Kòlosè 4 - Ikan feg

¹ Mbə̰ mə̀mbaʼ àfàʼì, mbə̀ ya ghìyə̀ inug abə ìmbən bəd àfàʼì ane ikuchèg ne koʼi bə̀ bɔ̀ŋ. Mbə̀ wendi gha mbə̰ bə̀ bèrì mbaʼ àfàʼì ikaŋ àbɔ̀ŋɔ.

Pɔl nàʼ tikə ndəŋ

² Mbə̀ ziye atog ni ya chàʼrà Ŋwiye mà nyumə̀ ijìm. Mbə̀ ya chàʼrà Ŋwiye bə̀ nɔ̀ŋɔ̀ ikɔndi igun ichaʼri Ŋwiye we. Mbə̀ ya bə̀ nàʼà məyakà abə Ŋwiye mà nyumə̀ ijìm.

³ Mbə̀ bə chàʼra Ŋwiye ina gha wì fiʼe inɔnjì ina tì chete ìwa ikən chɔm we ne ya yaʼi inə̀mbi imbə̀ʼ Kristo. À ya anjìm ikən we ne mə̀ yaʼi inga nəb ndəŋ .

⁴ Mbə̀ chaʼra Ŋwiye inum gha mə chete ikən chɔm we bə̀ tòʼrì we zen kwàʼ icheg ne mə beri ni ghì.

⁵ Mbə̀ we awən ane icheg ne mbə̰ mbe ghìyə̀ inug tì bəd mbe ne kayi bəd Kristo. Mbə̀ niŋ apan ze ne mbə̀ yaʼi tì inɔb ghì inug ne chwìye gha mbə̰ ya bəd Kristo.

⁶ Mbə̀ ghiyə gha ìngam we ne dùwə̀ inən ichug we yaʼ ìwi chɔm ne tì wi wètì bəd. Ane, mbə̰ biri kyeri ikuchèg chɔm ni ywìtì inug abə bəd.

Ichaʼri ne si nwḭ̀yḛ̀

⁷ Tichikùs, ne yaʼi ìmə ifi ne mə̀ taŋ kɔ̀ŋ biri gha inug ijìm inən imbə̀ʼ amə. Məd we fàʼà ane ìzi fìŋ ijìm. Məd ya bə̀ ìmə ifi ane àfàʼì icheg ne te fàʼà abə Anɔŋisəg.

⁸ Aton ne mə̀ tɔmi aməd inən ya gha wì biri ghì mbə kyeri icheg ne tì yaʼi, bə̀ nə̀ri ìtən fìŋ.

⁹ Məd we yèʼe tì Ònìsimùs ne yaʼi ìwa ifi ne tì taŋ kɔ̀ŋ. Ònèsimùs we bə̀ fàʼà ane ìzi fìŋ ijìm. Məd ya bə̀ wə̀d a Kòlosè icheg inən. Mbɔb mbo̰ məbe biri mə̀tì inug ijìm ne chè ina aŋa inən.

¹⁰ Àristakùs ne mə̀ yaʼi inga nəb ndəŋ tì məd we chàʼrà awən. Mag we ne məd tì Bànabàs yaʼi bɔn ane bɔn wə̀d ifibì we bə̀ chàʼrà awən. Mbə̰ fə zug inug imbə̀ʼ aməd. Məd mə̀ yèʼe, mbə̀ niŋ aməd kwàʼ icheg chɔm.

¹¹ Josùwà we ne mbe kàrà ane Jostùs we bə̀ chàʼrà awən. À ya məyi mbɔb mətad yaʼi mə̀Ju mbe ne fàʼà ane anug ìfɔ̀n Ŋwiye abɔ̀ʼ inum. Mbɔb fə wètì amə kwàʼ icheg chɔm.

¹² Epafràs ne yaʼi wə̀d abɔ̀ʼ inən bə̀ yaʼ wə̀d àfàʼì Yeso Kristo we bə̀ chàʼrà awən. Məd we zìyè atog ni chàʼra Ŋwiye inən mà nyumə̀ ijìm gha mbə̀ təm kà bə̀ taŋ kyèri inug ijìm mbe ne Ŋwiye kə̀bi, bə̀ taŋ zì atog ni nyìmi inug mbe, ne chəyi mbə̰ mbe jə̀mə̀.

¹³ Mo, mə bàd icheg ne məd we zìyè ika ni fàʼ inən fɔrɔ abə bəd Kristo mbe a Làwùdisìyà tì bəd Kristo mbe a Hìrapolìs.

¹⁴ Lug ne tì taŋ kɔ̀ŋ ne yaʼi dɔgtà fɔrɔ Demàs mbe bə̀ chàʼrà awən.

¹⁵ Mbə̀ chaʼra bəd Kristo mbe a Làwùdisìyà nàʼ inum. Mbə̀ bə chàʼrì Nimfà fɔrɔ ifeti bəd Kristo we ne nyìme ibo inga nəb.

¹⁶ Anyumə̀ ne mbə̀ fə fɔŋi àŋwàʼrì azo̰ inga ìwən ifeti, mbə̀ bə ghì gha mbe fɔŋ inga ifeti bəd Kristo we a Làwùdisìyà. Mbə̀ bə niŋ àŋwàʼrì ze ne mə̀ cha abə ifeti bəd Kristo we a Làwùdisìyà fɔŋ inga ìwən tì ifeti.

¹⁷ Mbə̀ gha abə Akipùs gha wì kirə ika ni mànì àfàʼì ze ne Anɔŋisəg zi ibo ikye abo.

¹⁸ À ya mo Pɔl ŋwàʼri ichaʼri gho̰ kwàʼ ane àmə abo. Mbə̀ wendi gha mo we inga nəb ndəŋ. Ŋwiye ghiyə ìchɔ̀mì inən.