Jn 5 - Ikan feg

Yeso ghù wə̀d ne ighog ya sweʼe

¹ Ane nyùmə̀ mɔ̀ʼɔ ya che, Yeso ya kɔʼ ghò a Jèrusalèm ane iteri mɔ̀ʼɔ ne ya iteri mə̀Ju.

² Atəŋ mɔ̀ʼɔ ya yaʼ iban inuʼ ikam we a Jèrusalèm ne mbi yaya kàrà ane Inuʼ Ikam Njə̀g. Mbi yaya kàrà atəŋ ze inga ìngam Hibrù gha Bèsedà. Mbi məkə̀tə̀ məta̰ ya chè kad atəŋ ze.

³ Inɔ̰ bəd ne beri ighɔn yaya nɔ̀kɔ̀ inga mbi məkə̀tə̀ mbe. Bəd aghɔn mbe ya yaʼ məfəg tì bəd ne ighog sweʼe fɔrɔ bəd ne aba nyɔd ku. Mbi ya yaʼ angu ghɔ̀mɔ̀ nyùmə̀ ane atəŋ ze biri ghùd. [

⁴ Angirə̀ Ŋwiye yaya yèʼe ni chìʼrì atəŋ ze. Anyumə̀ ne igyi we chìʼrè, wə̀d aghɔn mbègtog ne biri nyi inga atəŋ, kə̀ àkə iku aghɔn weg, aghɔn məd ya mèghè.]

⁵ Wə̀d mɔ̀ʼɔ ya yaʼ angu ne ya fə ghɔ̰ ane tituʼ ìghum itad chɔ̀b ìfàmi.

⁶ Yeso ya bàd aməd angu inɔ̀ki. Wì ya bàd ane kyeri gha wə̀d gho̰ fə ghɔ̀n agha sà, bə̀ chùghi tàndì igun asiŋi ze. Wì ya si bìri ibo gha, “Àghò kə̀b gha àze aghɔn meghe?”

⁷ Wə̀d aghɔn we ya ywìtì ibo gha, “Masà, anyumə̀ ne angirə̀ chìʼri atəŋ, mə mə̀ nɔ̀ʼ ŋa ghò nyi, wə̀d ndəŋ fə bè nyi.”

⁸ Yeso ya ghà ibo gha, “Nɔ̀ʼɔ təm, kad àze tìsa, ko yèn.”

⁹ Kwàʼ ati, wə̀d we ya bɔti, nɔ̀ʼ kad àzi tìsa ko yèn. Anug azo̰ ya dù igun aneg àzwètì mə̀Ju.

¹⁰ Ane, itog bəd inga aben mə̀Ju ya ghà abə wə̀d we gha, “Tèchɔ̀ŋ ya aneg àzwètì, chəyi ìmba mə̀nɔ̀ʼɔ̀ bḛ gha àghò beʼe àze tìsa.”

¹¹ Wì ya ywìtì gha, “Wə̀d we ne ghu amə kə̀ ghà inum gha, mə̀ nɔ̀ʼɔ təm kad àmə tìsa ko yèn.”

¹² Mbi ya biri ibo gha, “Wə̀d we ne ghà ine gha àghò kad àze tìsa ko yèn, àkə we?”

¹³ Chəyi wə̀d we ne Yeso ya ghu aməd ya kyeri wə̀d ne Yeso yaʼi ìwiwən imbə̀ʼ icheg ne Yeso ya fə chè nyi yi inga inɔ̰ bəd we ne ya yaʼi angu.

¹⁴ Nyùmə̀ mɔ̀ʼɔ ya chè, Yeso ghò inga mbàn Ŋwiye pè bàd aməd, ghà ibo gha, “Nḛ̀! Icheg ne àghò fə bɔti, fə sàŋa inug tibɔ̀ŋ, nji aghi ne biri ghì awe biri bə chè.”

¹⁵ Kwàʼ ati, wə̀d we ya nɔ̀ʼ ghò ghà abə atog wə̀d abə mə̀Ju gha, “Wə̀d we ne ghu amə ya Yeso.”

¹⁶ Itog bəd abə mə̀Ju ya ko se chɔ̀ʼɔ ibɔʼì ighog ìmbi Yeso imbə̀ʼ icheg ne wì ya ghù wə̀d igun aneg àzwètì mə̀Ju.

¹⁷ Si ya gha, Yeso ya ghà inɔb gha, “Ìmə mbaʼ ya fàʼà mà nyumə̀ ijìm. Mo inum ya bə̀ fàʼà ane.”

