Mə̀Hibrù 7 - Ikan feg

Mèkisedèg ne yaʼi ifɔn bə̀ yàʼ wə̀d mbàn Ŋwiye

¹ Mèkisedèg gho̰ ya yaʼ ifɔn a Salèm. Məd ya yaʼ wə̀d mbàn Ŋwiyekɔʼ. Anyumə̀ ne Abràham yaya bə̀ndə̀ ane ibid we ne wì ya màʼi chè məfɔn məkwè, Mèkisedèg ya bɔ̀mbì tì məd, zì àbɔrɔ̀bɔd igun məd.

² Abràham ya nàʼ aba amɔʼ inga iba ìghum ane ighi məd ijìm mbe ne wì ya niŋi ikɔm ibid abə Mèkisedèg. Ikum gho̰ Mèkisedèg ya gha, “Ifɔn ne ghìyə̀ inug ne təmi kòʼ.” Məd ya bə̀ ifɔn a Salèm. Ifɔn a Salèm ya ni gha “Ifɔn ne ghìyə̀ bəd chùghə ane àbɔrɔ̀bɔd.”

³ Chəyi Mèkisedèg gho̰ ya bèri ngɔb kə̀ mbaʼ kə̀ mə̀mbaʼ kyen. Chəyi aneni mɔ̀ʼɔ ne chwìye gha mbi ya gwi aməd kə̀ wì ya ku. Məd ya yaʼ wə̀d mbàn Ŋwiye ane ighə̀m imɔʼ kwàʼ icheg ne Ŋwan Ŋwiye bə̀ yaʼ.

⁴ Mbə̀ kɔndi iku ighumni ne Mèkisedèg ya bèri, ne Abràham, mbaʼ kyen abə mə̀Izre, ya nàʼi aba amɔʼ ibo inga iba ìghum ane ighi mbe ne wì ya niŋi ikɔm ibid.

⁵ Mə̀nɔ̀ʼɔ̀ Muse mbe chwìye gha bɔn ane inəbi Levì ne yaʼi bəd mbàn Ŋwiye yaya nìŋə aba amɔʼ inga iba ìghum abə ìmbɔb məfi, mə̀Izre, ka məfi mbe ya bə̀ yaʼ ane aghaŋ inəbi ze Abràham.

⁶ Chəyi Mèkisedèg gho̰ ya du ane aghaŋ inəbi ze Levì. Si ya gha, wì ya niŋ aba amɔʼ inga iba ìghum bə̀ zì àbɔrɔ̀bɔd igun Abràham we ne Ŋwiye ya kàʼi anug ze ibo.

⁷ Ze fə dù zen gha wə̀d we ne zìyè àbɔrɔ̀bɔd bèrì ighumni chè wə̀d we ne nìŋə.

⁸ Tè bàd gha bəd mbàn mbe ane aghaŋ inəbi Levì ne yaya nìŋə aba amɔʼ inga iba ìghum ya bə̀ bəd ne kùyə icheg mə̀mbin. Àsi Mèkisedèg ne ya bə̀ niŋ aba amɔʼ inga iba ìghum ya wə̀d ne yaʼi izɔm ane ighəm imɔʼ icheg ne Àŋwàʼrì Ŋwiye gha.

⁹ Aŋa ya ni tòʼrì gha, Levì we ne nìŋə aba amɔʼ inga iba ìghum ya bə̀ chè anjìm Abràham nàʼ aba amɔʼ inga iba ìghum abə Mèkisedèg.

¹⁰ Anyumə̀ ne Abràham ya bɔ̀mbi tì Mèkisedèg nàʼ aba amɔʼ inga iba ìghum ibo, Levì ya kiri biri inga anəm abə Abràham ne ya ìwɔb mbaʼ aneg.

Yeso ya icheg Mèkisedèg

¹¹ Mə̀nɔ̀ʼɔ̀ Muse mbe gha wə̀d mbàn Ŋwiye mənyìʼ dù ane aghaŋ inəbi Levì. Àkə aghi ne tì àfàʼì bəd mbàn Ŋwiye ane aghaŋ inəbi Levì ghì bəd bɔ̀ŋ mànì, nji chəyi ya ywìrè aton abə wə̀d mbàn ndəŋ ne du ane iwaŋ Mèkisedèg ni yeʼe, ne kayi ane aghaŋ inəbi Eròn.

¹² Anyumə̀ ne àfàʼì bəd mbàn Ŋwiye du igun inəbi mɔ̀ʼɔ nyi igun ìwi ndəŋ, mə̀nɔ̀ʼɔ̀ ya bə̀ mənyìʼ kɔ̀pɔ.

¹³ Ìwa Anɔŋisəg gho̰ ne mbe ghàmà inug mbo̰ imbə̀ʼ aməd ya wə̀d inga inəbi ndəŋ. Chəyi wə̀d mɔ̀ʼɔ inga inəbi we ne kiri kweʼì fàʼ icheg wə̀d mbàn Ŋwiye.

