Lk 10 - Ikan feg

Yeso tɔm bəd ìghum ìsàmbe chɔ̀b ibe

¹ Ane inug mbo̰ ya che, Anɔŋisəg ya chɔʼ bəd ndəŋ ìghum ìsàmbe chɔ̀b ibe . Wì ya tɔm awɔb məbe məbe. Wì ya gha mbe gho ibo imbìghè inga isiŋi mbe ne məd ya beri ni ghò məd məd.

² Wì ya ghà inɔb gha, “Ighi ni niŋ a mben mbe nɔ̀ʼ, si ya gha, bəd àfàʼì kə. Mbə̀ chaʼra Ŋwiye, ghà abə Anɔŋisəg ni beri mben gha, wè cha bəd àfàʼì ni biri niŋ ighi a mben məd.

³ Mbə̀ gho! Ane, mbə̀ kyeri gha mə ya anìŋ chà awən icheg bɔn njə̀g inga ìsàn ìfɔn.

⁴ Imbə̀ʼ mbə̰ niŋə awən taka, kə àbàn, kə bə̀ itami. Imbə̀ʼ mbə̰ bə təmə awən inɔnjì ni chàʼrì wə̀d.

⁵ Anyumə̀ ne mbə̀ nyi inga nəb mɔ̀ʼɔ, mbə̀ pe chàʼrì gha, ‹Ŋwiye ziye àbɔrɔ̀bɔd igun wə̀d ijìm inga nəb aŋa.›

⁶ Wə̀d ne kɔ̀ŋi àbɔrɔ̀bɔd mə̀ yaʼ inga nəb ze, àbɔrɔ̀bɔd ze ne mbə̀ gha biri yaʼ igun məd. Àmə yaʼ ne chəyi wə̀d ne kɔ̀ŋi àbɔrɔ̀bɔd yaʼi inga nəb ze, àbɔrɔ̀bɔd ze biri bə̀ndì yèʼe inən.

⁷ Mbə̀ chughi kwàʼ inga nəb ze ne mbə̀ nyi inga. Mbə̀ jəg bə̀ no ighi mbe ne mbi biri ya nàʼà inən imbə̀ʼ icheg ne wə̀d àfàʼì kòʼ ni bèrì ìzi chùd. Imbə̀ʼ mbə̰ ŋa chùghə awən a nəb a nəb.

⁸ Asiŋi ne mbə̀ nyi mbi niŋ awən, mbə̀ jəg ighi mbe ne mbi biri ya nàʼà inən.

⁹ Mbə̀ ghuyə bəd ne ghɔ̰̀ inga asiŋi ze bə̀ ghà abə bəd inga asiŋi ze gha, ‹Anug ìfɔ̀n Ŋwiye fə yeʼe si iban inən.›

¹⁰ Àsi inga asiŋi ne mbə̀ nyi mbi ton awɔb awən, mbə̀ duwə ghò igun mənɔnjì ghò gha;

¹¹ ‹Mbə̀ kyeri gha tè kùtì agwi ne nɔ̀ʼi inən inga aben ane ìmba ighog igun inən. Si ya gha, mbə̀ wendi gha anug ìfɔ̀n Ŋwiye fə yeʼe si iban inən.›

¹² Mə gha tesiʼ inən gha, ane aneg ze ne Ŋwiye biri saʼ bəd, wì biri chwi àsɔ̀mnəfiŋ igun bəd mbe inga Sodòm chè icheg ne wì biri chwi abə bəd inga asiŋi ze.”

Ngəʼ kyen ze igun bəd inga iben mbe ne chəyi mbi bḛ ikən chɔm

¹³ Yeso ya chè imbìghè gha, “Ngəʼ kyen biri yaʼ igun ine àghò Kòrazìn! Ngəʼ kyen biri bə yaʼ igun ine àghò Bèsayidà. Ngəʼ kyen ze igun inən imbə̀ʼ icheg ne iyeti inug mbe ne Ŋwiye fàʼi inga inən kə wì ya fàʼi anìŋ inga Tayì tì Sidòn, nji bəd mbe angu ya chughi aseg sèm ighog, zì ndwi-dèg, bə̀ fùʼì ìwɔb nyɔd ane aburi ni chwi gha mbe fə bə̀ŋì ìtɔb fìŋ dù ane inug tibɔ̀ŋ.

¹⁴ Ane aneg ze ne Ŋwiye biri saʼ bəd, wì biri bèrì àsɔ̀mnəfiŋ igun Tayì tì Sidòn chè awən.

