Matìyò 12 - Ikan feg

Ibiri imbə̀ʼ aneg àzwètì mə̀Ju

¹ Yeso tì mə̀mə̀nənùg məd yaya yḛ̀ inga mben kyìkɔ̀ʼ igun aneg àzwètì mə̀Ju. Njèg yaya zàŋa mə̀mə̀nənùg mbe. Ane, mbi ya ko se yḛ̀ nè mòʼò kyì kùrə awɔb.

² Anyumə̀ ne mə̀Farìsi ya bàri, mbi ya ghà abə Yeso gha, “Àghò nḛ ìmbe mə̀mə̀nənùg! Mbɔb mbe ghìyə̀ anug ne chəyi ìmba mə̀nɔ̀ʼɔ̀ bḛ gha mbe ghiyə igun aneg àzwètì.”

³ Yeso ya biri inɔb gha, “Chəyi mbə̀ kiri fɔŋi anug ne ifɔn Dèvid tì bəd mbe ne ya yaʼi abɔ̀ʼ məd ya ghi anyumə̀ ne njèg yaya zàŋa awɔb?

⁴ Məd tì bəd mbe ne ya yaʼi abɔ̀ʼ məd ya nyi inga nəb Ŋwiye, niŋ ngə̀ŋ ne mbi ya nàʼi ane aghi àfàtì abə Ŋwiye jəg. Mbi ya ghì anug ne chəyi mə̀nɔ̀ʼɔ̀ ya bḛ gha mbe ghiyə imbə̀ʼ icheg ne ngə̀ŋ ze ya məyi abə bəd mbàn Ŋwiye.

⁵ Chəyi mbə̀ bə kiri fɔŋi inga mə̀nɔ̀ʼɔ̀ Muse gha, bəd mbàn Ŋwiye ya ghì anug ne chəyi mbi ya beri ni ghì igun aneg àzwètì mə̀Ju, chəyi mbi bə gha mbɔb gùg anug?

⁶ Mə gha tesiʼ inən gha, aghi ne beri ati chè mbàn Ŋwiye ze aŋa.

⁷ Àkə aghi ne mbə̀ kyeri aton ane ìngam we ne gha, ‹Mə kə̀b gha mbə̀ ya bèrè àsɔ̀mnəfiŋ chè anug ni nàʼ ighi àfàtì› nji chəyi mbə̰ mbe chə bəd ne chəyi mbi kyeri anug.

⁸ Aton ya gha, Ŋwan Wə̀d ya Anɔŋisəg fɔrɔ igun aneg àzwètì.”

Yeso ghù wə̀d ne abo gwiʼe

⁹ Yeso ya nɔ̀ʼ inga mben kyì ze ghò inga ichamì Ŋwiye we inga asiŋi ze.

¹⁰ Wə̀d mɔ̀ʼɔ ne abo məd ya gwiʼe ya yaʼ angu. Mə̀Farìsi mbe yaya kə̀bə̀ anug ni zì igun atog abə Yeso. Ane, mbi ya si bìri ibo gha, “Ìmba mə̀nɔ̀ʼɔ̀ wa chwi gha mbe ghu bəd fɔrɔ igun aneg àzwètì?”

¹¹ Yeso ya ywìtì inɔb gha, “Wə̀d mɔ̀ʼɔ abɔ̀ʼ inən mə bèrì njə̀g imɔʼ, zi fen inga ibighi igun aneg àzwètì, àkə chəyi wì biri nyi chì?

¹² Àmə yaʼ ane, wə̀d bèrì ati chè njə̀g! Ane, mə̀nɔ̀ʼɔ̀ chwi gha wə̀d faʼa inug chɔm igun aneg àzwètì.”

¹³ Yeso ya ghàm ane, ghàbri ghà abə wə̀d we ne abo ya gwiʼe gha, “Sème àze abo.” Wə̀d we ya sèmì àzi abo kwàʼ ati ze sèmbè si yaʼ icheg àzin.

