Jn 18 - Ikan feg

Mbe gwiye Yeso

¹ Anyumə̀ ne Yeso ya fə màni ni chàʼra Ŋwiye, məd tì mə̀mə̀nənùg məd ya nɔ̀ʼ chè inga ikye mben we ne mbe kàrà ane Kidròn ghò injḭ iywin. Mben mə̀Olìf mɔ̀ʼɔ ya yaʼ asiŋi ze. Ane, mbi ya nyi ghò inga mben ze.

² Judàs we ne ya fḛ Yeso ya kyeri asiŋi ze imbə̀ʼ icheg ne à ya asiŋi ne Yeso yaya nḛ ni ghò angu tì ìmbi mə̀mə̀nənùg.

³ Mə̀Farìsi tì itog bəd mbàn Ŋwiye ya chà inɔ̰ mə̀sogyì fɔrɔ itog bəd mə̀Ju mɔ̀ʼɔ. Ane, Judàs ya niŋ awɔb mbi ghò ane asiŋi ze. Mbi ya ghò tì ighi ibid, fɔrɔ inam tì ikaʼi.

⁴ Yeso ya kyeri inug ijìm ne mbi biri ghì ibo. Ane, wì ya du ghò bìri inɔb gha, “Mbə̀ kə kə̀bə̀ we?”

⁵ Mbi ya ywìtì gha, “Tì ya kə̀bə̀ Yeso we a Nazarèd.” Wì ya ywìtì inɔb gha, “À ya mo gho̰.” Judàs we ne ya fḛ Yeso ya bə̀ yaʼ angu itəmi tì inɔb.

⁶ Anyumə̀ ne Yeso ya gha, “À ya mo gho̰”, mbi ya sùngì tè njìmè njìmè, gùg aseg mbɔb məjìm.

⁷ Wì ya ywìrì bìri inɔb gha, “Mbə̀ gha mbə̰ ya kə̀bə̀ we?” Mbi ya ywìrì ywìtì gha, “Tì ya kə̀bə̀ Yeso we a Nazarèd.”

⁸ Yeso ya ywìrì ghà inɔb gha, “Mə fə ghà inən gha, à ya mo gho̰. Mbə̰ mə̀ ya kə̀bə̀ amə, mbə̀ saŋa ìmbum mə̀mə̀nənùg mbo̰ mbe ghò awɔb.”

⁹ Anug azo̰ ya dù ni ghì gha, ìngam we ne məd ya ghum ghà we duwə ane tesiʼ. Wì ya ghùm gha, “Chəyi wə̀d mɔ̀ʼɔ imɔʼ inga bəd mbe ne àghò ya naʼi inum nìmi.”

¹⁰ Sayimùn Pità ya bèrì ibeg ibid. Ane, wì ya chì ibeg we inga baʼ, nwḭ̀ sɔb aba àtɔ̀ŋi jəghi abə wə̀d àfàʼì abə atog wə̀d igun bəd mbàn Ŋwiye. Ikum wə̀d àfàʼì we ya Makùs.

¹¹ Yeso ya kyen Pità gha, “Àghò zìye ìwe ibeg inga mbaʼ. Àghò kə kɔ̀ndɔ gha chəyi mə̀ biri zə̰ ngəʼ ze ne ìmə Mbaʼ fə gha gha mə biri zə̰?”

Mbe niŋ Yeso ghò imbìghè abə Anàs

¹² Mə̀sogyì mbe tì ìwɔb wə̀d kyen, fɔrɔ itog bəd mə̀Ju ya gwiye Yeso, kɔd.

¹³ Mbi ya bì niŋ aməd ghò abə Anàs. Anàs ya yaʼ ichi ìwi Kayifàs we ne ya yaʼ atog wə̀d igun bəd mbàn Ŋwiye inga fituʼ fe.

¹⁴ À ya Kayifàs ya ghum nàʼ ikə abə mə̀Ju gha, ze biri bɔ̀ŋ gha wə̀d imɔʼ ku atog abə bəd məjìm.

Pità tò̰ yi Yeso

¹⁵ Sayimùn Pità tì àmə̀nənùg ndəŋ ya beni abɔ̀ʼ Yeso. Àmə̀nənùg we ya beni abɔ̀ʼ Yeso, nyi ghò inga ikam abə atog wə̀d igun bəd mbàn Ŋwiye. Wì ya nyi ghò imbə̀ʼ icheg ne atog wə̀d igun bəd mbàn Ŋwiye we ya kyeri aməd.

