Lk 2 - Ikan feg

Icheg ne mbi ya gwi Yeso

¹ Inga ineg mbe ne mbi ya gwi Jɔn we ne yaya nàʼà mənib, ifɔn kyen igun iben məRom ya yaʼ Kayisà Àgɔstò. Məd ya niŋ isɔbi anug gha mbe taŋ bəd məjìm inga iben məRom ijìm

² À ya ghùm ighəm mbègtog ni taŋ bəd. Anyumə̀ we Kwìrinù yaya ghùmə̀ gɔbnà a Sirìyà.

³ Wə̀d imɔʼ imɔʼ ya nɔ̀ʼ ghò inga àzi aben ni ŋwàʼrì ìwi ikum.

⁴ Jòseb ya nɔ̀ʼ a Nazarèd inga aben Galìli kɔʼ ghò a Betèlèhem inga aben Jùdeyà. Betèlèhem ya aben ne mbi ya gwi ifɔn Dèvid. Jòseb ya ghò angu imbə̀ʼ icheg ne məd ya aghaŋ inga inəbi ifɔn Dèvid.

⁵ Məd ya ghò tì Mèri ni ŋwàʼrì ìtɔb tikum. Wì ya fə taŋ inam tì Mèri. Mèri ya fə si tì ibum.

⁶ Anyumə̀ ne mbi ya yaʼi a Betèlèhem, nyùmə̀ məd ni gwi ya kòʼ.

⁷ Wì ya fɔ̀d ŋwan mbaŋà, nib ane iba ndwi, zì inga fikuʼì ne mbe jə nyam icheg ne chəyi atog nəb mɔ̀ʼɔ ya yaʼi inɔb ni chughi inga.

Mbè angirə̀ ghà ikən chɔm abə mbè àjənjə̀g

⁸ Mbè àjənjə̀g mɔ̀ʼɔ ya yaʼ aba aben ze, ikaŋ tiwum kyèʼè ìtɔb njə̀g izimi.

⁹ Mbi ŋa zə̰, angirə̀ Anɔŋisəg dù inɔb imbìghè, ìzḛzḛ Ŋwiye chè kad awɔb chuʼ. Ibɔ ya gwì awɔb.

¹⁰ Angirə̀ we ya ghà inɔb gha, “Imbə̀ʼ mbə̰ bɔ awən. Mə yèʼe tì ikən chɔm inən ne biri nàʼ igyendi kyen abə bəd məjìm.

¹¹ Tèchɔ̀ŋ gho̰, wə̀d ne biri pumni bəd we mbi gwi inga aben ze ne mbi ya gwi ifɔn Dèvid inga. Məd ya Wə̀d we ne Ŋwiye zɔ̀ʼi. Məd ya Kristo Anɔŋisəg.

¹² Aneni ne mbə̀ biri bàd ya gha, mbə biri bàd ŋwan ne mbi nibi ane iba ndwi zì inga fikuʼì ne mbe jə nyam.”

¹³ Mbi ŋa zə̰, inɔ̰ mbè angirə̀ kwàʼ ìwi kyen, swiʼi tikaŋ kɔ̀ti ìywin, mbɔb məjìm se zə̀ʼə̀ ikyeg ghùmnə Ŋwiye gha,

¹⁴ “Ighumni yaʼ abə Ŋwiye ikaŋ àbɔ̀ŋɔ, àbɔrɔ̀bɔd yaʼ abə bəd mbe ne məd gyḛ igun isəg.”

¹⁵ Anyumə̀ ne mbè angirə̀ mbe ya bə̀ndì ghò ikaŋ, mbè àjənjə̀g ya si ghàm mbɔb mbɔb gha, “Tì gho a Betèlèhem ghò bàd anug azo̰ ne du, ne Anɔŋisəg ghi tì kyèri”

¹⁶ Mbɔb ya gàd nɔ̀ʼ ghò bàd Jòseb tì Mèri, bə̀ bàd ŋwan ne mbi nɔŋi inga fikuʼì ne mbe jə nyam.

¹⁷ Anyumə̀ ne mbi ya bàri ŋwan we, mbi ya ghà anug ne angirə̀ ya gha inɔb imbə̀ʼ ŋwan we abə bəd.

¹⁸ Anug ya chè wə̀d ijìm ne ya zughi inug mbo̰ ne mbè àjənjə̀g ya gha.

¹⁹ Mèri ya nɔ̀ŋì inug mbo̰ ijìm inga ìzi fìŋ se chìyè kɔ̀ndɔ.