¹⁴ Mə̀Farìsi ya bàd ane, si dù isəg ghò chùʼri yaʼ icheg ne mbi biri zwete Yeso.

Wə̀d àfàʼì we ne Ŋwiye chɔ̀ʼi

¹⁵ Yeso ya kyeri tikɔndi mə̀Farìsi. Ane, wì ya kye yi ane asiŋi ze. Inɔ̰ bəd ya beni abɔ̀ʼ məd, wì ghu wə̀d ijìm ne yaya ghɔ̰̀ inga inɔ̰ bəd we.

¹⁶ Yeso ya pati awɔb gha imbə̀ʼ mbi nɔ̀ʼ ghà wə̀d ne məd yaʼi ìwiwən abə bəd.

¹⁷ Anug azo̰ ya yaʼ anìŋ ni ghì gha anug ne wə̀dkə̀n Ŋwiye Àzayà ya gha, ze duwə ane tesiʼ.

¹⁸ Wì ya gha, “Aŋa ya ìmə wə̀d àfàʼì ne mə fə chɔʼi. À ya wə̀d àfàʼì ne mə̀ taŋ kɔ̀ŋ. Mə we taŋ gyènde imbə̀ʼ aməd. Mə biri zì àmə Azwighi inga məd. Məd biri ghà inga iben ijìm mbe ne kayi iben mə̀Ju gha mə biri saʼ awɔb ane icheg ne koʼi.

¹⁹ Chəyi wì biri chɔb kə̀ bì dèg gì du. Chəyi wə̀d mɔ̀ʼɔ biri zug gì məd ane itog izib.

²⁰ Bəd mbe ne fə bi bɔd, chəyi wì biri chə awɔb, kə̀ ghì anug tìbɔŋ mɔ̀ʼɔ abə bəd mbe ne bɔri. Wì biri ya ghìyə̀ inug kwàʼ ane àbɔrɔ̀bɔd tì bəd mbe ne taŋ bɔd ni gha imbə̀ʼ wì nɔʼ zì anə igun inɔb. Ze biri yaʼ ane anene pè ane nyumə̀ ne bəd igun isəg ijìm biri se ghìyə̀ inug ne koʼi.

²¹ Iben ijìm biri nɔ̀ŋì ìtɔb tikɔndi igun məd.”

Mə̀Farìsi gha Yeso ya nìŋə ika abə Bezebɔ̀b, ifɔn izwighi tibɔ̀ŋ

²² Bəd mɔ̀ʼɔ ya niŋ mbaŋà mɔ̀ʼɔ ne izwighi tibɔ̀ŋ ya yaʼi inga məd yèʼe abə Yeso. Mbaŋà ze ya yaʼ ifəg. Chəyi wì yaya bə̀ ghàmà. Yeso ya ghù aməd, wì ko se ghàmà bə̀ se bàrà isiŋi.

²³ Anug azo̰ ya chè wə̀d ijìm, mbi se bìri gha, “Ŋwan gho̰ kə anìŋ yaʼ ŋwan we abə ifɔn Dèvid?”

²⁴ Anyumə̀ ne mə̀Farìsi ya zughi anug azo̰, mbi ya gha, “À ya Bezebɔ̀b, ifɔn izwighi tibɔ̀ŋ we nàʼà ika ni kamni izwighi tibɔ̀ŋ chì inga bəd abə wə̀d gho̰.”

²⁵ Yeso ya kyeri ìtɔb tikɔndi, si ywìtì inɔb gha, “Anug ìfɔ̀n ne ghapa, ze biri nim. Aben ne ghapa ya chɔ̀bɔ, chəyi zè biri təm. Inəbi ne ghapa ya chɔ̀bɔ, chəyi wì biri bə təm.

²⁶ Sàtàn mə̀ ya kàmna Sàtàn, àze chwi gha anug ìfɔ̀n məd ze ighàpi. Ane, wì kə si təm iye?

