Jûd 1 - Ikan feg

Jud chàʼrì bəd Kristo

¹ À ya mo Jud ne yaʼi wə̀d àfàʼì Yeso Kristo ne bə̀ yaʼ ifi Jem ŋwàʼri àŋwàʼrì azo̰. Mə ŋwàʼrì anìŋ abə bəd mbe ne Ŋwiye ne yaʼi Mbaʼ kɔ̀ŋi awɔb bə̀ kàri awɔb ghì mbi yaʼ bəd məd. Ŋwiye bə̀ nɔ̀ŋì awɔb ni ghɔ̀m nyùmə̀ we ne Yeso Kristo biri ywiri yeʼe.

² Ŋwiye taŋ chwi àsɔ̀mnəfiŋ inən bə̀ taŋ zì àbɔrɔ̀bɔd igun inən bə̀ taŋ chwi àkɔ̀ŋì inən.

Bəd ne chwìte inug ako

³ Ìmbum məfi fɔrɔ ìtum njàbi ne mə̀ taŋ kɔ̀ŋ, icheg ne mə̀ ya nɔŋi fìŋ ni ŋwàʼrì inug inən imbə̀ʼ icheg ne tì fɔrɔ pum, mə̀ ya ywìrì bàd gha, ze bɔ̀ŋ gha mə ŋwaʼra inug ndəŋ ni nəri ìtən fìŋ. Mbə̀ che imbìghè taŋ nyìmi inug imbə̀ʼ ibḛfiŋ we ne Ŋwiye nàʼi abə ìmbi bəd ane ighə̀m imɔʼ.

⁴ Mə ya ghàmà anìŋ imbə̀ʼ icheg ne bəd mɔ̀ʼɔ ne chəyi mbe ghùmnə Ŋwiye fə nyaʼ nyi se abɔ̀ʼ inən. Mbɔb fə niŋ anug imbə̀ʼ ìchɔ̀mì we ne ìwa Ŋwiye we ghìyə̀ bə̀ŋì ane apan ni ghì ifanì inug. Mbɔb mbe bə̀ to̰ awɔb Yeso Kristo ne ya məyi məd yaʼi ìwa Mbaʼ àfàʼì bə̀ yaʼ ìwa Anɔŋisəg. Àŋwàʼrì Ŋwiye ya fə ghùm ghà icheg ne Ŋwiye biri chə awɔb.

⁵ Ka mbə̰ ya fə kyeri awən inug mbo̰ ijìm, mə̀ ya anìŋ ywìrè wènde inən. Mbə̀ wendi gha, Anɔŋisəg ya pumni mə̀Izre ikye abo abə mə̀Ijìb, bə̀ ywìrì kiri nimni mə̀Izre mbe ne chəyi mbi ya zi ibḛfiŋ igun məd.

⁶ Mbə̀ bə wèndi mbè angirə̀ mbe ne chəyi mbi ya nyimi ìmbɔb iti ìfàʼì mbe ne Ŋwiye ya nàʼi inɔb. Mbɔb ya sàŋì ìmbɔb iti ìfàʼì. Ane, Ŋwiye ya fə kɔd awɔb nɔ̀ŋì inga isəg afub ane ighə̀m imɔʼ gha mbe chughi ghɔ̀m Aneg kyen ze ne Ŋwiye biri saʼ awɔb.

⁷ Mbə̀ bə̀ wendi Sodòm tì Gòmorà fɔrɔ isiŋi mbe ne ya yaʼi iban inɔb, ne yaya ghìyə̀ ifanì inug fɔrɔ izunì inug. Ŋwiye ya zì awɔb inga atəŋ iywid ighə̀m imɔʼ ane aneni ni chwi gha wə̀d ijìm pati ìwi nyɔd.