²⁰ Mbè àjənjə̀g ya bə̀ndì, nè zə̀ʼə̀ ikyeg ghùmnə Ŋwiye ane inug mbo̰ ijìm ne mbɔb ya zughi bə̀ bàd imbə̀ʼ icheg ne inug mbo̰ ijìm ya bə̀ yaʼ kwàʼ icheg ne angirə̀ ya gha inɔb.

Mbe niŋ ŋwan we ghò inga mbàn Ŋwiye chùb ikum ane Yeso

²¹ Ineg ya kòʼ ìfàmi, mbi ŋwed ŋwan bə̀ chùb ikum məd ane Yeso, ne ya ikum ne angirə̀ ya nàʼi bɔŋ Mèri se bɔ̀ŋɔ̀ ibum məd.

²² Nyùmə̀ ya kòʼ abə Jòseb tì Mèri ni sò nyɔd icheg ne mə̀nɔ̀ʼɔ̀ Muse ya chwi, mbi niŋ Yeso kɔʼ ghò a Jèrusalèm ni ghò nàʼ abə Anɔŋisəg.

²³ Mbi ya ghì icheg ne mbi ya fə ŋwàʼrì inga àŋwàʼrì mə̀nɔ̀ʼɔ̀ Muse gha, “Fɔ̀d ŋwan mbaŋà ijìm ya mbe nàʼà abə Anɔŋisəg.”

²⁴ Mbɔb ya nàʼ ighi ituti Ŋwiye icheg ne àŋwàʼrì mə̀nɔ̀ʼɔ̀ Muse ya bə chwi. À ya tìnən tibe ne yaʼi icheg bupə kə̀ tìnən mɔ̀ʼɔ ne mbe kàrà ane pigìn.

²⁵ Anyumə̀ we, wə̀d mɔ̀ʼɔ ya yaʼ a Jèrusalèm ne ikum məd ya Simìyòn. Wì ya yaʼ wə̀d ne ghìyə̀ inug ne koʼi bə̀ bèrì ibɔ Ŋwiye. Wì yaya bə̀ ghɔ̀mɔ̀ nyùmə̀ ne Ŋwiye biri ghì gha bəd Izre pum. Azwighi Ŋwiye ya yaʼ igun məd.

²⁶ Azwighi Ŋwiye ya fə chwi ibo gha wì biri bàd Wə̀d we ne Anɔŋisəg zɔ̀ʼi bɔŋ ku.

²⁷ Azwighi Ŋwiye ya ghì aməd wì ghò inga mbàn Ŋwiye. Anyumə̀ ne Jòseb tì Mèri ya niŋi Yeso nyi inga mbàn Ŋwiye ni fàʼ inug icheg ne mə̀nɔ̀ʼɔ̀ ya chwi,

²⁸ Simìyòn ya niŋ ŋwan we nyìmi ikye ibo, nàʼ məyakà abə Ŋwiye gha,

²⁹ “Atumbisəg, àghò fàʼ icheg ne àghò ya kàʼi. Sàŋa ìwe wə̀d àfàʼì amad anìŋ wè saŋa isəg ane àbɔrɔ̀bɔd.

³⁰ Mə bàd kwàʼ ane àmə aghə, icheg ne àghò cha wə̀d ne biri pumni bəd,

³¹ ne àghò fə chuʼri chà wə̀d ijìm bàd.

³² Məd ya ìzḛzḛ ne biri chwi ìwe ikuchèg abə bəd ne kayi mə̀Ju, bə̀ nàʼ ighumni abə ìmbe bəd, mə̀Izre.”

³³ Anug ya chè Mèri tì Jòseb anyumə̀ ne mbi ya zughi anug ne Simìyòn ya gha imbə̀ʼ ŋwan we.

³⁴ Simìyòn ya zì àbɔrɔ̀bɔd igun inɔb, si ghà abə Mèri, ngɔb ŋwan gha, “Ŋwan gho̰ ya Ŋwiye chɔ̀ʼi ni ghì gha bəd ndan ndàn biri gùg. Wì biri bə nɔ̀rì bəd ndan ndàn inga Izre. Məd ya aneni ne nɔʼi abə Ŋwiye ne bəd ndan ndàn biri chàpì aməd.

³⁵ Məd biri toʼ inug mbe ne bəd yaya kɔ̀ndɔ inga ìtɔb fìŋ. Ibəʼ biri zùm ìze fìŋ icheg fibeg.”

