Matìyò 25 - Ikan feg

Ngam məghri imbə̀ʼ fɔ̀d bɔn àyi ìghum

¹ Yeso ya ghà abə mə̀mə̀nənùg məd tì inɔ̰ bəd we gha, “Anyumə̀ we ne Kristo biri ywiri yeʼe, anug ìfɔ̀n ikaŋ biri yaʼ icheg ne fɔ̀d bɔn àyi ìghum ne ya niŋi ìmbɔb inam dù ghò ni ghɔ̀m mbaʼ igən.

² Bɔn àyi məta̰ abɔ̀ʼ inɔb ya furə. Mə̀mbin məta̰ ya bèrì iwe.

³ Bɔn àyi mbe ne ya furə ya niŋ ìmbɔb inam, si ya gha, chəyi mbɔb ya nyimi məwud anam ndəŋ ni zì inga anam.

⁴ Bɔn àyi mbe ne ya beri iwe ya niŋ ìmbɔb inam bə̀ nyìmi məwud anam ndəŋ inga chəŋ ni ghò zì inga anam.

⁵ Icheg ne mbaʼ igən we ya ta̰ ni yeʼe, ngwḛ ya chìŋə̀ bɔn àyi mbe mbɔb məjìm, mbi fen angwḛ.

⁶ Ane àngɔŋ izimi ya pe, wə̀d mɔ̀ʼɔ ya kyen ane gì ka ka gha, ‹Mbaʼ igən we fə yeʼe! Mbə̀ yeʼe chàʼrì aməd!›

⁷ Anyumə̀ ne bɔn àyi mbe ya zughi anug ze, mbɔb ya nɔ̀ʼ angwḛ fùki ìtɔb tiniʼ inam.

⁸ Bɔn àyi mbe ne ya furə ya ghà abə mbin ne ya beri iwe gha, ‹Məmbon, tì boʼ ibo nàʼ inən, mbə̀ naʼa məwud anam mɔ̀ʼɔ ina. Ìmba tì inam mbe se nìmne›

⁹ Mbin ne ya beri iwe ya ywìtì inɔb gha, ‹Indèʼ! Chəyi məwud anam mbo̰ biri kòʼ ina fɔrɔ inən. Mbə̀ gho zon ìmbən tì məwud anam abə bəd ne fḛ̀ məwud.›

¹⁰ Anyumə̀ ne mbɔb ya gho ni zon məwud anam mbe, mbaʼ igən ya yeʼe. Bɔn àyi mbe ne ya fə chuʼri nyɔd ya nyi inga nəb igən ni ko jəg igən. Icheg ne mbɔb ya nyi ane, mbi ya wùbì inuʼ nəb.

¹¹ Ane, chəyi amad ya sa, mbin tì bɔn àyi ya bə̀ yèʼe, pè ko se gha, ‹Masà! Masà! Fìʼe nəb ina!›

¹² Mbaʼ igən we ya ywìtì inɔb gha, ‹Mə gha tesiʼ inən, chəyi mə̀ kyeri awən.›

¹³ Ane, mbə̀ chughi ikyèʼi imbə̀ʼ icheg ne chəyi mbə̀ kyeri aneg ze kə̀ nyumə̀ we ne Ŋwan Wə̀d biri ywiri yeʼe.”

Ngam məgri imbə̀ʼ bəd àfàʼì mətad

¹⁴ Yeso ya chè imbìghè ghà abə mə̀mə̀nənùg məd tì inɔ̰ bəd we gha, “Anug ìfɔ̀n ikaŋ biri bə yaʼ icheg ne wə̀d mɔ̀ʼɔ ne ya ŋa ghò yi ane igha̰. Wì ya tɔ̀ŋɔ ìmbi bəd àfàʼì, zì ìmbi ighi inɔb inga ikye abo.

