Mə̀Hibrù 11 - Ikan feg

Inug imbə̀ʼ ibḛfiŋ

¹ Ibḛfiŋ ya ni kyeri gha àghò biri bèrì aghi ze ne àghò nɔŋi ìwe ikɔndi igun se ghɔ̀mɔ̀ bə̀ kyèri gha ighi mbe ne chəyi àghò we bàrà, àghò biri bèrì.

² Ibḛfiŋ gho̰ ya aghi ze ne bəd mbe te aneg ya beri, Ŋwiye si niŋ awɔb gha mbe kòʼ.

³ À ya anjìm ibḛfiŋ ne tì kyeri gha Ŋwiye ya tangi isəg ane ìwi ìngam, ni gha ighi mbe ne tè bàrà kayi mbi ya tangi ane ighi ni ya fə yaʼi.

⁴ À ya anjìm ibḛfiŋ ne Abè ya nàʼi aghi àfàtì ne bɔŋi chè àze ne Ken ya nàʼi. À ya anjìm ibḛfiŋ ìwi Abè ne Ŋwiye ya gha məd ya wə̀d ne təmi kòʼ anyumə̀ we ne Ŋwiye ya gha, aghi àfàtì məd kòʼ. Ka Abè ya jiʼì ku yi, anjìm ibḛfiŋ məd, məd we kiri ghàmà.

⁵ À ya anjìm ibḛfiŋ ne Ŋwiye ya niŋi Enɔ̀g izɔm ghò ikaŋ àbɔ̀ŋɔ. Chəyi wə̀d mɔ̀ʼɔ ya ywirì bàd aməd imbə̀ʼ icheg ne məd ya fə ghò ikaŋ àbɔ̀ŋɔ. Bɔŋ wì ya se ghò ikaŋ àbɔ̀ŋɔ bəd ya kyeri aməd icheg wə̀d ne ghìyə̀ inug ne Ŋwiye kɔ̀ŋi.

⁶ Wə̀d ne chəyi wì beri ibḛfiŋ, chəyi tì tengàŋ ghì inug ne Ŋwiye kɔ̀ŋi. À ya ane imbə̀ʼ icheg ne wə̀d ne kə̀bə̀ ni ya ghùmnə Ŋwiye, wì mənyìʼ bèrì ibḛfiŋ gha Ŋwiye we angu bə̀ nàʼà chùd abə bəd mbe ne kə̀bə̀ ni kyeri aməd ane ìzɔb fìŋ ijìm.

⁷ À ya ibḛfiŋ ya ghi Nwa̰ zugri Ŋwiye anyumə̀ ne Ŋwiye ya pati aməd imbə̀ʼ ighi ne chəyi məd ya kyeri. Ane, Nwa̰ ya tangi abaŋ igyi ne ya chi aməd tì inəbi məd inga ngəʼ. À ya ibḛfiŋ ìwi Nwa̰ ya ghi Ŋwiye zi isaʼi igun bəd mbe igun isəg. Anjìm ibḛfiŋ ìwi Nwa̰, Ŋwiye ya niŋ aməd ane wə̀d ne təmi kòʼ.

⁸ À ya ibḛfiŋ ya ghì gha Abràham zugri Ŋwiye anyumə̀ ne Ŋwiye ya kàri aməd gha wì duwə inga àzi aben ghò ane asiŋi ne Ŋwiye biri nàʼ ibo. Ka chəyi Abràham ya kyeri asiŋi ze ne wì yaya ghò angu, wì ya dù ibo aben ghò.

⁹ À ya ibḛfiŋ ya ghi wì ghò chùghi inga asiŋi tìsɔ̀ʼ ze ne Ŋwiye ya kàʼi ibo icheg wə̀d tìsɔ̀ʼ. Abràham ya chughi inga izuŋ. Azìg tì Jàkɔb ya bə̀ chùghi inga izuŋ icheg məd. Ane, mbɔb məjìm ya bə̀ jəg ighi mbe ne Ŋwiye ya kàʼi abə Abràham.

¹⁰ Abràham yaya nḛ̀ imbìghè ni nyi inga asiŋi ze ne Ŋwiye zìye ya ŋwaʼi, zèg ati bə̀ bɔm ane ìmbi ibo.

¹¹ Ka Abràham ya fə nùn, ne iweg məd Sèra ya bə yaʼ kɔ̀m àyi, à ya ibḛfiŋ ya ghi gha wì ywirì gwi ŋwan. Ze ya yaʼ ane imbə̀ʼ icheg ne Abràham ya bḛ gha Ŋwiye we ne kàʼi ni nàʼ ŋwan ibo ya fàʼà anug ne wì kàʼi.

¹² Ane, bɔn ne nɔʼi icheg titəm iməg ikaŋ àbɔ̀ŋɔ fɔrɔ icheg tìsiwaŋ iban igyi tìbà ya san ane aghaŋ inəbi àzi Abràham gho̰ imɔʼ, ka wì yaya bə̀ se yi icheg awu wə̀d.