³⁶ Wə̀dkə̀n Ŋwiye mɔ̀ʼɔ ne ya àyi ya bə̀ yaʼ angu. Ikum məd ya Àna. Məd ya ŋwan ìwi Fanwè inga inəbi Asà. Wì ya fə nùn. Wì ya nam məyi ane tituʼ ìsàmbe, inɔm məd ku.

³⁷ Àna ya yaʼ iku-àyi anene wì si tituʼ ìghum ìfàmi chɔ̀b ikwè. Chəyi wì ya kweʼè dùwə̀ inga mbàn Ŋwiye. Ineg ijìm wì yaya chùghə njèg, chàʼrà Ŋwiye, bə̀ ghùmnə Ŋwiye tisi fɔrɔ tizimi.

³⁸ Kwàʼ anyumə̀ we, Àna ya pè nàʼ məyakà abə Ŋwiye, bə̀ ghà inug imbə̀ʼ ŋwan we abə bəd mbe ne yaya ghɔ̀mɔ̀ gha Ŋwiye zeri Jèrusalèm.

Mbe niŋ Yeso bə̀ndì ghò a Nazarèd

³⁹ Anyumə̀ ne Jòseb tì Mèri ya màni ni fàʼ inug icheg ne mə̀nɔ̀ʼɔ̀ Anɔŋisəg ya chwi, mbi ya bə̀ndì ghò inɔb achan a Nazarèd inga Galìli.

⁴⁰ Ŋwan we ya kweg, bèrì ika bə̀ taŋ bèrì iwe. Ŋwiye ya bə̀ ghì ìchɔ̀mì ibo.

Yeso nyi inga mbàn Ŋwiye ane wì yaʼi tituʼ ìghum chɔ̀b ibe

⁴¹ Jòseb tì Mèri yaya ghùmə̀ ghò a Jèrusalèm tituʼ tijìm ane Iteri Chègun.

⁴² Anyumə̀ ne Yeso ya yaʼi tituʼ ìghum chɔ̀b ibe, mbi ya bə̀ fɔrɔ ghò ane Iteri icheg ne mbi yaya ghùmə̀ ghò.

⁴³ Anyumə̀ ne Iteri ya mèghi, mbi ya nɔ̀ʼ ko ni kurə. Yeso ya tèn anjìm a Jèrusalèm, chəyi mə̀mbaʼ məd kyeri.

⁴⁴ Mbi ya yèn ane aneg afibì nè kɔ̀ndɔ gha məd we yi inga inɔ̰. Mbi ya nɔ̀ʼ se kə̀bə̀ aməd tèkan. Mbi ya biri abə ifud fɔrɔ abə mə̀sə̀ʼ, chəyi mbi bari.

⁴⁵ Ane, mbi ya bə̀ndì nè kə̀bə̀ aməd ghò a Jèrusalèm.

⁴⁶ Ineg ya chè itad, mbi bàd aməd inga mbàn Ŋwiye ichughi abɔ̀ʼ mə̀chwitì mə̀nɔ̀ʼɔ̀. Wì yaya zùghə inug ne mbi yaya ghà, bə̀ bìre inug inɔb.

⁴⁷ Anug ya chè wə̀d ijìm ne ya zughi icheg ne Yeso yaya ghàmà bə̀ ywìtè tibiri ane iwe.

⁴⁸ Ibo ya buʼrə abə mə̀mbaʼ məd anyumə̀ ne mbi ya bàri aməd. Ngɔb məd ya biri ibo gha, “Ìmə ŋwan, aton ne àghò ghi anìŋ ina àkə gha? Mo tì ìwe mbaʼ fə zə̰ ngəʼ ni te kə̀bə̀ awe.”

⁴⁹ Yeso ya ywìtì inɔb gha, “Àkə chəyi mbə̀ kyeri gha mə kə̀ bèrì ni yaʼ inga nəb ìmə Mbaʼ? Aton ne mbə̰ mbe kə̀bə̀ amə àkə gha?”

⁵⁰ Chəyi mbɔb ya kyeri aton ane ìngam gho̰ ne wì ya ghàmi.

⁵¹ Ane, Yeso ya bə̀ndì ghò a Nazarèd tì inɔb. Wì yaya zùgrə awɔb. Ngɔb məd ya zug inug mbo̰ ijìm nyìmi inga fìŋ.

⁵² Yeso yaya kwèghe, ìwe məd bə̀ kwèghe. Ŋwiye ya kɔ̀ŋ aməd, bəd bə̀ kɔ̀ŋ aməd.