¹⁶ Si ya gha, Pità ya pè təm yaʼ inuʼ ikam we, anjìm isəg. Àmə̀nənùg we ne atog wə̀d igun bəd mbàn Ŋwiye ya kyeri aməd ya ywìrì dù ghò isəg, ghàm abə ŋwan àyi we ne yaya chə̀ʼə̀ inuʼ ikam, si niŋ Pità nyi tì məd.

¹⁷ Ŋwan àyi we ne yaya chə̀ʼə̀ inuʼ ikam ya biri abə Pità gha “Àghò kə bə̀ àmə̀nənùg mɔ̀ʼɔ inga mbe mə̀mə̀nənùg ìmbi wə̀d gho̰.” Wì ya ywìtì yaʼ gha, “Indèʼ, mo kayi àmə̀nənùg məd ka.”

¹⁸ Bəd àfàʼì tì mə̀sogyì ne yaya chə̀ʼə̀ isiŋi ya tangi iywid, tə̀mbi iban se zɔ awɔb imbə̀ʼ icheg ne ifə yaya ko. Ane, Pità ya bə̀ təm iban iywid we bə̀ se zɔ yi.

Anàs biri inug abə Yeso.

¹⁹ Atog wə̀d igun bəd mbàn Ŋwiye ya biri inug abə Yeso imbə̀ʼ mə̀mə̀nənùg məd fɔrɔ imbə̀ʼ inug ne wì yaya chwìte.

²⁰ Yeso ya ywìtì ibo gha, “Mə yaya ghàmà asaŋ asaŋ, wə̀d ijìm zug. Mə yaya chwìte inug mà nyumə̀ ijìm inga məchamì Ŋwiye, kə̀ inga mbàn Ŋwiye asiŋi ne mə̀Ju məjìm yaya kà fète. Chəyi anug mɔ̀ʼɔ amɔʼ ne mə̀ ya chwiti inə̀mbi.

²¹ Aton ne àghò we bìre inug mbo̰ inum àkə imbə̀ʼ aghə? Àghò biri abə bəd mbe ne ya zughi imbə̀ʼ icheg ne mbɔb kyèri anug ne mə̀ yaya ghà.”

²² Anyumə̀ ne Yeso ya ghàmi anìŋ, wə̀d mɔ̀ʼɔ ne yaya chə̀ʼə̀ mbàn Ŋwiye ya yaʼ iban itəmi. Wì ya kɔ̀m Yeso igun ife. Wì ya kɔ̀m aməd ane, si bìri ibo gha, “Aŋa kə ikuchèg ne àghò biri ywìtì anug abə atog wə̀d igun bəd mbàn Ŋwiye?”

²³ Yeso ya ywìtì gha, “Mo mə̀ ghà anug mɔ̀ʼɔ ne bə, àghò ghà àzewən abə bəd məjìm. À yaʼ aghi ne, mə gha yaʼ anug tesiʼ, aton ne àghò kɔ̀mi mə àkə gha?”

²⁴ Anàs ya ghì mbi kɔd aməd niŋ ghò abə Kayifàs ne ya yaʼi atog wə̀d igun bəd mbàn Ŋwiye.

Pità ywìrì to̰ yi Yeso

²⁵ Sayimùn Pità ya kiri biri itəmi iban iywid we, zɔ yi. Wə̀d ndəŋ ya biri ibo gha, “Àghò ine kə bə̀ àmə̀nənùg mɔ̀ʼɔ inga mə̀mə̀nənùg ìmbi wə̀d iywin?” Wì ya ywìrì to̰ yi gha, “Indèʼ, mo kayi àmə̀nənùg məd ka.”

²⁶ Wə̀d àfàʼì mɔ̀ʼɔ abə atog wə̀d igun bəd mbàn Ŋwiye ne ya inəbi abə wə̀d we ne Pità ya sɔbi àtɔ̀ŋi məd ya ywìrì bìri abə Pità gha, “Imbə̀ʼ mə kə̀ bàd awe tì məd inga mben mə̀Olìf?”

²⁷ Pità ya ywìrì to̰ yi . Kwàʼ anyumə̀ we, ajɔŋ ngɔb tɔŋ.