¹⁸ Anyumə̀ ne wì ya ghàmi ane, itog bəd abə mə̀Ju ya se sa̰ iwu ni zweti aməd. Mbi yaya kə̀bə̀ ni zweti aməd kayi məyi imbə̀ʼ icheg ne wì ya gùg mə̀nɔ̀ʼɔ̀ mbe ane aneg àzwètì, à ya imbə̀ʼ icheg ne wì ya gha Ŋwiye ya ìwi Mbaʼ, ane, mə̀grì ìwi nyɔd ane Ŋwiye.

¹⁹ Yeso ya ywìtì inɔb gha, “Mə gha tesiʼ inən gha, chəyi tì Ŋwan Ŋwiye fàʼ aghi mɔ̀ʼɔ ane ìwi ighəm, wì ya fàʼà məyi aghi ne Mbaʼ məd we fàʼà. Aghi ne Mbaʼ we fàʼà, à ya àzewən ne Ŋwan məd we bə̀ fàʼà.

²⁰ Ane, ìmə Mbaʼ kɔ̀ŋ ìwi Ŋwan, chwi ighi ijìm ibo. Wì biri ywiri ghì Ŋwan məd fàʼ iyeti inug ne faŋi chè mbo̰. Ane, anug biri chè awən.

²¹ Icheg ne Mbaʼ we zwèmne bəd nàʼà ìtḛ̀ inɔb, à ya icheg ne Ŋwan we bə̀ nàʼà ìtḛ̀ abə bəd mbe ne məd kɔ̀ŋi.

²² Chəyi Mbaʼ we sàʼa bəd mɔ̀ʼɔ ka imbə̀ʼ icheg ne wì fə nàʼ ika abə Ŋwan gha wì se sàʼa bəd məjìm.

²³ Àzo̰ ya ni ghì gha, wə̀d ijìm nàʼ ighumni abə Ŋwan icheg ne mbe bə̀ nàʼà ighumni abə Mbaʼ. Wə̀d ne chəyi we ghùmnə Ŋwan, ane ya gha chəyi tengàŋ bə ghùmni Mbaʼ we ne cha aməd.

²⁴ Mə gha tesiʼ inən gha, bəd ne zughi ìmə ìngam bə̀ zì ìwɔb ibḛfiŋ igun wə̀d we ne cha amə, mbi biri jəg ìtḛ̀ ighə̀m imɔʼ. Chəyi mbi biri ywiri saʼ awɔb imbə̀ʼ icheg ne mbɔb fə pum abə iwu, si jəg ìtḛ̀.

²⁵ Mə ya ghà tesiʼ inən gha, nyùmə̀ we yèʼe. Nyùmə̀ we fə pè ne bəd ne fə ku biri zug gì Ŋwan Ŋwiye. Ane, bəd ne zughi biri jəg ìtḛ̀.

²⁶ Icheg we ne à ya Mbaʼ we ghìyə̀ gha bəd jəg ìtḛ̀ ighə̀m imɔʼ, wè bə̀ nàʼ ika abə Ŋwan məd ni gha wì bə se ghìyə̀ gha bəd jəg ìtḛ̀ ighə̀m imɔʼ.

²⁷ Ane, məd fə bə̀ nàʼ ika abə Ŋwan məd gha wì saʼ bəd imbə̀ʼ icheg ne məd ya Ŋwan Wə̀d.

²⁸ Imbə̀ʼ anug azo̰ chè yi awən imbə̀ʼ icheg ne nyùmə̀ we yèʼe ne bəd mbe ne ya fə ku, ne yaʼi inga iseg, biri zug gì məd.

²⁹ Anyumə̀ ne mbi zughi gì məd, mbi biri dù inga ìmbɔb itog iseg. Bəd ne yaya ghìyə̀ inug chɔm biri zweme, jəg ìtḛ̀. Àsi bəd ne yaya ghìyə̀ inug tibɔ̀ŋ biri zweme, Ŋwiye sɔb isaʼi zì ngəʼ igun inɔb.

³⁰ Chəyi tì mə ghì aghi mɔ̀ʼɔ ane ìmə ika. Mə ya sàʼa bəd məyi icheg ne Ŋwiye gha inum. Mə ya sɔ̀bɔ isaʼi ane icheg ne koʼi imbə̀ʼ icheg ne chəyi mə ghìyə̀ anug ne mə̀ kɔndi. Mə ya ghìyə̀ yaʼ anug ne wə̀d ne cha amə kə̀bi.

³¹ Mə mə̀ ghàm ane ìmə ighəm, chəyi wə̀d ne biri bḛ gha anug ne mə ghà ya tesiʼ.

