Mə̀Hibrù 5 - Ikan feg

¹ Tè kyèri gha, mbi ya chɔ̀ʼɔ atog wə̀d igun bəd mbàn Ŋwiye inga bəd ni gha wì ya tə̀mə imbìghè abə Ŋwiye atog abə bəd. Wì ya tə̀mə ane ni ya nàʼà ighi ni tùtì Ŋwiye fɔrɔ ighi àfàtì imbə̀ʼ inug tibɔ̀ŋ bəd.

² Məd ya bɔ̀tɔ ane fìŋ tì bəd bə̀ bèrè àsɔ̀mnəfiŋ igun bəd mbe ne fèbrè inug imbə̀ʼ icheg ne chəyi mbi kyeri. Aton ya gha, wì kyeri gha zìye ini bɔd ane mənɔnjì nɔʼ nɔʼ icheg ne bəd bə̀ bɔd.

³ Ane, wì ya nàʼà ighi àfàtì imbə̀ʼ ìmbi məd tì inug tibɔ̀ŋ bə̀ nàʼà ighi àfàtì imbə̀ʼ inug tibɔ̀ŋ bəd.

⁴ Chəyi wə̀d mɔ̀ʼɔ ne chɔ̀ʼɔ ìwi nyɔd ni niŋ ighumni ni yaʼ atog wə̀d igun bəd mbàn Ŋwiye. À ya məyi Ŋwiye we chɔ̀ʼɔ məd icheg ne wì ya chɔʼi Eròn.

⁵ À ya bə̀ ane ne kayi Kristo ya chɔʼi ìwi nyɔd ni niŋ ighumni ni yaʼ atog wə̀d igun bəd mbàn Ŋwiye. À ya Ŋwiye ya chɔʼi aməd ghà ibo gha, “Àghò ya ìmə Ŋwiye. Nɔ̀ʼ tèchɔ̀ŋ, mo ya si ìwe mbaʼ.”

⁶ Ŋwiye ywìrì ghà inga asiŋi ndəŋ inga àŋwàʼrì məd gha, “Àghò ya Wə̀d Mbàn Ŋwiye ane ighə̀m imɔʼ ne dù inga iwaŋ Mèkisedèg.”

⁷ Anyumə̀ ne Yeso ya yaʼi igun isəg, wì yaya chàʼrà Ŋwiye bə̀ dèghè inug abə Ŋwiye kwàʼ ane gì ka ka tì məsi ibo inga aghə. Wì yaya chàʼrà Ŋwiye ne beri ika ni chì aməd ane iwu. Ŋwiye ya zug inug ne wì yaya chàʼrà Ŋwiye ghà imbə̀ʼ icheg ne wì ya swi ìwi nyɔd aseg ni zugri Ŋwiye.

⁸ Ka wì ya jiʼì yaʼ Ŋwan Ŋwiye, ngəʼ ne wì ya zə̰ ya ghì wì zugri Ŋwiye ane inug ijìm.

⁹ Ŋwiye ya ghì aməd wì bɔ̀ŋ mànì, bə̀ ghì gha məd yaʼ wə̀d ne pùmnə wə̀d ijìm ne zùgrə aməd ane ighə̀m imɔʼ.

¹⁰ Ŋwiye ya chɔʼ aməd nɔ̀ŋì gha wì yaʼ atog wə̀d igun bəd mbàn Ŋwiye ne du inga iwaŋ Mèkisedèg.

Mbə̀ pati awən imbə̀ʼ mbə̰ nɔ̀ʼ chì fìŋ ane Yeso Kristo

¹¹ Tè bèrì inug nɔʼ nɔʼ ni ghà inən imbə̀ʼ icheg ne Kristo yaʼi atog wə̀d igun bəd mbàn ne du inga iwaŋ Mèkisedèg. Si ya gha, ze kà ina ni tòʼrì inug inən imbə̀ʼ icheg ne chəyi mbə̰ mbe zàmbà gwìyè inug.

¹² Mbə̰ ya kiri kə̀bə̀ gha wə̀d ndəŋ chwiti inug mbègtog imbə̀ʼ Ìngam Ŋwiye inən ne nji mbə̰ mbe se chwìte inug mbe abə bəd ndəŋ amad anìŋ. Mbə̰ mbe kiri awən icheg bɔn bɔd ne nyɔ̀ŋɔ ibən, ne nji mbə̰ fə se jə̀ghə tijəg ka ka.

¹³ Wə̀d ne kiri kə̀bə ni nyɔŋ ibən ya kiri ŋwan bɔd. Chəyi tengàŋ kiri kyeri inug mbe ne Àŋwàʼrì Ŋwiye gha imbə̀ʼ anug ni təm kòʼ imbìghè abə Ŋwiye.

¹⁴ Tijəg ka ka ya abə bəd kyen ne fə nani inug bə̀ kyèri icha ne yaʼi inga anug tibɔ̀ŋ tì anug chɔm.