Kòlosè 2 - Ikan feg

¹ Mə kə̀b gha mbə̀ kyeri icheg ne mə kìrə ika fàʼà imbə̀ʼ awən bə̀ fɔrɔ imbə̀ʼ bəd Kristo mbe a Làwùdisìyà fɔrɔ imbə̀ʼ bəd məjìm ne chəyi mbi bi kiri bari amə.

² Aton ya gha, mə ya kə̀bə̀ ni nəri ìtɔb fìŋ bə̀ ghì gha mbɔb yaʼ ane fìŋ ifibì bə̀ chùghi ane àkɔ̀ŋì. Àze biri ghì mbɔb taŋ bèrì iwe ni kyeri anug, imbə̀ʼ kyeri anug ze ne Ŋwiye nə̀mbi. Anug ze ya Kristo.

³ Ŋwiye nə̀mbì iwe ijìm fɔrɔ ika ni kyeri inug inga Kristo.

⁴ Mə ya ghà inug mbo̰ inən ni ghì gha imbə̀ʼ wə̀d mɔ̀ʼɔ nɔ̀ʼ tàmbi awən ane tìngam nəmi nəmi.

⁵ Ka chəyi awum abɔ̀ʼ inən, mbə̀ kyeri gha mə we kɔ̀ndɔ awən mà nyumə̀ ijìm. Mbə̀ bə kyèri gha, mə kɔ̀ŋ ni bàd icheg ne mbə̰ mbe ghìyə̀ inug ne koʼi bə̀ bàd icheg ne ìwən ibḛfiŋ təmi kà igun Kristo.

Bəd ne bḛ Yeso bèrì ìtḛ̀

⁶ Icheg ne mbə̀ fə bḛ Yeso Kristo gha məd ya Anɔŋisəg, mbə̀ bə chè imbìghè ni ya fàʼà inug icheg ne məd kə̀bi.

⁷ Mbə̀ bə chè imbìghè ni kweg inga anug Kristo, àzən aghaŋ inga Yeso təm kà. Ìwən ibḛfiŋ igun Yeso bə təm kà kwàʼ icheg ne mbi ya chwiti inən. Mbə̀ ya taŋ nàʼà məyakà abə Ŋwiye mà nyumə̀ ijìm.

⁸ Mbə̀ taŋ niŋ nyumə̀ imbə̀ʼ wə̀d mɔ̀ʼɔ nɔ̀ʼ tàmbi awən ane tiwe ako, ghì mbə bḛ ìbòʼì. Tiwe ako ìto̰ ne bəd mbe chwìte ti nɔ̀ʼ yaʼ abə bəd fɔrɔ abə izwighi mbe ne sàʼa isəg gho̰, kayi abə Kristo.

⁹ Aton ya gha, ka Kristo ya yeʼe igun isəg icheg wə̀d, məd ya kwàʼ Ŋwiye ane inug ijìm.

¹⁰ Ane, Ŋwiye fə nàʼ ìtḛ̀ tesiʼ inən icheg ne mbə̀ yaʼi ane ifɔti tì Kristo. Kristo bèrì ika chè izwighi ijìm fɔrɔ tika tijìm igun isəg.

¹¹ Mbi ya fə ŋwed awən icheg ne mbə̀ yaʼi ane ifɔti tì Kristo. Si ya gha, àŋwerì azo̰ ya kayi bəd faʼi ane ibo. Àŋwerì azo̰ ya icheg we ne Kristo kɔ̀pi ìtən fìŋ, chì ikuchèg tibɔ̀ŋ we ne ìtən nyàmnyɔd te ghə̀ʼrə̀.

¹² Mbi ya bə̀ twə̀ŋi awən tì Kristo anyumə̀ ne mbi ya zi awən inga mənib, mbə̀ niŋ mənib. Anyumə̀ ne mbi ya nɔ awən chì inga mənib ne mbə̀ yaya nìŋə mənib, à ya icheg ni gha, Ŋwiye ya bə̀ zwèmni awən ane iwu tì Kristo . Wì ya zwemni awən ane imbə̀ʼ icheg ne mbə̀ nɔŋi ìwən ibḛfiŋ igun ika Ŋwiye we ne ya zwemne Yeso ane iwu.

¹³ Chəyi mbi ya kiri ŋwed ìtən nyàmnyɔd anyumə̀ we ne mbə yaya kiri iwu bəd anjìm ìmbən inug tibɔ̀ŋ. Si ya gha, Ŋwiye ya ghì mbə si bèrì ìtḛ̀ feg icheg ne mbə̀ yaʼi ane ifɔti tì Kristo. Wì ya waʼ ìmba inug tibɔ̀ŋ mba məjìm.