¹⁵ Wì ya nàʼ ìbàn ikab gol ita̰ abə wə̀d àfàʼì fìbì, nàʼ ìbàn ibe abə ìwi ndəŋ, bə̀ nàʼ àbàn amɔʼ abə ìywin. Wì ya nàʼ inun ìbàn ikab gol mbe inɔb icheg ne tì wə̀d imɔʼ imɔʼ abɔ̀ʼ ya fàʼ tì ìmbi awən. Anyumə̀ ne mbaʼ àfàʼì we ya nàʼi ane, wì ya nɔ̀ʼ ghò yi ane igha̰.

¹⁶ Wə̀d àfàʼì we ne ya niŋi ìbàn ikab gol ita̰ ya ghò ghì iywin, jəg njìm ìbàn ndəŋ ita̰.

¹⁷ À ya bə̀ ane ne wə̀d àfàʼì we ne ya niŋi ìbàn ikab gol ibe ya bə̀ ghò ghì iywin, bə̀ jəg njìm ìbàn ndəŋ ibe.

¹⁸ Àsi wə̀d àfàʼì we ne ya niŋi àbàn ikab gol amɔʼ, wì ya ghò tɔŋ ibighi inga ìseg, nə̀m ikab ìwi mbaʼ àfàʼì məd we inga.

¹⁹ Anyumə̀ ne agha ya sa, ìwɔb mbaʼ àfàʼì we ya bə̀ndì igha̰, pè ko ni nwendi anug imbə̀ʼ məkab mbe ne wì ya nàʼi abə bəd àfàʼì məd mbe.

²⁰ Wə̀d àfàʼì we ne ya niŋi ìbàn ikab gol ita̰ ya ghò tì ìbàn ndəŋ ita̰, pè ghà abə mbaʼ àfàʼì məd gha, ‹Masà, àghò ya nàʼ ìbàn ikab gol inum ita̰. Nḛ, mə fə jəg njìm ìbàn ndəŋ ita̰.›

²¹ Mbaʼ àfàʼì məd we ya ghà ibo gha, ‹Àghò fə fàʼ kwàʼ icheg chɔm. Àghò ya kwàʼ wə̀d àfàʼì chɔ̀m ne fàʼà ane ìze fìŋ ijìm. Icheg ne àghò fə fàʼi ane ìze fìŋ ijìm tì ighi kwa kwa, mə biri nɔ̀ŋì awe igun ighi nɔʼ nɔʼ. Nyi inga nəb tì se fɔrɔ gyènde!›

²² Wə̀d àfàʼì we ne ya niŋi ìbàn ikab gol ibe ya bə̀ nyi ghò ghà mbaʼ àfàʼì we gha, ‹Masà, àghò ya nàʼ ìbàn ikab gol inum ibe. Nḛ, mə fə jəg njìm ìbàn ndəŋ ibe.›

²³ Mbaʼ àfàʼì məd we ya ghà ibo gha, ‹Àghò fə fàʼ kwàʼ icheg chɔm. Àghò ya kwàʼ wə̀d àfàʼì chɔ̀m ne fàʼà ane ìze fìŋ ijìm. Icheg ne àghò fə fàʼi ane ìze fìŋ ijìm tì ighi kwa kwa, mə biri nɔ̀ŋì awe igun ighi nɔʼ nɔʼ. Nyi inga nəb tì se fɔrɔ gyènde!›

²⁴ Wə̀d àfàʼì we ne ya niŋi àbàn ikab gol amɔʼ ya nyi ghà ibo gha, ‹Masà, mə kyèri gha ìze fìŋ kà. Mə bə̀ kyèri gha àghò ya kɔ̀ŋɔ̀ ni niŋ ighi ane asiŋi ne chəyi àghò ya nyɔ̀ʼi. Àghò ya bə̀ fèti ighi ane asiŋi ne chəyi àghò nwḭ ighi angu.