³² Si ya gha, wə̀d mɔ̀ʼɔ we angu ne tì wì ghàm ane ìmə ighəm. Mə kyèri gha anug ne we ghà imbə̀ʼ amə ya tesiʼ.

³³ Imbə̀ʼ à ya mbə̰ ya tɔmi bəd abə Jɔn we ne yaya nàʼà mənib? Anug ze ne wì ya gha imbə̀ʼ amə, à ya tesiʼ.

³⁴ Kayi gha à ya wə̀d mənyìʼ tòʼri wə̀d ne mə̀ yaʼi ìwiwən. Mə ya ghà anug ne Jɔn we ne yaya nàʼà mənib ya gha, məyi ni ghì gha mbə̀ pum.

³⁵ Jɔn ya yaʼ icheg anam ne yaya bère ghìyə̀ isiŋi zḛ. Mbə̰ yaya gyènde ane iki nyumə̀ mɔ̀ʼɔ icheg ne mbə̀ yaya yḛ̀ inga ìzḛzḛ we.

³⁶ Si ya gha, mə bèrì anug ne chwìye gha wə̀d ne mə̀ yaʼi ìwiwən ze chè anug ze ne Jɔn ya gha. Àfàʼì ze ne ìmə Mbaʼ zì inga ìmə ikye abo gha mə fàʼà, a ze ghàmà imbə̀ʼ amə. Àfàʼì azo̰ ajìm ze chwìye gha à ya ìmə Mbaʼ cha amə.

³⁷ Ìmə Mbaʼ we ne ya cha amə, Wì fə ghàm tesiʼ imbə̀ʼ amə. Chəyi mbə kweʼì zug gì məd kə kweʼì bàd icheg ne məd yaʼi.

³⁸ Chəyi mbə̰ mbe bə̀ nɔ̀ŋɔ̀ anug məd inən inga fìŋ imbə̀ʼ icheg ne chəyi mbə̀ nɔŋi ibḛfiŋ igun wə̀d we ne məd cha.

³⁹ Mbə̰ ya jiʼè zìyè atog ni mə̀nì Ìngam Ŋwiye inga Àŋwàʼrì məd nè kɔ̀ndɔ gha mbə biri jəg ìtḛ̀ ighə̀m imɔʼ. Mbə̀ kyèri gha, Ìngam Ŋwiye we ne mbə̀ zi atog ni mə̀nì, wi ya ghàmà imbə̀ʼ amə.

⁴⁰ Si ya gha, chəyi mbə̰ mbe kə̀bə̀ ni nɔŋi ìwən ibḛfiŋ igun inum imbə̀ʼ jəg ìtḛ̀.

⁴¹ Chəyi mə̀ kə̀bə̀ gha bəd ghumni amə

⁴² imbə̀ʼ icheg ne mə kyèri iku bəd ne mbə̀ yaʼi mbiwən. Chəyi mbə̰ mbe kɔ̀ŋɔ̀ Ŋwiye kwàʼ inən inga fìŋ.

⁴³ Mə yèʼe anìŋ ni ghà inən gha à ya ìmə Mbaʼ cha amə, si ya gha chəyi mbə̰ mbe bḛ amə. Wə̀d mɔ̀ʼɔ ndəŋ mə̀ yèʼe pè ghà yaʼ ìmbi tì inug, mbə biri bḛ aməd.

⁴⁴ Mbə̰ ya kɔ̀ŋɔ̀ ni ghì inug ni ghumni awən mbə̰ mbə̰. Chəyi mbə̰ mbe ghìyə̀ inug ne məyi Ŋwiye məd we imɔʼ biri ghumni awən. Ane, mbə̀ kə si chè iye ni nɔ̀ŋì ibḛfiŋ igun inum?

⁴⁵ Imbə̀ʼ mbə̰ si kɔndi awən gha mə biri puti awən abə ìmə Mbaʼ. Wə̀d ne biri puti awən ya Muse we ne mbə̀ fə nɔŋi ìtən fìŋ igun məd.

⁴⁶ Àkə ni gha mbə̰ bḛ anug ne Muse ya ŋwàʼri kwàʼ tesiʼ tesiʼ, nji mbə bə̀ nɔ̀ŋì ìwən ibḛfiŋ igun inum imbə̀ʼ icheg ne Muse ya ŋwàʼrì imbə̀ʼ amə.

⁴⁷ Icheg ne chəyi mbə̀ bi bḛ anug ne məd ya ŋwàʼri, mbə̀ kə si bə̀ bḛ anug ne mə ghà inən iye?”