¹⁵ Àsi àghò Kàpenàwum, àghò kə kɔ̀ndi gha Ŋwiye biri nɔ̰ we ghò pè ikaŋ àbɔ̀ŋɔ? Ŋwiye biri swi awe aseg, màʼ awe inga aben iwu bəd.”

¹⁶ Yeso ya si nwḭ̀yḛ̀ ghà abə mə̀mə̀nənùg məd gha, “Wə̀d ne zughi anug ze ne mbə̰ mbe ghà, tengàŋ fə bə̀ zug àze ne mə ghà. Àsi wə̀d ne to̰ yi awən, tengàŋ bə̀ to̰ yi awum. Ane, wə̀d ne to̰ yi awum, tengàŋ bə̀ to̰ yi wə̀d we ne cha amə.”

Bəd mbe ìghum ìsàmbe chɔ̀b ibe bə̀ndì

¹⁷ Bəd mbe ìghum ìsàmbe chɔ̀b ibe ya bə̀ndì tì igyendi inɔb inga fìŋ. Mbi ya pè gha, “Anɔŋisəg, Ka bèyi izwighi tibɔ̀ŋ, mbi ya zùgrə awa anyumə̀ ne tì ghàmi inɔb ane ìwe ikum.”

¹⁸ Yeso ya ywìtì inɔb gha, “Mə kə bàd Sàtàn we fḛ tikaŋ icheg àŋwàŋwaŋ.

¹⁹ Mbə̀ zug! Mə fə nàʼ ika inən ni yèn igun jo fɔrɔ igun mbi tìkafoʼ. Mə bə̀ nàʼ ika inən ni chè tika wə̀d ìpàb tijìm. Chəyi aghi mɔ̀ʼɔ biri ghì awən ka.

²⁰ Ane, imbə̀ʼ mbə̰ si ya gyènde awən gha izwighi tibɔ̀ŋ mbe zùgrə awən. Mbə̀ ya gyènde gha Ŋwiye ŋwàʼrì ìtən tikum inga àŋwàʼrì ikaŋ àbɔ̀ŋɔ.”

Igyendi sweg inga fìŋ abə Yeso

²¹ Anyumə̀ we, Azwighi Ŋwiye ya ghì igyendi sweg inga fìŋ abə Yeso. Wì si gha, “Ìmə Mbaʼ, Anɔŋisəg ne beri ikaŋ fɔrɔ ìseg. Mə nàʼ məyakà ine imbə̀ʼ icheg ne àghò nə̀m inug mbo̰ abə bəd ne kɔ̀ndɔ gha mbɔb bèrì iwe bə̀ kyèri inug, si chwi abə bəd ne chəyi mbi kyeri. E! Ìmə Mbaʼ, à ya icheg ne àghò kə̀bi gha ze yaʼ.

²² Ìmə Mbaʼ fə nàʼ ighi ijìm inum. Chəyi wə̀d ne taŋ kyèri Ŋwan chèyi ane Mbaʼ. Chəyi wə̀d ne bə taŋ kyèri Mbaʼ chèyi ane Ŋwan fɔrɔ bəd mbe ne Ŋwan kɔ̀ŋi ni ghì gha mbe kyeri Mbaʼ.”

²³ Yeso ya si ghàbri ghà abə mə̀mə̀nənùg anjìm anjìm gha, “Ŋwiye zì àbɔrɔ̀bɔd igun inən gha mbə̀ bara ighi mbo̰ ne mbə̰ mbe bàrà anìŋ.

²⁴ Mə gha tesiʼ inən gha, bədkə̀n Ŋwiye nɔʼ nɔʼ fɔrɔ məfɔn nɔʼ nɔʼ ya kə̀b ni bàd inug mbo̰ ne mbə̰ mbe bàrà, si ya gha, chəyi mbi ya bàri. Mbi ya bə̀ kə̀b ni zug inug mbo̰ ne mbə̰ mbe zùghə anìŋ, si ya gha, chəyi mbi ya bə zug.”

Ngam məgri imbə̀ʼ wə̀d a Sàmarìyà ne beri àsɔ̀mnəfiŋ

²⁵ À ya yaʼ igun aneg mɔ̀ʼɔ, àchwitì mə̀nɔ̀ʼɔ̀ mɔ̀ʼɔ ya ghò ni kwàʼrì Yeso. Wì ya biri ibo gha, “Àchwitìnùg, mə kə mənyìʼ ghì iye bɔŋ jəg ìtḛ̀ ighə̀m imɔʼ?”

²⁶ Yeso ya biri ibo gha, “Mbi kə ŋwàʼri inga mə̀nɔ̀ʼɔ̀ gha? Àghò kə tòʼri gha?”