Mbe niŋ Yeso ghò imbìghè abə Payilèd

²⁸ Isusu izimi izimi, mə̀Ju ya niŋ Yeso abə Kayifàs ghò tì məd inga ìtɔʼ Payilèd ne yaʼi gɔbnà. Chəyi itog bəd mə̀Ju ya nyi inga ìtɔʼ ze imbə̀ʼ icheg ne mbi yaya kə̀bə̀ ni ya zḛ icheg ne mə̀nɔ̀ʼɔ̀ chwi imbə̀ʼ jəg Iteri Chègun.

²⁹ Payilèd ya dù yèʼe bìri inɔb gha, “Isaʼi ne mbə̀ zi igun atog abə wə̀d gho̰ àkə gha?”

³⁰ Mbi ya ywìtì gha “Àkə aghi ne chəyi wì kə̀ gùghi anug, nji chəyi tì niŋ aməd yèʼe nàʼ ine.”

³¹ Payilèd ya ywìtì inɔb gha, “Àmə yaʼ ane, mbə̀ niŋ aməd ghò saʼ mbə̰ mbə̰ icheg ne ìmbən mə̀nɔ̀ʼɔ̀ chwi.” Mə̀Ju ya ywìtì gha, “Chəyi gomèn məRom nàʼ ika ina ni niŋ isɔbi anug gha mbe zweti wə̀d.”

³² Anug azo̰ ya dù anìŋ imbə̀ʼ ìngam we ne Yeso ya ghàmi, mə̀tì iku iwu ne wì biri ku, wi duwə ane tesiʼ.

³³ Payilèd ya bə̀ndi nyi ghò inga ìtɔʼ si ghì mbi niŋ Yeso yèʼe, wì bìri ibo gha, “Àghò kə ifɔn mə̀Ju?”

³⁴ Yeso ya ywìtì ibo gha. “Ibiri gho̰ kə kwàʼ ìwe ikɔndi kə̀ wə̀d mɔ̀ʼɔ wa ghà inug ine imbə̀ʼ amə?”

³⁵ Payilèd ya ywìtì ibo gha, “Mo wa kə Ju? Imbə̀ʼ à ya ìmbe bəd fɔrɔ itog bəd mbàn Ŋwiye cha awe inum? Anug ne àghò gùghi, àkə aghə?”

³⁶ Yeso ya ywìtì gha, “Chəyi àmə anug ìfɔ̀n yaʼi igun isəg aŋa. Àkə kə̀ ane, nji ìmbum bəd àfàʼì biri zɔ̀ŋ ni gha imbə̀ʼ mə̀Ju gwiye awɔb awum. Si ya gha, chəyi àmə anug ìfɔ̀n yaʼi igun isəg gho̰.”

³⁷ Payilèd ya si bìri ibo gha, “Àghò kə anìŋ yaʼ ifɔn?” Yeso ya ywìtì gha, “Àghò ya anìŋ ghà kwàʼ tesiʼ gha mo ya ifɔn. À ya kwàʼ tesiʼ gha, aŋa ya aton ze ne mbi ya gwi amə igun isəg aŋa, gha mə yeʼe ghà tesiʼ. Wə̀d ijìm ne kɔ̀ŋi tesiʼ ya zùghə anug ne mə̀ ghà.”

³⁸ Payilèd ya biri gha, “Tesiʼ kə aghə?” Wì ya biri ane, ywìrì dù ghò ghà abə mə̀Ju gha, “Chəyi mə̀ bari anug tibɔ̀ŋ mɔ̀ʼɔ ne wə̀d gho̰ gùghi.

³⁹ Si ya gha, à ya ìwən nɔ̀ʼɔ̀ aben ni gha, mə̀ chiye wə̀d inug tibɔ̀ŋ ifibì inga nəb ndəŋ sàŋì anyumə̀ ne mbə̰ ghò jəg ìwən Iteri Chègun. Mbə kɔ̀ŋ gha mə chiye ‹Ifɔn mə̀Ju› sàŋì?”

⁴⁰ Mbi ya kyen ane gì ka ka gha, “Indèʼ, kayi məd! nàʼa yaʼ Bàrabas ina!” Bàrabas ya wə̀d ne ya ghum to itog abə bəd, ghì mbi se kà atog abə aben.