⁸ À ya bə̀ ane ne bəd mbo̰ ne chwìte inug ako mbe tə̀mə igun ìmbɔb inatì njə̀m se nìŋə ìtɔb nyàmnyɔd ghìyə̀ inug tibɔ̀ŋ angu. Chəyi mbɔb mbe zùgrə anug ne Ŋwiye we ghà. Mbɔb ya ghàmà inug tibɔ̀ŋ igun mbè angirə̀ ne yaʼi ikaŋ àbɔ̀ŋɔ.

⁹ Ka bèyi Mayikə̀ ne yaʼi atog igun mbè angirə̀, anyumə̀ ne wì yaya tàŋà inug tì Debrə̀ imbə̀ʼ awu Muse, chəyi Mayikə̀ ya bi kə̀b ni zì isaʼi igun məd ni chìkì ikum məd ka. Wì ya ghà yaʼ gha, “Anɔŋisəg kyḛ awe!”

¹⁰ Àsi bəd mbo̰, mbi ya ghàmà chàtà inug mbe ne chəyi mbi kyeri. Mbi ya ghìyə̀ inug icheg nyam mben, bə̀ fàʼà inug icheg ne ìtɔb fìŋ te chwìye gha mbe faʼa. Inug mbe ne mbɔb mbe ghìyə̀, à ya mbiwən mbe chìkə̀ ìwɔb.

¹¹ Ngəʼ kyen biri nyi igun inɔb! À ya ane imbə̀ʼ icheg ne mbɔb mbe ghìyə̀ inug icheg Ken ne ya zweti ìwi ifi. Mbɔb ya bə̀ ghìyə̀ inug icheg Balàm ne yaya ghìyə̀ tiku inug ijìm ni bèrì ikab. Mbɔb ya ghìyə̀ tìzughə̀ abə Ŋwiye icheg Korà. Ane, mbɔb biri ku nim icheg Korà.

¹² Anyumə̀ ne tiku bəd ìto̰ chughi aseg ane iteri àkɔ̀ŋì abɔ̀ʼ inən, mbi ya icheg ànaŋ amɔʼ ne chìkə̀ aban. Mbɔb ya tàŋà ighi məyi ni zì inga àzɔb àbàn. Mbɔb ya icheg pàʼ zɔ̀bi ne afim ze chè bèʼì ne chəyi mbə̀ŋ. Mbɔb ya icheg ized ne chəyi mbe ko titam, ka bèyi abɔ̀ʼ ichi. Mbɔb ya icheg ized ne mbi fə chɔ̀ʼi kwàʼ ane ighaŋ, mbi ku.

¹³ Mbɔb ya icheg àwàwà ka ka. Ìmbɔb inug tibɔ̀ŋ ya kɔ̀ʼɔ icheg ifo zìyè tìnìrètog igun inɔb. Mbɔb ya icheg titəm iməg te ne bàrà chè che. Si ya gha, Ŋwiye fə ghɔmbi asiŋi nɔ̀ŋì inɔb inga isəg afub ne fḭ̀yḛ̀ nyìm. Mbi biri yaʼ inga ane ighə̀m imɔʼ

¹⁴ Enɔ̀g ne mbi ya gwi aməd inga ikəri bəd ne pè ane ìsàmbe nɔ̀ʼ ane Adàm, ya ghà ikən Ŋwiye imbə̀ʼ bəd mbo̰ gha, “Nḛ! Anɔŋisəg biri yeʼe tì mbè angirə̀ ìzḛzḛ məd chuʼ tì chuʼ

¹⁵ ne biri saʼ bəd igun isəg, zì ngəʼ igun inɔb imbə̀ʼ ìmbɔb inug tibɔ̀ŋ. Wì biri saʼ awɔb imbə̀ʼ tìngam tibɔ̀ŋ tijìm te ne mbɔb mbe ghàmà imbə̀ʼ Ŋwiye.”

