Mə̀Hibrù 6 - Ikan feg

¹ Tì saŋa inug mbègtog mbe ne tì ya ghum nàni imbə̀ʼ kristo si chè imbìghè ni nani yaʼ inug mbe ne mbe chwìte abə bəd mbe ne fə təmi kà inga anug Ŋwiye: Tì saŋa anug ni ya ywìrè chwiti gha bəd bəŋə ìtɔb fìŋ sìkì inug tibɔ̀ŋ ne tì mbi ghì mbɔb ku fɔrɔ anug ni nɔ̀ŋì ibḛfiŋ igun Ŋwiye.

² Tì bə saŋa anug ni chwiti anug ni niŋ mənib, tì anug ni nɔ̀ŋì ibo igun wə̀d ni zì àbɔrɔ̀bɔd igun məd, tì anug ne bəd biri ghum zweme, fɔrɔ anug imbə̀ʼ icheg ne Ŋwiye biri niŋ isɔbi isaʼi ighə̀m imɔʼ anyumə̀ ne isəg biri nwḭ̀yḛ̀.

³ Ane, Ŋwiye mə bḛ, tì biri sàŋì inug mbo̰ si chè imbìghè ni nani inug ndəŋ.

⁴ Bəd mbe ne chəyi tì mbi ywìrì bə̀ŋì ìtɔb fìŋ ya bəd mbe ne kweʼì kyèri tesiʼ imbə̀ʼ Ŋwiye, bə̀ kweʼì fàʼ inug ane tineʼi tè ne Ŋwiye we nàʼà, Azwighi Ŋwiye bə̀ nyi inɔb inga fìŋ.

⁵ À ya bəd mbe ne kweʼì bàd ìchɔ̀mì we ne yaʼi inga Ìngam Ŋwiye, bə̀ kyèri ika we ne yaʼi inga nyùmə̀ isəg we ne yèʼe.

⁶ Aton ya gha, icheg ne mbɔb mbe ywìrè bə̀ndə̀ anjìm ghìyə̀ inug tibɔ̀ŋ, ane ya gha, mbɔb mbe ywìrè kɔ̀mbɔ̀ Yeso ŋwan Ŋwiye igun azed abaʼri bə̀ ywìrè zìyè tìnìrètog igun məd asaŋ asaŋ ighəm ndəŋ.

⁷ Ŋwiye we zìyè àbɔrɔ̀bɔd igun ìseg ze ne mbə̀ŋ ze no igun, tijəg bə̀ kwèghe igun ni wètì bəd ne ghùyə̀ ighi.

⁸ Àsi ìseg ze ne məyi agyen njəŋ tì agyen tibɔ̀ŋ ya kwèghe igun ya ati ako abə wə̀d mben. Ŋwiye biri zì ndɔ̀n igun ìseg ze. Ane, Iywid biri tɔ̀n asiŋi ìseg ze.

⁹ Ìmbum mə̀sə̀ʼ ne mə̀ kɔŋi, ka tì ya ghàmà inən anìŋ, tè kyèri gha mbə̰ biri bèrì ighi ne bɔŋi chè ne Ŋwiye biri nàʼ inən icheg ne Ŋwiye pùmni awən.

¹⁰ Ŋwiye kayi wə̀d ne chwìye icha. Chəyi məd biri nèbì ìmbən ìfàʼì fɔrɔ àzən àkɔ̀ŋì ne mbə̰ mbe chwìye ibo, icheg ne mbə̰ mbe wètè bəd məd, bə̀ kiri che imbìghè ni ya wètè awɔb.

¹¹ Tì ya kə̀bə̀ gha wə̀d imɔʼ imɔʼ abɔ̀ʼ inən ya chwìye ikuchèg chɔm gho̰ mà nyumə̀ ijìm ghò pè ane ìnwḭ. Mbə̀ ghiyə ane ni gha ikɔndi we ne tì beri imbə̀ʼ ighi mbe ne tì ya ghɔ̀mɔ̀, chəyi wì biri chè ako.

¹² Ane, chəyi tì kəbi gha wə̀d mɔ̀ʼɔ abɔ̀ʼ inən yaʼ igwed. Mbə̰ ya fàʼà inug icheg bəd mbe ne fə che anjìm ìwɔb ibḛfiŋ fɔrɔ ìwɔb inyimbifiŋ jəg anug ze ne Ŋwiye ya kàʼi inɔb.

Chəyi anug ne Ŋwiye ya kàʼi ze kɔ̀pɔ

¹³ Anyumə̀ ne Ŋwiye ya kàʼi anug abə Abràham, wì ya ghàm zɔ̀m yi zìye ane ìwi ikum imbə̀ʼ icheg ne chəyi wə̀d mɔ̀ʼɔ ne che məd.

¹⁴ Wì ya kàʼ abə Abràham gha, “Mə biri zì àbɔrɔ̀bɔd igun ine bə̀ ghì ìwe inəbi san nɔʼ.”

¹⁵ Abràham ya nyimi fìŋ ghɔ̀m anene bə̀ ghum bèrì aghi ze ne Ŋwiye ya kàʼi ibo.

¹⁶ Bəd ya zɔ̀mɔ̀ nyɔd ane ikum wə̀d ne chè awɔb. Mbi ya mə̀ zɔ̀m ane, chəyi mbe ywìrè tàŋà anug ze.

¹⁷ Ŋwiye ya kə̀b ni chwi abə bəd mbe ne wì ya kàʼi anug inɔb gha chəyi wì biri kɔpi ìzi fìŋ. À ya aton ne wì ya ghàmi, zɔ̀m ane ìwi ikum.

¹⁸ Ŋwiye fə kàʼ anug bə̀ zɔ̀m. Inug mbo̰ ibe chəyi mbe kɔ̀pɔ imbə̀ʼ icheg ne chəyi tì Ŋwiye ghàm anug ako. Ane, mba mbe ne noro ghò nə̀mbì awa aton aməd, inug mbo̰ ibe taŋ nàʼ ika ina gha tì təm, ghɔ̀m, bə̀ nɔŋi ikɔndi igun aghi ze ne yaʼi ina imbìghè.

¹⁹ Ikɔndi we ne tì nɔŋi ni ghɔ̀m anug ze ne Ŋwiye kàʼi ya aghi ne ìwa ìtḛ̀ wi təmə̀ kà igun ne chəyi tì aghi mɔ̀ʼɔ ghì. Ze biri ghì gha tè che ndwi ze ne ghàpi asiŋi ighumni inga mbàn Ŋwiye, nyi inga asiŋi ne zḛ mànì.

²⁰ Yeso ya fə ghò ina imbìghè nyi inga asiŋi ze ane ìwa ighəm. Məd ya se atog wə̀d igun bəd mbàn Ŋwiye ne fàʼà ina ane ighə̀m imɔʼ, ne du ane iwaŋ Mèkisedèg.