²⁵ Mo yaya bɔ gha mə biri nimni ìwe ikab. Ane, mə̀ ya niŋ ikab we ghò nə̀m inga ìseg. Nḛ àze àbàn ikab gol ze azo̰.›

²⁶ Mbaʼ àfàʼì məd we ya ywìtì ibo gha, ‹Àghò ya kwàʼ wə̀d àfàʼì tibɔ̀ŋ, bə̀ yaʼ igwed! Àghò kyèri gha mə kɔ̀ŋ ni niŋ ighi ane asiŋi ne chəyi mə̀ nyɔ̀ʼi, bə̀ fèti ighi ane asiŋi ne chəyi mə̀ nwḭ ighi angu, kə̀ kayi ane?

²⁷ Nji àghò ya ghò nɔ̀ŋì ìmə ikab inga nəb ze ne bəd mbe nɔ̀ŋɔ̀ ikab inga, ni gha mə mə̀ bə̀ndì, mə niŋ atog ikab bə̀ bèrì njìm igun.›

²⁸ Wì ya ghàm ane si ghà abə bəd àfàʼì məd gha, ‹Mbə̀ niŋ àbàn ikab gol ze amɔʼ ibo nàʼ abə wə̀d àfàʼì we ne beri ìbàn ìghum.

²⁹ Mbə̀ niŋ imbə̀ʼ icheg ne wə̀d ne beri ighi, mbi biri nàʼ ighi ndəŋ ibo, wì si bèrì ighi ne taŋ nɔʼ. Àsi wə̀d ne chəyi wì beri ighi, ka bèyi iki ighi we ne wì bèri, mbi biri niŋ ibo.

³⁰ Àsi wə̀d àfàʼì ndɔ̀n gho̰, mbə̀ maʼa məd isəg inga afub, asiŋi ne mbi biri ya dèghè kùrə asɔŋ.›”

Isɔb isaʼi ne si nwḭ̀yḛ̀

³¹ Yeso ya chè imbìghè ghà abə mə̀mə̀nənùg məd tì inɔ̰ bəd we gha, “Anyumə̀ ne Ŋwan Wə̀d ywirì yèʼe icheg Ifɔn tì ìmbi mbè angirə̀ məjìm, wì biri chughi igun àze atən ifɔn.

³² Iben ijìm biri ghò feti ibo imbìghè. Ane, wì biri ghàpì bəd iba ibe, icheg ne àjənjə̀g ya ghàpà njə̀g chìyè inga gwi.

³³ Wì biri nɔ̀ŋì njə̀g ane aba abo jəghi si nɔ̀ŋì gwi ane aba abo təŋ.

³⁴ Ifɔn we biri ghàpì bəd ane, si ghà abə bəd mbe ne yaʼi ane aba abo jəghi gha, ‹Mbə̀ yeʼe, à ya mbə̰ mbe ne ìmə Mbaʼ fə zì àbɔrɔ̀bɔd igun inən. Mbə̀ yeʼe jəg anug ìfɔ̀n ze ne ìmə Mbaʼ ya fə chuʼri nɔ̀ŋì inən nɔ̀ʼ ane nyumə̀ ne wì ya tangi isəg.

³⁵ Mə gha mbə̀ yeʼe jəg anug ìfɔ̀n imbə̀ʼ icheg ne: Njèg yaya zàŋa mə, mbə nàʼ ighijəg inum. Adɔʼ mənib yaya ko amə, mbə nàʼ mənib inum. Mə ya yaʼ wə̀d tìsɔ̀ʼ, mbə̀ niŋ amə inga ìtən nəb.

³⁶ Mə yaya yḛ̀ tì ìkyèrikye, mbə zì ndwi inum ibə̀m. Mə yaya ghɔ̰̀, mbə yeʼe kyèʼì mə. Mə ya yaʼ inga nəb ndəŋ, mbə yeʼe nèn mə.›

³⁷ Bəd mbe ne ghìyə̀ inug ne koʼi biri si ywìtì ibo gha, ‹Anɔŋisəg, àkə ya yaʼ aneg azeg ne tì ya zə̰ gha njèg te zàŋa awe, tì nàʼ ighijəg ine, kə̀ ane adɔʼ mənib yaya ko awe, tì naʼ mənib ine?