¹⁴ Ze fə dù zen gha ìwa Anɔŋisəg ya aghaŋ inga inəbi Judà. Chəyi Muse ya bə̀ ghà anug mɔ̀ʼɔ imbə̀ʼ inəbi we imbə̀ʼ anug ni fàʼ inga mbàn Ŋwiye.

¹⁵ Anug ne tì gha fə taŋ dù zen gha wə̀d mbàn Ŋwiye ndəŋ icheg Mèkisedèg fə yèʼe.

¹⁶ Məd ya wə̀d mbàn Ŋwiye anjìm ika we ne yaʼi inga ìtḛ̀ ne chəyi tì aghi mɔ̀ʼɔ nimni. Məd kayi wə̀d mbàn icheg ne mə̀nɔ̀ʼɔ̀ Muse chwi.

¹⁷ Àze inga Àŋwàʼrì Ŋwiye imbə̀ʼ aməd gha, “Àghò ya wə̀d mbàn Ŋwiye ane ighə̀m imɔʼ ne du ane iwaŋ Mèkisedèg.”

¹⁸ Mbi ya pə̀ mə̀nɔ̀ʼɔ̀ anun chà iban imbə̀ʼ icheg ne chəyi mbi ya beri ika. Chəyi mbi ya ywìrì bèrì àfàʼì.

¹⁹ Chəyi anug mɔ̀ʼɔ ne mə̀nɔ̀ʼɔ̀ Muse ya ghi ze bɔ̀ŋ mànì. Ane, anug ne tì nɔŋi fìŋ igun amad anìŋ ze bɔ̀ŋ chè anug ze ne tì ya bì nɔ̀ŋì fìŋ igun. À ya anjìm àzewən ne te tìnde iban Ŋwiye.

²⁰ Ŋwiye ya zɔ̀m anyumə̀ ne wì yaya nɔ̀ŋɔ̀ Yeso ane wə̀d mbàn Ŋwiye. Chəyi Ŋwiye ya zɔ̀mi anyumə̀ ne wì yaya nɔ̀ŋɔ̀ mbin tì bəd mbàn Ŋwiye.

²¹ Ŋwiye ya zɔ̀m anyumə̀ ne wì yaya nɔ̀ŋɔ̀ Yeso ane wə̀d mbàn Ŋwiye, ghà ibo gha, “Anɔŋisəg fə zɔ̀m. Chəyi wì biri kɔpi ìzi fìŋ. Àghò ya wə̀d mbàn Ŋwiye ane ighə̀m imɔʼ.”

²² Icheg ne Ŋwiye ya zɔ̀mi ane, Yeso fə ghì gha Ŋwiye wara ikan tì ina ne bɔŋi chè.

²³ Bəd mbàn Ŋwiye mbe ane aghaŋ inəbi Levì ya nɔʼ imbə̀ʼ icheg ne mbi yaya kùyə mbi ndəŋ chè imbìghè ane àfàʼì.

²⁴ Àsi Yeso ya wə̀d mbàn Ŋwiye ne àfàʼì məd yaʼi ane ighə̀m imɔʼ imbə̀ʼ icheg ne məd we bə̀ izɔm ane ighə̀m imɔʼ.

²⁵ Ane, Yeso we tì wì pùmni bəd mbe ne yeʼe abə Ŋwiye anjìm məd mà nyumə̀ ijìm imbə̀ʼ icheg ne məd we dèghè abə Ŋwiye atog inɔb.

²⁶ Yeso gho̰ ya atog wə̀d igun bəd mbàn Ŋwiye ne nàʼà ighi ijìm ina. Məd ya wə̀d ne zḛ. Chəyi wì gùghi anug. Chəyi məd abɔ̀ʼ bəd inug tibɔ̀ŋ. Ŋwiye fə bə̀ nɔ̀ aməd nàʼ ati ighumni ibo ne chè iti ijìm ikaŋ àbɔ̀ŋɔ.

²⁷ Mbin tì itog bəd igun bəd mbàn Ŋwiye məjìm yaya nàʼà ighi àfàtì ineg ijìm. Mbɔb ya bì ko nàʼ ighi àfàtì ane ìmbɔb tì inug tibɔ̀ŋ, bɔŋ si nàʼ ighi àfàtì ane inug tibɔ̀ŋ bəd ndəŋ. Chəyi Yeso ya ghi icheg inɔb. Məd ya fə nàʼ àze atog icheg aghi àfàtì ane inug tibɔ̀ŋ bəd məjìm ane ighə̀m imɔʼ.

²⁸ Mə̀nɔ̀ʼɔ̀ Muse ya ghìyə̀ mbi chɔʼɔ atog wə̀d igun bəd mbàn Ŋwiye ne tì mbi gùg inug icheg mə̀mbin. Anug ze ne Ŋwiye ya zɔ̀mi ya si yèʼe yaʼ anjìm. Ŋwiye ya chɔʼ Ŋwan məd bə̀ ghì wì bɔŋ mànì ane ighə̀m imɔʼ.