Mə̀Hibrù 13 - Ikan feg

Icheg ni ghì gha Ŋwiye gyendi

¹ Mbə̀ che imbìghè ni ya kɔ̀ŋɔ̀ wə̀d imɔʼ imɔʼ icheg ne məfi mbe kɔ̀ŋɔ̀ ìtɔb nyàmnyɔd.

² Imbə̀ʼ mbə̰ waʼ awən anug ni ya nìŋə bəd tìsɔ̀ʼ inga ìmbən ichan. À ya ane ne bəd mɔ̀ʼɔ ya ghi, niŋ mbè angirə̀ inga ìtɔb nəb ne chəyi mbi ya kyeri gha à ya mbè angirə̀.

³ Mbə̀ ya kɔ̀ndɔ bəd mbe ne yaʼi inga nəb ndəŋ kwàʼ icheg ni gha mbə̰ ya bə̀ inga nəb ndəŋ tì inɔb. Mbə̀ ya bə̀ kɔ̀ndɔ bəd mbe ne mbe chə awɔb kwàʼ icheg ni gha mbə̰ ya bə̀ inga ngəʼ tì inɔb.

⁴ Wə̀d ijìm ghumni inam. Imbə̀ʼ wə̀d waʼ yi ìwi iweg kə̀b àyi ndəŋ. Imbə̀ʼ àyi bə waʼ yi ìwi inɔm kə̀b mbaŋà ndəŋ. Tesiʼ ya gha, Ŋwiye biri sɔb isaʼi zì ngəʼ igun bəd mbe ne fànà.

⁵ Mbə̀ chiye àzən adɔʼ ane anug ikab. Mbə̀ ya gyènde tì ighi mbe ne mbə̀ beri imbə̀ʼ icheg ne Ŋwiye gha, “Chəyi mə̀ biri ghum nɔ̀ʼ sàŋì awən kə̀ bə̀ waʼ awən.”

⁶ Ane, tì we tì tì gha kwàʼ ane fìŋ ifibì gha, “Anɔŋisəg ya wə̀d ne wètè amə. Chəyi mə̀ biri ya bɔ. Chəyi aghi mɔ̀ʼɔ ne tì wə̀d ghi inum.”

⁷ Mbə̀ kɔndi itog bəd mbe ne ya ghum ghà Ìngam Ŋwiye imbə̀ʼ Kristo inən bə̀ kɔ̀ndi ìwɔb ikuchèg. Ane, mbə̀ ya ghìyə̀ inug icheg inɔb bə̀ nɔ̀ŋɔ̀ ìwən ibḛfiŋ igun Ŋwiye icheg inɔb.

⁸ Chəyi Yeso Kristo we kɔ̀pɔ. Icheg ne wì ya yaʼi, à ya icheg ne wì yaʼi, à ya bə̀ icheg ne wì biri yaʼ ane ighə̀m imɔʼ.

⁹ Imbə̀ʼ mbə̰ saŋa awən gha inug feg ndəŋ mbe ne bəd mbe chwìte mbe febre awən. Ze bɔ̀ŋ gha tì saŋa ìchɔ̀mì Ŋwiye ghiyə ìta fìŋ təm kà. Chəyi mə̀nɔ̀ʼɔ̀ imbə̀ʼ tijəg mbe ghìyə̀ gha ìta fìŋ təm kà. Chəyi mə̀nɔ̀ʼɔ̀ mbo̰ mbe wètè bəd mbe ne nɔ̀ŋɔ̀ mə̀nɔ̀ʼɔ̀ angu.

¹⁰ Tè bèrì ikwijə̀ŋ àfàtì mɔ̀ʼɔ inga azuŋ Ŋwiye ne chəyi bəd mbe ne yaya fàʼà inga azuŋ Ŋwiye mbi kòʼi ni jəg ighi àfàtì mbe ne yaʼi igun.

¹¹ Atog wə̀d igun bəd mbàn Ŋwiye yaya bèʼè anəm nyam nyḭ̀yḛ inga asiŋi ne zḛ mànì inga mbàn Ŋwiye ni nàʼ icheg aghi àfàtì ni sò inug tibɔ̀ŋ. Àsi nyam te ya mbi yaya nìŋə dùwə̀ inga ikam ne bəd mbe chùghə, si ghò tɔ̀n isəg.