²⁷ Àmə yaʼ ne mə kàmna izwighi tibɔ̀ŋ ane ika ne Bezebɔ̀b nàʼi inum, ìmbən bəd kə se kàmna izwighi tibɔ̀ŋ ane ika ne we nàʼi inɔb? Àmə yaʼ ane, nji mbɔb biri saʼ awən.

²⁸ Kə̀ àmə yaʼ ne mə kàmna izwighi tibɔ̀ŋ ane ika ne Azwighi Ŋwiye naʼi inum, nji ane ya gha, anug ìfɔ̀n Ŋwiye fə yeʼe inən.

²⁹ Kə̀, tì wə̀d gho nyi inga nəb wə̀d ne beri ika, bèʼì ighi məd ne chəyi wì fə bi kɔd tengàŋ nɔ̀ŋì, bɔŋ se nìŋə ighi mbe?

³⁰ Mə ghà inən gha, wə̀d ne chəyi wì bḛ anug ne mə ghìyə̀, tengàŋ we zɔ̀ŋɔ̀ amə. Wə̀d ne chəyi wì ya fète tì inum, tengàŋ we tàʼà.

³¹ Mə gha tesiʼ inən gha, Ŋwiye biri waʼ iku inug tibɔ̀ŋ ijìm tì tiku àchàpì ajìm ne wə̀d zɔ̀mbi Ŋwiye. Àsi anug ni zɔ̀mbì azwighi Ŋwiye, à ya anug tibɔ̀ŋ ne chəyi Ŋwiye biri nɔʼ waʼ.

³² Ŋwiye biri waʼ inug tibɔ̀ŋ abə wə̀d ne zɔ̀mbi Ŋwan Wə̀d. Àsi ne wə̀d ghàmi anug tibɔ̀ŋ imbə̀ʼ Azwighi Ŋwiye, chəyi Ŋwiye biri nɔʼ waʼ anug tibɔ̀ŋ ze, inga isəg gho̰ fɔrɔ inga isəg feg.”

Azed ya mbe kyère ane fitam

³³ Yeso ya chè imbìghè gha, “Àghò mə kon azed chɔm, fitam məd biri yaʼ ìfi chɔm. Àghò mə kon azed tibɔ̀ŋ, fitam məd biri bə̀ yaʼ ìfi tibɔ̀ŋ. Tesiʼ ya gha, azed ya mbe kyère ane fitam.

³⁴ Mbə̰ ya kwàʼ ifighi! Tì mbə̰ bəd fìŋ tibɔ̀ŋ ghàm ìngam chɔm? Imbə̀ʼ wə̀d ya ghàmà anug ne yaʼi ibo inga fìŋ?

³⁵ Wə̀d chɔm ya ghìyə̀ inug chɔm ne yaʼi inga fìŋ məd. Wə̀d tibɔ̀ŋ ya bə̀ ghìyə̀ inug tibɔ̀ŋ ne bə yaʼ inga fìŋ məd.

³⁶ Mə gha tesiʼ inən gha, Wə̀d ijìm biri mə̀tì aton imbə̀ʼ ìngam ako ijìm ne dùwə̀ ibo ichug ane aneg ze ne Ŋwiye biri sɔb isaʼi.

³⁷ À ya ìwe ìngam biri chwi gha àghò chè isaʼi kə̀ gha àghò gùg isaʼi.”

Jonà ya aneni

³⁸ Mə̀Farìsi mɔ̀ʼɔ tì mə̀chwitì mə̀nɔ̀ʼɔ̀ mɔ̀ʼɔ ya ghà abə Yeso gha, “Àchwitìnùg, ghìyə ayeti anug mɔ̀ʼɔ tè bara.”

