Mə̀Hibrù 12 - Ikan feg

Ŋwiye ya chə ìmbi bɔn mbe ne wì kɔ̀ŋi ni də̰̀ awɔb

¹ Icheg ne tì beri bəd ndan ndàn ne nḛ̀ awa, ne ya nyimi ìwɔb ibḛfiŋ kwàʼ icheg chɔm, tì waʼ inug ijìm mbe ne kə̰ awa fɔrɔ inug tibɔ̀ŋ mbe ne kə nyìme awa anjìm. Tì nyimbi fìŋ ni nòrò ànòtì ze ne yaʼi ina imbìghè.

² Tì ya nḛ̀ məyi igun Yeso we ne ìwa ibḛfiŋ ko igun məd bə̀ nwḭ̀yḛ̀ məyi igun məd. À ya məd ne chəyi wì bɔ tìnìrètog we ni ku igun azed abaʼri imbə̀ʼ igyendi we ne ya yaʼi ibo imbìghè. Məd fə chughi ikaŋ àbɔ̀ŋɔ aba abo jəghi abə Ŋwiye.

³ Mbə̀ kɔndi icheg ne məd ya nyìʼi ngəʼ ikye ibo abə bəd inug tibɔ̀ŋ. Mbə̰ mə̀ kɔ̀ndi ane, nji chəyi ìwən ibḛfiŋ biri bɔd ghì mbə chì fìŋ ane Ŋwiye.

⁴ Mbə̀ kyeri gha chəyi mbə kiri zɔŋi ni ton inug tibɔ̀ŋ ghò pè ane ati ne bəd mbe se kə̀bə̀ ni zweti awən.

⁵ Mbə̰ wa fə nèbì ìngam we ne Ŋwiye ya nəri awən, kàrà awən ane ìmbi bɔn? Ŋwiye ya gha, “Ìmə Ŋwan, imbə̀ʼ àghò niŋ awe anug ze ne Ŋwiye ya chə bəd mbe ne gughi anug ane afed. Imbə̀ʼ àghò saŋa awe gha ìwe ibḛfiŋ bɔd anyumə̀ ne Ŋwiye chə awe ni də̀n awe.

⁶ À ya ane imbə̀ʼ icheg ne, Ŋwiye ya chə bəd mbe ne məd kɔ̀ŋi, bə̀ chə̀ wə̀d we ne məd niŋi ane ìwi ŋwan ni də̀n məd.”

⁷ Mbə̀ nyimbi fìŋ inga ngəʼ ze ne mbə̰ mbe zə̰ icheg ni gha à ya Ŋwiye we də̰̀ awən. À ya icheg ne Ŋwiye we ghìyə̀ tì ìmbi bɔn. Kə̀ ŋwan mɔ̀ʼɔ we wa angu ne chəyi mbaʼ məd we chə aməd ni də̀n aməd anyumə̀ ne wì gùghi anug?

⁸ Àmə chəyi Ŋwiye kiri chə awən icheg ne we chə ìmbi bɔn, ane ya gha mbə̰ kayi kwàʼ bɔn məd. Mbə̰ ya icheg bɔn ne chəyi mbaʼ.

⁹ Ni chè imbìghè, mba məjìm bèrì mə̀mbaʼ igun isəg aŋa ne chə awa ni də̀n awa, tì bə̀ kiri ghumnə awɔb. Àsi Ŋwiye we ne yaʼi ìwa Mbaʼ ikaŋ àbɔ̀ŋɔ, imbə̀ʼ tì beri ni taŋ zugri aməd imbə̀ʼ yaʼ izɔm!

¹⁰ Ìmba mə̀mbaʼ igun isəg ya chə awa ane icheg ne koʼi inɔb. Mbi ya chə awa ane iki nyumə̀. Àsi Ŋwiye, wì ya chə awa ni wètì awa gha tè təm zen icheg məd.

¹¹ Anyumə̀ ne mbe chə bəd, ze ya se awɔb. Si ya gha, bəd mbe ne mbi chə awɔb ya bèrè chùd anjìm. Chùd ze ya gha mbi biri si təm kòʼ bə̀ bèrì àbɔrɔ̀bɔd.

¹² Ane, imbə̀ʼ mbə̰ saŋi awən gha ìmbən ibo bɔd kə̀ ìmbən ighog bə̀ bɔd ane anug Ŋwiye.

¹³ Mbə̀ se ghìyə̀ inug ane icheg ne koʼi, ni gha chəyi bəd mbe ne bɔ̀rɔ inga anug Ŋwiye biri bə̀ndì anjìm. Mbi biri si təm kà inga anug Ŋwiye.

Mbə̀ pata awən imbə̀ʼ mbə̰ nɔ̀ʼ to̰ ìchɔ̀mì Ŋwiye

¹⁴ Mbə̀ kirə ika ni chughi ane àbɔrɔ̀bɔd ti wə̀d ijìm bə̀ chùghi inga ìzḛzḛ. Àmə chəyi ze yaʼi ane, nji chəyi wə̀d ne biri ghum bàd Anɔŋisəg.