³⁸ Àkə ya yaʼ aneg azeg ne tì ya bàri gha àghò ya yaʼ wə̀d tìsɔ̀ʼ, tì niŋ awe inga ìta nəb, kə̀ gha àghò yaya yḛ̀ tì ìkyèrikye, tì zi ndwi ine ibə̀m?

³⁹ Àkə ya yaʼ aneg azeg ne tì ya bàri awe ne àghò we ghɔ̰̀ kə̀ ne àghò yaʼi inga nəb ndəŋ, tì yèʼe nèn awe?›

⁴⁰ Ifɔn we biri si ywìtì inɔb gha, ‹Mə gha tesiʼ inən gha, icheg ne mbə̀ ya ghi inug mbo̰ abə wə̀d kwa kwa mɔ̀ʼɔ abɔ̀ʼ ìmbum məfi, ane ya gha mbə̀ ya ghì yaʼ inum.›

⁴¹ Wì biri ghà abə bəd mbe ne yaʼi ibo aba abo təŋ gha, ‹Mbə̰ ya bəd ndɔ̀n! Mbə̀ nɔʼɔ iban inum ghò nyi inga iywid ighə̀m imɔʼ, ne ìmə Mbaʼ ya fə tangi nɔ̀ŋì abə Debrə̀ tì mbè angirə̀ məd.

⁴² Mə ya ghà ane imbə̀ʼ icheg ne: Njèg yaya zàŋa mə, chəyi mbə̀ ya nàʼi ighijəg inum. Adɔʼ mənib yaya ko amə, chəyi mbə̀ ya nàʼi mənib inum.

⁴³ Mə ya yaʼi wə̀d tìsɔ̀ʼ, chəyi mbə̀ ya niŋi amə inga ìtən nəb. Mə yaya yḛ̀ tì ìkyèrikye, chəyi mbə̀ ya zi ndwi inum ibəm. Mə yaya ghɔ̰̀, chəyi mbə̀ ya yeʼe kyèʼì mə. Mə ya yaʼ inga nəb ndəŋ, chəyi mbə̀ ya yeʼe nèn mə.›

⁴⁴ Mbɔb biri bə ywìtì gha, ‹Anɔŋisəg, àkə ya yaʼ aneg azeg ne tì ya bàri gha njèg te zàŋa awe, chəyi tì naʼi ighijəg ine, kə̀ ane adɔʼ mənib yaya ko awe, chəyi tì naʼi mənib ine? Àkə ya yaʼ aneg azeg ne àghò ya yaʼ wə̀d tìsɔ̀ʼ, chəyi tì niŋ awe inga ìta nəb, kə̀ ne àghò yaya yḛ̀ tì ìkyèrikye, chəyi tì zi ndwi ine ibə̀m? Àkə ya yaʼ aneg azeg ne àghò yaya ghɔ̰̀, chəyi tì yeʼe kyèʼì awe, kə̀ ne àghò ya yaʼi a nəb ndəŋ, chəyi tì yèʼe nèn awe?›

⁴⁵ Wì bìri ywìti inɔb gha, ‹Mə gha tesiʼ inən gha, icheg ne chəyi mbə̀ ya ghi inug mbo̰ abə wə̀d kwa kwa mɔ̀ʼɔ abɔ̀ʼ mbo̰, ane ya gha chəyi mbə̀ ya bə ghì inum.›

⁴⁶ Ane, mbi biri si ghò nyi inga asiŋi ichə ne chəyi ìnwḭ. Àsi bəd mbe ne yaya ghìyə̀ inug ne koʼi, mbɔb biri jəg ìtḛ̀ ighə̀m imɔʼ.”