìfɔ̀n ikaŋ fə tinde.”

³ Jɔn gho̰ ya wə̀d we ne wə̀dkə̀n Ŋwiye Àzayà ya ghum ghà anug imbə̀ʼ aməd gha, “Wə̀d mɔ̀ʼɔ we kyḛ inga ibad zɔbi gha, ‹Mbə̀ tangi inɔnjì abə Anɔŋisəg. Mbə̀ ghiyə mənɔnjì məd mbe təm!›”

⁴ Mbi ya tangi ndwi ìti Jɔn ane nyɔ̀ŋì Kàme. Wì yaya tìŋə̀ ìkɔ̀bì gɔb ane ìkyèri. Ighijəg məd ya yaʼ ngwèmi tì jɔg ne mbi yaya chìyè inga iboʼ.

⁵ Bəd nɔʼ nɔʼ inga Jèrusalèm tì inga Jùdeyà ijìm bə̀ fɔrɔ inga isiŋi ijìm mbe ne yaʼi iban igyi Jodàn yaya ghò abə Jɔn.

⁶ Mbi yaya pè bḛ ìmbɔb inug tibɔ̀ŋ. Ane, wì yaya nàʼà mənib inɔb inga igyi Jodàn.

⁷ Àsi anyumə̀ ne wì ya bàri mə̀Farìsi nɔʼ nɔʼ tì mə̀Sadùsi nɔʼ nɔʼ ne yaya yèʼe gha wì naʼa mənib inɔb, wì ya ghà inɔb gha, “Mbə̰ ya kwàʼ ifighi! Àkə we pati awən gha mbə̀ nòrò abə ngəʼ kyen ze ne yèʼe?

⁸ Mbə̀ ghiyə inug mbe ne chwìye gha mbə̰ fə bə̀ŋì ìtən fìŋ sìkì inug tibɔ̀ŋ.

⁹ Imbə̀ʼ mbə̰ kɔndɔ awən gha mbə fə pum məyi icheg ne mbə̰ mbe ghà mbə̰ mbə̰ gha, ‹Mba ya bɔn ane aghaŋ inəbi Abràham!› Mə ghà inən gha, Ŋwiye we tì wì niŋ ateg azo̰ bə̀ŋì ane bɔn ìmbi Abràham.

¹⁰ Ka bèyi amad anìŋ, Ŋwiye fə nɔ̀ŋì jam iban ighaŋ ized. Ane, wì biri wàd ized ijìm mbe ne chəyi mbe ko titam chɔm màʼ inga iywid.

¹¹ Mə ya nàʼà mənib inən ni chwi gha mbə̰ fə bə̀ŋì ìtən fìŋ sìkì inug tibɔ̀ŋ. Si ya gha, wə̀d we ne yèʼe inum anjìm wì bèrì ati chè amə. Chəyi mə̀ koʼi ni bèʼì itami məd. Məd biri chà Azwighi Ŋwiye igun inən bə̀ chà iywid igun inən.

¹² Aso ìtweg-ikwè fə si ibo ikye abo ni kyàŋì ijɔri chì inga kyì ikye mben. Wì mə kyàŋì, wì biri feti ìti kyì chà inga ngən si tɔ̀n ijɔri inga iywid nɔʼ mèg.”

Yeso niŋ mənib

¹³ Anyumə̀ ne Jɔn yaya nàʼà mənib abə bəd, Yeso ya nɔ̀ʼ a Galìli ghò abə Jɔn ane wì ya yaʼi igyi Jodàn. Wì ya ghò gha Jɔn naʼa mənib ibo.

¹⁴ Jɔn ya kə̀b ni təmni aməd, ane wì ya ghà abə Yeso gha, “À ya àghò kə̀ beri ni nàʼ mənib inum. Aton ne àghò si yèʼe yaʼ inum àkə gha?”

¹⁵ Yeso ya ywìtì ibo gha, “Si ze yaʼ ane amad anìŋ imbə̀ʼ icheg ne ze kòʼ gha tì ghiyə inug ijìm icheg ne Ŋwiye kə̀bi.” Anyumə̀ ne wì ya gha ane, Jɔn ya zug bḛ, si nàʼ mənib ibo.

¹⁶ Anyumə̀ ne Yeso ya fə niŋi mənib, wì ya dù inga igyi we. Kwàʼ ati ati, ikaŋ àbɔ̀ŋɔ ya fìʼè, wì bàd Azwighi Ŋwiye ne ya swiʼi yèʼe icheg bupə pè nàŋa igun məd.

¹⁷ Gì mɔ̀ʼɔ ya si ghàm ikaŋ àbɔ̀ŋɔ gha, “Aŋa ya ìmə Ŋwan ne mə̀ taŋ kɔ̀ŋ. Ìmə fìŋ ze taŋ bɔ̀ŋɔ̀ imbə̀ʼ aməd.”