¹² À ya aton ne chəyi Yeso ya ku inga ikye aben a Jèrusalèm ne bəd mbe chùghə. Wì ya dù si zə̰ ngəʼ ku anjìm isəg ni sò inug tibɔ̀ŋ bəd ane àze anəm.

¹³ Ane, tì duwə inga aben ghò anjìm isəg abɔ̀ʼ məd ni bə bèrì tìnìrètog icheg məd.

¹⁴ Icheg ne chəyi tì beri aben ne yaʼi ane ighəm imɔʼ igun isəg gho̰, tì ya nḛ̀ imbìghè ni ghò nyi yaʼ inga aben feg ze ne yèʼe.

¹⁵ Ane, tì che anjìm Yeso ghì gha inug mbe ne dùwə̀ ina ichug, mbi ya nàʼà ighumni abə Ŋwiye ane aghəm ajìm icheg àza aghi àfàtì ne ghumnə ikum Ŋwiye.

¹⁶ Ane, imbə̀ʼ tì wàʼa awa anug ni ya ghìyə̀ ìchɔ̀mì abə bəd tì anug ni ya ghàpà ighi ne tì beri tì bəd imbə̀ʼ icheg ne à ya icheg aghi àfàtì ne ghìyə̀ Ŋwiye gyènde.

¹⁷ Mbə̀ ya zùgrə ìmbən itog bəd ane anug Ŋwiye bə̀ ya fàʼà inug mbe ne mbɔb mbe ghà inən. Àzɔb àfàʼì ya ni kyèʼrì awən. À ya mbɔb ne biri təm imbìghè abə Ŋwiye ni mə̀tì inug imbə̀ʼ awən. Mbə̀ ya zùgrə awɔb, ni ghì gha mbi biri ya fàʼà àzɔb àfàʼì ane igyendi, kayi ane agaŋ. Mbi mə̀ ya fàʼà nè gàŋa, chəyi ze biri wètì awən.

¹⁸ Mbə̀ chaʼra Ŋwiye ina. Tè kyèri kwàʼ tesiʼ gha ìta fìŋ zen imbə̀ʼ icheg ne tì ya kə̀bə̀ ni fàʼ ighi ijìm ane ikuchèg ne koʼi.

¹⁹ Àsi mo, mə nə̀rə awən gha mbə̀ chaʼra Ŋwiye gha we ywirì ghì mə zamba yèʼe inən.

Ichaʼri Ŋwiye ne si nwḭ̀yḛ̀

²⁰ Ŋwiye ne zìyè àbɔrɔ̀bɔd igun bəd ya ghì Yeso ìwa Anɔŋisəg zwème ane iwu. Yeso we ya Àjənjə̀g kyen ne ya niŋi àze anəm wàd ikan ne chəyi wì biri nɔʼ mèg.

²¹ Ŋwiye naʼa ighi chɔm ijìm inən. Ighi chɔm mbe ne mbə̀ koʼi ni bèrì ni ghì inug mbe ne məd kɔ̀ŋi. Ŋwiye bə chè anjìm Yeso Kristo fàʼ inug mbe ne məd kɔ̀ŋi ni fàʼ ina. Tè ghumni Yeso Kristo kwàʼ ane ighə̀m imɔʼ. À ya ane.

Ngam ne si nwḭ̀yḛ̀

²² Ìmbum məfi fɔrɔ ìtum njàbi, mə boʼ ibo inən gha ìngam gho̰ ne mə̀ zi inga iki àŋwàʼrì azo̰ ni nəri ìtən fìŋ, mbə̀ nyimi kwàʼ ane fìŋ chɔm.

²³ Mbə̀ kyeri gha mbi fə chì Timotì ìwa ifi inga nəb ndəŋ . Wì mə zàmbì yèʼe, nji mə biri yeʼe tì məd ni bàd awən.

²⁴ Mbə̀ chaʼra ìmbən itog bəd ane anug Ŋwiye fɔrɔ bəd Ŋwiye məjìm. Ìmba məfi fɔrɔ ìta njàbi te ne bḛ Kristo ne ya bəd a Italì mbe chàʼrà awən.

²⁵ Ŋwiye ghiyə ìchɔ̀mì inən mbə̰ məjìm.