¹³ Bəd mbo̰ məjìm ya nɔ̀ŋì ibḛfiŋ igun Ŋwiye ghò pè ane nyùmə̀ ne mbi ya ku. Chəyi mbɔb ya beri ighi mbe ne Ŋwiye ya kàʼi inɔb. Si ya gha, mbɔb ya bàd ighi mbe ane agha se ne mbe kiri yeʼe, fə si niŋ gha mbɔb fə bèrì inɔb ikye abo. Mbɔb ya bə̀ bḛ gha mbɔb ya bəd tìsɔ̀ʼ ne bə̀ chè awɔb che igun isəg.

¹⁴ Bəd ne gha mbɔb kayi bəd igun isəg aŋa ya ghàmà ane nḛ̀ ni ghò awɔb a aben ze ne yaʼi àzɔb.

¹⁵ Àkə aghi ne mbɔb yaya kɔ̀ndɔ imbə̀ʼ aben ze ne mbɔb ya du angu, nji mbɔb ya kə̀b inɔnjì ni bə̀ndì ghò awɔb angu.

¹⁶ Ane, mbɔb yaya kə̀bə̀ yaʼ aben ze ne taŋ bɔŋ chè, aben ne yaʼi ikaŋ àbɔ̀ŋɔ. À ya aton ne chəyi Ŋwiye we bèrè tìnìrètog anyumə̀ ne mbɔb mbe kàrà aməd ane ìwɔb Ŋwiye. À ya ane imbə̀ʼ icheg ne Ŋwiye ya fə tangi aben kyen nɔ̀ŋì inɔb.

¹⁷ Anyumə̀ ne Ŋwiye ya zweʼri Abràham, à ya ibḛfiŋ ya ghi Abràham chuʼri ìwi nyɔd ni nàʼ Azìg ane aghi àfàtì, ne ŋwan məd yaya məyi Azìg we imɔʼ.

¹⁸ Wì ya ghì ane ne Ŋwiye ya fə bi ghà ibo gha, “À ya anjìm Azìg, ne àghò biri bèrì bɔn mbe ne mə̀ ya kàʼi ine.”

¹⁹ Abràham ya bḛ gha Ŋwiye we tì wì zwemni Azìg ane iwu. Ane, ze ya icheg ni gha, Abràham ya si ywìrì niŋ Azìg icheg wə̀d ne zweme ane iwu.

²⁰ À ya anjìm ibḛfiŋ ne Azìg ya zi àbɔrɔ̀bɔd igun Jàkɔb tì Esawò ni gha ìwɔb isu yaʼ icheg chɔm.

²¹ Anyumə̀ ne Jàkɔb ya se nḛ̀ ni ku, à ya anjìm ibḛfiŋ ne wì ya zì àbɔrɔ̀bɔd igun bɔn ìmbi Jòseb. Wì ya bə̀ zə̀ʼrə igun ìfi fìmbàŋì ghùmni Ŋwiye.

²² Anyumə̀ ne Jòseb ya se nḛ̀ ni ku, à ya anjìm ibḛfiŋ ne wì ya ghàmi imbə̀ʼ icheg ne mə̀Izre biri ghum dù a Ijìb, bə̀ kə awɔb gha mbe ghum niŋ ìmbi iwu nyɔd dù inga Ijìb.

²³ Anyumə̀ ne mbi ya gwi Muse, à ya anjìm ibḛfiŋ ne ngɔb məd ya nə̀mbi aməd ane aməg atad. Wì ya ghì ane imbə̀ʼ icheg ne mbi ya bàd gha ŋwan we we tì icha mɔ̀ʼɔ. Ane, chəyi mbɔb ya bɔ ni gùg anug ne ifɔn a Ijìb ya gha.

²⁴ Anyumə̀ ne Muse ya fə kweghi, à ya ibḛfiŋ ya ghi wì to̰ yi gha zìye kayi ŋwan ne ŋwan àyi ìwi ifɔn Ferò gwi.

²⁵ Muse ya də̀b ni zən ngəʼ tì bəd Ŋwiye sɔ̀mɔ ni tə̀d inga inug tibɔ̀ŋ ne chəyi anug ne tə̀d biri tàndì.

²⁶ Wì ya bàd gha anug ne zə̰ ngəʼ imbə̀ʼ Wə̀d we ne Ŋwiye zɔ̀ʼi ze bɔ̀ŋ chè ighi àka inun mbe ne yaʼi a Ijìb imbə̀ʼ icheg ne wì yaya nḛ̀ imbìghè igun chùd ze ne wì biri bèrì.

²⁷ À ya ibḛfiŋ ya ghi wì nɔ̀ʼ a Ijìb ne chəyi wì bɔ gha ifɔn a Ijìb biri gaŋ ibo. Wì ya nyimbi fìŋ to̰ yi ni bə̀ndì imbə̀ʼ icheg ne wì yaya nḛ̀ igun Wə̀d we ne chəyi tì mbi bàd aməd.