¹⁵ Mbə̀ bə kìrə ika ni gha imbə̀ʼ wə̀d mɔ̀ʼɔ nɔ̀ʼ sam ìchɔ̀mì Ŋwiye. Imbə̀ʼ mbə̰ saŋa awən gha ngwèd tibɔ̀ŋ kweg inən inga fìŋ si ko inug tibɔ̀ŋ.

¹⁶ Imbə̀ʼ wə̀d mɔ̀ʼɔ abɔ̀ʼ inən ya nɔ̀kɔ̀ yi mbaŋà kə̀ mə̀yi abu abu. Imbə̀ʼ wə̀d mɔ̀ʼɔ bə yaʼ yi icheg Esawò ne chəyi wì ya kyeri Ŋwiye. Esawò yaya ghìyə̀ inug ne chəyi mbi koʼi imbìghè abə Ŋwiye. Chəyi wì yaya bə̀ bɔ Ŋwiye. Wì ya fèn àzi ati ŋwan mbèg ane akaŋ ighijəg.

¹⁷ Mbə̀ kyeri gha, anyumə̀ ne Esawò ya ywirì nɔ̀ʼ kə̀b ni niŋ àzi àbɔrɔ̀bɔd, mbaʼ məd ya ton imbə̀ʼ icheg ne chəyi Esawò ya ywìrì bèrì apan ni kɔpi anug ne wì ya fə ghi. Ka wì ya jiʼì dèg, nyùmə̀ ya fə chè.

¹⁸ Chəyi mbə yèʼe ane iwum ne tì wə̀d bètì, ne iywid we bə̀ bère igun. Chəyi mbə̀ yeʼe ane asiŋi ne fḭ̀yḛ nyìm, ne afim ka ka ze bə̀ chè angu.

¹⁹ Chəyi mbə̀ zughi gì tàŋ. Chəyi mbə̀ zughi gì ne tɔ ne bəd ne zùghə mbe to̰ awɔb gha imbə̀ʼ gì ze ywiri ghàm yi inɔb.

²⁰ Chəyi mbi ya kə̀bi ni ywiri zug gì ze imbə̀ʼ icheg ne gì ze ya ghàm anug ne ka. Zì ya gha, “Ka à ya bə̀ nyam, zì mə bètì iwum gho̰, mbe tumbi ane ateg zwèti.”

²¹ Inug ne bəd ya bàri ane asiŋi ze ya ghì tifa̰ gwì awɔb. Muse zìye ini ya si gha, “Mə we bìnde bə̀ bɔ.”

²² Àsi mbə̰, asiŋi ne mbə̀ yeʼe angu ya ikaŋ iwum Zayɔ̀n, a Jèrusalèm we ne yaʼi ikaŋ àbɔ̀ŋɔ, aben Ŋwiye we ne yaʼi izɔm. À ya asiŋi ne mbè angirə̀ chuʼ tì chuʼ fə fete se gyènde.

²³ À ya bə̀ asiŋi ne tifeti bəd Kristo ne ya ŋwan mbèg Ŋwiye ti fete fə bə̀ ŋwàʼrì ìtɔb tikum ikaŋ àbɔ̀ŋɔ. Mbə yèʼe abə Ŋwiye we ne sàʼa bəd məjìm fɔrɔ ane asiŋi ze ne izwighi bəd yaʼi angu. Bəd mbe ne Ŋwiye fə ghi mbi təm kòʼ bə̀ bɔ̀ŋ mànì ya angu.

²⁴ Mbə fə yeʼe abə Yeso, məd we ne ya yeʼe tì ikan feg. Mbə yèʼe abə anəm Yeso ze ne mbi ya tuti ne ghàmà inug ne bɔŋi chè inug mbe ne anəm àzi Abè ze ghà.

²⁵ Mbə̀ pati awən imbə̀ʼ mbə̰ nɔ̀ʼ to̰ məd we ne ghàmà inən. Chəyi tì mbɔb ya chwed anyumə̀ ne mbi ya to̰ ni zug Muse ne yaya pàta awɔb igun isəg. Tì kə mə̀ to̰ awa ni zug məd we ne pàtà awa ikaŋ àbɔ̀ŋɔ, tì kə si chwed iye?

²⁶ À ya yaʼ anyumə̀ we, gì məd ya ghì isəg ghùd. Si ya gha, amad anìŋ, məd fə kàʼ gha, “Mə biri ywiri ghì ighəm ndəŋ ne kayi məyi isəg biri ghùd, àbɔ̀ŋɔ biri ghùd abɔ̀ʼ.”

²⁷ Ìngam we ne gha, “ighəm ndəŋ” ya chwìte gha mbi biri chì ighi mbe ne mbi tangi ne tì mbi ghùd ni gha ighi mbe ne chəyi tì mbi ghùd biri si bùʼ.

²⁸ Ane, icheg ne te nìŋə anug ìfɔ̀n ne chəyi tì aghi mɔ̀ʼɔ ghì ze ghùd, tì ya nàʼà məyakà abə Ŋwiye bə̀ se ghùmnə aməd ane icheg ne koʼi. Tì ya ghùmnə ane nè bɔ Ŋwiye inga ìta fìŋ.

²⁹ Aton ya gha, “Ìwa Ŋwiye ya icheg iywid ne tì wi tɔ̀n ighi chìkì.”