³⁹ Yeso ya ywìtì inɔb gha, “Iwaŋ bəd gho̰ ne ghìyə̀ inug tibɔ̀ŋ ne chəyi mbi bə nɔ̀ŋì fìŋ igun Ŋwiye ya bìre yaʼ aneni anug. Si ya gha, chəyi aneni anug mɔ̀ʼɔ ne mə̀ biri chwi inɔb chèyi ane àze ne ya du abə wə̀dkə̀n Ŋwiye Jonà”

⁴⁰ Kwàʼ icheg ne Jonà ya chughi inga fibum abə su kyen ineg itad, à ya bə̀ ane ne Ŋwan Wə̀d biri bə chughi inga iseg ineg itad.

⁴¹ Igun aneg ze ne Ŋwiye biri sɔb isaʼi igun bəd məjìm, bəd mbe a Ninivè biri nɔ̀ʼ gha iwaŋ bəd gho̰ gùg anug. Aton ya gha, anyumə̀ ne mbi ya zughi icheg ne Jonà yaya ghàmà Ìngam Ŋwiye, mbɔb ya bə̀ŋì fìŋ sìkì inug tibɔ̀ŋ. Inga nyùmə̀ isəg gho̰, wə̀d ne beri ati chè Jonà we aŋa.

⁴² Igun aneg ze ne Ŋwiye biri sɔb isaʼi igun bəd məjìm, ifɔn àyi we a Sebà, aba isəg mə̀chɔŋɔ biri gha iwaŋ bəd gho̰ gùg anug imbə̀ʼ icheg ne wì ya nɔ̀ʼ asà agha yèʼe ni zug inug iwe mbe ne ifɔn Solomùn yaya ghàmà. Inga nyùmə̀ isəg gho̰, wə̀d ne beri ati chè Solomùn we aŋa.

Anug imbə̀ʼ azwighi ne du inga wə̀d

⁴³ Yeso ya chè imbìghè gha, “Anyumə̀ ne azwighi tibɔ̀ŋ du inga wə̀d, ze ya ghò ŋa yḛ̀ inga isiŋi zɔbi kə̀bə̀ asiŋi ni chughi.

⁴⁴ Àmə chəyi ze bari asiŋi ni chughi, ze ya gha, ‹Mə biri bə̀ndì ghò amə inga nəb ze ne mə̀ kə du inga.› Anyumə̀ ne ze bəndi, ze mə̀ pè bàd nəb ze izɔbi ne mbi zə bə̀ tàngi icheg chɔm,

⁴⁵ ze ya bə̀ndə̀ ghò nìŋə izwighi tibɔ̀ŋ ndəŋ ìsàmbe ne taŋ bə chè aməd, mbi si yèʼe nyi chùghi inga nəb ze. Wə̀d we biri si bə chè icheg ne wì ya bi yaʼ. À ya bə̀ icheg ne ze biri yaʼ tì iwaŋ bəd tibɔ̀ŋ gho̰.”

Ngɔb Yeso tì məfi Yeso

⁴⁶ Icheg ne Yeso yaya kiri ghamà abə inɔ̰ bəd we, ngɔb məd tì məfi məd ya təm isəg se kə̀bə̀ ni ghàm ibo.

⁴⁷ Wə̀d mɔ̀ʼɔ ya ghà ibo gha, “Ìwe ngɔb tì ìmbe məfi mbe isəg kə̀bə̀ ni ghàm ine.”

⁴⁸ Yeso ya ywìtì abə wə̀d we gha, “Ìmə ngɔb àkə we? Ìmbum məfi àkə mə̀we?”

⁴⁹ Wì ya biri ane, si ghàbri chwi mə̀mə̀nənùg məd ane ìfeg, si gha, “Aŋa ya ìmə ngɔb tì ìmbum məfi.

⁵⁰ Tesiʼ ya gha, wə̀d ne fàʼà inug icheg ne ìmə Mbaʼ ne yaʼi ikaŋ àbɔ̀ŋɔ kə̀bi, tengàŋ ya ìmə ifi tì ìmə njàbi fɔrɔ ìmə ngɔb.”