Matìyò 28 - Ikan feg

Yeso zwème ane iwu

¹ Ane aneg àzwètì mə̀Ju ya fə che, ne ituʼ ya se chə̀ghə ni nàʼ abə aneg Sɔndè, Mèri Màdàlen tì ìywin tì Mèri ya ghò ni nèn iseg we ne mbi ya nɔŋi awu Yeso inga.

² Ìseg ya gàd ghùd kwàʼ ane ika, Angirə̀ Anɔŋisəg swiʼi ikaŋ àbɔ̀ŋɔ pè tḭ iteg we ichug iseg we, chì nɔŋi iban, si chùghi yi igun.

³ Ìfe abə angirə̀ we yaya zḛ njànda njandi kwàʼ icheg àŋwàŋwaŋ. Ndwi məd yaya bə̀ fùyə kwàʼ icheg awḛ.

⁴ Mə̀sogyì mbe ne yaya kyèʼè iseg we ya bɔ, ghùmbə̀, kəm aseg icheg iwu bəd.

⁵ Angirə̀ we ya ghà abə mə̀yi mbe gha, “Imbə̀ʼ mbə̰ bɔ awən. Mə kyèri gha mbə̰ ya kə̀bə̀ Yeso we ne mbi ya kɔ̀mbi igun azed abaʼri.

⁶ Chəyi məd aŋa. Wì fə zweme kwàʼ icheg ne wì ya gha inən. Mbə̀ yeʼe bàd asiŋi ne mbi kə nɔŋi awu məd angu.

⁷ Kwàʼ icheg ne mbə̀ bari, mbə zamba ghò abə mə̀mə̀nənùg məd pè ghà inɔb gha, ‹Wì fə zwemi iwu. Məd we se ghò inən imbìghè a Galìli. Mbə̰ biri bàd aməd angu!› Mə fə ghà anug ne du inən.”

⁸ Mə̀yi mbe yaya bɔ, si ya gha, igyendi ya sweg inɔb inga fìŋ. Ane, mbi ya zàmbì nɔ̀ʼ atog iseg we, nòrò ghò ni ghà anug ne du abə mə̀mə̀nənùg ìmbi Yeso.

⁹ Mbi ŋa zə̰, Yeso bɔmbì tì inɔb, chàʼrì awɔb. Mbɔb ya ghò gùndi aseg ibo imbìghè, nyìmi ighog ibo, ghùmni aməd.

¹⁰ Wì ya si ghà inɔb gha, “Imbə̀ʼ mbə̰ bɔ awən. Mbə̀ gho ghà abə ìmbum məfi gha mbe gho a Galìli mbi biri bàd amə angu.”

Mə̀sogyì mə̀tì anug ne du

¹¹ Anyumə̀ ne mə̀yi mbe ya nɔ̀ʼi se ghò, mə̀sogyì mɔ̀ʼɔ ya ghò ikye aben ni mə̀tì anug ne du abə itog bəd mbàn Ŋwiye.

¹² Itog bəd mbàn Ŋwiye tì itog bəd inga aben ya fete ni chuʼri anug ne mbi biri ghì. Mbɔb ya chuʼri ane nàʼ ikab nɔʼ nɔʼ abə mə̀sogyì mbe,

¹³ si ghà inɔb gha, “Mbə̀ gha gha, ‹À ya mə̀mə̀nənùg məd yèʼe ji awu məd izimi anyumə̀ ne te kə̀ gwḛ.›

¹⁴ Gɔbnà mə zug anug azo̰, tì biri kyeri anug ni gha ibo ni chì awən inga ngəʼ.”

¹⁵ Mə̀sogyì mbe ya niŋ ikab we bə̀ ghà kwàʼ icheg ne mbi ya gha inɔb gha mbe gha. Mə̀Ju kiri biri chètè anug ako azo̰ pè tèchɔ̀ŋ.

Yeso zì àfàʼì kyen ikye abo abə ìmbi mə̀mə̀nənùg

¹⁶ Mə̀mə̀nənùg Yeso mbe ìghum chɔ̀b imɔʼ ya ghò ikaŋ iwum a Galìli icheg ne Yeso ya gha inɔb.

¹⁷ Anyumə̀ ne mbi ya bàri aməd, mbi ya ghumni aməd. Si ya gha, mbi mɔ̀ʼɔ ya jə̀m aməd.

¹⁸ Yeso ya si pè ghà inɔb gha, “Ŋwiye fə nàʼ ika inum ni tùmbì ighi ijìm ikaŋ àbɔ̀ŋɔ fɔrɔ igun isəg.

¹⁹ Ane, mbə̀ gho inga iben ijìm ghò ghì bəd yaʼ ìmbum mə̀mə̀nənùg. Mbə̀ naʼa mənib inɔb inga ikum Mbaʼ tì Ŋwan fɔrɔ Azwighi Ŋwiye.

²⁰ Mbə̀ chwiti inug inɔb mbe se zùgrə tikə tijìm te ne mə̀ ya nàʼi inən. Mbə̀ kyeri gha, mə biri yaʼ amə tì inən mà nyumə̀ ijìm anene isəg nwḭ̀yḛ̀.”