¹⁶ Bəd mbo̰ ya kùmə̀ inug ijìm. Chəyi anug mɔ̀ʼɔ ne kwèʼe bɔ̀ŋɔ̀ inɔb. Mbɔb ya ghìyə̀ inug ne ìtɔb nyàmnyɔd te ghə̀ʼrə̀. Mbɔb ya kɔ̀mɔ̀ igo. Mbɔb ya chɔ̀tɔ̀ wə̀d məyi ni niŋ aghi mɔ̀ʼɔ ibo.

Anug ni nyimi fìŋ

¹⁷ Ane, ìmbum mə̀sə̀ʼ ne mə̀ taŋ kɔ̀ŋ, mbə̀ wendi anug ne bədtɔm ìmbi ìwa Anɔŋisəg Yeso Kristo ya gha.

¹⁸ Mbi ya ghà inən gha, “Inga ineg mbe ne se ghò ane ìnwḭ, bəd ne biri ya chə̀ʼə awən biri yeʼe. Mbɔb biri ya ghìyə̀ yaʼ tiku inug te ne ìtɔb nyàmnyɔd te ghə̀ʼrə̀, ne chəyi te ghùmnə Ŋwiye.”

¹⁹ Bəd mbo̰ ya bəd ne zìyè àghàpì inga inən. Mbi ya ghìyə̀ yaʼ inug mbe ne ìtɔb nyàmnyɔd te ghə̀ʼrə̀. Chəyi Azwighi Ŋwiye yaʼi inga inɔb.

²⁰ Àsi awən, ìmbum mə̀sə̀ʼ ne mə̀ taŋ kɔ̀ŋ, mbə̀ che imbìghè ni ghì inug ne biri ghì mbə̰ kweg inga ìwən ibḛfiŋ we ne zḛ mànì. Mbə̰ ya chàʼrà Ŋwiye icheg ne Azwighi ze nàʼà ika inən.

²¹ Mbə̀ ya chùghə kyère gha Ŋwiye kɔ̀ŋ awən icheg ne mbə̰ mbe ghɔ̀mɔ̀ ìwa Anɔŋisəg Yeso Kristo. Anɔŋisəg biri bèrì àsɔ̀mnəfiŋ igun inən bə̀ ghì gha mbə̀ jəg ìtḛ̀ ighə̀m imɔʼ.

²² Mbə̀ bere àsɔ̀mnəfiŋ igun bəd mbe ne kɔ̀ŋɔ̀ ni jə̀m inug.

²³ Mbə̀ chiye bəd mɔ̀ʼɔ abɔ̀ʼ inɔb inga iywid, ghì mbe pum. Mbə̀ ya bèrè àsɔ̀mnəfiŋ igun wə̀d imɔʼ imɔʼ. Si ya gha, mbə̀ ya we awən imbə̀ʼ inug tibɔ̀ŋ mbe ne mbɔb mbe ghìyə̀ nɔ̀ʼ chè zɔʼ awən. Mbə̀ ba̰ ka bèyi ìtɔb ndwi imbə̀ʼ icheg ne ìmbɔb inug tibɔ̀ŋ fə zɔʼ ndwi te.

Ichaʼri Ŋwiye

²⁴ Tè ghùmnə Ŋwiye we ne tì wì nɔ̀ŋì awən gha imbə̀ʼ mbə̰ nɔ̀ʼ gùg anug. Məd we tì wì ghi mbə zen mànì ibo imbìghè bə̀ ghì gha mbə̀ se gyènde.

²⁵ Tè ghumni aməd we imɔʼ ne yaʼi Ŋwiye, ne bə̀ yaʼi wə̀d ne pùmnə awa anjìm ìwa Anɔŋisəg Yeso Kristo. Ighumni tì anug ìfɔ̀n kyen tì ika fɔrɔ anug ni tùmbi ighi ijìm ya ibo ikye abo. Ighi mbo̰ ijìm ya yi ìmbi məd nɔ̀ʼ ane nyùmə̀ isəg we ne fə che, fɔrɔ amad anìŋ, fɔrɔ ane ighə̀m imɔʼ. À ya ane.