¹⁴ Wì ya chìkì àŋwàʼrì mə̀nɔ̀ʼɔ̀ ze ne chwìye gha mba ya bəd inug tibɔ̀ŋ. Àŋwàʼrì ze yaya zìyè isaʼi igun ina, chwìye icheg ne ìmba inug tibɔ̀ŋ ya ghì tì si yaʼ bəd njo. Kristo ya chì àŋwàʼrì isaʼi ze kɔ̀mbì igun azed abaʼri.

¹⁵ Wì ya chìkì tika ijìm abə izwighi tibɔ̀ŋ ka ka fɔrɔ abə izwighi mbe ne sàʼa isəg gho̰ anyumə̀ ne wì ya ku igun azed abaʼri. Wì ya ghì ane, zì tìnìrètog igun inɔb kwàʼ asaŋ asaŋ icheg sogyì ne nyimi ìbòʼì ibid se tə̀rə̀ yi igun inɔb.

¹⁶ Ane, imbə̀ʼ mbə̰ bḛ awən gha wə̀d mɔ̀ʼɔ ziye isaʼi igun inən imbə̀ʼ aghi ne mbə̰ mbe jə̀ghə kə̀ imbə̀ʼ aghi ne mbə̰ mbe no, kə̀ imbə̀ʼ anug ni ghumni ineg mɔ̀ʼɔ, kə̀ anug ni ghumni aneg mbègtog inga iməg feg, fɔrɔ anug ni ghumni aneg àzwètì mə̀Ju.

¹⁷ Inug mbo̰ ijìm ne mbə̰ mbe kiri ghiyə ya àzìŋə ne chwìye inug ne biri yeʼe. Tì we tì tì bad tesiʼ we ne yaʼi inga ighi mbo̰ ijìm məyi anyumə̀ ne tì yaʼi ane ifɔti tì Kristo.

¹⁸ Imbə̀ʼ mbə̰ saŋa awən gha bəd mɔ̀ʼɔ ya kɔ̀mɔ̀ igo inən imbə̀ʼ icheg ne mbɔb mbe gha Ŋwiye we ghàmà inɔb inga inati njə̀m. Tiku bəd te ya kə̀bə̀ gha bəd mənyìʼ swi nyɔd aseg bə̀ ghùmni mbè angirə̀. Mbɔb ya ghìyə̀ ane ni chwi inən gha chəyi mbə̀ koʼi ni bèrì ineʼi we ne Ŋwiye nɔŋi inən icheg ne mbə̀ yaʼi ane anug amɔʼ tì Kristo. Imbə̀ʼ mbə̰ bḛ awən. Mbɔb ya nɔ̀ nyɔd ati ako, ghàmà yaʼ inug ne tikɔndi wə̀d te chwìte.

¹⁹ Tiku bəd ìto̰ fə sàŋì anug ni nyimi Kristo ne yaʼi atog abə nyàmnyɔd məd, ne ya ifeti bəd Kristo. À ya Kristo we ghìyə̀ ifeti bəd məd kweghe icheg ne Ŋwiye kə̀bi. À ya məd we nyìme ifeti bəd Kristo kwàʼ icheg ne atog ze nyìme nyàmnyɔd wə̀d ane tinḭ kyen kyen fɔrɔ mə̀nàra.

Anug ni ku bə̀ ywìrì yaʼ izɔm tì Kristo

²⁰ Mbə̰ ya fə ku tì Kristo. Wì ya fə chì awən ane ika izwighi mbe ne sàʼa isəg gho̰. Aton ne mbə̰ mbe ywìrè chùghə icheg bəd inga isəg àkə gha? Aton ne mbə̰ mbe ywìrè zùgrə mə̀nɔ̀ʼɔ̀ àkə gha: Mə̀nɔ̀ʼɔ̀ ya ghà gha,

²¹ “Imbə̀ʼ àghò nyìmi awe aghi azo̰, imbə̀ʼ àghò zweʼi awe aghi kyèg, imbə̀ʼ àghò bete awe àzin.”

²² Mə̀nɔ̀ʼɔ̀ mbo̰ məjìm ya ghàmà məyi imbə̀ʼ ighi mbe ne biri bə icheg ne bəd mbe bètè. Mə̀nɔ̀ʼɔ̀ mbe ya tikə bəd tì inug ne bəd tangi nɔ̀ŋì se chwìte.

²³ Tiku mə̀nɔ̀ʼɔ̀ te fug inug ne beri iwe icheg ne mbe chwìte inug ne wə̀d mənyìʼ ghì ni chwi gha məd we ghùmnə Ŋwiye. Mə̀nɔ̀ʼɔ̀ mbe ya imbə̀ʼ inug icheg: anug ni swi nyɔd aseg tì anug ne bəd mbe chə ìtɔb nyàmnyɔd ni ghumni Ŋwiye. Si ya gha, chəyi mə̀nɔ̀ʼɔ̀ mbe beri ika ni ghì gha imbə̀ʼ wə̀d si ywiri ghiyə yi inug tibɔ̀ŋ mbe ne nyàmnyɔd məd ze ghə̀ʼrə̀.