²⁸ À ya ibḛfiŋ ya ghi Muse ghà abə mə̀Ju gha mbe nɔŋɔ Iteri Chègun, bə̀ zɔʼ anəm nyam igun atog akɔŋi. Mbi ya ghì ane ni gha chəyi Angirə̀ we ne yaya zwète fɔ̀d bɔn mbaŋà biri zweti fɔ̀d bɔn mbaŋà abə mə̀Ju.

²⁹ À ya anjìm ibḛfiŋ ne mə̀Ju ya bani Tìbà Bàghi icheg bəd ne yaya yḛ̀ igun ìseg zɔbi. Anyumə̀ ne bəd mbe a Ijìb ya bə kəb ni bani, mbi ya fum inga igyi we, ku kwàʼ mbɔb məjìm.

³⁰ À ya anjìm ibḛfiŋ ne ikam we ne ya che kad Jèrikò ya buʼə aseg anyumə̀ ne mə̀Ju ya yḛ chè kad ikam we ane ineg ìsàmbe.

³¹ À ya anjìm ibḛfiŋ ne chəyi mbi ya zweti Rahàb ne ya yaʼi àkwàrì abɔ̀ʼ bəd mbe ne ya ghi tìzughə̀ abə Ŋwiye. Chəyi mbi ya zweti aməd imbə̀ʼ icheg ne wì ya niŋ mə̀Ju mbe ne ya ghò ni nyaʼ nwendi inug imbə̀ʼ Jèrikò, nə̀mbì ibo inga nəb.

³² Mə kə ywiri ghà gha? Chəyi mə̀ beri nyumə̀ ni ghàm imbə̀ʼ Gidìyòn tì Baràg, Samsòn tì Jeftà tì Dèvid tì Samùwè fɔrɔ bədkə̀n Ŋwiye mbin.

³³ Inga bəd mbo̰ məjìm: Mbi mɔ̀ʼɔ ya zɔ̀ŋ iben ndəŋ chè. Mbi mɔ̀ʼɔ ya ghì inug ne koʼi abə bəd. Mbi mɔ̀ʼɔ ya bə̀ jəg anug ze ne Ŋwiye ya kàʼi. Mbi mɔ̀ʼɔ ya wùbì ichug abə ìfɔn.

³⁴ Mbi mɔ̀ʼɔ ya bə̀ nìmni iywid ka ka. Mbi mɔ̀ʼɔ ya nòrò ne chəyi mbi ya zweti awɔb ane məbeg ibid. Mbi mɔ̀ʼɔ ne ya bɔri, Ŋwiye ya nàʼ ika inɔb mbi si yaʼ bəd ka ka ikɔm ibid. Ane, mbɔb ya bə̀ zɔŋ chè mə̀sogyì iben ndəŋ.

³⁵ Anjìm ibḛfiŋ: Mə̀yi mɔ̀ʼɔ ya niŋ ìmbɔb bəd ne ya zweme ane iwu. Mbi mɔ̀ʼɔ ya zə̰ ngəʼ bə̀ to awɔb ni dù inga nəb ndəŋ. Mbi ya ghì ane imbə̀ʼ icheg ne mbi yaya nḛ̀ ni jəg ìtḛ̀ ne bɔŋi chè.

³⁶ Mbi ya chəʼ mbi mɔ̀ʼɔ bə̀ ywìri awɔb. Mbi ya kɔd mə̀mbin ane mə̀chen ghò zì awɔb inga nəb ndəŋ.

³⁷ Mbi ya tumbi mbi mɔ̀ʼɔ ane ateg, bə̀ san mbin iba ibe ane ìsɔ. Mbi ya zweti mbi mɔ̀ʼɔ ane məbeg ibid. Mbi ya chɔʼ ibɔʼì ighog abə mbi mɔ̀ʼɔ, bə̀ chə mə̀mbin. Chəyi mbi mɔ̀ʼɔ ya ywirì bèrì ighi. Mbi yaya se zìyè gɔb njə̀g kə̀ gɔb gwi ane ndwi.

³⁸ Chəyi isəg gho̰ ya kòʼi inɔb. Mbɔb yaya yḛ̀ inga ibad zɔbi fɔrɔ ikaŋ tiwum. Mbɔb yaya se chùghə inga tibighi ne yaʼi inga igho fɔrɔ tibighi ne yaʼi inga ìseg.

³⁹ Ŋwiye ya niŋ bəd mbo̰ məjìm gha mbɔb kòʼ anjìm ìwɔb ibḛfiŋ, si ya gha, chəyi wə̀d mɔ̀ʼɔ abɔ̀ʼ inɔb ya jəghi anug ze ne Ŋwiye ya kàʼi.

⁴⁰ Chəyi Ŋwiye ya nàʼi ighi mbe ne wì ya kàʼi inɔb imbə̀ʼ icheg ne wì ya nɔ̀ŋì gha mbɔb biri fɔtɔ tì ina bɔŋ si bɔ̀ŋ mànì.