²⁷ Àchwitì mə̀nɔ̀ʼɔ̀ we ya ywìtì gha, “Àghò kɔŋɔ Anɔŋisəg ìwe Ŋwiye ane ìze fìŋ ijìm tì ìwe ikɔndi ijìm tì ìwe ika ijìm fɔrɔ ìwe iwe ijìm. Àghò bə̀ kɔ̀ŋ wə̀d ne yaʼi iban ine icheg ne àghò kɔ̀ŋi ìwe nyɔd.”

²⁸ Yeso ya ywìtì gha, “Àghò ghàm icheg chɔm. Àghò mə̀ ya fàʼà ane, nji àghò biri jəg ìtḛ̀.”

²⁹ Àchwitì mə̀nɔ̀ʼɔ̀ we ya kə̀b ni chwi gha zìye təm kòʼ. Wì ya biri abə Yeso gha, “Wə̀d ne yaʼi iban inum àkə we?”

³⁰ Yeso ya ywìtì gha, “Mbaŋà mɔ̀ʼɔ ya nɔ̀ʼ a Jèrusalèm se swìʼe ghò a Jèrikò. Wì ya nì fen ikye ibo abə məji. Məji mbe ya gwì aməd, chì ndwi ibo ibə̀m, sɔm aməd, si nɔ̀ʼ sàŋì aməd ane we se nùʼə ni ku.

³¹ Ze ya chwi gha wə̀d mbàn Ŋwiye mɔ̀ʼɔ yaya bə̀ swìʼe igun inɔnjì we. Anyumə̀ ne wì ya bàri wə̀d we, wì ya si chè yi aba inɔnjì àzin.

³² Mbaŋà mɔ̀ʼɔ inga inəbi Levì yaya bə̀ swìʼe igun inɔnjì we. Wì ya pè angu bàd aməd bə̀ chè yi aba inɔnjì àzin.

³³ À ya məyi mbaŋà mɔ̀ʼɔ a Sàmarìyà ne yaya bə̀ swìʼe igun inɔnjì we ya pe bàd aməd bèrì àsɔ̀mnəfiŋ igun məd.

³⁴ Wì ya sùngì ghò iban məd. Sò ina̰ məd ane mənoʼ, zɔʼ ane məwud, si kɔd. Wì ya bèʼì aməd igun nyam mə̀kara ghò nɔ̀ŋì inga nəb àzwètì bə̀ nə̀ri aməd.

³⁵ Isu abɔ̀ʼ, wì ya nàʼ chuʼ tibe abə wə̀d ne beri nəb àzwètì ze. Wì ya ghà ibo gha, ‹Nḛ wə̀d gho̰ nàʼ inum. Mə biri ywìtì ikab ijìm ne àghò chìki igun məd anyumə̀ ne mə̀ bəndi.›

³⁶ Àghò kɔ̀ndi gha inga bəd mbo̰ mətad, wə̀d ne ghi inug icheg wə̀d ne yaʼi iban wə̀d we ne ya fḛ inga ikye abo abə məji àkə we?”

³⁷ Àchwitì mə̀nɔ̀ʼɔ̀ we ya ywìtì gha, “À ya wə̀d ne ya chwi àsɔ̀mnəfiŋ igun məd.” Yeso ya si ghà ibo gha, “Ndò, ghò fàʼ ane bə.”

Yeso ghò mùg Màta tì Mèri

³⁸ Icheg ne Yeso yaya yḛ̀ tì mə̀mə̀nənùg məd, wì ya nyi inga asiŋi mɔ̀ʼɔ, ghò inga achan àyi mɔ̀ʼɔ ne ikum məd ya Màta, wì niŋ aməd ibo inga nəb.

³⁹ Mèri ne ya ifi ìwi Màta ya chughi imbìghè abə Anɔŋisəg se zùghə anug ne wì yaya ghà.

⁴⁰ Màta ya zì fìŋ yaʼ ane anug ni kə̀b ighijəg nàʼ abə bəd. Icheg ne àfàʼì yaya chè Màta, wì ya dèg abə Yeso gha, “Anɔŋisəg, chəyi àghò nḛ gha Mèri sàŋì àfàʼì ajìm inum? Gha ibo wì yeʼe wètì amə.”

⁴¹ Anɔŋisəg ya ywìtì ibo gha, “Màta, Màta! Àghò we nwìʼè nyɔd bə̀ zə̰ ngəʼ ako imbə̀ʼ inug nɔʼ nɔʼ.

⁴² Aghi amɔʼ ze angu ne àghò kòʼi ni bèrì. À ya àzewən ze ne Mèri fə də̀bi. Ane, chəyi tì mbi ywìrì niŋ ibo.”